Ndidu Uwem Ekekem Ye Uyakidem Christian Ke Ubọhọ-ufụn

“Ọtọ nte Spirit [Jehovah, NW] odude, ubọhọ-ufụn etiene odu do n̄ko.”—2 CORINTH 3:17.

1. Mme Ntiense Jehovah ẹyak idem ẹnọ anie, ndien ntak emi mmọ ẹdade mme n̄ka oro ẹkemde ye ibet ẹnam n̄kpọ?

MME NTIENSE JEHOVAH ẹnịm ke akpanikọ nte ke ido ukpono mmọ eyebịghi ke nsinsi. Mmọ ke ntre ẹdori enyịn ndinam n̄kpọ Abasi “ke spirit ye ke akpanikọ” ke nsinsi. (John 4:23, 24) Nte mbon oro ẹnyenede ifụre ndinam ubiere, mme Christian ẹmi ẹmenam uyakidem oro owo mîfamke n̄kpọ ida ẹnọ Jehovah Abasi ẹnyụn̄ ẹbiere ndidu uwem ekekem ye enye. Ke ntak oro, mmọ ẹberi edem ke Ikọ Abasi ye ke edisana spirit esie. Nte mmọ ke ofụri esịt ẹbịnede usụn̄ uyakidem Christian mmọ ke ubọhọ-ufụn oro Abasi ọnọde, Mme Ntiense ẹwụt ukpono oro odotde ẹnọ utom oro “mme enyene-odudu ẹmi ẹkarade” ẹnamde ẹnyụn̄ ẹda mme usụn̄ ye mme ndutịm oro ẹkemde ye ibet ẹnam n̄kpọ ke nnennen usụn̄. (Rome 13:1; James 1:25) Ke uwụtn̄kpọ, Mme Ntiense ẹda Watch Tower Society nte n̄kpọutom oro ekemde ye ibet—kiet ke otu ediwak ẹmi ẹdude ke nsio nsio idụt—man an̄wam mmọ ndiyọhọ utom mmọ eke edin̄wam mme ekemmọ owo, akpan akpan ke mme usụn̄ eke spirit. Edi Mme Ntiense ẹyak idem ẹnọ Abasi, idịghe n̄kpọutom ekededi oro ekemde ye ibet, ndien uyakidem mmọ nnọ Jehovah eyebịghi ke nsinsi.

2. Ntak emi Mme Ntiense Jehovah ẹnen̄erede ẹwụt esịtekọm ẹban̄a Watch Tower Society ye mme ukem n̄ka oro ẹkemde ye ibet?

² Nte mme asan̄autom oro ẹyakde idem ẹnọ Abasi, obiomo Mme Ntiense Jehovah nditiene mme item Jesus oro nte “ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ.” (Matthew 28:19, 20) Utom emi ayaka iso tutu esịm utịt editịm n̄kpọ emi, koro Jesus ama ọdọhọ n̄ko ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:3, 14) Kpukpru isua, itie umịn̄n̄wed Watch Tower Society ye mme ukem n̄ka oro ẹmi ekemde ye ibet ẹsinọ Mme Ntiense Jehovah ediwak miliọn Bible, mme n̄wed, ndiye uduot n̄kpri n̄wed, ye mme magazine ndikama ke utom ukwọrọikọ ofụri ererimbot mmọ. Mme n̄ka oro ẹkemde ye ibet mi ke ntre ẹnyene ata akamba ufọn ke ndin̄wam mme asan̄autom Abasi oro ẹyakde idem ẹnọ ndidu uwem ekekem ye uyakidem mmọ nnọ enye.

