‘Mbufo Kpukpru Sụn̄sụn̄ Mbio Isọn̄, Ẹyom Jehovah’
“MBUFO kpukpru sụn̄sụn̄ mbio isọn̄ ẹmi ẹnamde ikpe esie, ẹyom Jehovah; mbufo ẹyom edinen ido, ẹyom sụn̄sụn̄ ido: m̀mê mbufo ẹyedịbe ke usen iyatesịt Jehovah.”—Zephaniah 2:3.
Prọfet Zephaniah eketịn̄ mme ikọ oro ọnọ “sụn̄sụn̄ mbio isọn̄,” ndien enye ama akpak mmọ ete “ẹyom sụn̄sụn̄ ido” man ẹkpenyene ukpeme ke “usen iyatesịt Jehovah.” Eyịghe idụhe nte ke sụn̄sụn̄ ido edi se ẹyomde kaban̄a edinyan̄a. Edi ntak-a?
Ntak Ẹyomde Sụn̄sụn̄ Ido?
Sụn̄sụn̄ ido edi edu edinyene ifụre ifụre ido, oro ọbọhọde n̄wụtidem m̀mê ntan̄idem. Enye enyene n̄kpet n̄kpet ebuana ye nti ido eken, utọ nte nsụhọdeidem ye ifụre ifụre ido. Ke edide ntre, mbon o-sụn̄sụn̄ ido ẹkeme ndibọ ukpep ẹnyụn̄ ẹnyịme ndibọ ntụnọ nto Abasi, idem okposụkedi oro ekemede nditie ubiak ubiak ke ini oro.—Psalm 25:9; Mme Hebrew 12:4-11.
Sụn̄sụn̄ ido ekeme ndinyene esisịt n̄kpọ ndinam ye ifiọkn̄wed m̀mê idaha owo ke uwem. Nte ededi, mbon oro ẹnyenede akwa ifiọkn̄wed m̀mê ẹkụtde unen ke usụn̄ eke ererimbot ẹsinyene ntụhọ ndikere nte ke mmimọ imodot ndinam ubiere nnọ idem mmimọ ke kpukpru n̄kpọ, idem ke mme n̄kpọ ẹban̄ade utuakibuot. Emi ekeme ndikpan mmọ ndiyak owo en̄wen ekpep mmọ n̄kpọ m̀mê ndinyịme item nnyụn̄ nnam mme ukpụhọde oro ẹyomde ke uwem mmọ. Mbon en̄wen oro ẹnyenede inyene obụkidem ẹkeme ndikere n̄kpọ ke ukwan̄ usụn̄ nte ke ifụre mmimọ ọkọn̄ọ ke inyene obụkidem mmimọ. Ntem, mmọ ẹkere ke ufọn idụhe ndinyene inyene eke spirit oro otode Ikọ Abasi, kpa Bible.—Matthew 4:4; 5:3; 1 Timothy 6:17.
Kere ban̄a mme scribe, mme Pharisee, ye ikpọ oku eke eyo Jesus. Ke idaha kiet ke ini mme isụn̄utom oro mmọ ẹkedọn̄de ẹka ẹkemụm Jesus mîkasan̄ake ye enye inyọn̄ idi, mme Pharisee oro ẹkedọhọ ẹte: “Nte mbufo n̄ko ẹmewaha ẹkpọn̄ usụn̄? Nte baba owo kiet ke otu mbiowo m̀mê ke otu mme Pharisee ọkọbuọt idem ye Enye? Amaedi otuowo eke mîfiọkke ibet, mmọ ẹdi mbukpo owo.” (John 7:45-49) Ke ikọ en̄wen, ye mmọ, mbon unana ifiọk ye mbon oro mîfiọkke n̄wed kpọt ẹkpesịme ẹkem ndinịm Jesus ke akpanikọ.
Kpa ye oro, ndusụk mbon Pharisee ẹma ẹnyene udọn̄ ẹban̄a akpanikọ, ndien mmọ ẹma ẹkam ẹda ẹnọ Jesus ye mme Christian. Ke otu mmọemi ekedi Nicodemus ye Gamaliel. (John 7:50-52; Utom 5:34-40) Ke Jesus ama akakpa, “ediwak mme oku ẹnyụn̄ ẹsụk ibuot ẹnọ akpanikọ.” (Utom 6:7) Nte eyịghe mîdụhe apostle Paul ekedi ata n̄wọrọnda uwụtn̄kpọ. Enye ọkọbọ ukpep oto Gamaliel onyụn̄ akabade edi akwa okụt unen ye andida nnọ ido ukpono mme Jew oro ẹkponode. Nte ededi, nte ini akade enye ke nsụhọdeidem ama onyịme ikot Christ Jesus onyụn̄ akabade edi enyene-ifịk anditiene enye.—Utom 22:3; 26:4, 5; Galatia 1:14-24; 1 Timothy 1:12-16.
