Ẹsio Ẹnịm San̄asan̄a Nte Idara Idara Mme Anditoro ke Ofụri Ererimbot
“Mbufo ẹtoro Jehovah. Mbufo ikọt Jehovah, ẹtoro, ẹtoro enyịn̄ Jehovah.”—PSALM 113:1.
1, 2. (a) Nte ekemde ye Psalm 113:1-3, anie odot ndidi se nnyịn itorode ifịk ifịk? (b) Nso mbụme odot ndibụp?
JEHOVAH ABASI edi Akwa Andibot enyọn̄ ye isọn̄, Andikara Ekondo ke nsinsi nsinsi. Enye enen̄ede odot ndibọ itoro ofụri esịt nnyịn. Emi edi ntak oro Psalm 113:1-3 owụkde nnyịn ete: “Mbufo ẹtoro Jehovah. Mbufo ikọt Jehovah, ẹtoro, ẹtoro enyịn̄ Jehovah. Yak enyịn̄ Jehovah edi se ẹkọmde ke emi ye ke nsinsi. Ọfọn nte ẹtorode enyịn̄ Jehovah ọtọn̄ọde ke edem usiahautịn tutu esịm ke edem usop.”
2 Nte Mme Ntiense Abasi, nnyịn imadat esịt ndinam emi. Edi n̄kpọ nduaidem didie ntem nte ke Jehovah Abasi ọyọsọp ndinam idara idara ikwọ itoro emi nnyịn ikwọde mi mfịn ọyọhọ ofụri isọn̄! (Psalm 22:27) Nte ẹkop uyo fo ke akwa n̄ka ikwọ ofụri ererimbot emi? Edieke edide ntre, enyene ndidi emi anam fi okop inemesịt didie ntem ndidi se ẹsiode ke ererimbot emi abaharede onyụn̄ ananade inemesịt mi ẹnịm san̄asan̄a!
3. (a) Nso inam ikọt Jehovah ẹdi san̄asan̄a ye n̄wọrọnda? (b) Ke ewe mme usụn̄ ke ẹsio nnyịn ẹnịm san̄asan̄a?
3 Nnyịn ndidiana kiet ntoro Jehovah enen̄ede anam nnyịn idi san̄asan̄a, idi n̄wọrọnda. Nnyịn itịn̄ ikọ inyụn̄ ikpep n̄kpọ ke uyo kiet inyụn̄ ida ukem usụn̄ itan̄a ‘akwa ufọn Jehovah.’ (Psalm 145:7) Ih, nte ikọt Jehovah oro ẹyakde idem ẹnọ, ẹsio nnyịn ẹnịm san̄asan̄a ẹnọ utom Abasi nnyịn, Jehovah. Abasi ọkọdọhọ ikọt esie, Israel, oro ẹkeyakde idem ẹnọ ke eset ete ẹda san̄asan̄a ẹkpọn̄ mme idụt oro ẹkedude ẹkan mmọ ẹkụk ẹkûnyụn̄ ẹsabade idemmọ ye mme edinam idụt oro. (Exodus 34:12-16) Enye ama ọnọ ikọt esie mme ibet man an̄wam mmọ ẹnam emi. Kpasụk ntre mfịn, Jehovah ọnọ nnyịn Edisana Ikọ esie, kpa Bible. Mme item esie ẹwụt nnyịn nte nnyịn ikemede ndida san̄asan̄a n̄kpọn̄ ererimbot emi. (2 Corinth 6:17; 2 Timothy 3:16, 17) Idịghe ufọkidụn̄ n̄ka mọn̄k ye ufọkidụn̄ n̄ka nun abaharede nnyịn enịm san̄asan̄a, nte mme mọn̄k ye mme nun eke Akwa Babylon. Ke itienede uwụtn̄kpọ Jesus Christ, nnyịn idi an̄wan̄wa mme anditoro Jehovah.
