Ndisop Idem ye Mme Ama Ubọhọ-ufụn Oro Abasi Ọnọde
MME NTIENSE JEHOVAH ẹdi n̄wọrọnda ke ata ediwak usụn̄. Mmọ ikpọn̄ esem “edisana usem.” (Zephaniah 3:9, NW) Mmọ ikpọn̄ ẹdiana kiet, ẹnyene n̄wọrọnda edu ima emi Jesus Christ eketịn̄de. (John 13:35) Ndien edi mmọ ikpọn̄ ẹdara ubọhọ-ufụn oro Jesus Christ ọkọdọhọde ke akpanikọ eyeda edi, nte ẹwetde ke John 8:32 ẹte: “Mbufo ẹyefiọk akpanikọ, akpanikọ eyenyụn̄ anam mbufo ẹwọrọ ufụn.”
Mme ikọ oro Jesus Christ, kpa Eyen Abasi, eketịn̄de ọnọ mme mbet esie, ẹdi akpanikọ. Ndien kpukpru Mme Ntiense Jehovah oro ẹkedụkde Mme Mbono District “Mme Ama Ubọhọ-Ufụn” ẹdiọn̄ọ emi idahaemi ẹkan nte akanam edide. Ndutịm mbono oro ama anam nsio nsio ikpehe ubọhọ-ufụn mmọ an̄wan̄a mmọ, nte mmọ ẹdidade enye ẹnam n̄kpọ, mbiomo oro asan̄ade ye ubọhọ-ufụn mmọ, ye nte ẹdidi mbon oro ẹbọhọde ufụn edide edidiọn̄ ọnọ mmọ.
Ekemini ye enyene-ufọn mbono ẹmi ẹketọn̄ọ ke N̄kan̄ Edem Edere Ererimbot ke June 7, 1991, ke Los Angeles, California, U.S.A. Ndutịm ọkọtọn̄ọ ke n̄kanika 10:20 usenubọk ye ikwọ ukwak, adianade ye ikwọ ye akam. Utịn̄ikọ ediberede ekedi ọkpọsọn̄ utịn̄ikọ oro ọkọn̄ọde ke James 1:25. Nte ekemde ye The Jerusalem Bible, ufan̄ikọ emi okot ete: “Owo emi otịmde owụk enyịn ese mfọnmma ibet ubọhọ-ufụn onyụn̄ anamde oro edi edu esie—idịghe ndikpakpan̄ utọn̄ ndien ekem efre, edi esịnde enye ke edinam ifịk ifịk—eyekop inemesịt ke kpukpru se enye anamde.” Kpa nte nnyịn isede idem ke ukụtiso man ikụt ebiet oro oyomde inam edinen̄ede ke nte itiede, ntre oyom nnyịn ikọbọ ke ndiwụk enyịn ke mfọnmma ibet Abasi oro enyenede ubọhọ-ufụn man ikpep iban̄a ebiet oro oyomde inam mme ukpụhọde ke edu nnyịn. Ndien nnyịn ikpenyene ndikọbọ ke ndiwụk enyịn nse ukụtiso oro.
Ekem utịn̄ikọ etieibuot okpokoro ama edisịm, “Emedio-o, Kpukpru Mbufo Mme Ama Ubọhọ-ufụn.” Mme Ntiense Jehovah ẹma ubọhọ-ufụn, ndien mmọ ẹyom ndidu ke ifụre. Etịn̄ikọ ama okot oto mme anamutom ibet ẹmi ẹkewụtde ẹte ubọhọ-ufụn ndomokiet ikemeke ndidu ke ibet mîdụhe. Ih, mme Christian inyeneke ifụre ndinam se inemde mmọ esịt edi ẹnyene ifụre ndinam uduak Jehovah. Mmọ ẹyom ndida ubọhọ-ufụn mmọ nnam n̄kpọ ọyọhọ ọyọhọ edi idịghe ndikama enye ke idiọk usụn̄. Akpan akpan ọtọn̄ọde ke 1919, Mme Ntiense Jehovah ẹnyene ubọhọ-ufụn oro atarade. Etịn̄ikọ ama odụn̄ọde nsọn̄uyo oro ẹdoride ke ubọhọ-ufụn ke mme ibuotikọ mbono ye ke mme n̄wed Christian. Kpukpru mme andidụk mbono ẹyekpep ekese ẹban̄a ubọhọ-ufụn oro Abasi ọnọde ye nte ẹkemede ndida enye nnam n̄kpọ.
