Ẹtop Kpukpru Editịmede Esịt Mbufo Ẹdori Jehovah
“Ẹsụhọde idem . . . ke idak ọkpọsọn̄ ubọk Abasi, man Enye ekpemenede mbufo onịm ke enyọn̄ ke edikem ini. Ẹtop kpukpru ọkpọsọn̄ ekikere eke otịmerede mbufo esịt ẹduọk ẹdori Enye, koro Enye ke ekere mbufo.”—1 PETER 5:6, 7.
1. Didie ke editịmede esịt ekeme nditụk nnyịn, ndien didie ke ẹkeme ndinam emi an̄wan̄a?
EDITỊMEDE esịt ekeme nditụk uwem nnyịn akamba akamba. Ẹkeme ndimen enye ndomo ye odudu emi ndusụk ini esitịmede inem inem ikwọ oro ẹsikopde ke radio. Edieke n̄kpọ mîfịnake ofụm oro ọnọde radio odudu, ẹkeme ndikop inem inem ikwọ onyụn̄ ekeme ndinam ekikere ana sụn̄-n̄. Nte ededi, uyat uyat uyom otode odudu oro esitịmede inem ikwọ ekeme idem nditịmede ata inem inem ikwọ, anamde nnyịn ikop iyatesịt ye edikpu. Editịmede esịt ekeme nditụk emem oro nnyịn inyenede ukem ntre. Enye ekeme ndifek nnyịn ata akamba akamba tutu nnyịn ikemeke ndise mban̄a mme akpan n̄kpọ. Ke akpanikọ, “mfụhọ ke esịt owo eyenụk enye ọduọ.”—Mme N̄ke 12:25.
2. Nso ke Jesus Christ eketịn̄ aban̄a “ekikere uwem”?
2 Jesus Christ ama etịn̄ aban̄a n̄kpọndịk oro odude ke ndiyak ekikak editịmede esịt otịmerede owo. Ke prọfesi esie aban̄ade ukperedem usen, enye ama akpak ete: “Ẹkpeme idem mbufo, mbak uyụhọ udia ye mmịn ye ekikere uwem emi ẹdinam esịt mbufo odobi, ndien usen oro edibuat mbufo nte ekpọ; koro usen oro eyesịm kpukpru mmọemi ẹdụn̄de ke iso isọn̄. Edi mbufo ẹtaba idap kpukpru ini, ẹnyụn̄ ẹkpe ubọk, man mbufo ẹkpekeme ndibọhọ kpukpru n̄kpọ oro ẹdiwọrọde, nnyụn̄ nda ke iso Eyen Owo.” (Luke 21:34-36) Ukem nte uyụhọ udia ye mmịn ẹkemede ndida mbamba idaha ekikere ndi, ntre ke ediyak “ekikere uwem” efek owo ekeme ndinam nnyịn itaba ukeme use n̄kpọ ke nnennen usụn̄, osụn̄ọde ke mme utịp oro ẹkamade n̄kpọ mmọn̄eyet.
Se Editịmede Esịt Edide
3. Didie ke ẹkabade “editịmede esịt,” ndien nso idi ndusụk ntak esie?
3 Ẹkabade “editịmede esịt” nte “ubiak m̀mê ndịk unana ekikere ndidu ke emem awak[de] ndidi ke ntak ndiọkiso oro asan̄ade ekpere m̀mê oro ẹdoride enyịn ẹban̄a.” Enye edi “ọkpọsọn̄ ekikere oro asan̄ade ye ndịk m̀mê udọn̄” ọkọrọ ye “etikwo etikwo ye ekikak ekikak ekikere nsịn̄ede ye ndịk oro esiwakde ndisio mme idiọn̄ọ ikpọkidem ndi (nte editịbe ibibiak, mfịghe, ye oti ndiduọ ọsọp), ebe ke ndinyene eyịghe mban̄a ata idem n̄kpọ ye uduot ndịk, onyụn̄ oto edinyene eyịghe mban̄a ukeme idemowo ndikan emi.” (Webster’s Ninth New Collegiate Dictionary) Ntre editịmede esịt ekeme ndidi mfịna oro awakde n̄kukọhọ. Ke otu ediwak n̄kpọ oro ẹdide ntak esie ẹdi udọn̄ọ, usọn̄, ndịk ubiatibet, editaba utom, ye udọn̄ oro owo enyenede aban̄a mfọnọn̄kpọ ubon esie.