Ẹkpebe Akwa Anditoro Jehovah
4. Didie ke Jesus ekenịm uwụtn̄kpọ ke nditoro Jehovah?
4 Akananam Jesus iwọn̄ọkede ikpọn̄ uduak esie nditoro Jehovah. Ndien emi ama abahade enye enịm san̄asan̄a ọkpọn̄ ererimbot. Ke mme synagogue ye ke temple ke Jerusalem, enye ama otoro edisana enyịn̄ Abasi. Edide ke enyọn̄ obot m̀mê ke mbeninyan̄, ebiet ekededi emi otuowo ẹkebohode, Jesus ama ọkwọrọ akpanikọ Jehovah an̄wan̄wa. Enye ọkọdọhọ ete: “Mmọkọm Fi [an̄wan̄wa, NW], O Ete, Ọbọn̄ enyọn̄ ye isọn̄.” (Matthew 11:25) Idem ke ini akadade ke itie ikpe ke iso Pontius Pilate, Jesus ama ọnọ ikọ ntiense ete: “N̄kamana kaban̄a ntak emi, n̄konyụn̄ ndụk ke ererimbot kaban̄a n̄kpọ emi, man ndi ntiense nnọ akpanikọ.” (John 18:37) Jesus ama ọfiọk nte utom esie ekedide akpan n̄kpọ. Ebiet ekededi oro enye okodude, Jesus ama etie ntiense aban̄a Jehovah onyụn̄ otoro enye an̄wan̄wa.
5. Psalm 22:22 aban̄a anie, ndien nso ikpedi edu nnyịn?
5 Ke Psalm 22:22, ikụt ntịn̄nnịm ikọ emi aban̄ade Akwa Anditoro Jehovah mi: “Nyobụk enyịn̄ fo nnọ nditọete mi: nyotoro fi ke ufọt mbon esop.” Ke Mme Hebrew 2:11, 12, apostle Paul ada mme ufan̄ikọ ẹmi etịn̄ aban̄a Ọbọn̄ Jesus ye mbon oro Jehovah Abasi anamde ẹsana ọnọ ubọn̄ eke heaven. Ukem nte enye, bụt inamke mmọ nditoro enyịn̄ Jehovah ke ufọt esop. Ndi nnyịn imesinyene ukem ekikere emi ke ini idụkde mme mbonoesop nnyịn? Nnyịn ndibuana ufiop ufiop ke mme mbonoesop, ebe ke ndikpan̄ utọn̄ ye ke nditiene nsịn uyo, otoro Jehovah. Edi nte idara idara itoro nnyịn etre do?
6. Nso utom ke Jesus ọkọnọ mme mbet esie, ndien didie ke mme ama un̄wana ẹnọ Abasi ubọn̄?
6 Nte ekemde ye Matthew 5:14-16, Ọbọn̄ Jesus ama ọdọhọ n̄ko ete mme anditiene enye ẹnam un̄wana mmọ ayama man otodo mbon en̄wen ẹkpetoro Jehovah. Enye ọkọdọhọ ete: “Mbufo ẹdi un̄wana ererimbot. . . . Yak un̄wana mbufo ayama ke iso owo, man mmọ ẹkụt nti utom mbufo, ẹnyụn̄ ẹtoro Ete mbufo emi odude ke heaven.” Mme ama un̄wana ẹda ubọn̄ ẹsọk Abasi. Ndi mmọ ẹnam emi n̄kukụre ebe ke nditịn̄ nnyụn̄ nnam nti n̄kpọ ke ufọn n̄kaowo? Baba, utu ke oro mmọ ẹnam emi ebe ke ndidiana kiet nnọ Jehovah ubọn̄. Ih, mme ama un̄wana ẹyak idemmọ ẹnọ Abasi ẹnyụn̄ ẹkabade ẹdi idara idara mme anditoro enye. Nte afo amanam ọnọ-inemesịt usio-ukot emi?
