Ntak Emi Mme Ntiense Jehovah Ẹdude Ke Ukpeme
“Ẹkpeme . . . koro mbufo mîfiọkke usen eke Ọbọn̄ mbufo edide.”—MATTHEW 24:42.
1. Item oro “ẹkpeme” enyene mmanie?
YE KPUKPRU asan̄autom Abasi—edide ekpri m̀mê akamba, edide enyeoro ayakde idem ọnọ obufa obufa m̀mê enyeoro ama akanam utom ke anyanini—item Bible edi: “Ẹkpeme”! (Matthew 24:42) Ntak emi oro edide akpan n̄kpọ-ọ?
2, 3. (a) Idiọn̄ọ ewe ke Jesus eketịn̄ aban̄a in̄wan̄în̄wan̄, ndien nso ke edisu prọfesi owụt? (b) Nso idaha oro ẹtịn̄de ẹban̄a ke Matthew 24:42 odomo nte mbuọtidem nnyịn edide ata mbuọtidem, ndien didie?
2 Ke utịt utịt utom esie ke isọn̄, Jesus ama ebemiso etịn̄ aban̄a idiọn̄ọ edidu esie ke odudu Obio Ubọn̄ oro enyịn mîkwe. (Matthew, ibuot 24 ye 25) Enye ama etịn̄ nte an̄wan̄ade aban̄a ubọn̄ ubọn̄ ini edidu esie oro—ndien mme n̄kpọntịbe oro ẹsude prọfesi emi ẹwụt nte ke ẹma ẹdori enye ke ebekpo nte Edidem ke heaven ke 1914. Enye n̄ko ama anyan ubọk owụt idaha kiet emi edisịnde ata mbuọtidem nnyịn ke udomo. Emi ekenyene n̄kpọ ndinam ye ini emi enye edidahade ada ndinam n̄kpo nte Ebiereikpe ndisobo idiọk editịm n̄kpọ emi ke ini akwa ukụt oro Jesus ọkọdọhọde ete: “Edi baba owo kiet ifiọkke iban̄a usen oro m̀mê hour oro, kpa mme angel ke heaven, Eyen inyụn̄ ifiọkke, ke mîbọhọke Ete ikpọn̄.” Ekedi ye oro ke ekikere ke enye ọkọdọhọ ete: “Ẹkpeme ndien: koro mbufo mîfiọkke usen eke Ọbọn̄ mbufo edide.”—Matthew 24:36, 42.
3 Unana nnyịn nditre ndifiọk usen ye hour oro akwa ukụt editọn̄ọde oyom ete edieke nnyịn idọhọde ke idi mme Christian, ke ana nnyịn idu uwem nte mme ata Christian kpukpru usen. Nte usụn̄ emi afo adade uwem fo anam n̄kpọ eyesụn̄ọ ke unyịme Ọbọn̄ ke ini akwa ukụt edide edisịm? Mîdịghe edieke n̄kpa ebemde iso edi, nte enye eyeti fi nte owo oro akanamde n̄kpọ Jehovah ke edinam akpanikọ tutu osịm utịt uwem fo?—Matthew 24:13; Ediyarade 2:10.
Mme Akpa Mbet Ẹma Ẹdomo Ndidu ke Ukpeme
4. Nso ke nnyịn ikeme ndikpep nto uwụtn̄kpọ Jesus aban̄ade edidu ke ukpeme ke n̄kan̄ eke spirit?
4 Jesus Christ ke idemesie ama onịm eti uwụtn̄kpọ eke edidu ke ukpeme ke n̄kan̄ eke spirit. Enye ama esibọn̄ akam ndien ndien ye ke ofụri esịt ọnọ Ete esie. (Luke 6:12; 22:42-44) Ke ini okosobode idomo, enye ekenen̄ede eberi edem ke ndausụn̄ oro odude ke N̄wed Abasi. (Matthew 4:3-10; 26:52-54) Enye ikayakke ẹwọn̄ọde ntịn̄enyịn esie ẹkpọn̄ utom oro Jehovah ọkọdọn̄de enye. (Luke 4:40-44; John 6:15) Nte mbon oro ẹdade idemmọ nte mme anditiene Jesus ẹyedu ke ukpeme ntre?