4. (a) Nso ke ọfọn iti iban̄a mme owo ye editịmede esịt mmọ? (b) Edieke nnyịn inyenede editịmede esịt, nso ke ẹkeme ndinam?
4 Nte an̄wan̄ade, nsio nsio udomo editịmede esịt ẹdu, ukem nte nsio nsio idaha m̀mê mme ntak oro ẹnamde enye edemede ẹdude. Idịghe kpukpru owo ẹsinam n̄kpọ ẹban̄a idaha oro odude ke ukem usụn̄. Ntem, oyom nnyịn ifiọk ite ke idem ọkpọkọm n̄kpọ mîfịnake nnyịn, enye ekeme ndidi ntak ọkpọsọn̄ editịmede esịt ọnọ ndusụk ekemmọ mme andituak ibuot nnọ Jehovah. Nso ke ikeme ndinam edieke editịmede esịt osịmde utọ udomo oro anamde nnyịn ikemeke ndikaiso n̄wụk ekikere ke mme inem inem akpanikọ Ikọ Abasi oro ẹdude ke n̄kemuyo? Nso edieke editịmede esịt otụkde nnyịn tutu nnyịn ikemeke ndiwụk ntịn̄enyịn ke mme eneni ẹban̄ade itie edikara Jehovah ye nsọn̄ọnda Christian? Ekeme ndidi nnyịn idikemeke ndikpụhọde mme idaha nnyịn. Utu ke oro, oyom nnyịn iyom mme akpan n̄kpọ N̄wed Abasi oro ẹdin̄wamde nnyịn ndiyọ editịmede esịt oro mîdotke emi n̄kpọsọn̄ mfịna uwem ẹdide ntak.
Un̄wam Odu
5. Didie ke nnyịn ikeme ndinam n̄kpọ ke n̄kemuyo ye Psalm 55:22?
5 Ke ini mme Christian ẹyomde un̄wam ke n̄kan̄ eke spirit ẹnyụn̄ ẹdide se editịmede esịt efekde, mmọ ẹkeme ndibọ ndọn̄esịt nto Ikọ Abasi. Enye ọnọ ndausụn̄ oro ẹkemede ndiberi edem onyụn̄ ọnọ nnyịn ediwak nsọn̄ọ nte ke nnyịn idụhe ikpọn̄ nte mme anam-akpanikọ asan̄autom Jehovah. Ke uwụtn̄kpọ, David andiwet psalm ọkọkwọ ete: “Top mbiomo fo nọ Jehovah, ndien enye eyekama fi: enye idiyakke edinen owo esehede ke nsinsi.” (Psalm 55:22) Didie ke nnyịn ikeme ndinam n̄kpọ ke n̄kemuyo ye mme ikọ ẹmi? Ebe ke nditop kpukpru editịmede esịt, mfịna, ndịk, ye edikpu nnyịn ndori ima ima Ete nnyịn eke heaven. Emi eyen̄wam ndinọ nnyịn ifụre ekikere ye nsụkesịt.
6. Nte ekemde ye N̄wed Mbon Philippi 4:6, 7, nso ke akam ekeme ndinam nnọ nnyịn?
6 Akam ofụri esịt ofụri ini edi akpan n̄kpọ edieke anade nnyịn itop mbiomo nnyịn, esịnede kpukpru editịmede esịt nnyịn, idori Jehovah. Emi eyeda emem esịtidem ọsọk nnyịn, koro apostle Paul ekewet ete: “Ẹkûtịmede esịt ke baba n̄kpọ kiet, edi ke kpukpru n̄kpọ, ẹsan̄a ye akam ye n̄kpeubọk ye ekọm, ẹsian Abasi se mbufo ẹyomde. Ndien emem Abasi, emi ayan̄ade ifiọk owo, eyekpeme mbufo esịt ye ekikere ke Christ Jesus.” (Philippi 4:6, 7) “Emem Abasi” oro mînyeneke mbiet edi esen esen emem oro mme asan̄autom Jehovah oro ẹma ẹkeyak idem ẹnọ ẹdarade idem ke mme idaha oro ẹtiede ata idomo idomo. Enye osụn̄ọ oto n̄kpet n̄kpet ọkpọkpọ itie ebuana nnyịn ye Abasi. Nte nnyịn ibọn̄de akam iben̄e edisana spirit inyụn̄ iyakde enye onụk nnyịn, nnyịn ibọhọke kpukpru mfịna uwem, edi nnyịn imadara emem edide mbun̄wụm spirit. (Luke 11:13; Galatia 5:22, 23) Editịmede esịt ikanke nnyịn ubọk, koro nnyịn imọfiọk ite ke Jehovah amanam kpukpru ikọt esie oro ẹnamde akpanikọ ‘ẹtie ke ifụre’ ndien idiyakke n̄kpọ ndomokiet oro edinọde nnyịn unan ke nsinsi otịbe.—Psalm 4:8.