Idatesịt Otode Editoro Jehovah
7. Ntak emi mme anditoro Jehovah ẹkopde idatesịt ntre, ndien nso idara ke mmọ ẹkenyene ke usen Pentecost 33 E.N.?
7 Ntak emi mme anditoro Jehovah ẹkopde idatesịt ntre? Koro idatesịt edi mbun̄wụm edisana spirit Abasi. Ke Galatia 5:22, ẹwet enye ẹdiana ima. Mme mbet Jesus ke akpa isua ikie ẹma ẹwụt mbun̄wụm spirit Jehovah emi. Kamse, ke usen Pentecost 33 E.N., ke ini Abasi akan̄wan̄ade spirit esie ọduọk n̄kpọ nte mbet Jesus 120, kpukpru mmọ ẹma ẹtọn̄ọ nditoro Jehovah ke nsio nsio usem. Mme Jew ẹbakde Abasi oro ẹketode ediwak idụt ẹdi Jerusalem ‘ẹma ẹkop n̄kpaidem onyụn̄ ẹnyene mmọ ndyọ.’ Mmọ ẹma ẹfiori ẹte: “Nnyịn imokop mmọ [ẹtịn̄de] ata n̄kpọsọn̄ utom Abasi ke usem emana nnyịn”! (Utom 2:1-11) Nso ikedi utịp eke editoro Jehovah emi ke nsio nsio usem? N̄kpọ nte mme Jew ye mme okpono Abasi ke ido mme Jew 3,000 ẹma ẹnyịme eti mbụk Obio Ubọn̄ aban̄ade Messiah. Mmọ ẹma ẹna baptism, ẹbọ edisana spirit, ndien ye ọkpọsọn̄ udọn̄ ẹtiene ẹdian uyo mmọ nte mme idara idara anditoro Jehovah. (Utom 2:37-42) Nso edidiọn̄ ke oro ekedi ntem!
8. Ke Pentecost ama ekebe, nso ke mme Christian ẹkenam ndifori idatesịt mmọ?
8 Mbụk oro aka iso ete: “Ke usen ke usen mmọ ẹnyene iwụk ẹdu ke temple ye esịt kiet, ẹnyụn̄ ẹbụn̄ uyo ke ufọk; mmọ ẹdia udia ye idatesịt ye esịt kiet, ẹtoro Abasi; kpukpru owo ẹnyụn̄ ẹnen iso ye mmọ. Ndien Ọbọn̄ ada mmọemi ke ẹnyanyan̄a adian ye mmọ ke usen ke usen.” (Utom 2:46, 47) Ndi mmọ ndidu ọtọkiet nnyụn̄ ndia udia kpọt akada akwa idatesịt ọsọk mmọ? Baba, akpan idatesịt mmọ okoto editoro Jehovah Abasi ke usen ke usen. Ndien idatesịt mmọ ama ọkọri ke ini mmọ ẹkekụtde nte ediwak tọsịn owo ẹnyịmede etop edinyan̄a mmọ. Ukem oro ke edi ye nnyịn mfịn.
Idara Idara Mme Anditoro ke Kpukpru Idụt
9. (a) Ini ewe ndien didie ke Abasi ọkọtọn̄ọ ndinọ mme owo eke kpukpru mme idụt ifet ndikop eti mbụk esie? (b) Ntak emi ẹkenọde Cornelius ye mme nsan̄a esie edisana spirit mbemiso mmọ ẹkenade baptism?
