Nditie Ke “Ọkpọsọn̄ Udọn̄” Mbet

“Ofụri ekondo [etie] ke ọkpọsọn̄ udọn̄, ebet ini eke ẹdiyararede nditọ Abasi.”—ROME 8:19.

1. Nso ukem idaha idu ke ufọt mme Christian mfịn ye mme Christian eke akpa isua ikie?

IDAHA mme ata Christian mfịn etie nte eke mme Christian eke akpa isua ikie. Prọfesi ama an̄wam mme asan̄autom Jehovah ke eyo oro ndifiọk ini oro akanade Messiah owụt idem. (Daniel 9:24-26) Ukem prọfesi oro ekebem iso etịn̄ aban̄a nsobo Jerusalem edi ikọdọn̄ọke mme n̄kpatan̄a n̄kpọ ndinam mme Christian ẹbem iso ẹfiọk ini oro ẹdisobode obio oro. (Daniel 9:26b, 27) Ukem ntre, ke ndausụn̄ Abasi prọfesi ama anam mme anam-akpanikọ nditọ ukpepn̄kpọ Bible eke ọyọhọ isua ikie 19 ẹdu ke edidemede. Ke ndiyịri “isua itiaba” eke Daniel 4:25 ye “ini mme Gentile,” mmọ ẹma ẹdori enyịn nte ke Christ ọyọbọ odudu Obio Ubọn̄ ke 1914. (Luke 21:24, King James Version; Ezekiel 21:25-27) Ke adan̄aemi n̄wed Daniel ọdọn̄ọde ediwak prọfesi, ndomokiet ke otu ẹmi inamke nditọ ukpepn̄kpọ Bible eyomfịn ẹkeme ndibiere nnennen ini oro ẹdisobode ofụri editịm n̄kpọ Satan ẹmi ẹfep. (Daniel 2:31-44; 8:23-25; 11:36, 44, 45) Nte ededi, emi ayada itie ke mîbịghike, koro nnyịn idu uwem ke “utịt ini.”—Daniel 12:4.a

Ndidu ke Ukpeme ke Ini Edidu Christ

2, 3. (a) Nso ntan̄ndian n̄kpọ inọ uyarade nte ke nnyịn idu uwem ke ini edidu Christ ke odudu ubọn̄? (b) Nso iwụt ite ke akana mme Christian ẹdu ke ukpeme ke ini edidu Jesus Christ?

² Edi akpanikọ, prọfesi ama anam mme Christian ẹdu ke edidemede mbemiso ẹkenọde Christ odudu Obio Ubọn̄ ke 1914. Edi “idiọn̄ọ” oro Christ ọkọnọde kaban̄a edidu esie ye eke akpatre ini eyo emi okowụt mme n̄kpọntịbe. Ndien ẹdikụt n̄wakn̄kan idiọn̄ọ ẹmi ke edidu esie ama ọkọtọn̄ọ. Mme utọ n̄kpọntịbe oro—ekọn̄, akan̄, unyekisọn̄, idiọk udọn̄ọ, n̄kọri ukwan̄ido, edikọbọ mme Christian, ye edikwọrọ gospel Obio Ubọn̄ ke ofụri ekondo—ẹnọ akwa nsọn̄ọ nte ke idahaemi nnyịn idu uwem ke ini edidu Christ ke odudu ubọn̄.—Matthew 24:3-14; Luke 21:10, 11.

³ Edi, ofụri akpan n̄kpọ oro esịnede ke item unyọn̄ oro Jesus ọkọnọde mbet esie ekedi: “Mbufo ẹtịn̄ enyịn ẹse, ẹkpeme, . . . ẹkpeme.” (Mark 13:33, 37; Luke 21:36) Ndikot udọn̄ikọ emi esịnde udọn̄ ọnọ edidu ke ukpeme mi ye ntịn̄enyịn owụt nte ke Christ iketịn̄ke akpan akpan iban̄a edinen̄ede ndu ke ukpeme mban̄a idiọn̄ọ ntọn̄ọ edidu esie. Utu ke oro, enye okowụk ata mbet esie ndidu ke ukpeme ke ini edidu esie. Nso ke mme ata Christian ẹkenyene ndidu ke ukpeme mban̄a?