5. (a) Ntak emi mme apostle Jesus ẹkenyenede mfịna ndimụm edida ukem ukem eke spirit n̄kama? (b) Nso un̄wam ke Jesus ọkọnọ mme apostle esie ke enye ama ekeset?
5 Ke ndusụk idaha, idem mme apostle Jesus ẹma ẹyok. Nte utịp ebeubọk udọn̄ ye ukwan̄ ekikere, mmọ ẹkenyene ndikụt edikpu. (Luke 19:11; Utom 1:6) Mbemiso mmọ ẹkekpepde ndiberi edem ọyọhọ ọyọhọ ke Jehovah, mme mbabuat idomo ẹma ẹtịmede mmọ ekikere. Ntre, ke ini ẹkemụmde Jesus, mme apostle esie ẹma ẹfen̄e. Ekem ke okoneyo oro, Peter, ke ntak ndịk, ama akam akan̄ ediwak ini ete ke imọ idiọn̄ọke Christ. Mme apostle oro ikanamke kan̄a n̄kpọ ekekem ye item Jesus oro: “Ẹkpeme, ẹnyụn̄ ẹbọn̄ akam.” (Matthew 26:41, 55, 56, 69-75) Ke ama ekeset Jesus ama ada N̄wed Abasi ndisọn̄ọ mbuọtidem mmọ. (Luke 24:44-48) Ndien ke ini eketiede nte ke ndusụk mmọ ẹmọn̄ ẹnụk utom ukwọrọikọ oro ẹkeyakde ẹsịn mmọ ke ubọk ẹnịm ke udiana itie, Jesus ama edemede udọn̄ mmọ man ẹwụt ntịn̄enyịn ke utom oro edide akpan n̄kpọ akan.—John 21:15-17.
6. Nso n̄kpọ etabi iba ke Jesus ekebem iso odụri mme mbet esie utọn̄ aban̄a?
6 Ke ntọn̄ọ ntọn̄ọ, Jesus ama ọnọnọ mme mbet esie item ete ke mmọ ikenyeneke ndidi ubak ererimbot. (John 15:19) Enye ama ọnọ mmọ item n̄ko ete ẹkûsọn̄ ubọk ẹkara kiet eken edi ẹnam n̄kpọ ọtọkiet nte nditọete. (Matthew 20:25-27; 23:8-12) Ndi mmọ ẹma ẹnam item esie? Ndi mmọ ẹma ẹnịm utom oro enye ọkọnọde mmọ ndinam ke akpa?
7, 8. (a) Didie ke mme n̄kpọ oro mme Christian akpa isua ikie ẹkenamde owụt ke mmọ ẹma ẹnam item Jesus? (b) Ntak emi edikaiso ndu ke ukpeme ke n̄kan̄ eke spirit ekedide akpan n̄kpọ?
7 Adan̄a nte mme apostle ẹkesụk ẹdude ke uwem, mmọ ẹma ẹtịm ẹkpeme esop. Mbụk ọsọn̄ọ ete ke mme akpa Christian ikesịnke idem ke mme mbubehe ukaraidem Obio Ukara Rome ye nte ke mmọ ikenyeneke otu mme ọkwọrọ ederi oro ẹmenerede ke enyọn̄. Ke n̄kan̄ eken, mmọ ẹkedi ifịk ifịk mme anditan̄a Obio Ubọn̄ Abasi. Etisịm utịt akpa isua ikie, mmọ ẹma ẹnọ ikọ ntiense ke ofụri Obio Ukara Rome, ẹnamde mme mbet ke Asia, Europe, ye Edem Edere Africa.—Colossae 1:23.
8 Nte ededi, unen oro ẹkekụtde ke ukwọrọikọ do ikọwọrọke ite ke ufọn ikodụhe aba ndidu ke ukpeme ke n̄kan̄ eke spirit. Edidi Jesus oro ẹkebemde iso ẹtịn̄ okosụk oyoyom usụn̄. Ndien nte esop ekebede odụk ọyọhọ isua ikie iba E.N., mme idaha ẹma ẹdemede ẹmi ẹkesịnde mme idaha eke spirit mme Christian ke itiendịk. Didie ke ekedi ntre?