Ndụn̄ọde oro ẹkenamde ye mme ama ubọhọ-ufụn ẹmi ẹkedarade ndidu do ke mbono oro ẹma ẹtiene ekemini utịn̄ikọ oro. Mme utọ mbono oro ẹsidi ini idatesịt, idem nte usọrọ ita eke isua ke isua ke Israel eset ẹkedide ini akwa idara. Ediwak ndụn̄ọde ẹkenamde ẹma ẹwụt ẹte ke mme mbono ẹkedi ini idatesịt oro ọbọpde-bọp ke n̄kan̄ eke spirit.
Ekem utịn̄ikọ ibuotikọ mbono ama etiene, “Uduak ye Nte Ẹdade Ubọhọ-ufụn Emi Abasi Ọnọde Nnyịn Ẹnam N̄kpọ.” Ebede ke utịn̄ikọ emi mme andidụk mbono ẹma ẹkpep ẹte ke Jehovah ikpọn̄îkpọn̄ enyene ọyọhọ ọyọhọ ifụre sia enye edide Akakan Andikara ye ata ọkpọsọn̄. Ke ufọn enyịn̄ ye mme edibotn̄kpọ esie, nte ededi, enye ke ndusụk ini esisụhọde udomo ifụre esie ke nditre ndisọp iyatesịt ye ke ndiwụt mfara ke idem. Kpukpru enyene-ifiọk edibotn̄kpọ esie ẹnyene ukeuke ifụre, koro mmọ ẹdu ke nsụkibuot ẹnọ Jehovah ẹnyụn̄ ẹdu ke usụhọde idaha ebe ke mme ibet esie oro ẹkụtde ke enyịn ye eke ido uwem. Jehovah ama ọnọ mmọ ifụre kaban̄a inemesịt mmọ edi emi enen̄ede edi ntre man mmọ ẹkeme ndida ukpono ye idatesịt nsọk enye ebe ke ndituak ibuot nnọ enye. Ke ntak edida ubọhọ-ufụn mmọ nnam n̄kpọ ke eti usụn̄, Mme Ntiense Jehovah ẹmenyene eti enyịn̄ ke ofụri ererimbot ke ntak eti eduuwem ye ifiopesịt ke utom ukwọrọikọ mmọ.
Uwemeyo Friday
“Ndisịn Idem—Ke Mme Utom N̄kpa M̀mê ke Utom Jehovah?” ekedi ibuotikọ utịn̄ikọ oro anamde owo ekere n̄kpọ, emi ekebederede ikpehe edinam uwemeyo Friday. Mme utom n̄kpa isịneke mmọ oro ẹdide eke obụkidem ikpọn̄îkpọn̄ edi ẹsịne mbon eken n̄ko ẹmi ẹdide n̄kpakpa ke n̄kan̄ eke spirit, ikpîkpu, ye anana-mfri—utọ nte mme edinam ukọ okụk. Ke afan̄ emi, ndụn̄ọde esịt akpanikọ edi akpan n̄kpọ ndibiere m̀mê nnyịn ke inịm Obio Ubọn̄ Abasi akpa ke uwem.
Se ikenyenede ukem uduak oro ekedi udiana ibuotikọ oro, “Ndiyọhọ Utom Nnyịn Nte Mme Asan̄autom Abasi.” Etịn̄ikọ ama owụt ete ke mme Christian ke idemmọ ikpenyeneke ndikop uyụhọ ke ikpîkpu enyọn̄ enyọn̄ utom m̀mê ndikam nnyene hour oro ẹyomde. Mmọ ẹkpeyom ndikụt unen ke kpukpru ikpehe utom ukwọrọikọ Christian mmọ. Ẹma ẹnam akpan n̄kpọ emi an̄wan̄a ebe ke nnamn̄wụt ye mme ndụn̄ọde. Ẹma ẹsịn udọn̄ ẹnọ kpukpru owo ndiyọhọ utom mmọ ke ọyọhọ ọyọhọ udomo nte ẹkekeme.