4. Nso uduak ke idiọn̄ọ oro Jesus ọkọnọde ọkọyọhọ?

⁴ Jesus ama etịn̄ akwa prọfesi esie ke ibọrọ mbụme oro: “Sian nnyịn ini eke mme n̄kpọ ẹmi [mme n̄kpọntịbe oro ẹdidade isịm nsobo editịm n̄kpọ mme Jew] ẹdidide; nso idinyụn̄ idi idiọn̄ọ edidi Fo, ye eke akpatre ini eyo emi?” (Matthew 24:3) Idịghe sụk edidu Christ ke idiọn̄ọ oro ẹkebemde iso ẹtịn̄ edinam ẹdiọn̄ọ edi n̄ko ayanam ẹdiọn̄ọ mme n̄kpọntịbe oro ẹdidade isịm utịt idiọk editịm n̄kpọ emi.

5. Didie ke Jesus okowụt nte ke adan̄aemi imọ idude ke spirit, ke imọ ‘iyedi’?

⁵ Jesus ama owụt ete ke imọ ididi ke odudu ye ubọn̄ ke ini “edidu” imọ (Greek, pa·rou·siʹa). Kaban̄a utọ “edidi” oro (ẹdade orụk ikọ Greek oro erʹkho·mai ẹwụt), enye ọkọdọhọ ete: “Adan̄aoro ke idiọn̄ọ Eyen Owo oyowụt idem ke enyọn̄: adan̄aoro ke kpukpru mme idụt isọn̄ ẹyenyụn̄ ẹfụhọ, mmọ ẹyenyụn̄ ẹkụt Eyen Owo odorode ke obubịt enyọn̄ edi ke odudu ye akwa ubọn̄. . . . Edi ẹkpep n̄ke ke eto fig: ke ini n̄kọk esie ama akabade esehe, onyụn̄ asiahade ikọn̄, mbufo ẹfiọk ẹte ndaeyo ke ekpere; kpasụk ntre mbufo n̄ko, ke ini ẹkụtde kpukpru n̄kpọ ẹmi, ẹfiọk ẹte Enye [Christ] ke ekpere, odu ke enyịn-usụn̄. . . . Ẹkpeme ndien: koro mbufo mîfiọkke usen eke Ọbọn̄ mbufo edide. . . . Ẹben̄e idem; koro ke ini eke mbufo mîdorike enyịn, Eyen Owo eyedi.” (Sịghisịghi ubọkn̄wed edi eke nnyịn.)—Matthew 24:30, 32, 33, 42, 44.

Ntak Emi Jesus Christ Edide?

6. Didie ke nsobo “Akwa Babylon” editịbe?

⁶ Okposụkedi odude nte Edidem tọn̄ọ ke 1914, ana Jesus Christ ebiere ikpe ọnọ mme editịm n̄kpọ ẹmi ye mme owo kiet kiet mbemiso enye osobode mbon oro enye okụtde nte ẹdide ndiọi owo. (Men 2 Corinth 5:10 domo.) Ibịghike Jehovah eyesịn ke esịt mme andikara ndisobo “Akwa Babylon,” kpa ukara ererimbot eke nsunsu ido ukpono. (Ediyarade 17:4, 5, 16, 17) Apostle Paul ama owụt san̄asan̄a nte ke Jesus Christ oyosobo “ata abiat-ibet”—mbon nsọn̄ibuot mme ọkwọrọ ederi Christendom, n̄wọrọnda ikpehe “Akwa Babylon.” Paul ekewet ete: “Ẹyeyarade abiat-ibet oro, emi Ọbọn̄ Jesus [edidade] ibifịk inua Esie owot enye, onyụn̄ ada ediyarade edidi Esie osobo enye.”—2 Thessalonica 2:3, 8.