Mbon Oro Ẹketrede Ndidu ke Ukpeme
9, 10. (a) Ke etienede n̄kpa mme apostle, nso n̄kpọntịbe ẹkewụt nte ke ediwak owo oro ẹkedọhọde nte idide mme Christian ikodụhe ke ukpeme? (b) Itien̄wed ewe oro ẹsiakde ke ikpehe ekikere emi akpakan̄wam mbon oro ẹkedọhọde ke idi mme Christian ndikaiso nsọn̄ idem ke n̄kan̄ eke spirit?
9 Ndusụk mbon oro ẹkedụkde ẹdi esop ẹma ẹtọn̄ọ ndikpep se mmọ ẹnịmde ke akpanikọ ke ido akwaifiọk mbon Greek, man ẹnam mbon ererimbot ẹnyịme se mmọ ẹkekwọrọde. Sụn̄sụn̄, mme ukpepn̄kpọ mme okpono ndem, utọ nte Abasi-Ita-ke-Kiet ye edinyene ukpọn̄ oro mîkemeke ndikpa, ẹma ẹkabade ẹdi ubak idiọk orụk Ido Ukpono Christ. Emi ama ada okosịm edikpọnọde idotenyịn tọsịn isua nnịm. Ntak-a? Mmọ oro ẹkedide ẹdinịm ukpepn̄kpọ ukpọn̄ ikpaha ke nsinsi ẹma ẹberi ẹte ke edi ukpọn̄ oro edibọhọde ikpọkidem owo oro akpade edinyene ofụri edidiọn̄ eke ukara Christ ke obio mme spirit. Ntre mmọ ikekwe ufọn ndomokiet ndidu ke ukpeme mban̄a edidu Christ ke odudu Obio Ubọn̄.—Men Galatia 5:7-9; Colossae 2:8; 1 Thessalonica 5:21 domo.
10 Mme n̄kpọntịbe en̄wen ẹma ẹnam idaha emi ototịm ọsọn̄ ubọk. Ndusụk mbon oro ẹkedọhọde ke idi mme esenyịn Christian ẹma ẹtọn̄ọ ndida mme esop mmọ nnam n̄kpọ nte usụn̄ ndida nnyene uwọrọiso. Mmọ ke n̄kari ẹma ẹdọhọ ke mme ekikere ye mme ukpepn̄kpọ mmimọ ẹdi ukem ye eke N̄wed Abasi mîdịghe ke ẹkam ẹfọn ẹkan mmọ. Ke ini ifet ekebederede, ufọkabasi nsọn̄ibuot emi ama akam anam n̄kpọ kaban̄a ufọn obio ukaraidem.—Utom 20:30; 2 Peter 2:1, 3.
Mme Utịp Edikaiso Ndu ke Ukpeme
11, 12. Ntak emi Edinam Ukpụhọde eke mbon Protestant mîkedịghe edifiak n̄wụk utuakibuot akpanikọ?
11 Ke Ufọkabasi Roman Catholic ama akanam n̄kpọ ke idiọk usụn̄ ke ediwak isua ikie, ndusụk Mme Anam Ukpụhọde ẹma ẹsioro uyo ke ọyọhọ isua ikie-16. Edi emi ikedịghe kaban̄a edifiak mbịne utuakibuot akpanikọ. Ntak mîkedịghe?
12 Okposụkedi nsio nsio otu mbon Protestant ẹkekịbede ẹkpọn̄ odudu Rome, mmọ ẹma ẹda ediwak akpan ukpepn̄kpọ ye mme edinam nsọn̄ibuot ẹwọrọ—ubahade oro odude ke ufọt mme ọkwọrọ ederi ye usụhọde mbon ido ukpono, n̄ko edinịm ke akpanikọ ke Abasi-Ita-ke-Kiet, ukpọn̄ ikpaha ke nsinsi, ye nsinsi ndutụhọ ke n̄kpa ebede. Ndien, ukem nte Ufọkabasi Roman Catholic, mmọ ẹma ẹkaiso ndidi ubak ererimbot, ẹtịmde ẹdian idem ye mbon ukaraidem. Ntre mmọ ẹma ẹsịn idotenyịn ekededi oro aban̄ade edidi Christ nte Edidem.