9 Jehovah ikoyomke utom edinọ un̄wana eke mme asan̄autom esie etre ke idụt kiet. Ke ntre, ọtọn̄ọde ke 36 E.N., enye ama ọnọ mme owo ẹtode kpukpru idụt ifet ndikop eti mbụk esie. Ke ndausụn̄ Abasi, Peter ama aka ufọk etubom ekọn̄ kiet oro ekedide Gentile ke Caesarea. Do enye ama okụt Cornelius etiede ye mme n̄kpere-n̄kan ufan esie ye ubon esie. Nte mmọ ẹkekpan̄de utọn̄ ntotụn̄ọ ntotụn̄ọ ẹnọ mme ikọ Peter, mmọ ẹma ẹbuọt idem ye Jesus ke esịt mmọ. Nnyịn isan̄a didie ifiọk? Koro edisana spirit Abasi ama edidoro mme Gentile oro ẹkenịmde ke akpanikọ do. Nte ido edide, ẹsinọ spirit Abasi n̄kukụre ke ẹma ẹkena baptism, edi ke idaha enyeoro Jehovah ama owụt unyịme esie ọnọ mbon oro mîkedịghe mme Jew mi mbemiso mmọ ẹkebụhọde ke mmọn̄. Edieke Jehovah mîkpakanamke ntre, Peter ikpekenịmke ke akpanikọ nte ke Abasi idahaemi ama enyịme mme Gentile nte mme asan̄autom Esie ye nte ke mmọ ẹdot ndina baptism ke mmọn̄.—Utom 10:34, 35, 47, 48.
10. Didie ke ẹkebem iso ẹtịn̄ ke eset nte ke mme owo ẹtode kpukpru idụt ẹyetoro Jehovah?
10 Toto ke eset, Jehovah ama ebem iso etịn̄ ete ke mme owo ẹtode kpukpru idụt ẹyetoro imọ. Enye eyenyene idara idara mme anditoro ke kpukpru idụt. Man ọsọn̄ọ emi, apostle Paul ama okot oto mme prọfesi ke N̄wed Abasi Usem Hebrew. Enye ama asian esop ofụri ererimbot eke mme Christian ke Rome ete: “Ẹdara kiet eken kpa nte Christ akadarade mbufo, man Abasi enyene ubọn̄. Koro mmọdọhọ nte Christ amakabade edi asan̄autom ọnọ mme ana mbobi kaban̄a akpanikọ Abasi, man anam se ẹken̄wọn̄ọde ẹnọ mme ete nnyịn ada, man mme Gentile ẹnyụn̄ ẹnọ Abasi ubọn̄ ẹban̄a mbọm Esie; nte ẹwetde [ke Psalm 18:49] ẹte, Ke ntak emi nyọnọ Fi itoro ke otu mme Gentile, nyonyụn̄ n̄kwọ enyịn̄ Fo. Onyụn̄ ọdọhọ [ke Deuteronomy 32:43] ete, Mbufo mme Gentile, ẹdara ye ikọt Esie. Onyụn̄ ọdọhọ [ke Psalm 117:1] ete, Ẹtoro Ọbọn̄, kpukpru mme Gentile, yak kpukpru mme idụt ẹtoro Enye.” (Sịghisịghi ubọkn̄wed edi eke nnyịn.)—Rome 15:7-11.
11. Didie ke Abasi an̄wam mme owo ẹtode kpukpru idụt ẹkpep akpanikọ esie, ndien nso idi utịp?
11 Mme owo ikemeke ndidiana kiet ntoro Jehovah ibọhọke mmọ ẹkọn̄ idotenyịn mmọ ke Jesus Christ, kpa kiet emi Abasi emekde ete akara mme owo ke kpukpru mme idụt. Man an̄wam mmọ ẹfiọk akpanikọ Esie oro adade esịm nsinsi uwem, Abasi anam ndutịm unọ ukpep eke ofụri ererimbot odu. Enye ke ọnọ ndausụn̄ ebe ke otu ofụn anam-akpanikọ esie. (Matthew 24:45-47) Nso idi utịp? Se iwakde ikan uyo idatesịt owo miliọn ition ke ẹkwọ itoro ẹnọ Jehovah ke se ibede isọn̄ 230. Ndien ediwak miliọn owo efen efen ke ẹwụt udọn̄ ndinam ukem oro. Kamse ibat owo oro ẹkedụkde Editi ke 1996: 12,921,933. Utịben̄kpọ!
