Ndiyak Ifiọk Nnọ ke—Namibia

KE USEM ifan̄ ke afo esikop ikọ oro “in̄wan̄ake mi”? N̄wan otode Herero, ke anyan ẹwụra ye ọfọn̄ibuot esie emi ebietde nnụk, ama ọdọhọ ete, “Hi nokuzuva.” Eyenan̄wan otode Kwanyama, ye inua imam, ama ọbọrọ ete, “Nghi udite ko.” Owo obio-in̄wan̄ otode Ndonga, ama otop afara ọdọhọ ete, “Kandi uvite ko.” Ekpeme-ebot otode Kwangali ọkọdọhọ ete, “Kapi na kuzuvha.”

Kpukpru owo ẹmi ẹkedọhọ, “in̄wan̄ake mi.” Emi owụt mfọn mfọn didie ntem nte ke Mme Ntiense Jehovah ke Namibia ẹma ẹsobo ikpọ mfịna usem ke ini mmọ ẹkedomode ndisịm mme andidụn̄ ẹdide owo 1,370,000 ke akwa efakutom emi okponde ke n̄kpọ nte itiat 318,000 ke n̄kan̄ mbinan̄!

Eyịghe ndomokiet idụhe! Idịghe mbon Herero ye Nama kpọt edi n̄ko mbon Ovambo, Kavango, Tswana, Caprivi, Himba, Bushman, ye Damara ẹmi ẹtode Namibia ẹnyene usem idemmọ. Ke edide isio ye oro, ẹketịm Mme Ntiense ẹmi idem ye n̄wed Bible ke Ikọmbakara ye usem Afrikaans kpọt. Nte an̄wan̄ade, man ediwak owo efen efen ẹfiọk akpanikọ, utom ukabade n̄wed ekedi akpan n̄kpọ. Emi ama ọtọn̄ọ ke ata ekpri udomo ke ediwak isua ẹmi ẹkebede ke Windhoek, kpa ibuot obio se ikedide Ufọt Edem Usụk ye Edem Usoputịn Africa adan̄aoro.

Dick Waldron eti ete, “Ke Windhoek, ọkpọsọn̄ ukọbọ oro ufọkederi ye bodisi ẹkekọbọde utom unọ ikọ ntiense nnyịn ama odu.” Adianade ye n̄wan esie, Coralie, enye ekedi idụt emi ke 1953 nte andikụre ukpep ke Watchtower Bible School of Gilead. “Owo ikayakke nnyịn ibe idụk mme ebiet ẹmi mbubịt owo ẹkedụn̄de, ndien ke ndusụk ini ẹma ẹsifịna nnyịn ke ini ẹkekụtde nte itịn̄de ikọ inọ mbubịt owo. Ke akpatre nnyịn ima ikụt ebiet emi owo mîketịmekede nnyịn—kpa unaisọn̄ Akpa Gammans! Emi okodu ke ndondo oro ẹwọrọde ẹkpọn̄ obio. Nnyịn ima isinịm mme ukpepn̄kpọ Bible do, ke ebiet ikọt acacia ekesinọde udịbe.”

Ekedi do n̄ko ke ẹkekabarede mme n̄wed Watch Tower ke akpa ẹsịn ke mme usem n̄kann̄kụk. Mmọ ẹma ẹsịne ndusụk tract ke usem Kwanyama ye ekpri n̄wed oro “Eti Mbuk Obio uböñ Emi” ke usem Nama. Brọda Waldron eti ifiọk n̄kpọntịbe kiet emi edide n̄kpọ imam ke ebuana ye ekpri n̄wed emi, oro owo emi enyenede udọn̄ akan̄wamde ndikabade. Owo ikenyeneke ukem ikọ ke usem Nama inọ ikọ oro, “Adam ekedi mfọnmma owo.” Ntre owo oro enyenede udọn̄ do ama ọdọhọ ete: “Kam wet nte ke Adam ekebiet ndatndat peach. Mbon Nama ẹyefiọk ẹte ke enye ekedi mfọnmma.” Emi, ndien, ekedi nte ẹketọn̄ọde ndiyak ifiọk N̄wed Abasi nnọ ediwak owo ke otu mme amanaisọn̄ Namibia.—Men Daniel 11:33 domo.