3. Ke nso usụn̄ifiọk ke Mme Ntiense Jehovah ke akpa ẹkesida ikọ oro “N̄ka”?

³ Owo ekeme ndineni ete ke usụn̄ oro Mme Ntiense ẹsitịn̄de ẹban̄a Watch Tower Society—m̀mê “N̄ka” ke ediwak ini—owụt ete ke mmọ ẹda enye ke usụn̄ okponde akan n̄kpọutom oro ekemde ye ibet. Nte mmọ idaha enye nte ebiet emi akpatre ubiere otode ke mme n̄kpọ ẹban̄ade utuakibuot? N̄wed oro Jehovah’s Witnesses—Proclaimers of God’s Kingdom anam n̄kpọ emi an̄wan̄a ke ndidọhọ ete: “Ke ini Enyọn̄-Ukpeme (Ikọmbakara) [June 1, 1938] eketịn̄de aban̄a ‘N̄ka,’ emi ikọwọrọke sụk n̄kpọutom oro ekemde ye ibet, edi otu mme Christian oro ẹyetde aran oro okosiode n̄ka oro ekemde ye ibet mi edi onyụn̄ adade enye anam n̄kpọ.”a Ikọ oro ke ntre akada ọnọ “asan̄autom emi anamde akpanikọ, onyụn̄ enyenede ọniọn̄.” (Matthew 24:45) Edi ke usụn̄ifiọk emi ke Mme Ntiense ke ofụri ofụri ẹda ikọ oro “N̄ka.” Edi akpanikọ, n̄ka oro ibet enyịmede ye “asan̄autom emi anamde akpanikọ, onyụn̄ enyenede ọniọn̄” idịghe enyịn̄ oro ẹdade ke ukpụhọ. Ẹmemek mme Akamautom Watch Tower Society, ke adan̄aemi edide edisana spirit eyet Mme Ntiense oro ẹnamde “asan̄autom emi anamde akpanikọ” aran.

4. (a) Didie ke ediwak Mme Ntiense ẹsitịn̄ ikọ man ẹkpan ukwan̄ ekikere? (b) Ntak emi ikpadade ukem ukem ke se iban̄ade ikọ oro idade?

⁴ Man ẹfep ukwan̄ ekikere, Mme Ntiense Jehovah ẹdomo ndikpeme nte mmọ ẹtịn̄de ikọ. Utu ke ndidọhọ, “N̄ka ekpep,” ediwak Ntiense ẹsima ndida mme utọ ikọ nte, “Bible ọdọhọ” mîdịghe, “an̄wan̄a mi nte ke Bible ekpep.” Ke usụn̄ emi mmọ ẹdori nsọn̄uyo ke ọkpọkpọ ubiere oro Ntiense kiet kiet anamde ke ndinyịme mme ukpepn̄kpọ Bible ẹnyụn̄ ẹfep n̄ko ndiwụt ke ukwan̄ usụn̄ nte ke Mme Ntiense ke usụn̄ kiet m̀mê eken ẹtiene ubiere ndusụk n̄ka ido ukpono. Edi akpanikọ, mme ekikere ẹban̄ade ikọ oro ẹdade ikpedehede ikabade idi n̄kpọ eneni. Kamse, ikọ oro ẹdade edi akpan n̄kpọ n̄kukụre ke udomo oro enye mînamke ẹnyene ukwan̄ ekikere. Oyom edida ukem ukem eke Christian. Bible ọnọ nnyịn item ete “ẹkûn̄wana ẹban̄a ikọinua.” (2 Timothy 2:14, 15) N̄wed Abasi n̄ko etịn̄ edumbet emi ete: “Edieke mbufo mîdaha edeme mbufo isem usem eke ememde owo idem ndikop, ẹdisan̄a didie ẹfiọk se mbufo ẹtịn̄de?”—1 Corinth 14:9.