Ẹma Ẹbem Iso Ẹtịn̄ Ẹban̄a Akwa Otu eke Idara Idara Mme Anditoro
12. Nso aduai-owo-idem n̄kukụt ke apostle John okokụt, ndien nso idi ataata idem n̄kpọ oro aban̄ade enye?
12 Ke n̄kukụt, apostle John ama okụt “akwa otuowo” ẹmi ẹtode kpukpru idụt. (Ediyarade 7:9) Nso idi ibuotikọ itoro oro akwa otuowo ẹmi ẹdianade ye nsụhọ ikọt Abasi oro ẹyetde aran ẹkwọde? John asian nnyịn: “Yak edinyan̄a enyene Abasi nnyịn emi etiede ke ebekpo, onyụn̄ enyene Eyenerọn̄.” (Ediyarade 7:10) Ẹtan̄a emi uko uko ke kpukpru ikpehe ererimbot. Ke ndifụn̄ ndakeyop, yak idọhọ ntre, nnyịn imadiana kiet itoro Abasi nte Andikara Ekondo inyụn̄ itịn̄ ye idatesịt ke iso ebekpo ye isọn̄ nte ke edinyan̄a ‘nnyịn enyene’ enye ye Eyen esie, Eyenerọn̄, kpa Jesus Christ. Oh, nso nduaidem ke apostle John okokop ntem ndikụt utọ edemede owo udọn̄ n̄kukụt eke akwa otuowo oro! Ndien nnyịn ikop nduaidem didie ntem mfịn ndikụt, idem ndikam ndi ubak, mme andibuana ke ataata idem n̄kpọ oro John okokụtde!
13. Nso inam ikọt Jehovah ẹda san̄asan̄a ẹkpọn̄ ererimbot?
13 Nte mme asan̄autom Jehovah, nnyịn imokop inemesịt ndikere enyịn̄ esie. (Isaiah 43:10, 12) Nnyịn ndidi Mme Ntiense Jehovah anam nnyịn ikpụhọde ye ererimbot emi. Nso n̄kpọ idatesịt ke edi ntem ndikere san̄asan̄a enyịn̄ Abasi ndinyụn̄ nnyene edinam edisana utom esie nte uduak nnyịn ke uwem! Akwa uduak Jehovah ndinam edisana enyịn̄ esie asana ye ediwụt unen itie edikara ofụri ekondo esie ebe ke Obio Ubọn̄ oro anam uwem nnyịn enyene inem. Ndien enye an̄wam nnyịn inyene itie ke edisana uduak esie kaban̄a enyịn̄ ye Obio Ubọn̄ esie. Enye anam emi ke usụn̄ ita.
Ọnọ Akpanikọ
14, 15. (a) Nso idi usụn̄ kiet oro Abasi an̄wamde nnyịn ndinyene itie ke ata eti uduak esie kaban̄a enyịn̄ ye Obio Ubọn̄ esie? (b) Didie ke Obio Ubọn̄ oro ẹkewụkde ke 1914 E.N. okpụhọde ye enyeoro ẹkedororede ẹfep ke 607 M.E.N.?
14 Akpa, Jehovah ọnọ ikọt esie akpanikọ. Ediyarade oro aduaide owo idem akan edi nte ke Obio Ubọn̄ esie ama ọtọn̄ọ ndikara ke 1914. (Ediyarade 12:10) Ukara eke heaven emi okpụhọde ye mbiet esie oro okodude ke Jerusalem, oro ẹkesidoride ndidem ẹtode udịm ubon David ke ebekpo. Ẹma ẹdorode obio ubọn̄ oro ẹfep, ndien ọtọn̄ọde ke 607 M.E.N., Jerusalem okodu ofụri ofụri ke idak odudu ukara ererimbot mme Gentile. Obufa Obio Ubọn̄ oro Jehovah okowụkde ke 1914 edi ukara eke heaven oro tutu amama mîdidụhe ke idak owo ndomokiet ke mîbọhọke Jehovah, owo idinyụn̄ isoboke enye. (Daniel 2:44) N̄ko, itie ukara esie okpụhọde. Didie? Ediyarade 11:15 ọbọrọ ete: “N̄kpọsọn̄ uyo ẹwọrọ ke heaven, mmọ ẹnyụn̄ ẹdọhọ ẹte, Obio ubọn̄ ererimbot emi amakabade edi Obio Ubọn̄ Ọbọn̄ nnyịn ye Christ Esie. Enye oyonyụn̄ ada ubọn̄ ke nsinsi nsinsi.”—Sịghisịghi ubọkn̄wed edi eke nnyịn.