Ke utịn̄ikọ oro, “Mbon Oro Ẹbọhọde Ufụn Edi Ẹnam Ibat,” etịn̄ikọ ama ọsọn̄ọ etịn̄ ete ke okposụkedi ikọt Jehovah ẹdade ubọhọ-ufụn oro akpanikọ adade ọsọk mmọ ke akpan n̄kpọ, mmọ ẹkpenyene nditi nte ke enye asan̄a ye mbiomo. Mmọ ikpenyeneke ndida ubọhọ-ufụn mmọ nte isọn̄ ndida nnam idiọkido, edi ndida itoro nsọk Jehovah. Nte mme Christian, mmọ ẹnyene ndinam ibat nnọ “mme enyene-odudu ẹmi ẹkarade” ndien ẹkpenyene n̄ko ndidiana kiet ye mbiowo esop. (Rome 13:1) Akande oro, mmọ n̄ko ẹnyene ndinam ibat ke usịnen̄kpọ, ukamaidem, ye eduuwem mmọ. Mmọ ikpedehede ifre ite ke “kpukpru nnyịn kiet kiet iyebụk mbụk iban̄a [idem nnyịn] inọ Abasi.”—Rome 14:12; 1 Peter 2:16.
Ekem nneme kaban̄a ufọn oro oyomde kpukpru mme Christian “Ẹkûkop Ndịk Nte Utịt Ererimbot Emi Asan̄ade Ekpere” ama etiene. Ke adan̄aemi ubonowo okopde ndịk aban̄a se ini iso ekemede ndida ndi, iyomke mme Christian ẹkop ndịk ke ndinam utom mmọ. Unana edikop ndịk edi utịp otode ediberi edem ke Jehovah, koro adan̄a nte Christian abakde ndinam se iyatde Abasi esịt, ntre ke enye mîdikopke ndịk iban̄a mme edibotn̄kpọ. Nditi mme itien̄wed oro ẹnọde ndọn̄esịt ekeme ndisọn̄ọ owo idem man okûkop ndịk. Man isọn̄ idem ke n̄kan̄ eke spirit ikûnyụn̄ ikop ndịk, oyom mme asan̄autom Abasi n̄ko ẹda kpukpru ifet oro mmọ ẹnyenede ndibuana ye ekemmọ mme andinịm ke akpanikọ ẹnam n̄kpọ nte ọfọnde. Oyom owo kiet kiet n̄ko eti udeme oro akam enyenede ke nditre ndikop ndịk. Ke ndidu ye unana ndịk, mme Christian ẹyemụm eti itie ebuana oro ẹnyenede ye Jehovah Abasi ẹkama.
Ndutịm akpa usen ama osịm utịt ye drama oro ọnọde ata ukpep mi, Ẹsio ke Ufụn Man Ẹmenede Utuakibuot Akpanikọ ke Enyọn̄. Enye okowụt nte ubon eyomfịn ekpepde n̄kpọ oto Ezra ye udịm owo esie ẹmi ẹkedide 7,000, ẹmi ẹkeyakde n̄kpọ atak mmọ man ẹfiak ẹnyọn̄ Jerusalem. Enye ama an̄wam mme andidụk mbono kiet kiet ndidụn̄ọde mme ebeiso n̄kpọ esie nnyụn̄ n̄kụt nte enye ekemede ndikọri mme ifetutom esie. Drama emi ama enyene n̄kpọ ndikpep ikpọ owo ye nditọn̄wọn̄ ukem ukem.
