“Ẹyenam Mme Akpan̄kpa Ẹset”
“Koro ẹyefri ukotowo, ndien ẹyenam mme akpan̄kpa ẹset nte mmọ mîdikemeke ndibiara aba, ẹyenyụn̄ ẹkpụhọde nnyịn.”—1 CORINTH 15:52.
1, 2. (a) Nso ọnọ ndọn̄esịt un̄wọn̄ọ ke ẹkenọ ebe ke prọfet Hosea? (b) Nnyịn isan̄a didie idiọn̄ọ nte ke Abasi aduak ndinam mme akpan̄kpa ẹfiak ẹdidu uwem?
NTE akanam amataba owo ima fo ke n̄kpa? Do afo ọmọfiọk ubiak oro n̄kpa ekemede ndida ndi. Kpa ye oro, mme Christian ẹbọ ndọn̄esịt ẹto un̄wọn̄ọ emi Abasi ọkọnọde ebe ke prọfet Hosea: “Nyafak mmọ nsio ke ubọk udi; nyanyan̄a mmọ nsio ke n̄kpa: nyedi idiọk udọn̄ọ fo O n̄kpa; nyedi nsobo fo, O udi.”—Hosea 13:14.
2 Ekikere oro nte ke mme akpan̄kpa ẹyefiak ẹdidu uwem etie esen esen ọnọ mbon eyịghe. Edi Ata Ọkpọsọn̄ Abasi enen̄ede enyene odudu ndinam utọ utịben̄kpọ oro! Ata idem n̄kpọ edi m̀mê Jehovah aduak ndinam mme akpan̄kpa ẹfiak ẹdidu uwem. Edinen owo oro Job okobụp ete: “Ke owo akpade, nte enye ediset?” Ekem, enye ama ọnọ ibọrọ oro ọnọde nsọn̄ọ mi: “Afo okpokot, ndien ami n̄kpeyere fi, utom ubọk fo ọkpọdọn̄ fi.” (Job 14:14, 15) Ikọ oro “ọkpọdọn̄” owụt ọkpọsọn̄ ediyom m̀mê udọn̄. (Men Psalm 84:2 domo.) Ih, Jehovah enen̄ede ekere aban̄a ediset ke n̄kpa—enye oyom ndifiak n̄kụt mme anam akpanikọ oro ẹkekpade, oro ẹsụk ẹdude ke ekikere esie.—Matthew 22:31, 32.
Jesus Esịn Un̄wana ke Ediset ke N̄kpa
3, 4. (a) Nso un̄wana ke Jesus ekesịn ke idotenyịn ediset ke n̄kpa? (b) Ntak emi ẹkenamde Jesus eset ke spirit, utu ke obụkidem?
3 Mbon mbuọtidem eke eset nte Job ẹkenyene sụk esisịt ifiọk ẹban̄a ediset ke n̄kpa. Ekedi Jesus Christ ekesịn ọyọhọ un̄wana ke utịbe utịbe idotenyịn emi. Enye ama owụt akpan udeme oro enye ke idemesie enyenede ke ini enye ọkọdọhọde ete: “Owo eke ọbuọtde idem ye Eyen enyene nsinsi uwem.” (John 3:36) Ke m̀mọ̀n̄ ke edidara uwem oro? Ye n̄wakn̄kan owo oro ẹbuọtde idem, enye edidi ke isọn̄. (Psalm 37:11) Nte ededi, Jesus ọkọdọhọ mbet esie ete: “Ẹkûfehe ndịk, ekpri otu erọn̄; koro edide eti uduak Ete mbufo ndida Obio Ubọn̄ oro nnọ mbufo.” (Luke 12:32) Obio Ubọn̄ Abasi edi eke heaven. Ntem, un̄wọn̄ọ emi ọwọrọ ete ke “ekpri otu erọn̄” edinyene ndidu ye Jesus ke heaven nte mme edibotn̄kpọ eke spirit. (John 14:2, 3; 1 Peter 1:3, 4) Nso ubọn̄ ubọn̄ idotenyịn! Jesus ama aka iso ayarade owụt apostle John nte ke “ekpri otu erọn̄” emi edidi sụk 144,000 ke ibat.—Ediyarade 14:1.
