Mmọ Ẹma Ẹnam Uduak Jehovah

Ẹnọ Nsọn̄ọnda Job Utịp

JOB ekedi owo mbọm, andin̄wana nnọ mme ebeakpa, nditọakpa, ye mbon ukụt. (Job 29:12-17; 31:16-21) Ekem, ke ata mbuari, enye ama ọduọ odụk enyene-ndịk afanikọn̄, atabade inyene esie, nditọ esie, ye nsọn̄idem esie. Ke mfụhọ, uku uku erenowo emi ekedide adaha ibetedem ọnọ mbon oro ẹkefịkde ọkọbọ esisịt un̄wam kpọt ke ini unana esie. N̄wan esie ama akam ọdọhọ enye “kpọn̄ Abasi, ndien kpa n̄kpa.” Ndien “mme ufan” esie Eliphaz, Bildad, ye Zophar ikọnọhọ ndọn̄esịt. Utu ke oro, mmọ ẹma ẹtịn̄ ẹte ke Job ama anam idiọkn̄kpọ ndien ke ntre ama odot ndibọ ndutụhọ esie.—Job 2:9; 4:7, 8; 8:5, 6; 11:13-15.

Kpa ye ekese ndutụhọ, Job ama omụm mbuọtidem akama. Ke ntak emi, Jehovah ke akpatre ama owụt Job mbọm onyụn̄ ọdiọn̄ enye. Mbụk aban̄ade nte enye akanamde oro ọnọ kpukpru mme asan̄autom Abasi oro ẹmụmde nsọn̄ọnda ẹkama nsọn̄ọ nte ke edikem ini ẹyenọ mmọ n̄ko utịp.

Edinam Ọbọhọ ye Edifiak Ndiọn̄

Akpa, Jehovah ama asua ọnọ Eliphaz, Bildad, ye Zophar. Ke etịn̄de ikọ ọnọ Eliphaz, emi nte an̄wan̄ade ekedide andikpon n̄kan, enye ama ọdọhọ ete: “Mmayat esịt ye afo, ye mme ufan fo mbiba: koro mbufo mîkọdọhọke iban̄a mi nte enende, nte emi owo mi Job ọkọdọhọde. Mbufo ẹda ndien enan̄ itiaba, ye okukịm itiaba, ke idem mbufo, ndien ẹka ke ebiet owo mi Job, ẹkewa edifọp uwa ẹban̄a idem mbufo; ndien owo mi Job edinam n̄kpeubọk ọnọ mbufo.” (Job 42:7, 8) Kere ban̄a se emi akabuanade!

Jehovah okoyom akamba uwa oto Eliphaz, Bildad, ye Zophar, ndusụk man anam mmọ ẹfiọk nte idiọkn̄kpọ mmọ okokponde. Ke akpanikọ, edide ke n̄koi-nnam m̀mê ke ndudue, mmọ ẹma ẹsụn̄i Abasi ke ndidọhọ ke enye “ibuọtke idem ye ikọt esiemmọ” ye nte ke inen̄ekede ibehe enye m̀mê Job anam akpanikọ m̀mê inamke. Eliphaz ama akam ọdọhọ ete ke Job ikọsọn̄ke urua ke enyịn Abasi ikan ọfọn̄ekpo! (Job 4:18, 19; 22:2, 3) Eyịghe idụhe Jehovah ọkọdọhọde ete: “Mbufo [idọhọke] se inende iban̄a mi”!

Edi ikụreke ke oro. Eliphaz, Bildad, ye Zophar n̄ko ẹma ẹnam idiọkn̄kpọ ẹdian Job san̄asan̄a ebe ke ndidọhọ enye nte ke enye ekedi ntak mme mfịna esie. Mme anana-isọn̄ edori ikọ mmọ ye ata unana ediwụt mbọm ama anam Job ayat esịt onyụn̄ ofụhọ, anamde enye ofiori ete: “Adan̄a didie ke mbufo ẹdiyat mi esịt, ẹnyụn̄ ẹda uyo mbufo ẹnuak mi mbai mbai?” (Job 10:1; 19:2) Kere nte iso irenowo ita ẹmi ọkọyọhọde ye bụt nte mmọ idahaemi ẹkenyenede ndinọ Job uwa man awa kaban̄a idiọkn̄kpọ mmọ!

