Mme Ntiense Jehovah ke Ofụri Ererimbot—Sweden

SWEDEN odu ke n̄kan̄ edem usiahautịn inua-akpa Scandinavia onyụn̄ anyanade ana ebe Arctic Circle. Ke ẹdiọn̄ọde ke ofụri ererimbot ke ntak nti ikpọ akai ọkọrọ ye mme n̄kpọdiọhọ mmọn̄ ye mme obot esie, Sweden edi kiet ke otu mme idụt ke Europe emi ẹnen̄ede ẹdụn̄ọ nsuana nsuana ẹkan. Edi, Mme Ntiense Jehovah ẹmekụt unen ke ndiyom mme andima akpanikọ n̄kụt do ọtọn̄ọde ke ukperedem iduọkisua 1800. Kere ban̄a uwụtn̄kpọ eke ndondo emi.

N̄wan kiet ama ekpep Bible ye Mme Ntiense, edi ebe esie ikamaha emi. Enye ama ọdọhọ n̄wan esie ete etre ndikpep n̄kpọ, enye ama onyụn̄ etre. Eren emi akanam utom ke ufọk ubon mmịn. Usen kiet awat o-moto mbiomo ama edi ufọk ubon mmịn oro ye eyeyen esie ekedide isua duop ke emana. Eteeka oro ama ọdọhọ eren oro ese eyeneren emi ke adan̄aemi enye ọdọn̄de mbiomo ke moto. Kaban̄a ikpîkpu edinyene nneme, eren emi ama obụp eyeneren emi m̀mê nso enọ ke enye ọkọbọ ke usọrọ usen emana esie eke ndondo emi. Ke n̄kpaidem eren oro, eyeneren oro ama ọdọhọ ke imọ ye ubon imọ isinịmke mme usọrọ usen emana koro mmimọ idide Mme Ntiense Jehovah. Eyeneren oro n̄ko ama ọdọhọ enye ete ke imọ imesibọ mme enọ ke mme ini en̄wen ke isua ndien ke itabake n̄kpọ ndomokiet, sia imọ inyenede ubon emi etiede ata ima ima. Enye ama adian do ete ke idụhe mme enọ ẹmi ẹkande oro.

Eyeneren oro ama esifiak asan̄a ye eteeka esie aka ediwak ini. Kwa ini, eren oro eyebụp eyeneren emi ediwak mbụme, ndien usụn̄ emi eyeneren emi ekesinọde mme nnennen, in̄wan̄în̄wan̄ ibọrọ ye unana edimen̄e ama esitụk enye etieti. Esịtekọm oro eyeneren emi ekenyenede ọnọ nti n̄kpọ ama otụk enye n̄ko. Okoneyo kiet ke eren oro ama ekese edinam television kiet oro okowụtde mme idiọk idaha ẹmi ẹdude ke ererimbot, enye ama ọfiọk ke imọ inyene ndidụn̄ọde mme n̄kpọ eke spirit otịm ọfọn akan. Enye ama okot Ntiense oro ekesikpepde n̄kpọ ye n̄wan esie ke urụk ukopikọ onyụn̄ ọdọhọ enye afiak edi. Ikebịghike, Ntiense kiet ama esinyene ukpepn̄kpọ Bible ye eren oro, ndien enye ama anam usọp usọp n̄kọri. Enye ama ana baptism ke April 10, 1994. N̄wan esie ana baptism idahaemi n̄ko.

N̄kọri Oyom Edibọp

Sweden edi ebietidụn̄ ọnọ ediwak mme oyom ubọhọ ke esenidụt ẹtode mme idụt en̄wen, ndien Mme Ntiense ke Sweden ẹmenyene nti utịp ke ndikwọrọ ikọ nnọ mmọ. Ke ofụri ofụri utom oro omokụt unen tutu oyom mbufa Ufọkmbono Obio Ubọn̄ man ekeme ndise mban̄a n̄kọri emi. Ọtọn̄ọde ke 1986 osịm 1993, ẹkebọp mme Ufọkmbono Obio Ubọn̄ 37 ẹbe ke usọp usọp usụn̄ ubọpn̄kpọ, ke adan̄aemi ẹketatde ẹnyụn̄ ẹfiakde ẹdiọn̄ mme ufọkmbono 8. Ke 1994 ikpọn̄, ẹma ẹbọp Ufọkmbono Obio Ubọn̄ itiaba efen efen, ẹnyụn̄ ẹfiak ẹdiọn̄ ita.

Idahaemi, mme esop 65 ke ẹbet ndibọ un̄wam ndibọp obufa Ufọkmbono Obio Ubọn̄ mîdịghe nditat m̀mê ndifiak ndiọn̄ enyeoro mmọ ẹnyenede idahaemi. N̄kpọ nte mme anamutom unyịmesịt 2,500 ẹn̄wam ke utọ utom ubọpn̄kpọ oro, ndien mme esop ẹdara ima ima un̄wam mmọ etieti.

Ndusụk ini ẹsikot ikpehe edere edere Sweden, emi anyanarede ana ebe Arctic Circle, idụt emi utịn asiahade ke ufọt okoneyo. Emi edi ntre koro ndusụk ini ke ndaeyo utịn isisopke do. Nte ededi, ke ofụri Sweden, un̄wana akpanikọ n̄ko ke akaiso ndiyama mfọn mfọn. Ye edidiọn̄ Jehovah, un̄wana eke spirit oro idikịmke edi eyekaiso nditotịm nyama.

[Ekebe ke page 8]

IDAHA IDỤT ORO:

Isua Utom 1994

N̄WAKN̄KAN IBAT ẸMI ẸNỌDE IKỌ NTIENSE: 24,246

MBAHADE: Ntiense 1 ke owo 362

MME ANDIDỤK EDITI: 40,372

UKEM MBAHADE MME ASUANETOP ẸDIDE MME ASIAKUSỤN̄: 2,509

UKEM MBAHADE UKPEPN̄KPỌ BIBLE: 11,306

IBAT ẸKENADE BAPTISM: 850

IBAT ESOP: 358

ỌFIS N̄KỌK ITIEUTOM: ARBOGA

[Ndise ke page 9]

Ọfis n̄kọk itieutom ye Ufọkidụn̄ Bethel ke Arboga

[Ndise ke page 9]

Mme akpa Ntiense ke Hjo ẹkesida ekpri bọs emi ẹkụre efakutom okponde n̄kpọ nte kilomita 5,000