13. (a) Nso iwụt ke ndusụk owo ẹma ẹnen̄ede ẹda Ikọ Abasi ke ọsọn̄urua n̄kpọ? (b) Ke ọyọhọ isua ikie-19, nso n̄kpọntịbe ikedi akpan n̄kpọ udọn̄ ọnọ mbon oro ẹkedọhọde ke idi mme Christian? (c) Ntak emi ediwak mmọ ẹkekụtde edikpu?
13 Edi, Jesus ama ebemiso etịn̄ ete ke mme apostle ẹma ẹkekpa, mme ata andida Obio Ubọn̄ nnyene (emi enye ekemende odomo ye ibokpot) ẹyekaiso ndikọri ọtọkiet ye mme nsunsu Christian (m̀mê, mbiet) tutu ke ini idọk. (Matthew 13:29, 30) Nnyịn ikemeke ndinen̄ede nsiak kpukpru mmọ oro Eteufọk adade nte ibokpot mfịn. Edi odot ẹtịm ẹfiọk nte ke ọyọhọ isua ikie-14, ikie-15, ye ikie-16, mme owo ẹma ẹdu oro ẹkesịnde uwem ye ifụre mmọ ke itiendịk man ẹkabade Bible ẹsịn ke usem mme ọsọ owo. Mmọ eken ikenyịmeke Bible nte Ikọ Abasi kpọt edi n̄ko ẹma ẹsịn Abasi-Ita-ke-Kiet nte se mîkemke ye N̄wed Abasi. Ndusụk owo ẹma ẹsịn ukpepn̄kpọ ukpọn̄ ikpaha ke nsinsi ye ndutụhọ ke hell ikan̄ nte se mîdụhe ke n̄kemuyo ye Ikọ Abasi. N̄ko, ke ọyọhọ isua ikie-19, nte utịp ntatara ukpepn̄kpọ Bible, mme otu ke United States, Germany, England, ye Russia ẹma ẹtọn̄ọ ndinịm ke akpanikọ nte ke ini edifiak ndi Christ ama ekpere. Edi ata ediwak ke otu idotenyịn mmọ ẹkesụn̄ọ ke edikpu. Ntak-a? Ke ekese udomo, ekedi koro mmọ ẹkeberide edem ẹkaha ke mme owo idịghe ke N̄wed Abasi.
Nte Mmọemi Ẹkewụtde ke Imodu ke Ukpeme
14. Tịn̄ usụn̄ ukpep Bible oro C. T. Russell ye mme nsan̄a esie ẹkekamade.
14 Ekem, ke 1870, Charles Taze Russell ye ndusụk nsan̄a esie ẹma ẹtọn̄ọ otu ukpepn̄kpọ Bible ke Allegheny, Pennsylvania. Idịghe mmọ ẹkedi akpa mbon oro ẹkekụtde ediwak akpanikọ Bible oro mmọ ẹkefiọkde, edi ke ini ẹkpepde n̄kpọ, mmọ ye ntịn̄enyịn ẹma ẹnam edi edu mmọ ndidụn̄ọde kpukpru itien̄wed oro ẹnyenede ebuana ye mbụme oro ẹnemede.a Uduak mmọ ikedịghe ndiyom mme itien̄wed oro ẹsọn̄ọde ekikere oro ẹma ẹkenyenyene, edi ndikụt nte ke mmimọ imesịm mme ubiere oro ẹdude ke n̄kemuyo ye kpukpru n̄kpọ oro Bible etịn̄de ke n̄kpọ oro.
15. (a) Nso ke mbon efen ke ẹsiode Brọda Russell ẹfep ẹkedifiọk? (b) Nso ikowụt ke Nditọ Ukpepn̄kpọ Bible ẹkpụhọde ẹkpọn̄ mmọemi?
15 Ibat ibat mbon oro ẹkedude mbemiso mmọ ẹma ẹdiọn̄ọ ẹte ke Christ edifiak edi ke usụn̄ oro enyịn mîkwe nte spirit. Ndusụk mmọ ẹma ẹkụt ẹte ke uduak edifiak ndi Christ ikedịghe man edifọp isọn̄ onyụn̄ ọsọhi uwem ofụri owo efep, edi, utu ke oro, man edidiọn̄ kpukpru ubon ke isọn̄. Ama akam odu ibat ibat owo oro ẹkefiọkde ẹte ke isua 1914 edidi idiọn̄ọ utịt Ini Mme Gentile. Edi ye Nditọ Ukpepn̄kpọ Bible oro ẹkebuanade ye Brọda Russell, mme n̄kpọ ẹmi ẹnyenede se ẹwọrọde ẹkan ndidi n̄kpọ ndineme ke ukpepn̄kpọ ido ukpono. Uwem mmọ okowụhọ ofụri ofụri ke mme akpanikọ ẹmi ẹnyụn̄ ẹnam ẹdiọn̄ọ mmọ ke ofụri ererimbot ke udomo oro akanam mîdaha itie ke eyo oro.
