Jehovah Ama Odu Ye Ami
Nte Max Henning Obụkde
Ekedi ke 1933, ndondo oro ke Adolf Hitler okosụk ada ukara ke Germany. Nte ededi, n̄kpọ nte Mme Ntiense Jehovah 500 oro ẹkedude ke ikpehe Berlin ikoyokke. Ediwak n̄kparawa owo ẹma ẹkabade ẹdi mme asiakusụn̄, m̀mê mme asan̄autom uyọhọ ini, ndien ndusụk owo ẹma ẹkam ẹnyịme ndikanam utom ke mme idụt eken ke Europe. Ami ye ufan mi Werner Flatten ima isibụp kiet eken ite: “Ntak emi nnyịn imen̄ede, ibiatde ini nnyịn-e? Ntak emi nnyịn mîwọrọke ikanam utom usiakusụn̄?”
USEN itiaita ke mma n̄kamana ke 1909, mma ndidu ke idak edise enyịn ima ima ete ye eka ẹkedide mme andikpeme mi. Ke 1918 ubon nnyịn ama ofụhọ etieti ke ini eyenan̄wan mme andikpeme mi akakpade ke mbuari. Esisịt ini ke oro ebede Nditọ Ukpepn̄kpọ Bible, nte ẹkediọn̄ọde Mme Ntiense Jehovah ini oro, ẹma ẹwaha ẹdi enyịnusụn̄ nnyịn, ndien esịt ete ye eka ẹdide mme andikpeme mi ẹma ẹberede ntatara ntatara ndinyịme akpanikọ Bible. Mmọ n̄ko ẹma ẹkpep mi ndiwụt esịtekọm nnọ mme n̄kpọ eke spirit.
Mma nsịn ifịk ke ukpepn̄kpọ mi ke ufọkn̄wed nnyụn̄ n̄kabade ndi esịn mmọn̄ esan̄ukwak. Edi ke edide akpan n̄kpọ akan, mma nnyene iwụk ke n̄kan̄ eke spirit. Ami ye Werner ima itọn̄ọ usiakusụn̄ ke May 5, 1933. Nnyịn ima isiwat enan̄ukwak ika obio oro ọwọrọde ọkpọn̄ Berlin ke n̄kpọ nte kilomita 100, ke ebiet emi nnyịn ikodude inyụn̄ ikwọrọ ikọ ke urua iba. Ekem ifiak inyọn̄ Berlin man ikese iban̄a mme akpan n̄kpọ. Ke oro okụrede nnyịn ima ifiak ika efakutom ukwọrọikọ nnyịn ke urua iba efen.
Nnyịn ima isịn eben̄e ndikanam utom ke idụt efen, ndien ke December 1933 ẹma ẹnọ nnyịn ikanam utom ke se ẹkediọn̄ọde ini oro nte Yugoslavia. Nte ededi, mbemiso nnyịn ikekemede ndidaha, ẹma ẹkpụhọ utom nnyịn ẹnọ ika Utrecht ke Netherlands. Esisịt ini ke oro ebede ami mma nna baptism. Ini oro owo ikenen̄ekede idori nsọn̄uyo ke edina baptism; akpan n̄kpọ ekedi utom ukwọrọikọ. Ndiberi edem ke Jehovah idahaemi ama akabade edi n̄wọrọnda n̄kpọ ke uwem mi. Mma mbọ ekese ndọn̄esịt nto mme ikọ andiwet psalm ke Bible: “Sese, Abasi edi andinyan̄a mi: Ọbọn̄ mi odu ke otu mmọ ẹmi ẹmụmde ukpọn̄ mi ẹkama.”—Psalm 54:4.
Utom Usiakusụn̄ ke Netherlands
Ikebịghike ke ima ikebehe ke Netherlands, ẹma ẹfiak ẹnọ nnyịn ika obio Rotterdam. Ete ye eyen kiet ke ubon emi nnyịn ikodụn̄de ye mmọ ẹkedi n̄ko mme asiakusụn̄. Ọfiọn̄ ifan̄ ke oro ebede, ẹma ẹdep akamba ufọk ke Leersum, obio emi mîyomke usụn̄ ikpọn̄ Utrecht, nte ufọkidụn̄ mme asiakusụn̄, ndien ami ye Werner ima iwọrọ ikodụn̄ do.