Spirit Abasi Osụhọde Ibat Ibet Ẹyomde

5. Didie ke 1 Corinth 10:23 akpan̄wan̄a owo?

⁵ “Kpukpru n̄kpọ ẹnenen ndinam, edi idịghe kpukpru n̄kpọ ẹfọn,” ntre ke apostle Paul ọkọdọhọ. Enye ama adian ete: “Kpukpru n̄kpọ ẹnenen ndinam, edi idịghe kpukpru n̄kpọ ẹnam owo ẹkọri ke nti ido.” (1 Corinth 10:23) Ikọ Paul nte an̄wan̄ade ikọwọrọke ite ke enen ndinam mme n̄kpọ oro Ikọ Abasi obiomde ikpe in̄wan̄în̄wan̄. Ke ẹmende ẹdomo ye n̄kpọ nte ibet 600 ẹkenọde Israel eset, ibat ibat nnennen ewụhọ ẹdu ndikara uwem Christian ke ndimen ndomo. Ntem, ẹyak ediwak n̄kpọ ẹnọ ubieresịt owo kiet kiet. Owo oro ama akayak idem ọnọ Jehovah enyene ifụre oro osụn̄ọde oto ndausụn̄ oro spirit Abasi ọnọde. Ke ama akanam akpanikọ edi eke esie, Christian etiene ubieresịt esie oro Bible ọnọde ukpep onyụn̄ eberi edem ke ndausụn̄ Abasi otode edisana spirit. Emi an̄wam Christian oro ama akayak idem ọnọ ndibiere se ‘inamde owo ọkọri’ inyụn̄ ‘ifọnde’ inọ enye ye mbon efen. Enye ọfiọk ete ke mme ubiere oro imọ inamde ẹyetụk ọkpọkpọ itie ebuana imọ ye Abasi, emi imọ iyakde idem inọ.

6. Ke mme mbono esop Christian, didie ke ikeme ndiwụt nte ke imanam akpanikọ edi eke nnyịn?

⁶ Ntiense owụt ke imọ imanam akpanikọ edi eke imọ ebe ke ndinọ mme ibọrọ ke mme mbono esop Christian. Ke akpa, enye ekeme nditịn̄ nnennen se idude ke n̄wed oro ẹkpepde. Nte ini akade, nte ededi, enye ayanam n̄kọri ekesịm idaha nditịn̄ mme ukpepn̄kpọ Bible ke mme ikọ idemesie. Enye ke ntem ọnọ uyarade nte ke imọ ke ifori ukeme ukere n̄kpọ imọ, idịghe sụk edifiak ntịn̄ se mbon efen ẹketịn̄de. Ndibot mme ekikere nsio ke mme ikọ idemesie nnyụn̄ ntịn̄ nnennen ikọ akpanikọ ke usụn̄ otode esịt ayada inemesịt ọsọk enye onyụn̄ owụt ete ke enye enịm se idude enye ke ekikere ke akpanikọ.—Ecclesiastes 12:10; men Rome 14:5b domo.

7. Nso ubiere ke mme asan̄autom Jehovah ẹnam ifụre ifụre?

⁷ Ima ẹnyenede ẹnọ Abasi ye mme ekemmọ owo onụk Mme Ntiense Jehovah ndinam n̄kpọ. (Matthew 22:36-40) Ke akpanikọ, ima ebietde eke Christ enen̄ede adian mmọ ọtọkiet nte otu nditọete ofụri ererimbot. (Colossae 3:14; 1 Peter 5:9) Edi nte owo oro ekemede ndinam ubiere, owo kiet kiet emebiere ke idemesie nditan̄a eti mbụk Obio Ubọn̄ Abasi, ndida san̄asan̄a n̄kpọn̄ ukaraidem, ndibet iyịp, ndifep ndusụk orụk unọ idem inemesịt, nnyụn̄ nda mme idaha oro Bible enịmde ndu uwem. Mmọ ẹmi idịghe mme ubiere oro ẹnyịkde-nyịk ẹdori mmọ. Mmọ ẹdi mme ubiere oro ẹdide ubak usụn̄ uwem emi mbon oro ẹyomde ndidi Mme Ntiense ẹmekde mbemiso mmọ ẹkam ẹnamde usio-ukot uyakidem Christian.

Ẹnam Ibat ẹnọ Otu Ukara?