16. Ntak emi Brọda Russell ekewetde ke isua 1914 ete: “Nnyịn idu ke ini udomo”?
16 Kpa ye oro, ama oyom mmọ ẹdu ke ukpeme. Ntak-a? Nte uwụtn̄kpọ, okposụkedi mmọ ẹkefiọkde ẹte ke prọfesi Bible ama onịm 1914 idiọn̄ọ, mmọ ikotịmke ifiọk se iditịbede ke isua oro. Emi ama esịn mmọ ke udomo. Ke Enyọn̄-Ukpeme (Ikọmbakara) eke November 1, 1914, Brọda Russell ekewet ete: “Ẹyak nnyịn iti ite ke nnyịn idu ke ini udomo. . . . Edieke edide ntak ekededi odu emi edinamde owo ekededi etre ndinịm Ọbọn̄ ye Akpanikọ Esie ke akpanikọ, ndinyụn̄ ntre ndinam n̄waidem ke Ntak Ọbọn̄, do idịghe ima Abasi emi otode esịt akanam enye enyene udọn̄ ke Ọbọn̄, edi edi n̄kpọ en̄wen; eyedi idotenyịn nte ke ini edi ibio; ediyak idem nnọ ekedi eke ekpri ini kpọt.”
17. Didie ke A. H. Macmillan, ye mbon en̄wen nte enye, ẹkemụm edida ukem ukem eke spirit ẹkama?
17 Ndusụk owo ẹma ẹkpọnọde utom Jehovah ẹnịm ke ini oro. Edi A. H. Macmillan ekedi owo kiet emi mîkọkpọnọkede inịm. Ediwak isua ke ukperedem, enye ama onyịme in̄wan̄în̄wan̄ ete: “Ndusụk ini idotenyịn̄ oro ikenyenede ke akpan usenọfiọn̄ ama aka anyan akan se N̄wed Abasi ọkọdọhọde.” Nso ikan̄wam enye ndimụm edida ukem ukem eke spirit n̄kama? Nte enye ọkọdọhọde, enye ama ọfiọk ete “ke ini idotenyịn oro ẹbede ye unana edisu, oro ikokpụhọkede mme uduak Abasi.” Enye ama adian do ete: “Mma n̄kpep ke nnyịn ikpenyene ndinyịme mme ndudue nnyịn nnyụn̄ n̄kaiso ndidụn̄ọde Ikọ Abasi nnyom edinam an̄wan̄a efen efen.”b Ke nsụhọdeidem, Nditọ Ukpepn̄kpọ Bible eke eset oro ẹma ẹsiyak Ikọ Abasi enen̄ede ekikere mmọ.—2 Timothy 3:16, 17.
18. Didie ke edidu ke ukpeme eke Christian ọkọnọ mme ufọn sụn̄sụn̄ ke n̄kpọ aban̄ade editre ndidi ubak ererimbot?
18 Ke mme isua oro ẹketienede, ntak okoyomde mmọ ẹdu ke edidemede ikosụhọkede. Mmọ ẹma ẹfiọk, nte ededi, nte ke mme Christian inyeneke ndidi ubak ererimbot. (John 17:14; James 4:4) Ke n̄kemuyo ye oro, mmọ iketieneke Christendom ibuana ke ndinyịme Ediomi M’idụt nte uwụtn̄kpọ ukara Obio Ubọn̄ Abasi. Edi ke 1939 ke mmọ ẹkedifiọk n̄kpọ in̄wan̄în̄wan̄ ẹban̄a edida san̄asan̄a eke Christian.—Se Enyọn̄-Ukpeme (Ikọmbakara) eke November 1, 1939.