15 “Obio Ubọn̄ Ọbọn̄ nnyịn ye Christ Esie” akara ofụri ererimbot ubonowo. Obufa usụn̄ ediwụt itie edikara Jehovah emi, emi esịnede Messiah Eyen esie ye nditọete Jesus ẹdide owo 144,000, ẹmi idahaemi ẹma ẹkenam ediwak ke otu mmọ ẹset ẹkedụk ubọn̄ eke heaven, idịghe ikpîkpu udọn̄ edide eke ifiọkn̄wed—ekikere emi nditọ ufọkn̄wed ẹkpemade ndineme. Baba, Obio Ubọn̄ eke heaven emi edi ata ukara. Ndien idara idara idotenyịn eke edidu ke nsinsi ke idaha mfọnmma nte utịp edikara esie ọnọ nnyịn ekese ntak ndika iso ndara. Ndidi se ẹnọde utọ akpanikọ eke Ikọ Jehovah oro onụk nnyịn kpukpru ini nditịn̄ se ifọnde mban̄a enye. (Psalm 56:10) Nte afo ke anam emi kpukpru ini ebe ke nditịn̄ nnọ kpukpru owo nte ke Obio Ubọn̄ Messiah Abasi ke akara idahaemi ke heaven?
An̄wam ebe ke Edisana Spirit ye Ebuana Nditọete Ofụri Ererimbot
16, 17. Ewe ẹdi udiana ye ọyọhọ usụn̄ ita oro Abasi an̄wamde nnyịn ndinyene itie ke edisana uduak esie?
16 Udiana usụn̄ oro Abasi an̄wamde nnyịn ndinyene itie ke ata eti uduak esie edi ke ndinọ nnyịn edisana spirit esie, emi an̄wamde nnyịn ndision̄o ndiye mbun̄wụm esie ke uwem nnyịn nnyụn̄ nnyene unyịme esie. (Galatia 5:22, 23) N̄ko-n̄ko, Paul ama ewet ọnọ mme Christian oro ẹyetde aran ete: “Nnyịn . . . ikọbọ spirit emi otode Abasi, man otodo nnyịn ikpọfiọk mme n̄kpọ eke Abasi ọnọde nnyịn ke mfọn.” (1 Corinth 2:12) Ebede ke nnyịn ndinam n̄kpọ ntiene spirit Jehovah, kpukpru nnyịn idahaemi imekeme ndifiọk nti n̄kpọ eke idahaemi oro enye ọnọde nnyịn ke mfọnido—mme un̄wọn̄ọ esie, mme ibet esie, mme edumbet esie, ye ntre ntre eken.—Men Matthew 13:11 domo.
17 Amaedi ọyọhọ usụn̄ ita oro Abasi an̄wamde nnyịn, nnyịn imenyene otu nditọete ofụri ererimbot ye inem inem ndutịm esop Jehovah ẹnamde ẹnọ utuakibuot. Enye ke apostle Peter eketịn̄ aban̄a ke ini enye eketemede nnyịn ete “ẹma nditọete.” (1 Peter 2:17) Ima ima ubon nditọete nnyịn iren ye iban eke ofụri ererimbot an̄wam nnyịn ndinam n̄kpọ Jehovah ye akwa idatesịt, nte Psalm 100:2 etemede ete: “Ẹnam n̄kpọ ẹnọ Jehovah ke idatesịt: ẹda ikwọ ẹdi enye ke iso.” Ufan̄ikọ 4 aka iso ọdọhọ ete: “Mbufo ẹda ekọm ẹdụk ke inuaotop esie, ẹda itoro ẹdụk ke okụre esie: ẹkọm enye, ẹtoro enyịn̄ esie.” Ntre edide nnyịn ikwọrọ ikọ an̄wan̄wa m̀mê idụk mme mbonoesop nnyịn, nnyịn imekeme ndinyene idatesịt. Nnyịn ikụt emem ye ifụre didie ntem ke ediye okụre temple Jehovah eke spirit!