8. Nso mbụme ke oyom ẹnam an̄wan̄a?

⁸ Bible owụt in̄wan̄în̄wan̄ ete ke owo inyịkke-nyịk mme ata Christian ndinam n̄kpọ Abasi. Enye ọdọhọ ete: “[Jehovah] edi Spirit; ndien ọtọ nte Spirit [Jehovah] odude, ubọhọ-ufụn etiene odu do n̄ko.” (2 Corinth 3:17) Edi didie ke ẹkeme ndinam akpanikọ emi ekekem ye ekikere aban̄ade “asan̄autom emi anamde akpanikọ, onyụn̄ enyenede ọniọn̄” ye Otu Ukara esie?—Matthew 24:45-47.

9, 10. (a) Didie ke edumbet itieibuot enyene ebuana ke esop Christian? (b) Nditiene edumbet itieibuot akanam ẹyom nso ke esop Christian akpa isua ikie?

⁹ Man ibọrọ mbụme emi, ana nnyịn inyene edumbet N̄wed Abasi aban̄ade itieibuot ke ekikere. (1 Corinth 11:3) Ke Ephesus 5:21-24, ẹtịn̄ ẹban̄a Christ nte edide “Ibuot ọnọ [esop],” kpa enye emi esop “osụkde idem ọnọ.” Mme Ntiense Jehovah ẹdiọn̄ọ ẹte ke nditọete Jesus eke spirit ẹnam asan̄autom oro anamde akpanikọ onyụn̄ enyenede ọniọn̄. (Mme Hebrew 2:10-13) Ẹma ẹmek otu asan̄autom emi anamde akpanikọ mi ndinọ ikọt Abasi ‘udia eke spirit ke edikem ini.’ Ke utịt ini emi, Christ ama emek asan̄autom emi ‘ndise mban̄a ofụri inyene esie.’ Odot owo ekededi oro ọdọhọde ke idi Christian okpono idaha esie.

¹⁰ Uduak itieibuot edi ndimụm edidianakiet n̄kama nnyụn̄ n̄kụt ete ke ‘kpukpru n̄kpọ ẹsan̄a ke nde ke nde ye ke ido nte eyede.’ (1 Corinth 14:40) Man ẹnyene emi ke akpa isua ikie, ẹma ẹmek ediwak Christian ẹmi ẹyetde aran ẹsio ke otu asan̄autom emi anamde akpanikọ onyụn̄ enyenede ọniọn̄ ndida ke ibuot ofụri otu oro. Nte mme n̄kpọntịbe oro ẹketienede ẹkewụtde, utom use enyịn eke otu ukara akpa isua ikie emi ama enyene unyịme ye edidiọn̄ Jehovah. Mme Christian akpa isua ikie ẹma ẹnyịme ndutịm emi ye idatesịt. Ih, mmọ ẹma ẹnen̄ede ẹdara ẹnyụn̄ ẹwụt esịtekọm ẹban̄a nti utịp oro enye okosion̄ode.—Utom 15:1-32.

11. Didie ke ẹkpese Otu Ukara eyomfịn?

¹¹ Ufọn utọ ndutịm oro ke osụk ododu. Idahaemi, duop ke otu mme Christian oro ẹyetde aran ẹnam Otu Ukara eke Mme Ntiense Jehovah, kpukpru mmọ ẹnyenede ifiọkutom Christian ke mme iduọk isua duop. Mmọ ẹnọ Mme Ntiense Jehovah ndausụn̄ eke spirit, nte otu ukara eke akpa isua ikie akanamde. (Utom 16:4) Ukem nte mme akpa Christian, Mme Ntiense ye idatesịt ẹdori enyịn ke nditọete mmọ eke Otu Ukara oro ẹkọride ẹsịm ọyọhọ idaha ndinọ item ye ndausụn̄ oro ẹkọn̄ọde ke Bible ke mme n̄kpọ ẹban̄ade utuakibuot. Okposụkedi mme andibuana ke Otu Ukara ẹdide mme asan̄autom Jehovah ye eke Christ, kpa nte mme ekemmọ Christian mmọ ẹdide, Bible eteme nnyịn ete: “Ẹkop uyo mme andida mbufo usụn̄, ẹnyụn̄ ẹsụk ibuot ẹnọ mmọ; koro mmọ ẹkpemede ẹyom ufọn ukpọn̄ mbufo, nte mmọ ẹmi ẹnyenede ndinọ Abasi ibat; man mmọ ẹnam utom ke idara, ẹkûnam ke mfụhọ; koro emi mîdoroke udori inọ mbufo.”—Mme Hebrew 13:17.