Kpukpru emi owụt ete ke inamke n̄kpọ se idaha owo ekemede ndidi m̀mê nte owo ekemede ndikere idahaemi mban̄a etop Bible, mme ikọ Zephaniah ẹsụk ẹnyenyene n̄kpọ ndinam. Edieke owo oyomde ndinyene unyịme Abasi nnyụn̄ ndi se ikọ esie ọnọde ndausụn̄, sụn̄sụn̄ ido edi ata akpan n̄kpọ.
Mbon Oro ‘Ẹyomde Sụn̄sụn̄ Ido’ Mfịn
Ediwak miliọn owo ke ofụri ererimbot ẹnyịme eti mbụk Obio Ubọn̄. Mme Ntiense Jehovah ke ẹnịm se iwakde ikan ukpepn̄kpọ Bible miliọn inan̄ ke urua ke urua ke ufọk mme utọ owo oro. Mmọemi ẹto ediwak ye nsio nsio idaha ke uwem ye nsio nsio idaha ndutịm uforo ye ebuana n̄kaowo. Edi, ọsọ n̄kpọ kiet oro mmọ ẹnyenede edi nte ke mmọ ẹnyene nsụhọdeidem oro ekemde ndinyịme etop Bible emi owo ekenemede ọnọ mmọ ke enyịnusụn̄ mmọ m̀mê ke ebiet efen. Ediwak mmọ ke ẹnam n̄kọri oro ọfọnde koro mmọ ẹnyịmede ndisịn ukeme ndikan mme n̄kpọ ubiọn̄ọ ke usụn̄ mmọ. Ih, mmọ ẹdu ke otu “sụn̄sụn̄ mbio isọn̄” mfịn.
Da Maria ke Mexico ke uwụtn̄kpọ. Enye ekekpep ibet ke ufọkn̄wed ntaifiọk ama onyụn̄ enyene okụk ke ntak akpa. Ke ntak emi, enye ama enyene ndusụk ata ntatara ekikere oro okokpụhọrede enye esịn ke owo “nsọn̄ibuot, usọn̄enyịn, nsọn̄ido, ye owo oro mînịmke edidu Abasi ke akpanikọ,” nte enye ekesịnde enye. Maria ama eti ete, “Ami mma ndikere nte ke ẹkeme ndida okụk mbiere kpukpru n̄kpọ ye nte ke Abasi idịghe akpan n̄kpọ. Ke akpanikọ, n̄kekere ke enye ikakam idụhe.” Enye ama adian do ete, “Amaedi ami ido ukpono ekedi n̄kpọ nsahi ye n̄kpọ oro n̄kaowo akakam oyomde.”
Nte ini akakade, Maria ama okụt mme ukpụhọde ke idem eyen eyeneka ete esie ke enye ama akakabade edi kiet ke otu Mme Ntiense Jehovah. Maria ama anam an̄wan̄a ete: “Enye ama esinyene ndịk etieti, ndien idahaemi enye ekedi ata owo emem ye edinen owo. Mme iman ẹkedọhọ ẹte ke enye ekedi ọkwọrọikọ onyụn̄ esikot Bible, ndien ke ntak oro enye ikesikpaha mmịn m̀mê ndibịne iban aba. Ntre mma nyom enye edi edikot Bible ọnọ mi koro n̄kekere nte ke usụn̄ emi ami nnyenyene emem ye ifụre oro n̄koyomde etieti.” Utịp ekedi nte ke Maria ama onyịme ukpepn̄kpọ Bible ye Mme Ntiense oro ẹkedide ebe ye n̄wan.
Enye ama enyene ediwak n̄kpọ ndikan, okonyụn̄ edi ata ọkpọsọn̄ n̄kpọ n̄ko ọnọ enye ndinyịme edumbet itieibuot Bible man osụk ibuot ọnọ ebe esie. Edi enye ama anam ikpọ ukpụhọde ke uwem ye edu esie. Enye ama onyịme ete: “N̄kere ke toto nte nditọete oro ẹkeda un̄wam Jehovah ẹdi ufọk mi, inemesịt, ifụre, ye edidiọn̄ Abasi ẹmedu ke ufọk mi.” Mfịn, Maria edi Ntiense Jehovah oro ama akayak idem ọnọ, ana baptism.