4 Didie, ndien, ke owo 144,000 ẹdidụk ubọn̄ eke heaven? Jesus ama “osio uwem, kpa uwem eke mîdikụreke, enịm ke un̄wana.” Ebede ke iyịp esie, enye eberede “obufa ye odu uwem usụn̄” ndibe ndụk heaven. (2 Timothy 1:10; Mme Hebrew 10:19, 20) Akpa kan̄a, enye ama akpa, nte Bible ekebemde iso etịn̄ ke enye ayakpa. (Isaiah 53:12) Ekem, nte apostle Peter akatan̄ade ke ukperedem, “Abasi akanam Jesus emi eset ke n̄kpa.” (Utom 2:32) Nte ededi, owo ikanamke Jesus eset nte owo. Enye ọkọdọhọ ete: “Uyo emi ndinọde edi obụkidem Mi, man ererimbot odu uwem.” (John 6:51) Ndifiak mbọ ikpọkidem esie akpabiat uwa oro. Ntre ‘ẹkewot Jesus ke obụkidem, edi ẹnam enye edidu uwem ke Spirit.’ (1 Peter 3:18) Jesus ke ntre “ọkọbọ nsinsi ufak ọnọ owo,” emi ọwọrọde “ekpri otu erọn̄.” (Mme Hebrew 9:12) Enye ama ọnọ Abasi ekọmurua mfọnmma uwem esie eke owo nte ufak mme anam idiọkn̄kpọ ubonowo, ndien owo 144,000 ẹkedi akpa ndibọ ufọn nto emi.
5. Nso idotenyịn ke ẹkenam atara esịm mme anditiene Jesus eke akpa isua ikie?
5 Jesus idịghe n̄kukụre owo oro ẹnamde eset ke n̄kpa odụk uwem eke heaven. Paul ama ọdọhọ ekemmọ mme Christian ke Rome ete ke ẹyet mmọ aran ye edisana spirit man ẹdi nditọ Abasi ye mme ada udeme ye Christ edieke mmọ ẹsọn̄ọde ediyet aran mmọ oro ebe ke ndiyọ tutu esịm utịt. (Rome 8:16, 17) Paul n̄ko ama anam an̄wan̄a ete: “Edieke nnyịn ima ikadiana ye Enye ke n̄kpa eke ebietde n̄kpa Esie, nnyịn iyonyụn̄ idi kiet ye Enye ke ediset eke ebietde ediset Esie.”—Rome 6:5.
Edida nnọ Idotenyịn Ediset ke N̄kpa
6. Ntak emi ẹkenenide ẹban̄a edinịm ediset ke n̄kpa ke akpanikọ ke Corinth, ndien didie ke apostle Paul ọkọbọrọ?
6 Ediset ke n̄kpa edi ubak “akpa editọn̄ọ ukpepn̄kpọ” Ido Ukpono Christ. (Mme Hebrew 6:1, 2) Kpa ye oro, ukpepn̄kpọ oro okodu ke eneni ke Corinth. Ndusụk owo ke esop, ẹmi nte an̄wan̄ade ẹkeyakde ukpepn̄kpọ akwaifiọk mbon Greece akara mmọ, ẹkedọhọ ẹte: “Ediset mme akpan̄kpa idụhe.” (1 Corinth 15:12) Ke ini etop aban̄ade emi ekesịmde apostle Paul, enye ama ọsọn̄ọ ada ọnọ idotenyịn ediset ke n̄kpa, akpan akpan idotenyịn eke mme Christian oro ẹyetde aran. Ẹyak nnyịn idụn̄ọde mme ikọ Paul ẹmi ẹwetde ke 1 Corinth ibuot 15. Afo oyokụt nte an̄wamde ndikot ofụri ibuotn̄wed oro, nte ẹketorode ke ibuotikọ oro ekebemde iso.
7. (a) Ke nso akpan n̄kpọ ke Paul okowụk ntịn̄enyịn? (b) Mmanie ẹkekụt Jesus oro ẹkenamde eset?