19. Nso ufọn ke edise enyịn ke esop akada edi ke ntak emi esop akakade iso odu ke ukpeme?
19 Akananam mmọ inyeneke otu mme ọkwọrọ ederi, okposụkedi ndusụk mbiowo oro ẹkemekde ẹkekerede ke ndikwọrọ ikọ ke esop ekedi n̄kukụre se ẹkpeyomde ẹto mmimọ. Nte ededi, ye ọkpọsọn̄ udọn̄ ndinam n̄kpọ ekekem ye N̄wed Abasi, esop ama afiak odụn̄ọde utom mbiowo ke un̄wana N̄wed Abasi, anamde ntre ediwak ini ebe ke mme ikpehe Enyọn̄-Ukpeme. Ẹma ẹnam mme ukpụhọde ke ndutịm esop ke n̄kemuyo ye se N̄wed Abasi owụtde.
20-22. Didie ke ẹkekaiso sụn̄sụn̄ nditịm esop idem man anam utom editan̄a Obio Ubọn̄ ke ofụri ererimbot oro ẹkebemde iso ẹtịn̄?
20 Ke ẹketịm ofụri esop idem ndinam utom oro Ikọ Abasi okonịmde ọnọ eyo nnyịn mma. (Isaiah 61:1, 2) Ke nso udomo ke ẹkenyene nditan̄a eti mbụk ke eyo nnyịn? Jesus ọkọdọhọ ete: “Ẹnyene ndibem iso n̄kwọrọ gospel nnọ kpukpru mme idụt.” (Mark 13:10) Ke idaha ekikere owo, utom oro ekesiwak nditie nte se owo mîdikemeke ndinam.
21 Edi, ye mbuọtidem ke Christ nte Ibuot esop, asan̄autom emi anamde akpanikọ onyụn̄ enyenede ọniọn̄ amasan̄a aka iso iso. (Matthew 24:45) Ke edinam akpanikọ ye ke usụn̄ enyenede iwụk, mmọ ẹwụt ikọt Jehovah utom oro anade ẹnam. Ọtọn̄ọde ke 1919 kaiso, ẹma ẹdori n̄kaiso nsọn̄uyo ke utom an̄wautom. Ye ediwak owo, ikedịghe mmemmem n̄kpọ ndisan̄a ke ufọk ke ufọk nnyụn̄ nnyene nneme ye isenowo (Utom 20:20) Edi mme utọ ibuotikọ ukpepn̄kpọ nte “Ọfọfọn Ọnọ Mmọ eke Mîkopke Ndịk” (ke 1919) ye “Ẹsọn̄ Esịt” (ke 1921) ẹma ẹn̄wam ndusụk owo nditọn̄ọ utom oro, ye mbuọtidem ke Jehovah.
22 Ke 1922, eben̄e oro “ẹtan̄a, ẹtan̄a, ẹtan̄a Edidem ye obio ubọn̄ esie” ama ọnọ nsịnudọn̄ oro ẹkeyomde man ẹnọ utom emi uwọrọiso oro odotde. Ọtọn̄ọde ke 1927 kaiso, ẹma ẹdon̄ode mbiowo oro mîkenyịmeke mbiomo N̄wed Abasi oro ẹfep ke itieutom. Ke n̄kpọ nte ini oro, ẹma ẹnọ mme andida ke ibuot N̄ka oro ẹsan̄ade-san̄a, kpa mbonisan̄ ido ukpono, ndidi mme adausụn̄ ke utom n̄kann̄kụk, ẹnọde mme asuanetop ọkpọkpọ item ke utom an̄wautom. Idịghe kpukpru owo ẹkekeme ndinam utom usiakusụn̄, edi ke mme utịturua ediwak owo ẹma ẹsida ofụri usen ndinam utom, ẹtọn̄ọde ke tụhi tụhi usenubọk, ẹtrede ke ata esisịt ini ndibịt itọn̄, ndien ekem ẹkade iso ke utom tutu osịm mbubịteyo. Mmọ oro ẹkedi mme akpan ini n̄kọri ke utom ukara Abasi, ndien nnyịn imọbọ akwa ufọn ke ndidụn̄ọde usụn̄ nte Jehovah ọkọnọde ikọt esie ndausụn̄. Enye ke akaiso ndinam ntre. Ye edidiọn̄ esie, ẹyeda utom edikwọrọ eti mbụk Obio Ubọn̄ oro ẹma ẹkewụk mi ẹkesịm utịt nte okụtde unen.