7. Nso udeme ke mbiowo Christian ẹkeme ndinyene ke ndin̄wam nnyịn iyọ editịmede esịt?
7 Edi, nso edieke editịmede esịt nnyịn akade iso, idem okposụkedi nnyịn itiede ikere N̄wed Abasi inyụn̄ ikọbọde ke edibọn̄ akam? (Rome 12:12) Mbiowo oro ẹmekde ke esop ẹdi n̄ko ndutịm Jehovah ndin̄wam nnyịn ke n̄kan̄ eke spirit. Mmọ ẹkeme ndidọn̄ nnyịn esịt nnyụn̄ n̄n̄wam nnyịn ebe ke ndikama Ikọ Abasi n̄ko ebe ke ndibọn̄ akam ye nnyịn nnyụn̄ mbọn̄ mban̄a nnyịn. (James 5:13-16) Apostle Peter akakpak ekemmọ mbiowo ete ẹkpeme otuerọn̄ Abasi ke imaesịt, ke ifịk, ye ke usụn̄ oro ẹnịmde uwụtn̄kpọ. (1 Peter 5:1-4) Iren ẹmi ẹnyene udọn̄ ẹban̄a mfọnọn̄kpọ nnyịn ẹnyụn̄ ẹyom ndin̄wam. Nte ededi, man ibọ ufọn ọyọhọ ọyọhọ ito un̄wam mbiowo inyụn̄ inam n̄kpọ nte ọfọnde ke n̄kan̄ eke spirit ke esop, oyom kpukpru nnyịn ida item Peter isịn ke edinam: “Mbufo n̄kparawa, ẹsụk idem ẹnọ mbiowo. Kpukpru mbufo ẹnyụn̄ ẹbọbọ nsụkidem ke idem nte mbọbọ, ẹnam n̄kpọ ẹnọ kiet eken: koro Abasi an̄wan̄wana ye mbon iseri, edi ọfọn ido ye mbon nsụkidem.”—1 Peter 5:5.
8, 9. Nso ndọn̄esịt ke ikeme ndinyene nto 1 Peter 5:6-11?
8 Peter ama adian ete: “Ẹsụhọde idem ndien ke idak ọkpọsọn̄ ubọk Abasi, man Enye ekpemenede mbufo onịm ke enyọn̄ ke edikem ini. Ẹtop kpukpru ọkpọsọn̄ ekikere eke otịmerede mbufo esịt ẹduọk ẹdori Enye, koro Enye ke ekere mbufo. Ẹfara ke idem ẹnyụn̄ ẹkpeme; asua mbufo, kpa Satan, ke oyoyo nte lion eke okụnide, oyom se editade. Ẹsọn̄ọ ẹda ke mbuọtidem ẹn̄wana ye enye, ke ẹfiọkde ẹte ke kpa utọ ndutụhọ emi ke ọyọyọhọ ke otu nditọete mbufo ẹmi ẹdude ke ererimbot. Ndien Abasi kpukpru mfọn, emi okokotde mbufo ete ẹdidụk ke nsinsi ubọn̄ Imọ ke Christ, ke ini mbufo ẹma ẹkụt ukụt ke ekpri ini, ẹyenam mbufo ẹfọn ẹma, ẹnyụn̄ ẹsọn̄ọ ẹda, ẹnyụn̄ ẹkop idem. Yak edi Enye edi Andikara ke nsinsi nsinsi. Amen.”—1 Peter 5:6-11.