Ndisịm Akpan N̄kọri

Ẹma ẹsịm akpan n̄kọri ke ntọn̄ọ ntọn̄ọ iduọk isua 1970 ke ini ẹkekabarede n̄wed oro Akpanikö oro Adade osim Nsinsi Uwem ẹsịn ke usem Ndonga ye Kwanyama. Mmọemi ẹdi akpan usem iba oro ata ediwak mbon Namibia ẹsemde ke Ovamboland, emi edide n̄kpọ nte itiat 450 ke n̄kan̄ edem edere Windhoek. Ẹma ẹbọp ufọk mme asiakusụn̄ adan̄aoro ke Ondangwa, kpa obufa obio oro ẹsiakde ke Ovamboland. Man ẹn̄wam mbon oro ẹnyenede udọn̄ ke ebiet emi ndibọ ufọn nto nneme Bible eke urua ke urua oro ọkọn̄ọde ke Enyọn̄-Ukpeme, ẹma ẹmek mme akpan asiakusụn̄ ẹmi ẹkenamde utom ke Ovamboland ndikabade mme ibuotikọ ukpepn̄kpọ Ikọmbakara nsịn ke usem Ndonga ye Kwanyama.

“Ọfis” ukabade n̄wed ekedi itụn̄ kiet oro ẹkebaharede ke itie unịm moto ke ebiet emi ẹkesision̄ode Enyọn̄-Ukpeme oro ẹkekabarede ke akani ukwak usion̄o n̄wed. Ikedịghe mmemmem n̄kpọ ndiwụk ntịn̄enyịn ke akpan utom emi, sia mme idaha ẹkedide n̄kani n̄kani ndien ufiop ndaeyo okodude ke ufọt Fahrenheit 100 ye 110 ke ẹbaharede ukem ukem. Nte ededi, ekedi mi ke ẹkekabarede mbufa n̄kpri n̄wed ye n̄wed oro Afo Emekeme Ndidu Uwem ke Nsinsi ke Paradise ke Isọn̄.

Nte ẹketọn̄ọde mme esop ke Ovamboland ye ke ebiet efen ke Namibia, utịp ekedi nte ke ẹma ẹyom okụre oro okponde onyụn̄ ọfọnde akan. Adianade do, ẹma ẹyom itie oro odude ke ufọt ebiet akan man ẹkeme ndinọ ntịn̄enyịn ke mme udọn̄ ẹmi ẹdude ke mme ikpehe efen ke idụt oro. Mi kan̄a, usua kaban̄a utom ukwọrọikọ Obio Ubọn̄ ama osụhọde ubọk. Ntre ẹma ẹbọ eben̄e nditọn̄ọ ndibọp ufọk ke akamba ubak isọn̄ oro kiet ke otu Mme Ntiense Jehovah ọkọnọde ke Windhoek. Ibịghike, ẹma ẹnọ se iwakde ikan mbonutom unyịmesịt 40 ufọkidụn̄ ke itieutom ubọpufọk oro, ndien ke December 1990 ẹma ẹkụre utom ke mme ọfis ukabade n̄wed.

Idahaemi, ke mme ọfis ye mme ubet ẹmi ẹferede owo ke idem ke ufọk eyomfịn emi, utom edida ifiọk nsọk ediwak owo ke akaiso usọp usọp. Ke ẹkaiso ndikabade mbufa n̄wed nsịn ke usem Herero ye Kwangali. Amaedi usem Ndonga ye Kwanyama, nsiondi Enyọn̄-Ukpeme usem iba eke ọfiọn̄ ke ọfiọn̄ odu idahaemi ke uduot. Enye ọdọn̄ọ kpukpru ibuotikọ ukpepn̄kpọ ọkọrọ ye mme ibuot nneme efen. Emi, ke akpanikọ, edi ata isio isio ye ekpri ntọn̄ọ ke edisat isọn̄akpa ke ediwak isua ẹmi ẹkebede.

Owo isọpke ndikop ikọ oro “in̄wan̄ake mi” aba. Utu ke oro, se iwakde ikan Mme Ntiense Jehovah 600 ke Namibia ẹnen̄erede ẹwụt esịtekọm ẹnọ Ete mmọ eke heaven, ndien idahaemi mmọ ẹkeme ndidọhọ ẹte: “Edisiak ikọ fo an̄wan̄a owo: otịm asian mme ọkọi.”—Psalm 119:130.

[Mme ndise ke page 24]

Nditan̄a eti mbụk ke otu mbon Herero

Ndikabade mme n̄wed Christian ke ufọn mbon Namibia

Mme ọfis ukabade n̄wed ke Namibia