Mme Mbụme Ẹtode Mme Andikot

Ke Mme Hebrew 11:26, nte ẹtịn̄ ẹban̄a Moses nte “Christ,” mîdịghe nte enye utu ke oro ekebiet Jesus Christ?

Ke ini enemede aban̄a mbuọtidem Moses, apostle Paul ekewet ete ke Moses ama “abat esuene Christ nte inyene eke okponde akan n̄kpọ uto Egypt: koro enye owụkde enyịn ese utịp eke edinọde enye.” (Mme Hebrew 11:26) Etie nte Paul eketịn̄ aban̄a Moses nte “Christ,” m̀mê enyeoro ẹyetde aran, ke ndusụk usụn̄ifiọk.

Nte ẹnyịmede, ke nsio nsio usụn̄ Moses ama onịm uwụtn̄kpọ ọnọ Messiah oro ekedide. Okposụkedi Moses ke idemesie ekedide prọfet, enye ama ebemiso etịn̄ aban̄a edidi eke n̄kponn̄kan prọfet ‘eke edibietde enye.’ Ediwak mme Jew ẹma ẹfiọk ẹte ke Jesus ekedi “prọfet oro,” emi mme anditiene enye ẹkesọn̄ọde. (Deuteronomy 18:15-19; John 1:21; 5:46; 6:14; 7:40; Utom 3:22, 23; 7:37) Moses ekedi n̄ko esịne-ufọt Ibet ediomi, edi Jesus ama ọbọ “idaha oku eke ọfọnde akan,” nte “esịne-ufọt ke ediomi eke ọfọnde akan,” kpa ubọn̄ ubọn̄ obufa ediomi. (Mme Hebrew 8:6; 9:15; 12:24; Galatia 3:19; 1 Timothy 2:5) Ntre ke ndusụk usụn̄ ẹma ẹkeme ndidọhọ ke Moses ekebiet Messiah emi ekedide.

Nte ededi, etie nte oro idịghe se Mme Hebrew 11:26 ọwọrọde akpan akpan. Uyarade ndomokiet idụhe nte ke Moses ama ọfiọk aban̄a ọyọhọ mbụk aban̄ade Messiah, otịmde ọfiọk se enye okosobode ke Egypt nte edide kaban̄a Messiah m̀mê nte andida ke ibuot Esie.

Ndusụk owo ẹma ẹnọ ẹkikere ẹte ke ikọ Paul ke Mme Hebrew 11:26 ẹkenyene ukem se ọwọrọde ye ikọ esie nte ke mme Christian ẹma ẹsobo “ndutụhọ Christ.” (2 Corinth 1:5) Mme Christian oro ẹyetde aran ẹma ẹfiọk ẹte ke Jesus Christ ama okụt ndutụhọ ye nte ke edieke mmimọ ‘ikụtde ndutụhọ ye Enye, iyenyụn̄ ida ubọn̄ ye Enye’ ke heaven. Edi Moses ikọfiọkke ndutụhọ emi Messiah oro edidide edikụtde, m̀mê Moses ndikenyene idotenyịn eke heaven.—Rome 8:17; Colossae 1:24.

Ekpri ifiọk odu ke nte Moses “[akabatde] esuene Christ nte inyene eke okponde akan.”

Ke ini Paul ekewetde “Christ” ke Mme Hebrew 11:26, enye akada ikọ Greek oro Khri·stouʹ, emi edide ukem ye ikọ Hebrew oro Ma·shiʹach, m̀mê Messiah. “Messiah” ye “Christ” ẹwọrọ “enyeemi ẹyetde aran.” Ntre Paul ekewet aban̄a Moses ‘ndibat esuene enyeemi ẹyetde aran.’ Nte ẹkpekeme ndikot Moses “enyeemi ẹyetde aran”?

Ih. Ke mme ini Bible ẹma ẹkeme ndinọ owo akpan utom ke ẹduọkde enye aran ke ibuot. “Samuel ada ekpeme aran ọtọhọ [Saul] ke ibuot.” “Samuel ada ndụk aran eyet [David] idem ke otu nditọete esie: ndien spirit Jehovah odụk David ke idem.” (1 Samuel 10:1; 16:13; men Exodus 30:25, 30; Leviticus 8:12; 2 Samuel 22:51; Psalm 133:2 domo.) Edi, ẹtịn̄ ẹban̄a ndusụk owo, utọ nte prọfet Elisha ye Hazael edidem Syria, nte ẹdide se ‘ẹyetde aran’ idem okposụkedi uyrade ndomokiet mîdụhe nte ke ẹma ẹduọk mmọ ata aran ke ibuot. (1 Ndidem 19:15, 16; Psalm 105:14, 15; Isaiah 45:1) Ntem, owo ama ekeme ndidi “enyeemi ẹyetde aran” ke ndidi se ẹmekde m̀mê ẹnọde akpan utom.

Ke usụn̄ifiọk emi Moses ke idemesie ekedi enyeemi Abasi eyetde aran, ndien ndusụk Bible ẹkam ẹnọ mme utọ edikabade nte “Enyeemi Abasi Eyetde Aran” m̀mê “Enyeemi Ẹyetde Aran” ke Mme Hebrew 11:26. Ẹkenọ Moses utom nte andida ke ibuot Jehovah ye enyeemi edidade Israel ọwọrọ ke Egypt. (Exodus 3:2-12, 15-17) Okposụkedi ẹkebọkde Moses ke ufọt inyene ye ubọn̄ Egypt, enye ama enen̄ede ada utom oro ẹkenọde enye, emi enye okonyịmede onyụn̄ ọyọhọde, ke ọsọn̄urua n̄kpọ. Nte ekemde, Paul ama ekeme ndiwet nte ke Moses ama “abat esuene Christ nte inyene eke okponde akan n̄kpọuto Egypt.”