Usenubọk Saturday
Ke ndutịm ikwọ ukwak ama ekebe, ikwọ, akam, ye edineme itien̄wed Bible eke usen oro, edinam usenubọk Saturday ama esịne nneme oro ọdọhọde “Ubọhọ-ufụn ye Mbiomo ke Esịt Ubon.” Ke akpa ikpehe, “Nte Mme Ete Ẹkemede Ndikpebe Jehovah,” ẹma ẹnọ mme ete item ke nsio nsio usụn̄ ẹmi mmọ ẹkemede ndikpebe Ete nnyịn eke heaven. Akpa N̄wed Timothy 5:8 iyomke mmọ ẹnọ n̄kpọ eke obụkidem ikpọn̄îkpọn̄ edi oyom ẹnọ n̄ko n̄kpọ eke spirit. Mmọ ẹkpebe Jehovah ke ndidi nti mme andikpep ubon mmọ n̄kpọ ye ke ndinọ ima ima ntụnọ ke ẹyomde. Ẹma ẹnanam akpan n̄kpọ ẹmi ẹwụt ke ediwak ndụn̄ọde.
“Idaha Unọ-un̄wam eke An̄wanndọ,” ekedi udiana ikpehe nneme emi. Ẹketọn̄ọ enye ke ndisọn̄ọ ntịn̄ nte ke n̄wanndọ enyene ukpono ukpono idaha ke ubon Christian, kpa enyeoro aban̄ade edinọ un̄wam. Nso ke emi oyom oto enye? Nte ke ana enye odu ke nnennen nsụkibuot, idehede inyịk ebe esie ndinam n̄kpọ oro enye ikpọn̄îkpọn̄ oyomde. Oyom enye otịm ese mme mbiomo oro enye enyenede ndise ebe ye nditọ esie enyịn, ndien enye ekeme ndinyene ata uyụhọ ke ndinam ufọk esie asana onyụn̄ eye. Ndien nte Christian asan̄autom, enye ekeme ndinyene ekese ifet ndibuana ke utom an̄wautom. Ndụn̄ọde oro ẹkenamde ye ubon ama owụt eti ibuot oro odude ke utọ item N̄wed Abasi oro.
Ẹma ẹnọ n̄kparawa owo ntịn̄enyịn ke ikpehe oro, “Nditọ Oro Ẹkpan̄de Utọn̄ Ẹnyụn̄ Ẹkpepde N̄kpọ.” Ebede ke ndinọ nditọ mmọ ukpep ndikpan̄ utọn̄ nnyụn̄ n̄kpep n̄kpọ, ete ye eka ẹnọ Jehovah ukpono ẹnyụn̄ ẹwụt ima oro mmọ ẹnyenede ẹnọ nditọete eke spirit mmọ ye nditọ idemmọ. Ọkpọsọn̄ mbọbọ esidu ke ufọt mme ete ye eka ye nditọ edieke mmọ ẹdade ini oro ọfọnde ẹdu ọtọkiet. Ana mme ete ye eka ẹtịm idem ndibọrọ mbụme nditọ mmọ ẹnyụn̄ ẹdemede nsatitọn̄ mmọ kaban̄a ifiọk. N̄ko, mme ndụn̄ọde ẹma ẹwụt nte ẹkemede ndinam emi.
Efen ekedi eti item oro, “Nam Idemfo Ọbọhọ Ufụn Man Anam N̄kpọ Jehovah.” Didie ke ẹkpenam emi? Ke nditre ndibịne mme ubọkọkọ ererimbot, mme utom ini nduọkodudu oro adiade ini, ye mme utịtmbuba eke inyene obụkidem. Jesus ye apostle Paul ẹma ẹnịm eti uwụtn̄kpọ ẹnọ nnyịn ke ndinam n̄waidem. Oyom ikọt Jehovah ẹnam enyịn mmọ ẹtịm ẹse, ẹwụhọ ke mme ufọn n̄kpọ Obio Ubọn̄. Ke ini edide edisịm edinyene mme n̄kpọ obụkidem, eyewụt eti ibuot akan ndinịm okụk idahaemi nnyụn̄ ndep n̄kpọ ke ukperedem akan edidep n̄kpọ idahaemi nnyụn̄ n̄kpe okụk ke ukperedem. Ana mme uyen ẹkpeme ẹbiọn̄ọ ekikere aban̄ade inemesịt oro odude ke idan̄ ye mme ubọkọkọ ererimbot. Ndụn̄ọde oro ẹkenamde ye asiakusụn̄ oro mîdọhọ ndọ ama owụt mme edidiọn̄ oro ẹnyenede ke ini owo anamde idemesie ọbọhọ ufụn ndinam n̄kpọ Jehovah.