7 Ke akpa ufan̄ikọ iba eke 1 Corinth ibuot 15, Paul owụt ibuotikọ nneme esie: “Nditọete mi, mmanam mbufo ẹfiọk gospel oro n̄kọkwọrọde nnọ mbufo, emi mbufo ẹkenyụn̄ ẹbọde, ẹnyụn̄ ẹsọn̄ọde ẹda ke esịt; emi ẹnyụn̄ ẹdade enye ẹnyan̄a mbufo, . . . ibọhọke mbuọtidem mbufo ama ọwọrọ ikpîkpu.” Edieke mbon Corinth ẹkekpude ndisọn̄ọ nda ke eti mbụk, mmọ ẹkenyịme akpanikọ ke ikpîkpu. Paul ama akaiso ete: “Mma mmen se n̄kọbọde nyak nnọ mbufo ke akpa itie, nte, Christ ama akpa aban̄a mme idiọkn̄kpọ nnyịn, nte asan̄ade ekekem ye se N̄wed Abasi ọdọhọde; ẹnyụn̄ ẹbụk Enye; ẹnyụn̄ ẹnam Enye eset ke n̄kpa ke ọyọhọ usen ita, nte asan̄ade ekekem ye se N̄wed Abasi ọdọhọde: Enye onyụn̄ ayarade idem owụt Cephas; ekem owụt mbet Esie duopeba; ekem Enye ayarade idem ini kiet owụt nditọete ẹmi ẹwakde ẹbe owo ikie ition, emi akamba ubak mmọ ẹsụk ẹdude tutu emi, edi ndusụk ke otu mmọ ẹma ẹde idap. Ekem Enye ediyarade idem owụt James; ekem owụt kpukpru mme apostle. Ndien ke ata ukperedem, Enye ediyarade idem owụt mi n̄ko emi ntiede nte eyen eke amanade ke ini mîkemke.”—1 Corinth 15:3-8.
8, 9. (a) Ndinịm ediset ke n̄kpa ke akpanikọ edi akpan n̄kpọ adan̄a didie? (b) Ana edi ini ewe ke Jesus okowụt “nditọete ẹmi ẹwakde ẹbe owo ikie ition” idem?
8 Ye mbon oro ẹma ẹkenyịme eti mbụk, ndinịm ediset Jesus ke n̄kpa ke akpanikọ ikedịghe n̄kpọ oro ẹnyenede ndimemek. Ediwak mbon ẹmi ẹkekụtde ẹma ẹdu ndisọn̄ọ nte ke “Christ ama akpa aban̄a mme idiọkn̄kpọ nnyịn” ye nte ke ẹma ẹnam enye eset. Kiet ekedi Cephas, m̀mê Peter, nte ẹtịmde ẹdiọn̄ọ enye. Ke Peter ama akakan̄ Jesus ke okoneyo oro ẹketapde Jesus ẹnọ ẹnyụn̄ ẹmụmde enye, ana edi Jesus ndiwụt enye idem ama anam enye enen̄ede okop ndọn̄esịt. Jesus oro ẹkenamde eset ama aka n̄ko ekese “mbet duopeba,” mme apostle nte otu,—ifiọk n̄kpọntịbe oro nte eyịghe mîdụhe akan̄wamde mmọ ndikan ndịk mmọ nnyụn̄ ndi mme ntiense oro ẹnyenede uko ẹban̄a ediset ke n̄kpa Jesus.—John 20:19-23; Utom 2:32.
9 Christ n̄ko ama owụt otu okponde akan oro idem, “nditọete ẹmi ẹwakde ebe owo ikie ition.” Sia ekedide ke Galilee ikpọn̄ ke enye ekenyene mme anditiene ẹwakde ntre, ana edi emi edi edinam oro ẹtịn̄de ẹban̄a ke Matthew 28:16-20, ke ini Jesus ọkọnọde ewụhọ edinam mbet. Nso okopodudu ikọ ntiense ke mme owo ẹmi ẹkekeme ndinọ ntem! Ndusụk mmọ ẹkesụk ẹdodu uwem ke 55 E.N. ke ini Paul eketịmde akpa n̄wed emi ọnọ mbon Corinth. Tịm fiọk, nte ededi, nte ke ẹketịn̄ ẹban̄a mbon oro ẹkekpade nte “ẹde idap.” Owo ikanamke mmọ ẹset ke n̄kpa kan̄a man ẹbọ utịp mmọ eke heaven.
