Ẹkpeme Idem Ye Mme Nsunsu Prọfet!
EBE ye n̄wan ẹtode Brazil ẹma ẹdụk idap ke okoneyo ke ini mmọ ẹkekopde nte inọ ẹbụn̄de usụn̄ ẹdụk ufọk mmọ. Ebe ye n̄wan ẹmi ẹkopde ndịk mi ẹma ẹn̄wana ẹwọn̄ọ ke window ubet ẹnyụn̄ ẹkot borisi. Edi ke oro ebede n̄wan ama okop ndịk etieti aban̄a se ikotịbede oro tutu enye ikemeke ndide idap ke ufọk oro, ndien ekenyene ndika n̄kodu ye eka esie.
Owo ekededi oro akanam ẹbụn̄de ufọk esie ẹdụk m̀mê oro akanam ẹwode ke ndusụk usụn̄ efen eyekop mbọm aban̄a enye. Utọ ifiọk n̄kpọntịbe oro ekeme ndibọ owo odudu, ndien, ke mfụhọ, ediwak owo efen efen ke ẹbọ ufen ke utọ usụn̄ emi. Nte ededi, odu orụk uyịp inọ oro enyenede utịp oro ẹtịmde ẹdiọk ẹkan oro.
Nso idi ata idiọk orụk uyịp inọ emi, ndien mmanie ẹdi mme inọ? Jesus Christ ama ọnọ nnyịn ndusụk ntọt aban̄a enye ke ini, ke etịn̄de aban̄a eyo nnyịn, enye ọkọdọhọde ete: “Ediwak prọfet nsu ẹyedaha ẹda ẹnam ediwak owo ẹwaha ẹkpọn̄ usụn̄.” (Matthew 24:11) Mme nsusu prọfet ẹdi inọ. Ke nso usụn̄? Nso ke mmọ ẹyịp? Ẹyịri uyịp inọ mmọ ye prọfesi oro mmọ ẹtịn̄de. Ntre man idiọn̄ọ n̄kpọ emi ọyọhọ ọyọhọ, oyom nnyịn ke akpa idiọn̄ọ se editịn̄ prọfesi edide nte ekemde ye Bible.
Se Editịn̄ Prọfesi Ọwọrọde
Ke ini afo ekerede aban̄a editịn̄ prọfesi, iso-ọfọn akpa n̄kpọ oro odụkde fi ekikere edi edibemiso ntịn̄ ini iso. Emi ke akpanikọ ekedi ikpehe kiet ke utom prọfet Abasi eset, edi enye ikedịghe akpan utom mmọ. Ke uwụtn̄kpọ, ke ini ẹkedọhọde prọfet Ezekiel ke n̄kukụt ẹte “tịn̄ prọfesi kot spirit [“ofụm,” NW],” enye n̄kukụre ekenyene nditịn̄ ewụhọ otode Abasi. (Ezekiel 37:9, 10) Ke ini Jesus akadade ke ikpe ke iso mme oku, ẹma ẹtọ enye etap, ẹnyụn̄ ẹmia enye ufia, ndien mme andikọbọ enye ke esuene ẹma ẹdọhọ ẹte: “Siak enyịn̄ owo emi oyịbide Fi [“Tịn̄ prọfesi nọ nnyịn,” NW], O Christ.” Mmọ ikọdọhọke Jesus etịn̄ ini iso. Mmọ ẹkemia enye ata ẹte ada odudu Abasi asiak mbon oro ẹkeyịbide enye.—Matthew 26:67, 68.
Ke akpanikọ, akpan ekikere oro akpasarade ikọ usem oro ẹkedade ẹwet Bible akamade, emi ẹkabarede “tịn̄ prọfesi” m̀mê “prọfesi” edi akpan akpan nditịn̄ ekikere Abasi kaban̄a n̄kpọ m̀mê, nte N̄wed Utom Mme Apostle esịnde enye, “ẹtịn̄ ata n̄kpọsọn̄ utom Abasi.” (Utom 2:11) Edi ke usụn̄ifiọk enyeemi ke mme nsunsu prọfet ẹwo ediwak owo.
Nte ededi, mmanie ẹdi mme nsunsu prọfet, ndien nso ke mmọ ẹyịp? Man ibọrọ mbụme emi, ẹyak nnyịn ise mbụk idụt Israel ifiak edem ikosịm eyo Jeremiah. Nnyịn iyenam emi ke udiana ibuotikọ.