Edinam usenubọk Saturday ama osịm utịt ye utịn̄ikọ oro “Be Dụk Ubọhọ-ufụn ke Uyakidem ye Baptism.” Ẹma ẹti mbon baptism ẹte ke adan̄aemi nsọn̄ibuot Adam ama akayak ekondo esịn ke itieufụn, ọkpọsọn̄ Andifak, Jesus Christ, ama eberede usụn̄ ndinyene ubọhọ-ufụn ebe ke uwa esie. Etịn̄ikọ ama owụt se ibuanade ke ndikịbe mbọhọ man ẹnam uduak Abasi onyụn̄ osio mme mbiomo ye mme edidiọn̄ oro ẹdidide eke mbon oro ẹnade baptism owụt.
Uwemeyo Saturday
Ndutịm uwemeyo Saturday ọkọtọn̄ọ ye mbụme udụn̄ọde idem oro, “Ufọn Anie ke Afo Oyom?” Ererimbot owụt edu uma idem eke Devil. Nte ededi, mme Christian ẹnyene ndikpebe edu n̄waidem Jesus Christ. Nso uwụtn̄kpọ ke enye okonịm ntem! Enye ama ọkpọn̄ ubọn̄ eke heaven ndien ekem awa uwem eke owo esie ke ufọn nnyin. Mme n̄kpọ-ata oro ẹsidude kaban̄a m̀mê ufọn anie ke nnyịn iyom ẹsiwụt idem ke ini utọk odude ke ufọt mme Christian ke mbubehe m̀mê mme n̄kpọ ẹban̄ade okụk, ke ini ẹnyenede utọk owo ye owo, ye ntre ntre eken. Mme utọ n̄kpọ oro ẹsidomo ima Christian. Edi ke ndiyom ufọn mbon en̄wen, owo ekeme ke akpanikọ ndidiọn̄ọ n̄kponn̄kan edidiọn̄ oro odude ke ndinọnọ, ndien enye eyenyene unyịme Jehovah.
Ekem ibuotikọ oro otịmde ebiet enyeoro ama etiene, “Ndifiọk Nnyụn̄ N̄kan Mme Mmeme eke Spirit.” Utịn̄ikọ emi ama ọsọn̄ọ etịn̄ ufọn edidiọn̄ọ mme idiọn̄ọ mmeme eke spirit nnyụn̄ nnam n̄kpọ ye ubiere ke en̄wan ndikan Satan ye mme n̄kari esie. Ana mme asan̄autom Jehovah ẹkọri ntotụn̄ọ ima ẹnọ enye ẹnyụn̄ ẹkọri usua kaban̄a se idiọkde. Emi oyom mmọ ẹdiọn̄ọ Jehovah ebe ke enyene-uduak, ọkpọkpọ ukpepn̄kpọ ubon eke ofụri ini. Ana mmọ ẹfep kpukpru orụk unọ idem inemesịt oro otorode afai ye oburobụt ido idan̄. (Ephesus 5:3-5) Akam ofụri ini ye edidụk mme mbonoesop edi akpan n̄kpọ n̄ko ndikụt unen ke ndikan mme mmeme eke spirit.
Iso-ọfọn utịn̄ikọ oro ekedide ibuot nneme akan utịn̄ikọ efen ekededi oro ẹkenọde ke mbono oro ekedi enyeoro ọkọdọhọde “Nte Ndọ Edi Ukpọhọde Inemesịt?” Ekese n̄kparawa owo ẹkere ntre! Edi etịn̄ikọ oro ama anam an̄wan̄a nte ke anana-ibat mme anam-akpanikọ edibotn̄kpọ eke spirit ẹdu oro ẹkopde inemesịt okposụkedi mîdọhọ ndọ, kpa nte ediwak mme Christian oro ẹma ẹkeyak idem ẹnọ ẹkopde ata inemesịt okposụkedi mmọ mîdụhe ke mbọbọ ndọ. Akande oro, ediwak mme ọdọ ndọ ikopke inemesịt, nte uwak ibat usiondọ ẹwụtde. Akam oyom owo etie ekere ediwak edidiọn̄ oro kpukpru mme Christian oro ẹyakde idem ẹnọ ẹdarade man ẹfiọk ẹte ke ndọ, okposụkedi ekemede ndidi edidiọn̄, idịghe ukpọhọde inemesịt.