9 Edi n̄kpọ ndọn̄esịt didie ntem ndifiọk nte ke nnyịn imekeme ‘nditop kpukpru ọkpọsọn̄ ekikere eke otịmerede nnyịn esịt idori Abasi koro enye ekere aban̄a nnyịn’! Ndien edieke ndusụk editịmede esịt nnyịn osụn̄ọde oto ukeme oro Satan esịnde ndibiat itie ebuana nnyịn ye Jehovah ebe ke ndida ukọbọ ye mme ndutụhọ eken ntiene nnyịn, nte idịghe utịben̄kpọ ndifiọk nte ke n̄kpọ eyefọn ye mbon nsọn̄ọnda? Ih, ke nnyịn ima ikokụt ukụt ke ekpri ini, Abasi ofụri mfọnido oro owo mîdotke eyenam nnyịn ifọn ima eyenyụn̄ anam nnyịn isọn̄ọ ida inyụn̄ ikop idem.
10. Akpa Peter 5:6, 7 etịn̄ aban̄a nso edu ita oro ẹkemede ndin̄wam ndisụhọde editịmede esịt?
10 Akpa Peter 5:6, 7 etịn̄ aban̄a edu ita oro ẹkemede ndin̄wam nnyịn iyọ editịmede esịt. Kiet edi nsụhọdeidem, m̀mê “nsụkidem.” 1Pe 5 Ufan̄ikọ 6 etre ye ikọ oro “ke edikem ini,” ọnọde ekikere ufọn edime ime. 1Pe 5 Ufan̄ikọ 7 owụt nte ke nnyịn imekeme nditop kpukpru editịmede esịt nnyịn ye mbuọtidem idori Abasi ‘koro enye ekere aban̄a nnyịn,’ ndien mme ikọ oro ẹsịn udọn̄ ẹnọ edinyene ọyọhọ mbuọtidem ke Jehovah. Ntre ẹyak nnyịn ise nte nsụhọdeidem, ime, ye ọyọhọ mbuọtidem ke Abasi ekemede ndin̄wam ndisụhọde editịmede esịt.
Nte Nsụhọdeidem Ekemede Ndin̄wam
11. Didie ke nsụhọdeidem ekeme ndin̄wam nnyịn iyọ editịmede esịt?
11 Edieke nnyịn isụhọrede idem, nnyịn iyenyịme ke mme ekikere Abasi ẹnen̄ede ẹkpon ẹkan eke nnyịn. (Isaiah 55:8, 9) Nsụhọdeidem an̄wam nnyịn ndifiọk nte ke ukeme ukere n̄kpọ nnyịn enyene adan̄a ke ẹmende ẹdomo ye kpukpru ekikere Jehovah oro ẹnen̄ede ẹka anyan. Enye okụt mme n̄kpọ oro nnyịn mîfiọkke, nte ẹwụtde ke se iban̄ade edinen owo oro Job. (Job 1:7-12; 2:1-6) Ebede ke ndisụhọde idem nnyịn “ke idak ọkpọsọn̄ ubọk Abasi,” nnyịn idiọn̄ọ usụhọde itie nnyịn ke ebuana ye Akakan Andikara. Ke n̄kan̄ eken, emi an̄wam nnyịn ndiyọ mme idaha oro enye onyịmede ẹdu. Ekeme ndidọn̄ nnyịn ndinyene ubọhọ usọp usọp, edi sia mme edu Jehovah ẹdude ke mfọnmma idaha oro adade ukem ukem, enye ọfiọk nnennen nnennen ini ye nte akpanamde n̄kpọ ke ibuot nnyịn. Do, ukem nte n̄kpri nditọwọn̄, ẹyak nnyịn ke nsụhọdeidem iberi edem ke ọkpọsọn̄ ubọk Jehovah, inyenede mbuọtidem nte ke enye eyen̄wam nnyịn iyọ mme editịmede esịt nnyịn.—Isaiah 41:8-13.
12. Edieke nnyịn ke nsụhọdeidem idade mme ikọ eke Mme Hebrew 13:5 isịn ke edinam, didie ke emi ekeme nditụk editịmede esịt mban̄a inyene obụkidem?