12. Ana Christian kiet kiet anam ibat ọnọ anie?

¹² Nte idaha use enyịn oro N̄wed Abasi ọnọde Otu Ukara ọwọrọ ete ke ana owo kiet kiet ke otu Mme Ntiense Jehovah anam ibat utom esie ọnọ enye? Idịghe ntre nte ekemde ye mme ikọ oro Paul eketịn̄de ọnọ mme Christian ke Rome ete: “Nsinam ndien afo ekpede ikpe ọnọ eyenete fo? M̀mê nsinam afo esede eyenete fo ke mbio? Koro kpukpru nnyịn iyada ke iso itie ikpe Abasi . . . Kpukpru nnyịn kiet kiet iyobụk mbụk iban̄a idem [nnyịn] inọ Abasi.”—Rome 14:10-12.

13. Ntak emi Mme Ntiense Jehovah ẹtọtde utom ukwọrọikọ mmọ?

¹³ Nte emi idịghe akpanikọ, nte ededi, nte ke oyom Mme Ntiense kiet kiet ọtọt utom ukwọrọikọ esie? Ih, edi ẹnam uduak kaban̄a emi etịm an̄wan̄a ke n̄wed Mme Ntiense kiet, emi ọdọhọde ete: “Mme akpa anditiene Jesus Christ ẹma ẹnyene udọn̄ ke nditọt n̄kọri utom ukwọrọikọ. (Mark 6:30) Nte utom okoforode, ẹma ẹsitan̄ ibatutom ẹdian kiet adianade ye mbụk n̄wọrọnda ifiọkutom mbon oro ẹbuanade ke edikwọrọ eti mbụk. . . . (Utom 2:5-11, 41, 47; 6:7; 1:15; 4:4) . . . Ekedi n̄kpọ nsịnudọn̄ didie ntem ọnọ mme anam-akpanikọ Christian mbonutom oro ndikop mbụkutom aban̄ade se ẹkenamde! . . . Ke ukem usụn̄ oro, esop Jehovah eyomfịn omodomo ndinịm nnennen n̄wetnnịm n̄kpọ aban̄ade utom oro ẹnamde ke edisu Matthew 24:14.”

14, 15. (a) Didie ke 2 Corinth 1:24 enyene ebuana ye Otu Ukara? (b) Ke ewe isọn̄ ke ana Christian kiet kiet anam ọkpọkpọ ubiere, nte ekemde ye ewe akpanikọ?

¹⁴ Otu Ukara edi ima ima ndutịm ye uwụtn̄kpọ mbuọtidem oro odotde ẹkpebe. (Philippi 3:17; Mme Hebrew 13:7) Ebede ke mmọ ndisọn̄ọ nyịre nnyụn̄ ntiene Christ nte uwụtn̄kpọ, mmọ ẹkeme nditịn̄ mme ikọ Paul ẹmi: “Idịghe nte nnyịn idedi mme andikara mbufo ke n̄kpọ mbuọtidem, edi nte idedi mme andin̄wam mbufo ndinyene idatesịt. Koro ke mbuọtidem ke mbufo ẹdada.” (2 Corinth 1:24) Ebede ke ndinọ ntịn̄enyịn ke nte mme n̄kpọ ẹkade iso, Otu Ukara odụri ntịn̄enyịn owụt mme ufọn edinam item Bible, ọnọ mme ekikere aban̄a edida mme ibet ye mme edumbet Bible nsịn ke edinam, odụri owo utọn̄ aban̄a mme n̄kpọndịk oro ẹdịbede, onyụn̄ ọnọ ‘mme ekemmọ mbon utom’ nsịnudọn̄ oro ẹyomde. Enye ke ntem anam utom akama-ukpọhọde Christian esie, an̄wam mmọ ndimụm idatesịt mmọ n̄kama, onyụn̄ ọbọp mmọ ke mbuọtidem man mmọ ẹkeme ndisọn̄ọ nda.—1 Corinth 4:1, 2; Titus 1:7-9.