Ke adan̄aemi idụn̄de ke ufọkidụn̄ mme asiakusụn̄ oro, nnyịn ima isiwat ke enan̄ukwak ika mme n̄kpet n̄kpet efakutom ndien iwat moto ekemede ndimen owo itiaba ika mme efakutom ẹnen̄erede ẹyom usụn̄. Ke ini oro, Mme Ntiense 100 kpọt ẹkedu ke ofụri Netherlands. Mfịn, isua 60 ke ukperedem, efakutom oro nnyịn ikesitode ufọkidụn̄ mme asiakusụn̄ oro ikanam utom enyene se iwakde ikan mme asuanetop 4,000 ke n̄kpọ nte esop 50!
Nnyịn ima isinam utom ọkpọsọn̄, osịm hour 14 ke usen kiet kiet, ndien oro ama esinam nnyịn ikop inemesịt. Akpan uduak ekedi ndinịm ediwak n̄wed nte ikekeme. Ekesidi ọsọ n̄kpọ nnyịn ndinịm se iwakde ikan n̄kpri n̄wed 100 ye mbon oro ẹnyenede udọn̄ ke usen kiet. Ndinam mme mfiakn̄ka ye edinịm mme ukpepn̄kpọ Bible ikedịghe kan̄a ubak utom ofụri ini nnyịn.
Usen kiet ami ye nsan̄a mi ikanam utom ke obio Vreeswijk. Ke adan̄aemi enye ọkọnọde eren kiet ikọ ntiense ke inuaotop itieidụn̄ mbonekọn̄, mma nda ini oro n̄kot Bible mi. Ẹma ẹda ndatndat ye blu blu mmọn̄n̄wed ẹdụri udịm ke usụn̄ oro ẹkemede ndisọsọp n̄kụt. Ekem, anamusọ eto oro akanamde utom ke ọkọmufọk oro okodude ekpere ama odụri owo oro okodude ke inuaotop utọn̄ ete ke ekeme ndidi ami ndi owo uyep. Nte utịp, ẹma ẹmụm mi kpa ke usen oro ke ini n̄kọnọde anyam ufọkurua kiet ikọ ntiense, ndien ẹma ẹbọ mi Bible mi.
Ẹma ẹda mi ẹka esop. Do ẹma ẹdọhọ ẹte ke mme udịm oro n̄kodụride ke Bible mi ekedi ukeme nsịnde ndinam mbuwet itieidụn̄ mbonekọn̄ oro. Ẹma ẹbiom mi ikpe, ndien ebiereikpe ama ebiere n̄kpọkọbi isua iba ọnọ mi. Nte ededi, ẹma ẹsion̄o ikpe oro, ndien ẹma ẹsana mi ẹyak. N̄kokop inemesịt didie ntem ndidi se ẹsanade ẹyak, edi mma n̄kam nnen̄ede n̄kop inemesịt ke ini ẹkefiakde ẹyak Bible mi ye kpukpru n̄kpọ oro n̄kewetde ke esịt ẹnọ mi!
Ke ini ndaeyo eke 1936, ami ye Richard Brauning, kiet ke otu mme asiakusụn̄ ke ufọkidụn̄ emi, ima ida ini ndaeyo oro ikwọrọ ikọ ke edem edere idụt oro. Ke akpa ọfiọn̄, nnyịn ima isịn hour 240 ke utom ukwọrọikọ inyụn̄ inịm ata ediwak n̄wed. Nnyịn ikodụn̄ ke tent inyụn̄ ise iban̄a se nnyịn iyomde, iyet mme ọfọn̄ nnyịn, item udia, ye ntre ntre eken.
Ekem ẹma ẹnọ mi n̄ka ubom oro ẹkekotde Lightbearer, emi ẹketịmde ẹdiọn̄ọ ke edem edere Netherlands. Mme asiakusụn̄ ition ẹkedụn̄ ke ubom oro, ndien ye enye nnyịn ima isikeme ndisịm ediwak nsannsan efakutom.
Mme Udiana Ifetutom
Ke 1938, ẹma ẹnọ mi ndinam utom nte asan̄autom zone, nte ẹkesikotde mme esenyịn circuit eke Mme Ntiense Jehovah ini oro. Ntre mma n̄kpọn̄ Lightbearer nnyụn̄ ntọn̄ọ ndika n̄kese mme esop ye Mme Ntiense ke mme obio ita ke usụk usụk.