12 Nsụhọdeidem esịne edinyịme ndida item otode Ikọ Abasi nsịn ke edinam, emi ekemede ediwak ini ndisụhọde editịmede esịt. Ke uwụtn̄kpọ, edieke editịmede esịt nnyịn osụn̄ọde oto ọkpọsọn̄ edisịn idem ke ediyom n̄kpọ obụkidem, ọkpọfọn nnyịn ndikere mban̄a item Paul emi: “Ẹkûkọmọ ke ima inyene; ẹnem esịt ke se mbufo ẹnyenede; koro Abasi ọdọhọde ete, Ndikpụhu fi, ndinyụn̄ n̄kpọn̄ke fi.” (Mme Hebrew 13:5) Ebede ke ndisụhọde idem nda utọ item oro nsịn ke edinam, ediwak owo ẹmesio idemmọ ẹfep ke ọkpọsọn̄ editịmede esịt mban̄a inyene obụkidem. Ke adan̄aemi ekemede ndidi mmọ inyeneke uforo ke n̄kan̄ okụk, enye ikarake ekikere mmọ tutu ọnọ mmọ unan ke n̄kan̄ eke spirit.
Udeme Oro Ime Enyenede
13, 14. (a) Kaban̄a ime ime ediyọ, nso uwụtn̄kpọ ke eren oro Job ọkọnọ? (b) Ndibet Jehovah ke ime ekeme ndinam nso nnọ nnyịn?
13 Ikọ oro “ke edikem ini” ke 1 Peter 5:6 ọnọ ekikere kaban̄a ime ime ediyọ. Ndusụk ini mfịna esika iso ke anyanini, ndien oro ekeme ndinam editịmede esịt ototịm okpon. Adan̄aoro akpan akpan ke oyom nnyịn iyak mme n̄kpọ isịn Jehovah ke ubọk. Mbet oro James ekewet ete: “Nnyịn idọhọ ite, ọfọfọn ye mmọemi ẹma ẹbiom ukụt: mbufo ẹmokop ẹban̄a ime Job, ẹmenyụn̄ ẹkụt se Ọbọn̄ anamde enye ke akpatre, nte Ọbọn̄ enyenede esịtmbọm, onyụn atuade owo mbọm.” (James 5:11) Job ama osobo nditaha ke n̄kan̄ ndutịm uforo, ataba nditọ duop ke n̄kpa, ọbọ ufen oto akama itekesịt udọn̄ọ, abian̄a abian̄a mbon ndọn̄esịt ẹma ẹnyụn̄ ẹbiom enye ikpe ke ukwan̄ usụn̄. Ke nsụhọde n̄kaha, ndusụk udomo editịmede esịt ama odot ke mme utọ idaha oro.
14 Nte ededi, Job ekedi uwụtn̄kpọ ke ime ime ediyọ. Edieke nnyịn isobode ọkpọsọn̄ idomo mbuọtidem, ekeme ndiyom nnyịn itie ibet ubọhọ, idem kpa nte enye akanamde. Edi Abasi ama anam n̄kpọ ke ibuot esie, ke akpatre anamde Job ọbọhọ ndutụhọ esie onyụn̄ ọnọ enye utịp uwak uwak. (Job 42:10-17) Ndibet Jehovah ye ime anam ime nnyịn ọkọri onyụn̄ ayarade nte uten̄e oro nnyịn inyenede inọ enye otụn̄ọde.—James 1:2-4.
Buọt Idem ye Jehovah
15. Ntak emi nnyịn ikpọbuọtde idem ye Jehovah ọyọhọ ọyọhọ?
15 Peter akakpak ekemmọ mme andinịm ke akpanikọ ete ‘ẹtop kpukpru ọkpọsọn̄ ekikere eke otịmerede mmọ esịt ẹduọk ẹdori Abasi koro enye ke ekere mmọ.’ (1 Peter 5:7) Ntre nnyịn imekeme ikponyụn̄ inyene ndinyene ọyọhọ mbuọtidem ye Jehovah. Mme N̄ke 3:5, 6 ọdọhọ ete: “Buọt idemfo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo onịm.” Ke ntak mme ifiọk n̄kpọntịbe ini edem, ọsọn̄ ndusụk owo oro editịmede esịt efekde ndibuọt idem ye mbon en̄wen. Edi nnyịn imenyene kpukpru ntak ndibuọt idem ye Andibot nnyịn, kpa Ntọn̄ọ ye Andinịm uwem. Idem edieke nnyịn mîbuọtke idem ke edinam nnyịn ke ndusụk n̄kpọ, nnyịn imekeme ndiberi edem ke Jehovah kpukpru ini ndinyan̄a nnyịn nsio ke mme afanikọn̄.—Psalm 34:18, 19; 36:9; 56:3, 4.