Ẹtoro Jehovah ke Idatesịt!
18. Ntak emi nnyịn ikemede ndikop idatesịt nditoro Jehovah kpa ye ukọbọ m̀mê mme mfịna efen oro ẹkemede ndisịm nnyịn?
18 Inamke n̄kpọ m̀mê nso n̄kpọsọn̄ idaha, ukọbọ, m̀mê mme mfịna efen ẹsịm nnyịn, ẹyak nnyịn idat esịt nte ke nnyịn idu ke ufọk utuakibuot Jehovah. (Isaiah 2:2, 3) Ẹti ẹte ke idatesịt edi idaha esịt. Nditọete nnyịn Christian iren ye iban eke eset ẹkedi idara idara mme anditoro Jehovah kpa ye ediwak nsọn̄ọn̄kpọ ye mme ntakurua oro mmọ ẹkekụtde. (Mme Hebrew 10:34) Mme ekemmọ andinịm ke akpanikọ mfịn ẹtie ukem nte mmọ.—Matthew 5:10-12.
19. (a) Ewe ewụhọ oro ẹnọde ke ubọk ke ubọk edemede nnyịn nditoro Jehovah? (b) Nsinsi uwem nnyịn ọkọn̄ọ ke nso, ndien nso idi ubiere nnyịn?
19 Kpukpru nnyịn ẹmi inamde n̄kpọ Jehovah imadat esịt ndinam ewụhọ Bible oro ọdọhọde ẹtoro enye. Ndien ndien n̄wed Ediyarade ada ikọ emi “Hallelujah,” nditịn̄ mban̄a itoro Abasi. (Ediyarade 19:1-6) Ke mme ufan̄ikọ itiokiet eke Psalm 150, ẹsian nnyịn utịm ike 13 ẹte itoro Jehovah. Emi edi eben̄e ẹnọde kpukpru n̄kpọ obot ke kpukpru ebiet ndidi ndidiana ke ndikwọ itoro idara idara nnọ Jehovah. Nsinsi uwem nnyịn ọkọn̄ọ ke nnyịn nditiene n̄kwọ akwa ikwọ Hallelujah emi! Ih, n̄kukụre mbon oro ẹdidude uwem ke nsinsi ẹdi mbon oro ẹkọbọde ke ndinọ Jehovah itoro. Ke ntre, nnyịn imebiere ndisọn̄ọ nyịre ye esop eke ofụri ererimbot esie emi enyenede nsọn̄ọnda nte utịt asan̄ade ekpere. Do, nnyịn imekeme ndidori enyịn ndikụt mme akpatre ikọ eke Psalm 150 ẹsude ọyọhọ ọyọhọ: “Yak kpukpru n̄kpọ eke ẹduọkde ibifịk ẹtoro Jehovah. Mbufo ẹtoro Jehovah.”
Didie ke Afo Ọkpọbọrọ?
◻ Nso inam ikọt Jehovah ẹdi san̄asan̄a ye n̄wọrọnda?
◻ Ntak emi mme asan̄autom Jehovah ẹkopde idatesịt ntre?
◻ Nso inam nnyịn ida san̄asan̄a ikpọn̄ ererimbot?
◻ Ke ewe usụn̄ ita ke Abasi an̄wam nnyịn inyene itie ke ata eti uduak esie?
[Ndise ke page 17]
Ke ebiet ekededi oro enye okodude, Jesus ama etie ntiense aban̄a Jehovah onyụn̄ otoro enye an̄wan̄wa