10. (a) Nso ikedi utịp akpatre mbono Jesus ye mbet esie? (b) Didie ke Jesus okowụt Paul idem “nte eyen eke amanade ke ini mîkemke”?
10 N̄wọrọnda owo efen oro okokụtde ediset ke n̄kpa Jesus ekedi James, eyen Joseph ye Mary, eka Jesus. Mbemiso ediset ke n̄kpa, James nte an̄wan̄ade ikedịghe andinịm ke akpanikọ. (John 7:5) Edi ke Jesus ama okowụt enye idem, James ama akabade edi andinịm ke akpanikọ ndien ekeme ndidi ama enyene udeme ke ndinam nditọete esie eken ẹkabade esịt. (Utom 1:13, 14) Ke akpatre mbono esie ye mme mbet, ke ini oro enye ọkọdọkde aka heaven, Jesus ama ọnọ mmọ utom ete “ẹdi mme ntiense . . . tutu esịm utịt ererimbot.” (Utom 1:6-11) Ke ukperedem, enye ama owụt Paul eke Tarsus andikọbọ mme Christian, idem. (Utom 22:6-8) Jesus okowụt Saul idem “nte eyen eke amanade ke ini mîkemke.” Eketie nte Saul ama eseset odụk uwem eke spirit ke ntre ekemede ndikụt Ọbọn̄ oro ẹkenọde ubọn̄ ediwak isua ikie mbemiso ini ediset ke n̄kpa oro ekemde. Ifiọk n̄kpọntịbe emi ama okpụhọde ibak ibak edinam Saul eke edibiọn̄ọ esop Christian inikiet inikiet onyụn̄ anam n̄wọrọnda ukpụhọde. (Utom 9:3-9, 17-19) Saul ama akabade edi apostle Paul, kiet ke otu ata akpa andida nnọ ido ukpono Christian.—1 Corinth 15:9, 10.
Mbuọtidem ke Ediset ke N̄kpa Edi Akpan N̄kpọ
11. Didie ke Paul akayarade nsu emi odude ke ikọ oro, “Ediset ke n̄kpa idụhe”?
11 Ediset ke n̄kpa Jesus ke ntre ekedi akpanikọ oro ẹkenen̄erede ẹsọn̄ọ. Paul afan̄a ete: “Edi edieke ẹkwọrọde ẹban̄a Christ, ẹte ẹnam Enye eset ke n̄kpa, ndusụk owo ke otu mbufo ẹnam didie ẹdọhọ ẹte ediset mme akpan̄kpa idụhe?” (1 Corinth 15:12) Utọ mbon oro ikenyeneke sụk ọkpọkpọ eyịghe m̀mê mme mbụme kaban̄a ediset ke n̄kpa edi mmọ ẹma ẹtịn̄ unana edinịm ke akpanikọ mmọ in̄wan̄în̄wan̄. Ntre Paul ama owụt nte ekikere mmọ ekedide abian̄a abian̄a. Enye ọdọhọ ete edieke owo mîkanamke Christ eset, etop Christian ekedi nsu, ndien mbon oro ẹketiede ntiense ẹban̄a ediset ke n̄kpa Christ ẹkedi “mme ntiense nsu [ẹnọ] Abasi.” Edieke owo mîkanamke Christ eset, owo ikekpehe ufak inọ Abasi; mme Christian ẹkesụk ‘ẹdodu ke mme idiọkn̄kpọ mmọ.’ (1 Corinth 15:13-19; Rome 3:23, 24; Mme Hebrew 9:11-14) Ndien mme Christian ẹmi “ẹkedede idap,” ke ndusụk idaha nte mme akpan̄kpa usụn̄ Abasi, ẹma ẹtak ye unana eti idotenyịn. Nso idaha emi enyenede mbọm ke mme Christian ẹkpedu ntem edieke edide uwem enye emi ikpọn̄ ke mmọ ẹdori enyịn! Ofụri ndutụhọ mmọ ekpedi ke ikpîkpu.