¹⁵ Edieke Ntiense anamde mme ubiere ẹkọn̄ọde ke item Bible oro Otu Ukara ọnọde, enye emek ndinam oro ke idemesie koro ọkpọkpọ ukpepn̄kpọ Bible esie anam enye enịm ke akpanikọ nte ke emi edi nnennen edinam. Ikọ Abasi otụk Ntiense kiet kiet ndida nti item N̄wed Abasi oro Otu Ukara ọnọde nsịn ke edinam, ọdiọn̄ọde ọyọhọ ọyọhọ nte ke mme ubiere oro imọ inamde ẹyetụk ọkpọkpọ itie ebuana imọ ye Abasi, emi imọ iyakde idem inọ.—1 Thessalonica 2:13.

Nditọ Ukpepn̄kpọ ye Mbonekọn̄

16. Okposụkedi mme ubiere kaban̄a edu uwem ẹdide ọkpọkpọ n̄kpọ, ntak emi ẹsisiode ndusụk owo ẹfep?

¹⁶ Edi edieke mme ubiere kaban̄a edu uwem edide ọkpọkpọ n̄kpọ, ntak emi ẹsisiode ndusụk owo ke otu Mme Ntiense Jehovah ẹfep? Idụhe owo ndomokiet emi ebierede nte amama nte ke edinam akpan idiọkn̄kpọ oyom edisio mfep. Utu ke oro, N̄wed Abasi enyịme edinam emi n̄kukụre ke ini andibuana ke esop anamde ikpọ idiọkn̄kpọ ye unana edikabade esịt, utọ nte mbon oro ẹbatde ke ọyọhọ ibuot 5 eke Akpa Corinth. Ntem, ke adan̄aemi ẹkemede ndisio Christian mfep ke ntak anamde use, emi etịbe n̄kukụre edieke owo oro esịnde ndinyịme un̄wam eke spirit eke mme ima ima ekpemerọn̄. Idịghe Mme Ntiense Jehovah ikpọn̄ ẹsitiene ido edinam Christian emi. The Encyclopedia of Religion ọdọhọ ete: “N̄ka ekededi ọdọhọ ke imenyene unen ndikpeme idemesie mbiọn̄ọ mme andibuana oro mîdụhe uwem ekekem ẹmi ẹkemede ndisịn mfọnọn̄kpọ ofụri owo ke itiendịk. Ke n̄kan̄ ido ukpono ẹwụt unen emi ẹbe ke edinịm ke akpanikọ oro nte ke ufen oro ẹnọde [edinọ iduọ] otụk idaha oro owo enyenede ke iso Abasi.”

17, 18. Didie ke ẹkeme ndiwụt nte ke edisio mfep enen?

¹⁷ Mme Ntiense Jehovah ẹdi nditọ ukpepn̄kpọ Bible. (Joshua 1:8; Psalm 1:2; Utom 17:11) Ẹkeme ndimen ndutịm unọ ukpep Bible oro Otu Ukara ọnọde ndomo ye ukpepn̄kpọ ufọkn̄wed oro itieutom esede aban̄a ukpepn̄wed odiomide. Okposụkedi itieutom oro ke idemesie mîdịghe ebiet emi ukpepn̄kpọ oro otode, enye anam ndutịm ukpepn̄kpọ, ebiere usụn̄ unọ ukpep, onyụn̄ ọnọ mme ndausụn̄ oro ẹyomde. Edieke owo ekededi ke in̄wan̄în̄wan̄ usụn̄ esịnde ndidu uwem ekekem ye mme n̄kpọ oro ufọkn̄wed oyomde, adade mme mfịna ọsọk mme ekemmọ nditọ ufọkn̄wed, mîdịghe adade esuene ọsọk ufọkn̄wed, ẹkeme ndibịn enye. Mme akamautom ufọkn̄wed ẹnyene unen ndinam n̄kpọ ke ufọn ofụri nditọ ufọkn̄wed.

