Ntọt Mme Anditan̄a Obio Ubọn̄
‘Ikọt Fo Ẹyenọ Idemmọ Unyịme Unyịme’
OKOPODUDU akwa owoekọn̄ Syria oro Naaman ama enyene akpamfia. Edieke owo mîsọbọke, akama-itekesịt udọn̄ọ emi ekeme ndisụn̄ọ ke edibiomo ndo ye n̄kpa. Nso ke Naaman edinam? Ke otu mbonufọk Naaman ekpri eyenan̄wan kiet odu, ‘emi ẹkemụmde ke isọn̄ Israel.’ Enye etịn̄ ikọ uko uko onyụn̄ owụt prọfet Elisha nte owo emi ekemede ndinam udọn̄ọ okụre Naaman.—2 Ndidem 5:1-3.
Ke ntak uko uko idaha eyenan̄wan emi, Naaman oyom Elisha okụt ndien ẹnam udọn̄ọ esie okụre. N̄ko-n̄ko, Naaman akabade edi andituak ibuot nnọ Jehovah! Ifiọk n̄kpọntịbe emi, emi ẹkewetde ke Bible, akada itie ke ọyọhọ isua ikie duop M.E.N. (2 Ndidem 5:4-15) Mfịn, ediwak uyen ẹwụt ukem uko oro ke nditịn̄ ikọ ke ufọn n̄kpọ Obio Ubọn̄. Ifiọkutom oro etienede mi emi otode Mozambique owụt emi.
Nuno emi edide isua itiokiet ke emana edi asuanetop eti mbụk oro mînaha baptism. Idem mbemiso enye akakabarede edi asuanetop oro mînaha baptism, Nuno ama esikot nditọwọn̄ ke mbọhọ esie obok, ọbọn̄ akam, onyụn̄ ekpep mmọ Bible, akamade N̄wed Mi eke Mme Mbụk Bible.
Ediwak ini Nuno esibak edemede ke usenubọk Saturday onyụn̄ eti ubon esie ete: “Mfịn nnyịn iyọwọrọ an̄wautom.” Ifịk esie ke utom ukwọrọikọ owụt idem ke mme usụn̄ efen. Ke adan̄aemi asan̄ade ye ete ye eka esie anam utom ukwọrọikọ efak ke Maputo, Nuno esiwak ndika mbịne mme owo ke idemesie ikpọn̄. Ke kiet ke utọ idaha oro, anam mbubehe kiet ama edi ebịne enye onyụn̄ obụp ete: “Ntak emi afo anyamde-nyam mme magazine ẹmi?” Nuno ama ọdọhọ ete: “Ami nyamke-nyam mme magazine oro, edi mmọbọ mme etịbe ndin̄wam ke ndinam utom ukwọrọikọ aka iso.” Anam mbubehe oro ama ọdọhọ ete: “Okposụkedi ami mmenyeneke udọn̄, edu ye ukeme fo ẹtụk mi. Nyama nditịp n̄kpọ nsịn ke utom emi.”
Ke idaha efen, Nuno ama asan̄a ekpere eren kiet ke efak onyụn̄ ọkọnọ enye n̄wed oro True Peace and Security—How Can You Find It? Eren oro ama obụp ete: “Nse nte aka n̄wed ke ufọkn̄wed oko?” Nuno ama ọbọrọ ete: “Ih, n̄ka ufọkn̄wed oro, edi mfịn ami nnọ akpan etop otode n̄wed emi. Enye owụt fi nte ke afo emekeme ndidu uwem ke obufa ererimbot oro Abasi edidade edi, nte ẹwụtde ke ndise ke n̄wed emi.” Nuno ikọfiọkke ite ke eren oro enye ekenyenede nneme ekedi andikpep ke ufọkn̄wed esie. Ikokụreke ke andikpep oro ndibọ n̄wed oro edi n̄ko enye idahaemi esibọ mme magazine Enyọn̄-Ukpeme ye Awake! oto Nuno.
Ke ini ẹbụpde Nuno ntak emi enye amade ndibuana ke utom ukwọrọikọ, enye ọdọhọ ete: “Nyom ndinyene nneme ye mme owo nnyụn̄ n̄kpep mmọ mban̄a Jehovah ye Eyen esie, Jesus Christ.” Enye adian ete: “Ndien edieke mme owo mîmaha ndinọ n̄kpan̄utọn̄, ntak ndomokiet idụhe ndikop iyatesịt.”
Ke ofụri ererimbot, ediwak tọsịn mme uyen nte Nuno ‘ẹnọ idem mmọ unyịme unyịme’ ndinọ ukpep nnyụn̄ n̄kwọrọ mban̄a Obio Ubọn̄ Abasi. (Psalm 110:3) Edi emi isitịbeke ke mbuari. Mme ete ye eka ẹmi ẹkpepde nditọ mmọ ẹban̄a Jehovah toto ke uyen, ẹnịmde eti uwụtn̄kpọ ke utom ukwọrọikọ, ẹnyụn̄ ẹbịnede mme udọn̄ n̄kpọ Obio Ubọn̄ ifịk ifịk ẹyebọ utịp uwak uwak.