Enan̄ukwak ekedi n̄kukụre n̄kpọisan̄ nnyịn. Ekesiwak ndida ofụri usen kiet ndisan̄a to ke esop kiet m̀mê otu mbon oro ẹnyenede udọn̄ nsịm efen. Ke otu mme obio oro n̄kakade n̄kese ekedi Breda, emi ami ndụn̄de idahaemi. Ini oro, Breda ikenyeneke baba esop kiet ndien Ntiense ebe ye n̄wan ẹdide mbonusọn̄ kpọt ẹkedụn̄ do.
Ke adan̄aemi nnamde utom ye nditọete ke Limburg, ẹma ẹkot mi ndibọrọ ediwak mbụme oro anamutom kiet ke itie udọkisọn̄ nyom n̄kpọuto, emi ekerede Johan Pieper, okobụpde. Enye ama ọsọn̄ọ omụm akpanikọ Bible akama onyụn̄ akabade edi uko uko ọkwọrọikọ. Isua inan̄ ke ukperedem ẹma ẹsịn enye ke itienna ekikere, ke ebiet emi enye akabiatde isua ita ye ubak. Ke ẹma ẹkesio enye, enye ama afiak ọtọn̄ọ ukwọrọikọ ifịk ifịk, ndien mfịn emi enye osụk edi anam-akpanikọ ebiowo. Ekpri esop oro ekenyenede Mme Ntiense 12 do ke Limburg ọkọri idahaemi osịm mme esop 17 ye n̄kpọ nte mme asuanetop 1,550!
Ke Idak Ukara Nazi
Ke May 1940 mbon Nazi ẹma ẹda ekọn̄ ẹdụk Netherlands. Ẹma ẹnọ mi n̄kanam utom ke ọfis n̄kọk itieutom Watch Tower Society ke Amsterdam. Nnyịn ikenyene ndinam utom nnyịn ye ata ukpeme, emi akanamde nnyịn itịm ifiọk n̄ke Bible oro: ‘Ata ufan edi eyeneka eke amanade ọnọ ini nnan-enyịn.’ (Mme N̄ke 17:17) Inem inem mbọbọ edidianakiet oro ọkọkọride ke ini mfịghe emi ama otụk n̄kọri eke spirit mi akamba akamba, ndien enye ama otịm mi idem ọnọ n̄kpọsọn̄ ini oro ẹkekam ẹdide ke iso.
Utom mi ekedi ndise mban̄a edisuan n̄wed nnọ mme esop, emi edide se mme andida leta nsọk mme owo ẹkesinamde. Mme ndedịbe bodisi ke ẹkesịn ifịk ẹyom n̄kparawa ndinam utom nte mbon mbiomo ke Germany, ntre nnyịn ima ida nditọete iban Christian inam utom nte mme andida n̄wed nsọk mme owo. Nte ini akakade ẹma ẹnọ Wilhelmina Bakker, emi ẹkesiwakde ndidiọn̄ọ nte Nonnie, oto Hague edi edidu ye nnyịn, ndien mma nda enye n̄ka ebiet emi esenyịn n̄kọk itieutom nnyịn, Arthur Winkler, okodịbede. Man ndomo ndidịbe nte n̄kekeme, mma nsisịne ọfọn̄ nte ọtọin̄wan̄ owo Netherlands, ikpaukot eto ye kpukpru n̄kpọ ọtọin̄wan̄, nnyụn̄ nda Nonnie ke moto n̄ka. Ke ukperedem mma ndifiọk nte ke ama ọsọn̄ enye idem ndime imam, sia enye ekekerede ke ẹma ẹnen̄ede ẹdiọn̄ọ mi.
Ke October 21, 1941, ẹma ẹwụt mme asua itie ubon n̄wed ye babru ke Amsterdam. Ke ini mme ndedịbe bodisi ẹkedide ẹdinam ndụn̄ọde, ẹma ẹmụm Winkler ye Nonnie. Ke ini ẹkesịnde mmọ ke ufọk-n̄kpọkọbi, mmọ ẹma ẹkop isụn̄utom ndedịbe bodisi iba ẹtịn̄de nte mmimọ ikebịnede “ekpri ufan kiet enyenede obubịt idet” emi ọkọbọhọde mmimọ osop ke otu owo ke efak. Ama ana in̄wan̄în̄wan̄ nte ke mmọ ẹketịn̄ ẹban̄a mi, ntre Winkler ama an̄wana ọnọ etop ẹsọk nditọete. Inikiet inikiet, ẹma ẹnọ mi n̄ka Hague.