16. Nso ke Jesus Christ eketịn̄ aban̄a editịmede esịt kaban̄a mme n̄kpọ obụkidem?
16 Ndibuọt idem ye Abasi esịne ndikop uyo Eyen esie, Jesus Christ, emi ekekpepde se enye ekekpepde oto Ete esie. (John 7:16) Jesus ama akpak mbet esie ‘ndibon n̄kpọuto ke heaven’ ebe ke ndinam n̄kpọ Jehovah. Edi nso kaban̄a mme n̄kpọ obụkidem ẹbuanade udia, edisịnen̄kpọ, ye ufọkidụn̄? Jesus ọkọnọ item ete, “Ẹkûtịmede esịt.” Enye ama owụt nte ke Abasi ọbọk mme inuen. Enye esịne mme flawa ọfọn̄ ediye ediye. Nte mme asan̄autom Abasi ẹdide owo ikponke ikan mmọemi? Ke akpanikọ mmọ ẹkpon ẹkan. Ntem, Jesus ama akpak ete: “Ẹkam ebem iso ẹyom Obio Ubọn̄ Esie ye edinen ido [Abasi]; ndien ẹyedian kpukpru n̄kpọ ẹmi ẹnọ mbufo.” Jesus ama akaiso ete: “Ẹkûtịmede esịt ẹban̄a n̄kpọn̄ ndien; koro n̄kpọn̄ eyeda utịmede esịt esie edi.” (Matthew 6:20, 25-34) Ih, imoyom udia, edin̄wọn̄ n̄kpọ, edisịnen̄kpọ, ye ufọkidụn̄, edi edieke nnyịn ibuọtde idem ye Jehovah, nnyịn iditịmekede esịt iban̄a mme n̄kpọ ẹmi nte mîdotke.
17. Didie ke nnyịn ikeme ndinam ufọn edibem iso nyom Obio Ubọn̄ an̄wan̄a?
17 Man ibem iso iyom Obio Ubọn̄, ana nnyịn ibuọt idem ye Abasi inyụn̄ inịm mme n̄kpọ oro ẹdide mme ebeiso n̄kpọ ẹnọ nnyịn ke nnennen idaha. Onịm enịm oro mînyeneke n̄kpọ uda n̄kot ibifịk ekeme ndisụhọde ndụk isọn̄ mmọn̄ ndikoyom n̄kọp emi pearl esịn̄ede ke esịt. Emi edi usụn̄ oro enye adade ese aban̄a ufọk esie. Ata ebeiso n̄kpọ, ke akpanikọ! Edi nso idi akpan n̄kpọ ikan? Ofụm! Ana enye ọwọrọ edi enyọn̄ mmọn̄ ndien ndien man afiak edikot ofụm esịn ọyọhọ obufre esie. Ofụm edi ata ebeiso n̄kpọ. Ukem ntre, ekeme ndiyom nnyịn ibuana ke editịm n̄kpọ emi ke ndusụk usụn̄ man inyene mme n̄kpọ uduuwem. Nte ededi, ana mme n̄kpọ eke spirit ẹbem iso koro uwem ubon nnyịn ọkọn̄ọde ke mme n̄kpọ ẹmi. Man ifep nditịmede esịt mban̄a mme n̄kpọ obụkidem nte mîdotke, ana nnyịn inyene ọyọhọ mbuọtidem ke Abasi. Akan oro, ‘ndiyọhọ kpukpru ini ke utom Ọbọn̄’ ekeme ndin̄wam ndisụhọde editịmede esịt koro “idatesịt Jehovah” edi odudu nnyịn.—1 Corinth 15:58; Nehemiah 8:10.