Nneme oro, “Ubọhọ-ufụn Christian ke Eyo Nnyịn” ama etiene emi. Akpa etịn̄ikọ ama eneme aban̄a “Ndidụn̄ọde Mme Ikpehe Ubọhọ-ufụn Christian nnyịn.” Mmọemi ẹbuana ubọhọ-ufụn ẹtode utọ ukpepn̄kpọ nsunsu ido ukpono nte Abasi-Ita-ke-Kiet, ukpọn̄ ikpaha ke nsinsi, ye nsinsi ndutụhọ. Ndien ubọhọ-ufụn odu ke ọkpọnọ itieufụn idiọkn̄kpọ. Okposụkedi mme Christian ẹdide mme anana mfọnmma, mmọ ẹbọhọ mme utọ ndiọi edu nte edin̄wọn̄ sika, edibre mbre mfọniso, edikpa mmịn, ye oburobụt ido idan̄. Ubọhọ-ufụn ke idaha unana idotenyịn odu n̄ko, koro mmọ ẹnyene idotenyịn Paradise oro onụkde mmọ ndisian mmọ efen mban̄a enye.
Etịn̄ikọ oro eketienede ama obụp mbụme emi “Nte Afo ke Idemfo Amadara Utọ Ubọhọ-ufụn Oro?” Ndidara ọwọrọ ndima, ndikama ye ntịn̄enyịn. Man ẹnam oro, ana asan̄autom Abasi ekpeme mbak edidi se ẹdomode ẹbe adan̄a ukeme ubọhọ-ufụn Christian. Ubọhọ-ufụn ererimbot edi nsu, koro enye osụn̄ọde ke ufụn idiọkn̄kpọ ye mbiara.
Akpatre etịn̄ikọ ke nneme emi ekeneme n̄kpọ ke ibuotikọ oro “Mme Ama Ubọhọ-ufụn Ẹsọn̄ọ Ẹda.” Man ẹnam oro, ana mme Christian ẹsọn̄ọ ẹyịre ye ete ye eka mmọ eke enyọn̄, Jehovah ye esop mbiet-an̄wan esie. Ikọt Jehovah ikemeke ndiyak idemmọ ẹdi se ufiet mbon nsọn̄ibuot ọwọn̄ọrede; ana mmọ ẹsịn mbon oro ẹdụkde ẹdi ye mme oburobụt uduak. Man ẹsọn̄ọ ẹda ke ubọhọ-ufụn Abasi, ana mme Christian ‘ẹdu uwem ke spirit.’—Galatia 5:25.
Akpatre utịn̄ikọ usen oro ekedi ata n̄kpọ idatesịt. Ẹkekot enye “Akakan Owo Oro Akanam Odude Uwem.” Jesus Christ ekedi akakan owo oro, koro enye ama otụk uwem ubonowo ke usụn̄ enyenede odudu akan kpukpru mbonekọn̄, mme an̄wana-ekọn̄-mmọn̄, mbon ufọkmbet, ye ndidem ke ẹtan̄de ẹdian ọtọkiet. Enye ekedi Eyen Abasi, emi okodude uwem ke heaven mbemiso edide isọn̄. Jesus ama otịm ekpebe Ete esie eke heaven ke se enye eketịn̄de onyụn̄ ekpepde ye nte enye okodude uwem tutu enye ekekeme ndidọhọ ete: “Owo eke okokụtde Mi okokụt Ete.” (John 14:9) Didie ke Jesus okowụt mfọn mfọn ntem ete ke “Abasi edi ima”! (1 John 4:8) Ke ama ekeneme ekese n̄kpọ aban̄a mme edu Jesus, etịn̄ikọ ama owụt ete ke ẹma ẹmịn̄ udịm udịm ibuotikọ ẹkotde “Uwem ye Utom Jesus” ke Enyọn̄-Ukpeme ọtọn̄ọde ke October 1985. Ke ndinam n̄kpọ mban̄a ediwak eben̄e ẹkesịnde, N̄ka kemi omosio obufa n̄wed oro Akakan Owo Oro Akanam Odude Uwem. Enye enyene ibuot 133 ẹnyụn̄ ẹmịn̄ ke ọyọhọ uduot. Ẹma ẹwet mme n̄kpọ oro ẹkedude ke udịm udịm ibuotikọ oro, ndien ẹma ẹtan̄ kpukpru mmọ ẹdọn̄ ke n̄wed oro enyenede page 448 mi. Ke akpanikọ, usen mbono enyeemi eketre ye akwa idara!