¹⁸ Ke osiode edidi nditọ ukpepn̄kpọ efep, Mme Ntiense Jehovah ẹdi mbonekọn̄ Jesus Christ, ẹmi ẹtemede ẹte ‘ẹn̄wana eti en̄wan mbuọtidem.’ (1 Timothy 6:12; 2 Timothy 2:3) Nte ido edide, edika iso ke edu uwem oro mîdotke Christian owoekọn̄ ndidu ekeme ndinam ẹtre ndinyene unyịme Abasi. Nte owo oro ẹnọde ifụre ndinam ubiere, Christian owoekọn̄ ekeme ndibiere n̄kpọ nte enye amade, edi ana enye ọyọ mme utịp ubiere esie. Paul ọdọhọ ete: “Baba owo kiet eke akade ekọn̄ idaha idem ikọkọmọ ke mbubehe uwem emi, man enye enem andisịn enyịn̄ esie ke n̄wed mbonekọn̄ esịt. Onyụn̄ edieke owo an̄wanade ndikan ke mbre, iyarake enye anyanya ke enye mîsan̄ake ke mme item in̄wana.” (2 Timothy 2:4, 5) Mme Christian oro ẹkọride ẹsịm ọyọhọ idaha, esịnede mbon oro ẹdude ke Otu Ukara, ẹdu ofụri ofụri ke idak Adausụn̄ mmọ, Jesus Christ, ẹnịmde “mme item” man mmọ ẹkeme ndibọ utịp uwem nsinsi.—John 17:3; Ediyarade 2:10.

19. Ke ima ikodụn̄ọde mme akpanikọ ẹban̄ade uyakidem Christian, nnyịn ikeme ndikụt nso nte edide akpanikọ?

¹⁹ Nte akpanikọ inamke an̄wan̄a nte ke Mme Ntiense Jehovah ẹdi mme asan̄autom Abasi, idịghe ifịn owo? Nte mme Christian oro ẹma ẹkeyak idem ẹnọ ẹdarade ubọhọ-ufụn oro Christ anamde mmọ ẹbọhọ, mmọ ẹyak spirit Abasi ye Ikọ esie akara uwem mmọ nte mmọ ẹnamde n̄kpọ ke edidianakiet ye nditọete mmọ ke esop Abasi. (Psalm 133:1) Mme uyarade kaban̄a emi ẹkpenyene n̄ko ndibiat eyịghe ekededi aban̄ade ebiet emi odudu mmọ otode mfep. Mmọ ẹkeme ndidiana ye andiwet psalm n̄kwọ ẹte: “Jehovah edi odudu mi, ye otuekọn̄ mi; esịt mi ebere enye, ndien enye ayanyan̄a mi: esịt mi onyụn̄ adara; ndien nyada ikwọ mi ntoro enye.”—Psalm 28:7.

[Mme Ikọ idakisọn̄]

Didie ke Afo Ọkpọbọrọ?

◻ Didie ke Watch Tower Society ye mme ukem n̄ka oro ẹmi ẹkemde ye ibet ẹn̄wam Mme Ntiense Jehovah?

◻ Didie ke mme Christian ẹbọ ufọn ẹto utom oro Otu Ukara eke Mme Ntiense Jehovah anamde?

◻ Ntak emi ikọt Jehovah ẹsitọtde utom ukwọrọikọ mmọ?

◻ Ke mme ewe idaha ke edisio Christian oro ama akayak idem ọnọ odot?

[Ndise ke page 19]

Otu ukara eke akpa isua ikie ama omụm edidianakiet ke ukpepn̄kpọ akama

[Mme ndise ke page 23]

Ke ofụri ererimbot, Mme Ntiense Jehovah ẹdara ubọhọ-ufụn oro Christ anamde mmọ ẹbọhọ