Ntọt M’ọkwọrọ Obio Ụbọn̄

Mme Uyen Ẹtoro Abasi ke Democratic Republic Of Congo

KE EDIWAK isua ikie ko-o, andiwet psalm ama ọnọ n̄kparawa owo ufiop ufiop ikot nditiene ntoro nsinsi Edidem: “N̄kparawa, ye nditọ iban; n̄kani iren, ye nditọwọn̄ . . . ẹtoro enyịn̄ Jehovah: koro enyịn̄ esie ikpọn̄îkpọn̄ okon̄de.” (Psalm 148:12, 13) Mme ifiọkutom ẹtienede mi ẹtode Democratic Republic of Congo ẹwụt anana-mbiet ifetutom emi.

• Edu uwem Mme Ntiense Jehovah ama otụk ete enyene ebiet oro akpan asiakusụn̄ kiet okodụn̄de ke ufọk esie ke eti usụn̄. Enye ke ntem ama ayak Mme Ntiense ẹkpep Bible ye Fifi, eyenan̄wan esie oro ekedide isua ition ke emana. Ke ama okokụt n̄kọri Fifi ke ndikpep N̄wed Mi eke Mme Mbụk Bible,a ete esie ama esiyak enye odụk mme mbonoesop ke Ufọkmbono Obio Ubọn̄. Do, ekpri Fifi ama ekpep mme ikwọ Obio Ubọn̄ oto n̄wedikwọ Mme Ntiense. Enye ama enen̄ede ama ọyọhọ ikwọ 4, emi ibuotikọ edide “Paradise Oro Abasi Ọn̄wọn̄ọde.”

Usen kiet ete Fifi ama ebiere ndida enye n̄ka ufọkabasi esie. Ke n̄kpaidem kpukpru owo, Fifi ama esịn ndikwọ ikwọ ufọkabasi oro. Ntak-a? Koro enye ekekerede ete ke mme ikwọ oro ẹkekwọde ke ufọkabasi ete esie ikodụhe ke n̄kemuyo ye se enye ekekpepde ke ukpepn̄kpọ Bible esie. Ye uko, enye ama ọkwọ ikwọ Obio Ubọn̄ oro enye amade akan ke ukpụhọ.

Ke ẹma ẹkesịn ekese ukeme oro mîkekwe unen ndikpụhọde ekikere esie, mme adausụn̄ ke ufọkabasi ẹma ẹbiere ndinọ Fifi, eyen isua ition, iduọ! Kpa ye idiọk edinam emi, ete esie ikosioroke uyo. Enye ama okop inemesịt nte ke Fifi ama ọsọn̄ọ ada kaban̄a se enye ekenịmde ke akpanikọ. Ete ye eka Fifi ẹyom enye aka iso abuana ye Mme Ntiense Jehovah.

• Ke ini uyen kiet ekerede Lukodi ekebierede ndikpep Bible ye Mme Ntiense Jehovah, ete esie ama ọbiọn̄ọ idiọk idiọk. Ke idaha kiet ke ini Lukodi eketịmde idem ndika mbonoesop ke Ufọkmbono Obio Ubọn̄, ete esie ama ada ofụt edịghe enye uwem. Ke idaha efen ete Lukodi ama eyịbi enye ke eto, ọnọde enye akamba unan ke edem. Kpa ye ọkpọsọn̄ ubiọn̄ọ, Lukodi ama ọsọn̄ọ ada ke ubiere esie ndikabade ndi kiet ke otu Mme Ntiense Jehovah. Enye ama aka iso anam n̄kọri onyụn̄ ana baptism. Idahaemi enye anam utom nte asiakusụn̄ ofụri ini.

Nsọn̄ọnda Lukodi ama enen̄ede otụk Sona, ekpri eyeneka esie an̄wan, tutu enye n̄ko ọtọn̄ọ ndikpep Bible ye Mme Ntiense Jehovah. Nte ededi, man ọbiọn̄ọ enye ndikpep n̄kpọ, ete mmọ ama ọnọ Sona aka ufọkn̄wed ke obio-in̄wan̄ efen, emi Ntiense ndomokiet mîkodụhe. Kpa ye oro, Sona ama anam edi ido esie nditịn̄ mme n̄kpọ oro enye ekekpepde nnọ mbon en̄wen. Nte utịp, eyen eyeneka eka esie ama enyene udọn̄ n̄ko.

Ke ini Mme Ntiense ke obio-in̄wan̄ mbọhọ oro ẹkekopde ẹban̄a utom ukwọrọikọ Sona, mmọ ẹma ẹka ẹkese enye ẹnyụn̄ ẹnam ndutịm ẹnọ enye ndinyene ukpepn̄kpọ Bible ofụri ini. Enye ama aka iso ndinam n̄kọri ndien ikebịghike ama etiene eyeneka esie eren edi Ntiense Jehovah oro ayakde idem ọnọ onyụn̄ anade baptism. Adianade do, eyen eyeneka eka esie edi asuanetop oro mînaha baptism idahaemi, ndien ke ẹnịm ukpepn̄kpọ n̄wedesop ke obio-in̄wan̄ emi.

Edi utịbe n̄kpọ onyụn̄ edemede owo didie ntem ke ini n̄kpri owo ẹtienede ẹtoro enyịn̄ Jehovah!

[Mme Ikọ idakisọn̄]