12. Nso ke edikot Christ “akpa mbun̄wụm ke otu mmọ ẹmi ẹdede idap” ọwọrọ? (b) Didie ke Christ anam ediset ke n̄kpa odu?
12 Nte ededi, ikedịghe ntre. Paul akaiso ete: “Ẹma ẹnam Christ eset ke n̄kpa.” N̄ko-n̄ko, enye edi “akpa mbun̄wụm ke otu mmọ ẹmi ẹdede idap.” (1 Corinth 15:20) Ke ini nditọ Israel ke n̄kopitem ẹkenọde Jehovah akpa mbun̄wụm mmọ, Jehovah ama ada akpakịp idọk ọdiọn̄ mmọ. (Exodus 22:29, 30; 23:19; Mme N̄ke 3:9, 10) Ke ndikot Christ “akpa mbun̄wụm,” Paul owụt ete ke n̄kaiso idọk eke mme owo ẹmi ẹdinamde ẹset ke n̄kpa ẹdụk uwem eke heaven oyodu. Paul ọdọhọ ete: “Kpa nte n̄kpa okotode owo, ediset ke n̄kpa onyụn̄ oto owo. Koro nte kpukpru owo ẹkpan̄ade ke Adam, kpa ntre n̄ko ke Christ ke ẹyenam kpukpru owo ẹdu uwem.” (1 Corinth 15:21, 22) Jesus ama anam ediset ke n̄kpa odu ebe ke ndinọ mfọnmma uwem esie eke owo nte ufak, ebererede usụn̄ ọnọ edinam ubonowo ọbọhọ ufụn idiọkn̄kpọ ye n̄kpa.—Galatia 1:4; 1 Peter 1:18, 19.a
13. (a) Ini ewe ke ediset ke n̄kpa n̄ka heaven ada itie? (b) Didie ke edi nte ke ndusụk ke otu mbon oro ẹyetde aran ‘idehe’ ke n̄kpa?
13 Paul akaiso ete: “Edi kpukpru owo ke idaha esie; Christ ebem iso eset nte akpa mbun̄wụm; ekem mmọ ẹmi ẹdide ikọt Christ ẹyediana ye Enye ke edidi Esie.” (1 Corinth 15:23) Ẹkenam Christ eset ke n̄kpa ke 33 E.N. Nte ededi, mme anditiene enye oro ẹyetde aran—“mmọ ẹmi ẹdide ikọt Christ”—ẹdinyene ndibet esisịt ini ebe ke Jesus ama ọkọtọn̄ọ edidu esie ke ubọn̄, emi prọfesi Bible owụtde nte akadade itie ke 1914. (1 Thessalonica 4:14-16; Ediyarade 11:18) Nso kaban̄a mmọ oro ẹdidude uwem ke ini edidu oro? Paul ọdọhọ ete: “Sese mmọn̄ ndọhọ ndịbe-n̄kpọ nnọ mbufo. Idịghe kpukpru nnyịn [idide] idap, edi ẹyenam kpukpru nnyịn ikpụhọde, ke idaha kiet, ke ediyịp enyịn kiet, ke adan̄aemi ẹdifride akpatre ukotowo. Koro ẹyefri ukotowo, ndien ẹyenam mme akpan̄kpa ẹset nte mmọ mîdikemeke ndibiara aba, ẹyenyụn̄ ẹkpụhọde nnyịn.” (1 Corinth 15:51, 52) Nte an̄wan̄ade, idịghe kpukpru mbon oro ẹyetde aran ẹde ke udi ẹbet ediset ke n̄kpa. Ẹyekpụhọde mbon oro ẹkpan̄ade ke ini edidu Christ ke ndondo oro mmọ ẹkpan̄ade.—Ediyarade 14:13.