Nte Afo ke Odu ke Ekpeme?
23. Kaban̄a ima Christian ye edida san̄asan̄a n̄kpọn̄ ererimbot, didie ke nnyịn owo kiet kiet ikeme ndiwụt ke nnyịn ke idu ke ukpeme?
23 Ke ndinam n̄kpọ mban̄a ndausụn̄ Jehovah, esop esie aka iso ndinam nnyịn idu ke edidemede iban̄a mme edinam ye edu oro ẹkpenamde ẹdiọn̄ọ nnyịn nte ubak ererimbot, ke ntre idude ke itiendịk ndibe mfep ye enye. (1 John 2:17) N̄ko, oyom nnyịn owo kiet kiet idu ke ukpeme ebe ke ndinam n̄kpọ mban̄a ndausụn̄ Jehovah. Jehovah n̄ko ọnọ nnyịn item ndidu uwem nnyụn nnam utom ọtọkiet. Esop esie aman̄wam nnyịn ndikọri esịtekọm nnọ se ima Christian enen̄erede ọwọrọ. (1 Peter 4:7, 8) Nnyịn ndidu ke ukpeme oyom ete nnyịn isịn ifịk idomo ndida item emi isịn ke edinam, kpa ye mme unana mfọnmma eke owo.
24, 25. Kaban̄a nso akpan ntak ke nnyịn ikpodu ke ukpeme, ye nso idotenyịn ke ekikere?
24 Kpukpru ini, asan̄autom emi anamde akpanikọ onyụn̄ enyenede ọniọn̄ eti nnyịn ete: “Buọt idemfo ye Jehovah ke ofụri esịt fo; ndien kûberi edem ke asian fo.” (Mme N̄ke 3:5) “Ẹkûdop akam.” (1 Thessalonica 5:17) Ẹnọ nnyịn item ndikpep ndikọn̄ mme ubiere nnyịn ke Ikọ Abasi, ndiyak ikọ emi edi ‘utuenikan̄ ukot nnyịn ye un̄wana usụn̄ nnyịn.’ (Psalm 119:105) Ke ima ima usụn̄, ẹsịn udọn̄ ẹnọ nnyịn ndinịm edikwọrọ eti mbụk Obio Ubọn̄ Abasi akpa ke uwem nnyịn, kpa utom oro Jesus ekebemde iso etịn̄ aban̄a eyo nnyịn.—Matthew 24:14.
25 Ih, ke akpanikọ asan̄autom emi anamde akpanikọ onyụn̄ enyenede ọniọn̄ ke odu ke ukpeme. Oyom nnyịn owo kiet kiet n̄ko idu ke ukpeme. Nte utịp edinam ntre, akpakam ẹkụt nnyịn ke otu mbon oro ẹnyenede unyịme ke iso Eyen owo ke ini enye edide ndibiere ikpe.—Matthew 24:30; Luke 21:34-36.
[Mme Ikọ idakisọn̄]
a Faith on the March, emi A. H. Macmillan, Prentice-Hall, Inc., ẹwetde, 1957, page 19-22.
b Se Enyọn̄-Ukpeme (Ikọmbakara) eke August 15, 1966, page 504-510.
Ke Ndidụn̄ọde
◻ Nte ẹwụtde ke Matthew 24:42, ntak emi oyomde nnyịn idu ke ukpeme?
◻ Didie ke Jesus ye mme anditiene enye eke akpa isua ikie ẹkekaiso ẹdu ke ukpeme ke n̄kan̄ eke spirit?
◻ Toto ke 1870, nso mme n̄kpọntịbe ẹda itie ke ntak emi mme asan̄autom Jehovah ẹdude ke ukpeme?
◻ Nso idinọ uyarade nte ke nnyịn owo kiet kiet ke idu ke ukpeme?
[Mme ndise ke page 23]
Jesus ama esịn idem ke utom oro Ete esie ọkọdọn̄de enye. Enye n̄ko ama esibọn̄ akam ke ofụri esịt
[Ndise ke page 24]
Charles Taze Russell ke ukperedem isua esie
[Ndise ke page 25]
N̄kpọ nte mme ọkwọrọ Obio Ubọn̄ 4,700,000 ke esịn ifịk ke ofụri isọn̄