Usenubọk Sunday
Ntọn̄ọ ntọn̄ọ ke edinam usenubọk Sunday ekedi nneme oro “Ndinam Utom Nte Mme Ọkọ Owo.” Utịn̄ikọ oro “Ndimụm Iyak—Ke Ata ye Ndamban̄a Usụn̄” ama esịn itiat idakisọn̄ ọnọ mme utịn̄ikọ oro ẹketienede. Etịn̄ikọ ama owụt ete ke Jesus ama akanam ẹmụm iyak ke utịbe utịbe usụn̄, enye ama okot mme ọkọiyak ẹmi ẹkebuanade ndikabade ndi mme ọkọ owo. Ke ndusụk ini, Jesus ama ọnọ mme mbet esie ukpep ndikabade ndi mme ọkọ owo, ndien ọtọn̄ọde ke Pentecost eke 33 E.N., mmọ ẹma ẹkụt unen ke ndin̄wam ediwak irenowo ye iban ndikabade ndi mme mbet.
Udiana etịn̄ikọ ekeneme aban̄a n̄ke iyịre oro ẹwetde ke Matthew 13:47-50. Enye ama owụt ete ke ndamban̄a iyịre ama esịne mme Christian oro ẹyetde aran ye Christendom, eke ukperedem emi ke ntak utom emi enye akanamde ke ndikabade, mmịn̄, nnyụn̄ nsuan mme Bible, okposụkedi ukeme ẹmi okomụmde iyak oro mîfọnke ke ediwak ibat. Akpan akpan ọtọn̄ọde ke 1919, utom edibahade omodu, ẹtopde iyak oro mîfọnke ẹduọn̄ọ, ke adan̄aemi ẹtan̄de mbon oro ẹfọnde ẹdọn̄ ke mme esop ẹbietde n̄kpọ udọn̄ n̄kpọ oro an̄wamde ndikpeme nnyụn̄ ntịm mme ata Christian nnịm nnọ utom Abasi.
Ọyọhọ utịn̄ikọ ita, “Ndikọ Owo ke Mmọn̄ Ofụri Ererimbot,” ọkọsọn̄ọ etịn̄ mbiomo oro kpukpru Christian oro ẹyakde idem ẹnọ ẹnyenede ke ndibuana ke ukọiyak ofụri ererimbot. Idahaemi se ibede owo 4,000,000 ke ẹbuana ke utom emi ke se iwakde ikan idụt 200, ndien ke mme isua ndondo emi, ẹmenịm se iwakde ikan owo 230,000 baptism kpukpru isua. Ẹma ẹkpak kpukpru ikọt Jehovah ndifori usọ umụm iyak mmọ, ndien ẹma ẹnam ndụn̄ọde ye ediwak “mme ọkọiyak” oro akpan akpan ẹkụtde unen.
Ke utịn̄ikọ emi eketienede, oro ọkọdọhọde “Ndidu ke Edidemede ke ‘Utịt Ini,’” etịn̄ikọ ama asiak un̄wam itiaba ndin̄wam ikọt Abasi ndidu ke edidemede: ndin̄wana ye mme n̄kpọ oro ẹsiwọn̄ọrede ntịn̄enyịn owo ẹfep, ndibọn̄ akam, ndinọ ntọt mban̄a utịt editịm n̄kpọ emi, ndisọn̄ọ nnyịre ye esop Jehovah, ndinam ndụn̄ọde idemowo, nditie n̄kere mme prọfesi oro ẹsude, ye ndinyene ke ekikere nte ke edinyan̄a mmimọ ekpere akan nte akakam edide ke ini mmimọ ikakabarede idi mme andinịm ke akpanikọ.