14. Didie ke mbon oro ẹyetde aran “ẹkena baptism ke ibuot mme akpan̄kpa”?
14 “Edieke n̄kpọ mîbonoke ntem,” Paul obụp ete, “mmọ ẹmi ẹnade baptism ẹban̄a mme akpan̄kpa ẹdinam nso? Edieke mînamke nam mme akpan̄kpa ẹset, nsidi ndien ntak emi mmọ ẹnade baptism ẹban̄a mmọ oro? Nsinyụn̄ idi ntak emi nnyịn isụk idodu ke ọkpọsọn̄ afanikọn̄ kpukpru ini?” (1 Corinth 15:29, 30) Paul ikọdọhọke ite ke mbon oro ẹdude uwem ẹkena baptism ke ibuot mme akpan̄kpa, nte ndusụk edikabade Bible ẹnamde etie. Kamse, baptism enyene n̄kpọ ndinam ye edidi mbet Christian, ndien ukpọn̄ ẹmi ẹkpan̄ade ikemeke ndidi mbet. (John 4:1) Utu ke oro, Paul eketịn̄ aban̄a mme Christian oro ẹdude uwem, ẹmi ediwak ke otu mmọ, ukem nte Paul ke idemesie, ẹkedude “ke ọkpọsọn̄ afanikọn̄ kpukpru ini.” Mme Christian oro ẹyetde aran ‘ẹkena baptism ẹdụk ke n̄kpa Christ.’ (Rome 6:3) Ọtọn̄ọde ke ini emi ẹkeyetde mmọ aran, mmọ ẹma ẹna “baptism,” yak idọhọ ntre, ẹdụk ke usụn̄ emi edidade mmọ ikesịm orụk n̄kpa Christ. (Mark 10:35-40) Mmọ ẹdikpa ye ubọn̄ ubọn̄ idotenyịn ediset ke n̄kpa n̄ka heaven.—1 Corinth 6:14; Philippi 3:10, 11.
15. Ana edi Paul okosobo nso afanikọn̄, ndien didie ke mbuọtidem ke ediset ke n̄kpa ekenyene udeme ke ndiyọ mmọ?
15 Paul idahaemi anam an̄wan̄a nte ke imọ ke idem imọ ima isobo afanikọn̄ ikesịm idaha emi imọ ikekemede ndidọhọ: “Ntie nte owo n̄kpa kpukpru usen.” Mbak ndusụk owo ẹdidori enye ikọ nte okpon inua ikọ, Paul adian ete: “Mmada mbụre emi mbụrede mban̄a mbufo ke Christ Jesus Ọbọn̄ nnyịn, nditọete, n̄n̄wọn̄ọ.” The Jerusalem Bible esịn ufan̄ikọ emi ntem: “Mmosobo n̄kpa kpukpru usen, nditọete, ndien mmekeme ndida mbụre emi mbụrede mban̄a mbufo ke Christ Jesus Ọbọn̄ nnyịn n̄n̄wọn̄ọ.” Nte uwụtn̄kpọ mme n̄kpọndịk oro enye okosobode, ke 1Co 15 ufan̄ikọ 32, Paul etịn̄ aban̄a ‘edin̄wana ye mme idiọk unam ke Ephesus.’ Mbon Rome ẹkesiwot mme abiatibet ke nditop mmọ nnọ ndiọi unam ke an̄wambre. Edieke Paul ọkọyọde en̄wan ye ata ndiọi unam, ana edi enye ọkọbọhọ n̄kukụre ye un̄wam Jehovah. Ke ẹsiode idotenyịn ediset ke n̄kpa ẹfep, ndimek usụn̄ uwem oro okosiode enye anyan ọnọ utọ n̄kpọndịk oro ekpenen̄ede edi ndisịme. Ye unana idotenyịn uwem ini iso, ndiyọ mme ukọbọ ye n̄waidem ẹmi ẹsan̄ade ye edinam n̄kpọ Abasi ikpenyeneke ufọn. Paul ọdọhọ ete: “Edieke mînamke mme akpan̄kpa ẹset, yak idia inyụn̄ in̄wọn̄, koro iyakpa n̄kpa n̄kpọn̄.”—1 Corinth 15:31, 32; se 2 Corinth 1:8, 9; 11:23-27.
16. (a) M̀mọ̀n̄ ke ekeme ndidi ikọ oro “yak idia inyụn̄ in̄wọn̄, koro iyakpa n̄kpa n̄kpọn̄” okoto? (b) Nso ikedi mme n̄kpọndịk ẹmi ẹdude ke ndinyịme ekikere emi?