Kan̄a kemi ẹma ẹsio Nonnie ke ufọk-n̄kpọkọbi, ndien enye ama afiak ọnyọn̄ edi Hague ndisiak usụn̄. Mma mfiak nsobo ye enye do. Edi ke ini ẹkemụmde asan̄autom esop ke Rotterdam, ẹma ẹnọ mi n̄kada itie esie. Ekem ẹma ẹmụm asan̄autom esop ke Esop Gouda, ndien ẹma ẹnọ mi n̄ka do man n̄kada itie esie. Ke akpatre, ke March 29, 1943, ẹma ẹmụm mi. Ke adan̄aemi n̄kodụn̄ọrede mme n̄wed Bible oro nnyịn ikenyenede, ndedịbe bodisi ẹnamde ndụn̄ọde ẹma ẹbuat mi.
Ke ẹsiode mme n̄wed Bible oro ẹkesuanade ẹbono ke enyọn̄ okpokoro, n̄wed enyịn̄ nditọete Christian iren ye iban ama odoro do, okposụkedi ẹkewetde mmọ ke edu idiọn̄ọ. Ke mfụhọ, mma mbọn̄ akam nte Jehovah osio usụn̄ ọnọ mi ndinyan̄a mbon oro ẹkesụk ẹnyenede ifụre ndikwọrọ ikọ. Ye unana mme owo ndikụt, mma n̄n̄wana mfụk ubọk ke n̄wed enyịn̄ oro nnyụn̄ mfụt enye nsịn ke ekaubọk mi. Ekem mma mben̄e nte ẹyak n̄ka ikọt, ke ebiet emi n̄kesepde n̄wed oro ndọn̄ nnyụn̄ n̄kpọhọde mmọn̄ nyet mmọ mfep.
Ke ini ndude ke utọ enyene-ndịk idaha oro, mma n̄kpep ndikop nsọn̄idem nto usụn̄ oro Jehovah ekesinamde n̄kpọ ye ikọt esie ke eset ye mme un̄wọn̄ọ esie kaban̄a edinyan̄a. Emi edi kiet ke otu un̄wọn̄ọ eke odudu spirit oro ẹkesidude mi ke ekikere kpukpru ini: “Mîkpedịghe Jehovah ada ye nnyịn, ke ini owo ẹdahade ke enyọn̄ ẹnam ikọ ye nnyịn: ke ini oro ẹkpemen nnyịn ye uwem.”—Psalm 124:2, 3.
Mme Ufọk-N̄kpọkọbi ye Mme Itienna Ekikere
Ẹkeda mi ẹka ufọk-n̄kpọkọbi ke Rotterdam, emi n̄kenemde esịt ndifiak nnyene Bible mi. Ami n̄ko mma nnyene n̄wed oro Salvation, ubak ikpehe n̄wed oro Children, ye ekese ini ndikot mme n̄wed ẹmi. Ke ọfiọn̄ itiokiet ẹma ẹkebe mma ndọn̄ọ n̄kpa n̄kpa ndien n̄kenyene ndika ufọkibọk. Mbemiso n̄kọkpọn̄de ufọk-n̄kpọkọbi, mma ndịp mme n̄wed oro ke idak matras mi. Ke ukperedem mma n̄kop nte ke ẹma ẹnọ Ntiense efen, Piet Broertjes, ubet n̄kpọkọbi oro ẹkesịnde mi ndien enye ama okụt mmọ. Ntem ẹma ẹsikama mme n̄wed ẹmi ndisọn̄ọ mbuọtidem mbon efen efen.
