Ntọt Mme Anditan̄a Obio Ubọn̄

Abasi Anam Enye Ọkọri ke Alaska

KE IDAK eboho snow ye ice, ekpri n̄kpasịp ke ana ebet ini edikọri n̄kpon. Ke ufan̄ ọfiọn̄ ita oro anamde ndaeyo Alaska, n̄kpasịp ikọn̄ udia emi edide milimita ita ekeme ndikọri n̄kpere ndisịm kilogram 40! Ih, isọn̄ emi ediwak owo ẹkekerede ini kiet ko ẹte ke edi ikpîkpu isọn̄ snow emi mîfọnke n̄kpọ ekeme ndision̄o akpakịp mbun̄wụm.

Emi enen̄ede edi akpanikọ ye isọn̄ eke spirit ke Alaska. Do, ke isọn̄ anyan ini etuep, Mme Ntiense Jehovah ẹka iso nditọ n̄kpasịp Obio Ubọn̄. Nte edide ke mme ikpehe isọn̄ en̄wen, Abasi anam n̄kpasịp oro asiaha ke nti esịt.—1 Corinth 3:6, 7.

● Ke adan̄aemi odude ke bọs ufọkn̄wed, uyen Ntiense kiet emi ekerede Vanessa ama okụt ekemmọ eyen ufọkn̄wed, Ann, emi ekesitiede ikpọn̄ kpukpru ini. Ann eketie mfụhọ mfụhọ, ntre Vanessa ama okot Ann editie adiana imọ. Eyịghe idụhe Ann okofụhọde! Ifehesịt okowot eka esie, ndien esisịt ini ke ukperedem, kansa ama owot ete esie. Ntak ekedi oro Ann okodụn̄de ye iman ke Alaska.

Vanessa ama awaha ufọk obufa ọdiọn̄ọ esie emi ke adan̄aemi odude ke utom an̄wautom ke Saturday kiet onyụn̄ ọnọ enye ediye uduot ekpri n̄wed oro Nte Abasi Enen̄ede Ekere Aban̄a Nnyịn? Ke Monday oro eketienede ke ufọkn̄wed, Ann ama oyom uyen Ntiense oro okụt. Ann ama enyene ediwak mbụme Bible, emi Vanessa ekekemede ndibọrọ. Enye ama obụp ete: “M̀mọ̀n̄ ke mbufo ẹsinịm mbono utuakibuot mbufo?” Mbubịteyo oro Ann ama odụk akpa mbono esop esie ke Ufọkmbono Obio Ubọn̄.

Ikadaha anyan ini eyenakpa isua 17 emi ndinyene ediwak “ete” ye “eka,” ukem nte Jesus ọkọn̄wọn̄ọde. (Matthew 19:29) Ndien ekedi n̄kpọ idatesịt didie ntem ndikụt Ann oro okopde inemesịt onyụn̄ atuakde inua imam anamde uyarade uyakidem esie ọnọ Jehovah ebe ke baptism mmọn̄ ke Mbono District “Mme Isụn̄utom Emem Abasi”!

● Ke nsannsan ikpehe Ata Edere Edere Alaska—ke ebiet emi mme wilderness ẹmi ẹniọn̄de ke ediwak kilomita ke mme itie ikie ẹbaharede mme obio-in̄wan̄—ẹsida ubomofụm Watch Tower Society emi enyenede engine iba ndisuan n̄kpasịp Obio Ubọn̄ ke se ibede mme obio 150. Edi n̄kọri eke spirit ebede ke ukpepn̄kpọ Bible ofụri ini ọkọn̄ọ ke ediwet leta. Sia uwet leta edide ọkpọsọn̄ n̄kpọ ọnọ ediwak owo, oyom andikpep Bible enyene usọ man anam udọn̄ eyen ukpepn̄kpọ okûnịme. Didie ke ẹkeme ndiyọhọ emi?

Kathy ama enịm ukpepn̄kpọ Bible emi enyenede uforo ye Edna, okposụkedi mmọ ẹkedụn̄de oyom usụn̄ ọkpọn̄ kiet eken ke se iwakde ikan kilomita 600! Utu ke ndiwet sụk mme mbụme ẹmi ẹdude ke n̄wed un̄wam ukpepn̄kpọ, Kathy ama ada n̄wed ewet mme mbụme onyụn̄ ọnọ ufan̄ ẹdiwetde ibọrọ. Ke Edna ama ọkọdọn̄ mme ibọrọ, Kathy ama ọbọrọ onyụn̄ ọdọn̄ mme utịn̄ikọ ẹmi ẹkeyomde man anam akpan n̄kpọ an̄wan̄a. Kathy etịn̄ ete: “Mma nsio mbubịteyo Wednesday nnịm nnọ ‘ukpepn̄kpọ’ nnyịn, ndien mma n̄n̄wana ndisọn̄ọ nyịre ke enye nte n̄kpanamde ye ediomi ukpepn̄kpọ Bible efen. N̄ko mma nsinọ efọkn̄wed emi n̄wetde adres mi nnyụn̄ ndian stamp nnọ ẹsọk Edna. Sia ekesidade urua iba leta ndisịm, ukpepn̄kpọ ebede ke leta ikesisọpke ke ndusụk udomo.”

Kere ban̄a inemesịt oro okodude ke ini Kathy ye Edna ẹkesobode iso ye iso ke mbono district ke Anchorage ke ẹma ẹkekpep n̄kpọ ke ọfiọn̄ duop ebe ke uwet leta! Mme Ntiense ẹma ẹkop inemesịt n̄ko ndikụt nditọ ukpepn̄kpọ Bible ye mmọ en̄wen ẹmi ẹnyenede udọn̄ ẹtode ediwak nsannsan obio-in̄wan̄ ke Alaska edidụk mbono oro.

Okposụkedi n̄kọri ekemede nditie nte isọpke ke ndusụk ini, ndusụk “nsek eto” ẹsisọp ẹkọri edieke ẹsiode ẹnyan ẹnọ un̄wana akpanikọ. Ke ẹbaharede ukem ukem, se iwakde ikan mbufa mme anditoro Jehovah ikie ẹsina baptism kpukpru isua ke Alaska! Nnyịn idọhọ ite, “Jehovah, sọsọn̄ọ,” ke ndinam enye ọkọri!