Ke ndibịne utuakibuot akpanikọ, ikpehe efen odu emi sụn̄sụn̄ ido, m̀mê unana edinyene enye, enyenede akpan n̄kpọ ndinam. Ata ediwak ini, n̄wanndọ ke ubon esinyịme akpanikọ onyụn̄ oyom ndinam n̄kpọ Abasi, edi ebe emen̄e. Ndusụk ekeme ndidi ọkpọsọn̄ n̄kpọ ọnọ ndusụk ebe ndinyịme ekikere oro nte ke owo en̄wen odu—kpa Jehovah Abasi—emi n̄wan esie anade osụk ibuot ọnọ idahaemi. (1 Corinth 11:3) N̄wan kiet ke Chihuahua, Mexico, ama oyom ukpepn̄kpọ Bible, ndien nte ini akakade enye ye nditọ esie itiaba ẹma ẹdidụk akpanikọ. Ke akpa ebe esie ama ọbiọn̄ọ. Ntak-a? Koro enye ikoyomke ubon esie esisan̄a ẹkwọrọ ikọ ke ufọk ke ufọk, ẹnọde mme n̄wed Bible. Nte an̄wan̄ade enye ekekere ete ke imọ imokpon ikan ndikwọrọ ikọ. Nte ededi, ubon esie ẹma ẹsọn̄ọ ẹda ke ubiere mmọ ndinam n̄kpọ Abasi. Nte ini akakade ebe ama ọtọn̄ọ ndikụt ufọn oro odude ke ndinyịme ndutịm Abasi. Edi isua 15 ẹma ẹbe mbemiso enye akayakde idemesie ọnọ Jehovah.
Ke ofụri Mexico, ediwak obio oro ẹdude nsannsan ẹsụk ẹdodu ẹmi mme andidụn̄ ke n̄kann̄kụk ẹsemde usem ẹnyụn̄ ẹnyenede ido mbon India. Etop Bible osịm mmọemi onyụn̄ an̄wam mmọ ndinam idaha ntatenyịn mmọ ọfọn akan, nte ndusụk mmọ ẹkpepde ndikot n̄wed nnyụn̄ n̄wet n̄kpọ ke adan̄aemi mmọ ẹkpepde akpanikọ. Nte ededi, akpanikọ oro nte ke mme owo ẹnyene esisịt ifiọkn̄wed m̀mê esisịt n̄kpọ obụkidem inen̄ekede iwọrọ ite ke mmọ ẹyesọp ndinyịme. Ntan̄idem eke orụk ye ọkpọsọn̄ edisọn̄ọ nyịre ke mme ido edinam eteete ndusụk ini ẹsinam edi ọkpọsọn̄ n̄kpọ ọnọ ndusụk owo ndinyịme akpanikọ. Emi n̄ko anam an̄wan̄a ntak emi mbon obio-in̄wan̄ en̄wen ẹsiwakde ndifịna mbon oro ẹnyịmede akpanikọ ke ndusụk obio-in̄wan̄ India. Ntre sụn̄sụn̄ ido enyene ediwak uduot.
Nam N̄kpọ ke Sụn̄sụn̄ Ido
Nso kaban̄a fi ke idemfo? Nte afo ke anam n̄kpọ aban̄a akpanikọ Ikọ Abasi? Mîdịghe nte edi ọkpọsọn̄ n̄kpọ ọnọ fi ndinyịme ndusụk akpanikọ Bible? Ndusụk afo eyeyom ndidụn̄ọde idemfo man okụt se ibiọn̄ọde fi. Nte afo enyene mfịna koro ata ediwak owo oro akpanikọ odụride ada ẹdi sụn̄sụn̄ ke emana? Nte ntan̄idem idemowo abuana ke ekikere fo? Edi n̄kpọ oro ọfọnde ndikere ikọ apostle Paul emi: “Abasi ekemek n̄kpọ oro edide ndisịme ke ererimbot man Enye esuene mbon eti ibuot; Abasi okonyụn̄ emek n̄kpọ eke edide mmeme ke ererimbot man Enye esuene n̄kpọsọn̄ n̄kpọ; Abasi onyụn̄ emek n̄kpọ eke ẹdude ke usụhọde itie ye n̄kpọ eke owo esede ke ndek, ye n̄kpọ eke mîdụhe, man Enye anam mme n̄kpọ eke ẹdude ẹwọrọ ikpîkpu; mbak owo baba kiet edibụre mbụre ke iso Abasi.”—1 Corinth 1:27-29.
Nte afo ekpesịn n̄kpọuto n̄kukụre koro afo ọfiọhọde enye ke usụhọde aban̄ mbat? Nte ededi, ukpusịnke! Edi, oro edi usụn̄ oro Abasi emekde ndinọ nnyịn anyan̄a-uwem Ikọ akpanikọ esie, nte apostle Paul anamde an̄wan̄a ete: “Nnyịn ikama ọsọn̄urua n̄kpọ emi ke aban̄ mbat, man akwa ubom odudu esie okpoto Abasi, itoho nnyịn.” (2 Corinth 4:7) Sụn̄sụn̄ ido ye nsụhọdeidem ẹyen̄wam nnyịn ndikụt ata ekọmurua n̄kpọuto inyụn̄ idịghe sụk “aban̄ mbat,” m̀mê mme isụn̄utom ẹdide owo, ẹdade enye ẹsọk nnyịn. Ke ndinam ntre, nnyịn n̄ko iyenam ifet nnyịn ndidi se ‘ẹdịpde ke usen iyatesịt Jehovah’ okpon inyụn̄ idu ke otu mbon o-sụn̄sụn̄ ido oro ‘ẹdidade isọn̄ inyene.’—Zephaniah 2:3; Matthew 5:5.