Ke ini idem ama ọkọsọn̄ mi ẹma ẹnọ mi n̄ka ufọk-n̄kpọkọbi ke Hague. Ke adan̄aemi ndude do mma nsobo ye Leo C. van der Tas, eyen ufọkn̄wed ekpepde ibet emi ẹkesịnde ke ufọk-n̄kpọkọbi ke ntak ekesịnde ndinam utom nnọ Nazi. Akananam enye ikokopke n̄kpọ iban̄a Mme Ntiense Jehovah, ndien mma nnyene ifet ndinọ enye ikọ ntiense. Ndusụk ini enye ama esidemede mi ke ufọt okoneyo onyụn̄ obụp mme mbụme. Enye ikekemeke ndidịp ima oro enye akamade Mme Ntiense, akpan akpan ke ini enye ọkọfiọkde ete ke ẹkeme ndisana nnyịn nyak edieke nnyịn ikam isịnde ubọk ke n̄wed ndikan̄ mbuọtidem nnyịn. Ke ekọn̄ oro ama okokụre, Leo ama akabade edi lọya onyụn̄ ekpe ediwak ikpe oro ẹkebuanade ifụre utuakibuot ọnọ Watch Tower Society.
Ke April 29, 1944, ẹma ẹsịn mi ke tren ndinam isan̄ usen 18 oro ọkọyọhọde ye ndutụhọ n̄ka Germany. Ke May 18 ẹma ẹsịn mi ke itienna ekikere Buchenwald. Tutu Mbuaha udịmekọn̄ ẹdision̄o nnyịn ke se ikekperede ndisịm isua kiet ke ukperedem, uwem ama enyene ndịk ke usụn̄ oro owo mîkemeke nditịn̄. Ediwak tọsịn owo ẹma ẹkpan̄a, ediwak mmọ ke iso nnyịn. Sia n̄kesịnde ndinam utom ke usiakifia oro okodude ekpere emi ẹkesidomde n̄kpọekọn̄, ẹma ẹnọ mi n̄kanam utom ke ufọk ekwe.
Usen kiet ẹma ẹduọk bọmb ke usiakifia oro. Ediwak owo ẹma ẹfen̄e ẹdụk itieidụn̄ mbonekọn̄ ndiyom ubọhọ, ke adan̄aemi mmọ eken ẹkefen̄ede ẹdụk ikọt. Bọmb oro ẹkesuanade ntịme ntịme ẹma ẹtọ itieidụn̄ mbonekọn̄ oro, ndien mme bọmb oro ẹsibụberede ikan̄ ẹma ẹsịn ikan̄ ke ikọt oro. Emi ekedi n̄kpọ oro enyenede ndịk! Ikan̄ ama ata ediwak owo owot! Ami mma n̄kụt itie udịbe oro ọkọfọnde, ndien ke ini ikan̄ oro ama okosụhọde, mma nsan̄a mbe ediwak okpo owo mfiak n̄ka itienna.
Ata ediwak owo mfịn ẹfiọk ẹban̄a ọkpọsọn̄ ndịk akpakịp nsobo eke mbon Nazi oro. Mmọkọm Jehovah koro enye ọnọde ukeme ukere n̄kpọ mi odudu, anamde ọkpọsọn̄ ndịk oro n̄kokụtde ikarake ekikere mi ke ofụri isua ẹmi. Ke ini n̄kerede mban̄a ini n̄kpọkọbi mi, ata akpa ntụk oro nnyenede edi idatesịt ke ndimụm nsọn̄ọnda n̄kama ye Jehovah kaban̄a ubọn̄ enyịn̄ esie.—Psalm 124:6-8.
Utom Ini Ukụre Ekọn̄
Ke ẹma ẹkesana mi ẹyak mfiak nnyọn̄ Amsterdam, mma n̄ka ọfis n̄kọk itieutom nnennen man n̄kọbọ utom. Ama ọdọn̄ mi ndifiọk se ikakade iso ke ini oro mmen̄kedụhe. Nonnie ama ododu do anam utom. Ke akpatre isua ekọn̄ oro, n̄wan emi ama anam utom nte andida n̄wed nsọk mme owo oro adade mme n̄wed Bible ọsọk mme esop. Owo ikafiakke imụm enye aba, okposụkedi enye ekesibọhọde ke ikwa ifụhi ediwak ini.