16 Anaedi Paul okokot oto Isaiah 22:13, emi etịn̄de aban̄a akama-n̄kpa edu mme otụtutọn̄ andidụn̄ Jerusalem. Mîdịghe ekeme ndidi enye ekenyene mme ukpepn̄kpọ mbon Epicurus, ẹmi ẹkesịnde idotenyịn ekededi aban̄ade uwem ke owo ama akakpa ke ndek ẹkenyụn̄ ẹnịmde nte ke inemesịt ekedi akpan ufọn odude ke uwem owo. Se ededi idaha oro okodude, ukpepn̄kpọ akwaifiọk eke “idia inyụn̄ in̄wọn̄” ikọfọnke. Ntem, Paul odụri owo utọn̄ ete: “Ẹkûbian̄a idem mbufo ke n̄kpọ emi. Idiọk nsan̄a ababiat eti ido.” (1 Corinth 15:33) Ndidụk nsan̄a ye mbon oro mîkenyịmeke ediset ke n̄kpa ekeme ndikama n̄kpọndịk. Ekeme ndidi utọ nsan̄a oro ama etịp esịn ke mme mfịna ẹmi Paul ekenyenede ndise mban̄a ke esop Corinth, utọ nte oburobụt ido idan̄, ubahade, ukot ikpe, ye unana ediwụt ukpono nnọ Udia Mbubịteyo Ọbọn̄.—1 Corinth 1:11; 5:1; 6:1; 11:20-22.
17. (a) Nso item ke Paul ọkọnọ mbon Corinth? (b) Ewe mme mbụme ẹsụhọ ndibọrọ?
17 Ntem Paul ọnọ mbon Corinth in̄wan̄în̄wan̄ item emi: “Ẹfara ke idem edinen edinen, ẹnyụn̄ ẹtre mme idiọkn̄kpọ, koro ndusụk owo inyeneke ifiọk Abasi. Ntịn̄ emi man bụt anam mbufo.” (1 Corinth 15:34) Ukwan̄ ekikere aban̄ade ediset ke n̄kpa ama ada ndusụk owo ekesịm mmeme eke spirit, nte n̄kpọ emi ẹkpade mmịn. Ama oyom mmọ ẹdemede, ẹdu ke edidemede. Kpasụk ntre oyom mme Christian oro ẹyetde aran mfịn ẹdu ke edidemede ke n̄kan̄ eke spirit, ẹkûyak mme eyịghe eyịghe ekikere ererimbot ẹkara mmọ. Ana mmọ ẹsọn̄ọ ẹyịre ke idotenyịn ediset ke n̄kpa eke heaven mmọ. Edi mme mbụme ẹkesụk ẹsosụhọ—ẹnọ mbon Corinth adan̄aoro ye nnyịn idahaemi. Ke uwụtn̄kpọ, ke nso uduot ke ẹnam owo 144,000 ẹset ẹka heaven? Ndien nso kaban̄a ediwak miliọn mbon eken ẹmi ẹsụk ẹdude ke udi ẹmi mînyeneke idotenyịn eke heaven? Nso ke ediset ke n̄kpa ediwọrọ ọnọ utọ mbon oro? Ke ibuotikọ nnyịn etienede, nnyịn iyodụn̄ọde nneme Paul eken kaban̄a ediset ke n̄kpa.
[Mme Ikọ idakisọn̄]
a Se nsiondi Enyọn̄-Ukpeme eke February 15, 1991, kaban̄a nneme aban̄ade ufak.
Nte Afo Emeti?
◻ Nso un̄wana ke Jesus ekesịn ke ediset ke n̄kpa?
◻ Mmanie ẹkedi ndusụk ntiense inọ ediset ke n̄kpa Christ?
◻ Ntak emi ẹkenenide ẹban̄a ukpepn̄kpọ ediset ke n̄kpa, ndien nso ikedi ibọrọ Paul?
◻ Ntak emi mbuọtidem ke ediset ke n̄kpa ekedide akpan n̄kpọ ọnọ mme Christian oro ẹyetde aran?
[Ndise ke page 15]
Eyenan̄wan Jairus ama akabade edi nsọn̄ọ nte ke ediset ke n̄kpa ekeme nditịbe
[Ndise ke page 16]
Ke idotenyịn ediset ke n̄kpa mîdụhe, n̄kpa usụn̄ Abasi mme anam-akpanikọ Christian ikpenyeneke ufọn