Edi ikanaha Job enem esịt aban̄a usụhọde itie mmọ. Ke akpanikọ, Jehovah ama oyom enye ọbọn̄ akam aban̄a mbon oro ẹkedoride enye ikọ. Job ama anam kpa nte ẹketemede enye, ndien ẹma ẹdiọn̄ enye kaban̄a emi. Akpa, Jehovah ama ọkọk enyene-ndịk udọn̄ọ esie. Ekem, nditọete Job iren, iban, ye n̄kani ọdiọn̄ọ esie ẹma ẹdi ẹdidọn̄ enye esịt, “kpukpru mmọ kiet kiet ẹnyụn̄ ẹnọ enye ubak silver kiet, ye n̄kpanuen o-gold kiet.”a Akan oro, Job ama ọtọn̄ọ ntak “enyene tọsịn n̄kpri ufene duopenan̄, ye tọsịn camel itiokiet, ye enan̄ iba iba itie tọsịn, ye tọsịn uman ass.”b Ndien n̄wan Job nte an̄wan̄ade ama anam emem ye enye. Nte ini akakade, ẹma ẹdiọn̄ Job ye nditọiren itiaba ye nditọiban ita, ndien enye ama odu uwem okụt ọyọhọ emana nditọ esie inan̄.—Job 42:10-17.

Ukpepn̄kpọ Ẹdude ẹnọ Nnyịn

Job ama enịm n̄wọrọnda uwụtn̄kpọ ọnọ mme asan̄autom Abasi eke eyomfịn. Enye ama “ọfọn ama, onyụn̄ enen,” owo oro Jehovah ekenyenede uko ndikot “owo mi.” (Job 1:8; 42:7, 8) Emi, nte ededi, iwọrọke ite ke Job ekedi mfọnmma. Ke idaha kiet ke ini idomo esie, enye ke ndudue ama ekere ete ke Abasi ekedi ntak afanikọn̄ esie. Enye ama akam okụt ndudue ọnọ usụn̄ oro Abasi akanamde n̄kpọ ye owo. (Job 27:2; 30:20, 21) Ndien enye ama etịn̄ aban̄a edinen ido esie utu ke eke Abasi. (Job 32:2) Edi Job ama esịn ndikpa edem n̄wụt Andibot, ndien enye ke nsụhọdeidem ama ọbọ edinen̄ede okotode Abasi. “[Ntịn̄] se mmentịmke mfiọk,” ntre ke enye ọkọdọhọ. “Mmọdo nsuade idem mi, nnyụn̄ ntiede ke obu ye ntọn̄ ntua n̄kpọfiọk.”—Job 42:3, 6.

Ke ini idude ke idak idomo nnyịn n̄ko imekeme ndikere n̄kpọ, itịn̄ ikọ, mîdịghe inam n̄kpọ ke usụn̄ oro mîdotke. (Men Ecclesiastes 7:7 domo.) Kpa ye oro, edieke inyenede ntotụn̄ọ ima inọ Abasi, nnyịn idisọn̄ke ibuot ye enye m̀mê ndiyat esịt koro enye ayakde nnyịn isobo nsọn̄ọn̄kpọ. Utu ke oro, nnyịn iyomụm nsọn̄ọnda nnyịn ikama ndien ekem ke akpatre ibọ akwa edidiọn̄. Andiwet psalm eketịn̄ aban̄a Jehovah ete: “Afo eyenyene ima ye mbon ima fo.”—Psalm 18:25.

Mbemiso ẹkenamde Job afiak enyene nsọn̄idem, Jehovah ama oyom enye ọbọn̄ akam aban̄a mbon oro ẹkeduede enye. Nso eti uwụtn̄kpọ ke emi edi ntem ọnọ nnyịn! Jehovah oyom ete nnyịn ifen mbon oro ẹduede nnyịn mbemiso ẹkemede ndifen mme idiọkn̄kpọ nnyịn. (Matthew 6:12; Ephesus 4:32) Edieke nnyịn mînyịmeke ndifen mbon en̄wen ke ini eti isọn̄ odude ndinam ntre, nte nnyịn imekeme ndidori enyịn Jehovah ndiwụt nnyịn mbọm?—Matthew 18:21-35.

Kpukpru nnyịn imesisobo mme idomo ke ini kiet m̀mê eken. (2 Timothy 3:12) Edi, ukem nte Job nnyịn imekeme ndimụm nsọn̄ọnda n̄kama. Ke ndinam ntre, nnyịn iyọdọk akwa utịp. James ekewet ete: “Sese, nnyịn idọhọ ite, ọfọfọn ye mmọ ẹmi ẹma ẹbiom ukụt: mbufo ẹmekop ẹban̄a ime Job, ẹmenyụn̄ ẹkụt se Ọbọn̄ anamde enye ke akpatre, nte Ọbọn̄ enyenede esịt mbọm, onyụn̄ atuade owo mbọm.”—James 5:11.

[Mme Ikọ idakisọn̄]