Mma nnam utom usiakusụn̄ esisịt ini ke Haarlem, edi ke 1946, ẹma ẹdọhọ n̄ka n̄kọk itieutom ke Amsterdam n̄kanam utom ke Itieutom Unọ N̄wed Ọwọrọ. Ke utịt utịt 1948, ami ye Nonnie ima idọ ndọ, ndien nnyịn ima ikpọn̄ n̄kọk itieutom ndikanam utom usiakusụn̄ ọtọkiet. Ẹkenọ nnyịn ika utom usiakusụn̄ ke Assen. Isua 12 ke mbemiso ami ye Richard Brauning ima idụn̄ ke tent inam utom ukwọrọikọ do ke ini ndaeyo. Ẹma ẹtịn̄ ẹnọ mi ẹte ke ẹma ẹtop Richard ẹwot ke usụn̄ ndika itienna ekikere.
Mme ini oro n̄kodude ke n̄kpọkọbi ama otụk nsọn̄idem mi idiọk idiọk. Isua itiokiet ke ẹma ẹkesio mi ke Buchenwald, udọn̄ọ ama onịm mi ke isọn̄ ke ọfiọn̄ inan̄. Ediwak isua ke ukperedem, ke 1957, akpaikpai ikọn̄ ama omụm mi ke ofụri isua kiet. Odudu ikodụhe mi aba ke idem, edi edu usiakusụn̄ mi ke ọkọsọsọn̄. Ke ini udọn̄ọ mi, mma nsida kpukpru ifet ndinọ ikọ ntiense. N̄kere ke edu usiakusụn̄ emi edi akpan n̄kpọ oro mîkayakke mme ini udọn̄ọ ẹnam mi n̄kabade ndi owo udọn̄ọ oro etiede ifu. Ami ye Nonnie imebiere ndisọn̄ọ nyịre ke utom uyọhọ ini adan̄a nte nsọn̄idem nnyịn ayakde.
Ke mma n̄kokop nsọn̄idem, ẹma ẹnọ nnyịn ikanam utom ke obio Breda. Emi ekedi isua 21 ke mma n̄kaka n̄kese obio oro nte asan̄autom zone. Ke ini nnyịn ikosịmde do ke 1959, ekpri esop oro ekenyenede Mme Ntiense 34 okodu do. Mfịn, isua 37 ke ukperedem, enye ọmọkọri osịm esop itiokiet ye Mme Ntiense ẹwakde ẹbe 500, ẹmi ẹsisopde idem ke Ufọkmbono Obio Ubọn̄ ita! Ke mme mbonoesop ye n̄kpri mbono n̄kann̄kụk nnyịn, nnyịn imesikụt ediwak owo oro ẹkebọde ifiọk akpanikọ Bible nte utịp ukeme oro nnyịn ikesịnde. Esitie nnyịn ke idem kpukpru ini nte eketiede apostle John ke ini enye ekewetde ete: “Nnyeneke idatesịt eke okponde akan edikop eke n̄kopde nte nditọ mi ẹsasan̄a ke akpanikọ.”—3 John 4.
Idahaemi nnyịn imọsọn̄. Ami ndi isua 86, ndien Nonnie edi 78, edi nnyene nditịn̄ nte ke utom usiakusụn̄ edi utom oro ọnọde nsọn̄idem. Tọn̄ọ nte n̄kodu ke Breda, mmakan ekese mfịna unana nsọn̄idem oro n̄kenyenede ke ini n̄kodude ke n̄kpọkọbi. Ami mmadara n̄ko ediwak isua oro on̄wụmde mfri ke utom Jehovah.
Ndifiak nti ediwak isua utom oro on̄wụmde mfri edi n̄kpọ idatesịt ọnọ nnyịn mbiba. Akam nnyịn kpukpru usen edi nte Jehovah akpakam ọnọ nnyịn spirit ye ukeme ndika iso ke utom esie adan̄a ini nte ibifịk odude nnyịn ke idem. Ye mbuọtidem, nnyịn itịn̄ iban̄a idem nnyịn ke mme ikọ andiwet psalm emi: “Sese, Abasi edi andinyan̄a mi: Ọbọn̄ mi odu ke otu mmọ ẹmi ẹmụmde ukpọn̄ mi ẹkama.”—Psalm 54:4.
[Ndise ke page 23]
Nda n̄kpere tent oro ikakamade ke ini inamde utom usiakusụn̄ ke mme iduọkisua 1930
[Ndise ke page 23]
Ubom oro ẹkesidade ẹkesịm nsannsan efakutom
[Ndise ke page 23]
Ẹnam ndụn̄ọde ye ami ke mbono ke 1957
[Ndise ke page 24]
Ye n̄wan mi mfịn