Ntọt M’ọkwọrọ Obio Ubọn̄

‘Ndiyama nte Ntantaọfiọn̄ ke Ererimbot’

MME NTIENSE JEHOVAH ẹwọrọ ẹda san̄asan̄a ẹsinyụn̄ ẹwọrọ idiọk etop ke ntak mmọ mîsibọhọ edikịm iyịp nsịn ke idem. Idaha emi, nte ededi, ọsọn̄ọ owụhọ ke Bible. Enye owụt ete ke Abasi akpan edida iyịp nnam n̄kpọ ke idiọk usụn̄, sia iyịp edide ọsọn̄urua n̄kpọ ke enyịn esie. (Genesis 9:3, 4; Leviticus 17:14) Nte utịp edidụn̄ọde N̄wed Abasi ke ibuot nneme emi, Mme Ntiense Jehovah ẹbiere ẹte ke ewụhọ Bible oro nte yak ‘ẹbet iyịp’ abuana edinam edikịm iyịp nsịn ke idem eke eyomfịn in̄wan̄în̄wan̄.—Utom 15:19, 20, 28, 29.

Ke mme isua ndondo emi n̄ka mme ọnọ ibọkusọbọ, ọkọrọ ye esopikpe ke ndusụk idụt, ẹdinyịme ye Mme Ntiense Jehovah ke n̄kpọ emi. Ke uwụtn̄kpọ, ke Denmark ekpri ekaeyen kiet emi ama ekemehe ye ekikere Bible kaban̄a iyịp ama akpa ke ntak mbabuat n̄kpọntịbe moto. Ke ntak emi enye mîkenyịmeke ndibọ edikịm iyịp nsịn ke idem, mme dọkta esie ẹma ẹsịn nsọk ẹnọ usua ọfiọn̄ kiet oro ndutịm usuanetop ekedemerede aban̄a Mme Ntiense Jehovah.

Ete ye eka eyenan̄wan oro ẹma ẹdọhọ ẹte yak ẹnam ndụn̄ọde, ndien ke April 1994 Itieutom Uyom Ufọn Mbon Udọn̄ọ ke Denmark ama ọtọt ubiere oro ẹkesịmde. Enye ọkọdọhọ ete ke owo udọn̄ọ oro ikakpaha ke ntak emi enye mîkọbọhọ iyịp, edi ke ntak idiọk usụn̄ unọ usọbọ. Ubiere oro ọkọkọn̄ọ ke mme ndụn̄ọde oro Itieutom Esede Aban̄a Ebuana Oro Ibọkusọbọ Enyenede ye Ibet ye mbonutom unọ usọbọ ẹkenamde. Ke babru oro ẹkenọde ẹsọk kpukpru itieutom unọ usọbọ ke Denmark, Itieutom Unọ Usọbọ eke Idụt ama ọdọhọ ete ke mme dọkta ẹnyene mbiomo ndinọ Mme Ntiense Jehovah mfọnn̄kan ukpụhọ usọbọidem ekededi oro odude, ẹnyenede edisịn oro mmọ ẹsịnde ndibọ iyịp ke ekikere.

Ikọ efen akabuana Dan, Ntiense emi edide isua 15 ke emana emi akakpade ke ntak udọn̄ọ nsen iyịp. Ke ikọ enyeemi mme dọkta ẹma ẹwụt ukpono ẹnọ uko uko ubiere Dan ndisịn edikịm iyịp nsịn ke idem. Emi ama osụn̄ọ ke ntatara edisuan etop emi ndutịm usuanetop ọkọduọhọde mme dọkta nte ntak n̄kpa Dan. Ediwak owo, nte ededi, ikenyịmeke ye etikwo etikwo etop emi.

Ke uwụtn̄kpọ, akamba etubom ke ufọkn̄wed emi Dan ekesikade ama odu do ke Ufọkmbono Obio Ubọn̄ kaban̄a edinam ubụkowo. Enye ama etịn̄ ke idem akpa imọ aban̄a idiọk mbụk oro ẹkesuande ẹban̄a n̄kpa Dan. Ke ama okosobo nsan̄autom kiet emi edide Ntiense onyụn̄ obụp ediwak mbụme aban̄a Mme Ntiense Jehovah, enye ama ọbọ video Jehovah’s Witnesses—The Organization Behind the Name. Enye ama enen̄ede ama video oro tutu enye anam ndutịm ọnọ kpukpru mme andikpep ke ufọkn̄wed oro ndise enye. Ekem, ẹma ẹwụt kpukpru nditọ ufọkn̄wed video oro, otu ubet ukpepn̄kpọ kiet ke ini kiet.

N̄ko isụn̄utom Denmark emi esede aban̄a nsọn̄idem ikenyịmeke ye idiọk etop oro ẹkesuande ẹban̄a mme dọkta Dan. Enye ama ọdọhọ ete ke dọkta ẹkenam nnennen n̄kpọ ke ndikowụt ukpono nnọ ubiere oro Dan akanamde nte akamba owo ye enyene-iwụk mbuọtidem esie.

Ediwak miliọn mme andikwọrọ Obio Ubọn̄ ẹdu ẹmi ẹnịmde ibet Abasi. Ke ntak n̄kopitem mmọ, mmọ ẹwọrọ ẹda san̄asan̄a, ‘ẹyama nte ntantaọfiọn̄ ke ererimbot.’—Philippi 2:12, 15.