Ẹkaiso Nditop Editịmede Esịt Mbufo Ndori Jehovah
18. Nso uyarade idu nte ke nditop kpukpru editịmede esịt nnyịn ndori Jehovah ekeme ndinen̄ede n̄n̄wam nnyịn?
18 Man iwụk enyịn ise n̄kpọ in̄wan̄în̄wan̄ ke n̄kan̄ eke spirit, ana nnyịn ikaiso nditop kpukpru editịmede esịt nnyịn ndori Jehovah. Ẹti kpukpru ini ẹte ke enye enen̄ede ekere aban̄a mme asan̄autom esie. Ke ndinam an̄wan̄a: Ke ntak unana edinam akpanikọ ebe esie nnọ enye, editịmede esịt Christian an̄wan kiet ama okpon osịm udomo oro enye mîkekemeke ndide idap. (Men Psalm 119:28 domo.) Nte ededi, ke anade ke bed, enye eyetop kpukpru editịmede esịt esie odori Jehovah. Enye eyetịn̄ se idude enye ke esịt ọnọ Abasi, asiande enye aban̄a ubiak oro enye ye n̄kpri nditọiban esie iba ẹkekopde. Ke enye ama ekeseme oyom ubọhọ ke akam ofụri esịt, enye kpukpru ini eyekeme ndide idap, koro enye ọkọbuọtde idem nte ke Jehovah eyese aban̄a imọ ye nditọ imọ. N̄wan emi ama akadianade ndọ nte ekemde ye N̄wed Abasi mi omokop inemesịt kemi ndidọ ebiowo.
19, 20. (a) Nso idi ndusụk usụn̄ oro nnyịn ikemede ndiyọ editịmede esịt? (b) Nso ke nnyịn ikpenyene ndikaiso nnam ye kpukpru editịmede esịt nnyịn?
19 Nte ikọt Jehovah, nnyịn imenyene nsio nsio usụn̄ ndiyọ editịmede esịt. Ndida Ikọ Abasi nsịn ke edinam edi n̄kpọ un̄wam akpan akpan. Nnyịn imenyene uwak udia eke spirit oro Abasi ọnọde ebe ke “asan̄autom emi anamde akpanikọ, onyụn̄ enyenede ọniọn̄,” esịnede mme ibuotikọ oro ẹnọde un̄wam ye ifụre oro ẹmịn̄de ke Enyọn̄-Ukpeme ye Awake! (Matthew 24:45-47) Nnyịn imenyene un̄wam edisana spirit Abasi. Akam ofụri ini ye ofụri esịt enyene ufọn ọnọ nnyịn akamba akamba. Mbiowo Christian oro ẹmekde ẹdu ke mben̄eidem ẹnyụn̄ ẹnyịme ndinọ un̄wam eke spirit ye ndọn̄esịt.
20 Nsụhọdeidem ye ime nnyịn ẹnen̄ede ẹnyene ufọn ke ndise mban̄a editịmede esịt oro ekemede ndifịna nnyịn. Se inen̄erede idi akpan n̄kpọ edi ọyọhọ mbuọtidem ke Jehovah, koro mbuọtidem nnyịn ọsọn̄de idem nte nnyịn ikụtde un̄wam ye ndausụn̄ esie. Ke n̄kan̄ eken, mbuọtidem ke Abasi ekeme ndinam nnyịn itre nditịmede esịt nte mîdotke. (John 14:1) Mbuọtidem anam nnyịn ibem iso iyom Obio Ubọn̄ inyụn̄ isịn idem ke idara idara utom Ọbọn̄, emi ekemede ndin̄wam nnyịn iyọ editịmede esịt. Utọ utom oro anam nnyịn idu ke ifụre ke otu mmọ oro ẹdikwọde itoro Abasi ke nsinsi nsinsi. (Psalm 104:33) Ẹyak nnyịn ke ntre ikaiso nditop kpukpru editịmede esịt nnyịn ndori Jehovah.
Didie ke Afo Ọkpọbọrọ?
◻ Didie ke ẹkeme ndikabade editịmede esịt?
◻ Nso idi ndusụk usụn̄ oro nnyịn ikemede ndiyọ editịmede esịt?
◻ Didie ke nsụhọdeidem ye ime ẹkeme ndin̄wam ndisụhọde editịmede esịt?
◻ Ke ndiyọ editịmede esịt, ntak edide akpan n̄kpọ ndinyene ọyọhọ mbuọtidem ke Jehovah?
◻ Ntak emi ikpenyenede ndikaiso ntop kpukpru editịmede esịt nnyịn ndori Jehovah?
[Ndise ke page 24]
Nte afo ọmọfiọk ntak emi Jesus ọkọdọhọde ete, “Ẹkûtịmede esịt”?