7. Ke ini Eyen owo edidide ke ubọn̄ esie, nso ubiereikpe ke enye edinọ?

⁷ Ke n̄kpet n̄kpet ini iso, Christ eyebiere ikpe ọnọ mme owo eke mme idụt etiene nte mmọ ẹkenamde n̄kpọ ye nditọete esie oro ẹsụk ẹdude ke isọn̄. Nnyịn ikot ite: “Ke ini Eyen Owo edidide ke ubọn̄ Esie, asan̄a ye kpukpru mme angel, adan̄aoro ke Enye eyetie ke ebekpo ubọn̄ Esie. Ndien ẹyebon kpukpru mme idụt ke iso Esie: Enye oyonyụn̄ abahade mmọ kiet ye eken, nte emi ekpemerọn̄ abaharede erọn̄ ye ebot; ndien eyenịm erọn̄ ke ubọk nnasia Esie, ye ebot ke ufien. . . . Edidem ọyọbọrọ [erọn̄] ete, Ke akpanikọ ke ndọhọ mbufo, Adan̄a nte mbufo ẹkenamde n̄kpọ ẹmi ẹnọ kiet ke otu nditọ-ete Mi, kpa ata n̄kpri emi, mbufo ẹkenam ẹnọ Mi. . . . Ekem [ebot] ẹyedaha ẹkedụk ke nsinsi ufen; edi ndinen owo ẹyedụk ke nsinsi uwem.”—Matthew 25:31-46.

8. Didie ke Paul etịn̄ aban̄a nte Christ edidide ndibiere ikpe nnọ mme owo oro mîbakke Abasi?

⁸ Nte ẹwụtde ke n̄ke erọn̄ ye ebot, Jesus ọyọnọ kpukpru mbon oro mîbakke Abasi akpatre ubiereikpe. Paul ama ọnọ mme ekemmọ andinịm ke akpanikọ oro ẹkekụtde ukụt nsọn̄ọ aban̄a “nduọk-odudu . . . ke ini emi Ọbọn̄ Jesus editode ke heaven ọbiọn̄ọde ke ikan̄ emi asakde, ye mme angel odudu Esie, edisio usiene ọnọ mmọ ẹmi mîfiọkke Abasi, mînyụn̄ isụkke ibuot inọ gospel Ọbọn̄ nnyịn Jesus; emi edidianarede ke iso Ọbọn̄ ye ke iso ubọn̄ odudu Esie, ẹdibọ ufen nsinsi nsobo, ke ini Enye edidide ndida ubọn̄ ke idem nti ikọt Esie.” (2 Thessalonica 1:7-10) Ye ofụri aduai-owo-idem n̄kpọntịbe ẹmi ẹdude nnyịn ke iso, ndi nnyịn ikpowụtke mbuọtidem inyụn̄ idu ke ukpeme iban̄a edidi Christ ye ọkpọsọn̄ udọn̄?

Ndibet Ediyarade Christ ye Ọkpọsọn̄ Udọn̄

9, 10. Ntak emi mbon oro ẹyetde aran oro ẹsụk ẹdude ke isọn̄ ẹbetde ediyararede Jesus Christ ye ọkpọsọn̄ udọn̄?

⁹ ‘Ọbọn̄ Jesus ndito ke heaven mbiọn̄ọde’ ididịghe n̄kukụre man ada nsobo ọsọk ndiọi owo edi n̄ko man ọnọ nti owo utịp. Mme nsụhọ nditọete Christ oro ẹyetde aran ẹmi ẹsụk ẹdude ke isọn̄ ẹkeme ndika iso n̄kụt ndutụhọ mbemiso ediyarade Christ, edi mmọ ẹdat esịt ke ubọn̄ ubọn̄ idotenyịn mmọ eke heaven. Apostle Peter ama ewet ọnọ mme Christian oro ẹyetde aran ete: “Adan̄a nte mbufo ẹbuanade ke ndutụhọ Christ, ẹkam ẹdara; man mbufo ẹkpenyụn̄ ẹdat esịt eti-eti ke adan̄aemi ẹdiyararede ubọn̄ Esie.”—1 Peter 4:13.

