Ndikpep N̄kpọ Nto Mme Ndudue Ini Edem

MME ibet ido uwem Andibot nnyịn edi nsinsi ye se owo mîkemeke ndikpụhọde. Ke ntak emi edumbet ẹkụtde ke Galatia 6:7 enyene n̄kpọ ndinam mfịn: “Se ededi owo ọtọde, oro ke enye edinyụn̄ ọdọk.” Edi akpanikọ, owo ekeme ndidọhọ ke idinamke ibat inọ Abasi, edi ewụhọ Abasi ikpụhọkede. Ke akpatre, baba owo kiet ibọhọke mme utịp edinam esie.

Nso kaban̄a owo emi odude uwem ntụtutọn̄ ndien ekem okpụhọde, akabade edi asan̄autom Abasi? Ekeme ndidi enye oyosụk osobo mme utịp akani usụn̄ uwem esie. Emi, nte ededi, iwọrọke ite ke Abasi ifenke inọ enye. Itie ebuana efịbe Edidem David ye Bath-sheba ama ada ekese afanikọn̄ ọsọk enye ke uwem. Enye ikekemeke ndibọhọ emi. Edi enye ama akabade esịt, ndien enye ama enyene edifen nnọ otode Abasi.—2 Samuel 12:13-19; 13:1-31.

Nte akanam esịt ọduọ fi ke ini afo osobode mme utịp ndudue oro afo akanamde? Edieke isede ke nnennen usụn̄, ekikere editua n̄kpọfiọk ekeme nditie nte n̄kpọ editi nnọ nnyịn ‘ndikpeme idem nnyịn, mbak idikabade inam idiọk ido.’ (Job 36:21) Ih, ekikere editua n̄kpọfiọk ekeme ndin̄wam nnyịn ndifep edifiak nnam idiọk. Ke akam ọfọnde akan, David ama ada ifiọk n̄kpọntịbe oro enye ekenyenede oto idiọkn̄kpọ oro enye akanamde ndinam n̄kpọ idịghe ke ufọn idemesie ikpọn̄ edi ke ufọn mbon efen n̄ko. Enye ọkọdọhọ ete: “Nyeteme mme edue-ibet usụn̄ fo; mme idiọk owo ẹyenyụn̄ ẹkabade ẹtiene fi.”—Psalm 51:13.

[Mme ndise ke page 7]

David ama ekpep n̄kpọ oto idiọkn̄kpọ esie ye Bath-sheba