Nso Ke Ifụre Ido Ukpono Ọwọrọ Ọnọ Fi?
Okposụkedi ẹdade ifụre ido ukpono nte akpan unen ke United States, oyobio afai otu mbon ntịme emi ẹkedade ẹtiene Mme Ntiense Jehovah ama ofụme ke ofụri idụt oro ke iduọk isua 1940
EDIWAK miliọn owo ẹmen̄wana ẹban̄a enye. Ndusụk owo ẹkam ẹkpan̄a kaban̄a enye. Enye enen̄ede edi kiet ke otu ata ọsọn̄urua inyene ubonowo. Nso ke enye edi? Ifụre! The World Book Encyclopedia akabade ifụre nte “ukeme ndimek n̄kpọ nnyụn̄ nnam mmọ.” Enye aka iso ete: “Ke n̄kan̄ ibet, mme owo ẹnyene ifụre edieke n̄kaowo mîdorike mmọ ukpan oro mînenke, oro mîdịghe akpan n̄kpọ, m̀mê oro mîwụtke eti ibuot. Ana n̄kaowo ekpeme mme unen mmọ n̄ko—oro edi, mme akpan ifụre mmọ, ukeme, ye mme ifetutom.”
Etie nte ekikere emi edi mmemmem. Nte ededi, ke nditịm ntịn̄, etie nte mme owo ikam ikemeke ndinyịme m̀mê m̀mọ̀n̄ edi nnennen itie emi ẹkpenịmde adan̄a ifụre. Ke uwụtn̄kpọ, ndusụk owo ẹnịm ke akpanikọ ẹte ke ukara ekpenyene ndinịm mme ibet ndikpeme ifụre mbio obio esie. Edi mbon en̄wen ẹfan̄a nte ke mme ibet ẹmi ẹkam ẹdi mme n̄kpọ ubiọn̄ọ emi oyomde mbio obio ẹbọhọ! Nte an̄wan̄ade, ifụre ọwọrọ nsio nsio n̄kpọ ọnọ nsio nsio owo.
Nso Kaban̄a Ifụre Ido Ukpono?
Etie nte ifụre oro odude ke ọkpọsọn̄ eneni edi ifụre ido ukpono, emi ẹkabarede nte “unen ndinịm nnyụn̄ nnanam se owo emekde ndinịm ke akpanikọ.” Nte Uwetn̄kpọ Ofụri Ekondo Kaban̄a Unen Owo eke Edidiana Mme Idụt ọdọhọde, “kpukpru owo ẹnyene unen ndinyene ifụre ekikere, ubieresịt ye ido ukpono.” Emi esịne “unen oro owo enyenede ndikpụhọ ido ukpono esie m̀mê se enye enịmde ke akpanikọ,” ọkọrọ ye ifụre “ndiyarade ido ukpono esie m̀mê se enye enịmde ke akpanikọ n̄wụt ke ukpepn̄kpọ, edinam, utuakibuot ye ido edinam.”—Ikpehe 18.
Ke akpanikọ, nnyịn ikpodori enyịn ndikụt idụt ekededi oro etịmde ese aban̄a mbio obio esie ọnọde utọ ifụre oro. Ke mfụhọ, emi isitịbeke kpukpru ini. The World Book Encyclopedia ọdọhọ ete: “Ido ukpono omotụk ntotụn̄ọ ntụk ediwak owo. Ndusụk ukara ẹnyene ntotụn̄ọ ebuana ye ido ukpono kiet ẹnyụn̄ ẹda mbon ido ukpono efen nte edide n̄kpọ ndịghe ẹnọ ukara. Ukara n̄ko ekeme ndida ido ukpono nte edide n̄kpọndịk ọnọ ndutịm ukaraidem koro mme ido ukpono ẹkeme ndinịm edinam akpanikọ nnọ Abasi ke ebeiso akan nsụkibuot nnọ ukara.”
Ke ntak ẹmi ndusụk ukara ẹdori mme ukpan ke edinam ido ukpono. Esisịt ibat ẹkpan edinam ido ukpono ekededi ofụri ofụri. Mmọ eken, okposụkedi ẹdọhọde nte isịnde udọn̄ inọ ifụre utuakibuot, ẹnen̄ede ẹkpeme kpukpru edinam ido ukpono.
Ke uwụtn̄kpọ, kere ban̄a idaha oro okodude ke ediwak isua ke Mexico. Okposụkedi Ibet ọkọnọde ido ukpono ifụre, enye ama owụk ete: “Mme ufọkabasi oro ẹdade ẹnam an̄wan̄wa utuakibuot ẹdi inyene Idụt, emi Akwa Ukara adade ke ibuot esie, emi edibierede m̀mê ewe ke ẹkeme ndika iso nda nnam n̄kpọ ke utọ usụn̄ oro.” Ke 1991 ẹma ẹfiak ẹnen̄ede Ibet oro man ẹtre ukpan emi. Edi, uwụtn̄kpọ emi owụt ete ke nsio nsio idụt ẹkeme ndikabade ifụre ido ukpono ke nsio nsio usụn̄.
Orụk Ifụre Ido Ukpono Efen
Nte ifụre ido ukpono odu ke idut oro afo odụn̄de? Ke edide ntre, didie ke ẹkabade enye? Nte emekeme ndituak ibuot nnọ Abasi ke usụn̄ oro afo emekde, mîdịghe nte ẹnyenyịk fi ndikabade ndi andibuana ke ido ukpono Idụt? Nte ẹyak fi okot onyụn̄ asuan mme n̄wed ido ukpono, mîdịghe ndi ukara akpan mme utọ n̄wed oro? Nte emekeme nditịn̄ nnọ mbon en̄wen mban̄a ido ukpono fo, mîdịghe ndi ẹda emi nte se ituahade ye unen oro mbon en̄wen ẹnyenede ke ido ukpono mmọ?
Mme ibọrọ mbụme ẹmi ẹkọn̄ọ ke ebiet emi afo odụn̄de. Kpa ye oro, nte enemde, odu orụk ifụre ido ukpono oro mîkọn̄ọke ke ebiet ndomokiet ke usụn̄ ekededi. Ke adan̄aemi okodude ke Jerusalem ke isua 32 E.N., Jesus ama ọdọhọ mme anditiene enye ete: “Edieke mbufo ẹsọn̄ọde ẹda ke ikọ Mi, mbufo ẹdi mbet Mi ke akpanikọ: ndien mbufo ẹyefiọk akpanikọ, akpanikọ eyenyụn̄ anam mbufo ẹwọrọ ufụn.”—John 8:31, 32.
Ikọ Jesus emi ọkọwọrọ nso? Ama ọdọn̄ mme andikpan̄ utọn̄ nnọ enye ẹkedide mme Jew ndiwọrọ ufụn ukara Rome. Edi Jesus ikenemeke iban̄a edibọhọ ufịk ukaraidem. Utu ke oro, enye ọkọn̄wọn̄ọ n̄kpọ oro ọfọnde akan oro ọnọ mme mbet esie, nte nnyịn idikụtde ke ibuotikọ emi etienede.