Ẹma ẹberi ndutịm usenubọk oro ye nneme oro, “Mmanie Ẹdibọhọ ‘Ini Ukụt’?” Etịn̄ikọ ama owụt nte prọfesi Joel ekenyenede ubak ubak edisu ke eyo mme apostle, nte enyenede n̄kaiso edisu idahaemi, ye nte edinyenede ọyọhọ ọyọhọ edisu ke n̄kpet n̄kpet ini iso.
Uwemeyo Sunday
Ndutịm uwemeyo oro ọkọtọn̄ọ ye utịn̄ikọ an̄wa, “Nditoro Obufa Ererimbot Ubọhọ-ufụn Abasi!” Utịn̄ikọ emi akaka iso ye ibuotikọ ubọhọ-ufụn mbono. Ẹma ẹsio ẹwụt nte ke Ikọ Abasi ama ebemiso etịn̄ aban̄a obufa ererimbot emi ediwọrọde ufụn ufịk nsunsu ido ukpono, ukaraidem, ndutịm uforo, ye usua eke orụk. Ubọhọ-ufụn idiọkn̄kpọ ye n̄kpa ẹyedu n̄ko. Ẹyefiak ẹnọ mfọnmma nsọn̄idem man owo ekpekeme ndidu uwem ke nsinsi ke inemesịt ke paradise isọn̄. Ntre, mme ama edinen ido ẹnyene kpukpru ntak nditoro Andinam obufa ererimbot ebe ke nditan̄a ẹte: “Jehovah, sọsọn̄ọ-o, ke ata ubọhọ-ufụn oro ọnọde ke akpatre!”
N̄kpọ oro edide obufa ke mme mbono district ama etiene utịn̄ikọ an̄wa—kpa edineme ukpepn̄kpọ urua oro ke Enyọn̄-Ukpeme. Ekem mbono ama edisịm utịt ye nduaidem nduaidem utịn̄ikọ ye ikọ item oro, “Mme Ama Ubọhọ-ufụn, Ẹka Iso Iso.” Etịn̄ikọ ke ibio ibio ama eneme aban̄a mme akpan n̄kpọ oro ẹdude ke ibuotikọ mbono oro aban̄ade ubọhọ-ufụn. Enye ama ọsọn̄ọ etịn̄ nte ikọt Jehovah ẹkopde inemesịt ke ntak ubọhọ-ufụn mmọ, abatde usụn̄ ẹmi mme Christian ẹnamde n̄kọri, onyụn̄ akpak mmọ ndika iso iso ye edidianakiet man ẹkpedọk mme edidiọn̄ efen efen. Enye ama eberi ye mme ikọ ẹmi: “Nte nnyịn inamde emi, Jehovah akpakam akaiso ndidiọn̄ kpukpru nnyịn man nnyịn ikpekeme ndika iso iso nte mme ama ubọhọ-ufụn.”
“Ẹkenam ofụri ekondo osụk idem ọnọ ikpîkpu n̄kpọ, itoho ke edinyịme esịt, edi oto ke Enyeemi akanamde enye osụk ntre, ye idotenyịn, ete ke ẹyenyan̄a ekondo ke idemesie nde ẹsio ke itieufụn mbiara, ẹsịn ke itie eyenisọn̄ emi enyenede ubọn̄ [“ubọn̄ ubọn̄ ubọhọ-ufụn,” NW] eke nditọ Abasi.”—Rome 8:20, 21.
[Mme Ndise ke page 25]
Uyen kiet oro okodụkde mbono ke Prague, Czechoslovakia
[Mme Ndise ke page]
1. Mbon baptism ẹsan̄ade ẹka itie baptism ke Prague. Czechoslovakia
2. Ndina baptism nte kiet ke otu Mme Ntiense Jehovah ke Tallinn, Estonia
3. Mbufa n̄wed ẹma ẹda idatesịt ẹsọk mme andidụk mbono ke Usolye-Sibirskoye, Siberia
4. Edisio “New World Translation of the Holy Scriptures” ke usem Czechoslovakia ye Slovakia ke mbono oro ẹkenịmde ke Prague