¹⁰ Mbon oro ẹyetde aran ẹbiere ndinam akpanikọ tutu mmọ ‘ẹsobo ye Christ’ man mbuọtidem mmọ oro ẹma “[ẹkedomo] ẹwụt . . . ọkpọwọrọ edi n̄kpọ itoro ye ubọn̄ ye ukpono ọnọ [mmọ] ke adan̄aemi Jesus Christ ediyararede idem.” (2 Thessalonica 2:1; 1 Peter 1:7) Kaban̄a utọ mme anam-akpanikọ Christian oro ẹbonde ke spirit do, ẹkeme ndidọhọ: “Ẹda mbufo ẹyarade ẹte ikọ-ntiense, eke ẹkenọde ẹban̄a Christ, edi akpanikọ; ntre ke mbufo inanake baba enọ kiet, ke ini mbufo ẹtiede ẹbet ediyarade Ọbọn̄ nnyịn Jesus Christ.”—1 Corinth 1:6, 7.

11. Ke adan̄aemi ẹbetde ediyararede Jesus Christ, nso ke mme Christian oro ẹyetde aran ẹnam?

¹¹ Nsụhọ oro ẹyetde aran ẹbuana ekikere Paul, emi ekewetde ete: “Mbat nte ndutụhọ eke idude idaha emi idịghe se idotde ndida ndomo ye ubọn̄ eke ẹdiyararede ke idem nnyịn.” (Rome 8:18) Mbuọtidem mmọ ikọn̄ọke ke ubatini. Mmọ ẹyọhọ ye utom Jehovah, ẹnịmde utịbe utịbe uwụtn̄kpọ ẹnọ mme nsan̄a mmọ, kpa “mme erọn̄ en̄wen.” (John 10:16) Mbon oro ẹyetde aran mi ẹfiọk nte ke utịt idiọk editịm n̄kpọ emi ekpere, ndien mmọ ẹnam item Peter emi: “Ẹfak ọfọn̄ esịt mbufo, ẹfara ke idem, ẹnyụn̄ ẹdori enyịn ọyọhọ-ọyọhọ ke ufọn eke ẹdidade ẹsọk mbufo ke ediyarade Jesus Christ.”—1 Peter 1:13.

‘Ekondo Etie ke Ọkpọsọn̄ Udọn̄ Ebet’

12, 13. Didie ke ẹkenam ofụri ekondo “osụk idem ọnọ ikpîkpu n̄kpọ,” ndien nso ke mme erọn̄ en̄wen ẹnyene udọn̄ ẹban̄a?

¹² Ndi mme erọn̄ en̄wen n̄ko ẹnyene n̄kpọ eke mmọ ẹbetde ye ọkpọsọn̄ udọn̄? Ke ofụri akpanikọ mmọ ẹnyene. Ke ama eketịn̄ aban̄a ubọn̄ ubọn̄ idotenyịn eke mbon oro Jehovah adade nte “nditọ” esie oro ẹbonde ke spirit ye nte ‘nsan̄a mme ada udeme ye Christ’ (NW) ke Obio Ubọn̄ eke heaven, Paul ama ọdọhọ ete: “Ofụri ekondo [etie] ke ọkpọsọn̄ udọn̄, ebet ini eke ẹdiyararede nditọ Abasi. Koro ẹkenam ofụri ekondo osụk idem ọnọ ikpîkpu n̄kpọ, itoho ke edinyịme esịt, edi oto ke Enye emi akanamde enye osụk ntre, ye idotenyịn, ete ke ẹyenyan̄a ekondo ke idemesie nde ẹsio ke itie ufụn mbiara, ẹsịn ke itie eyen-isọn̄ emi enyenede ubọn̄ eke nditọ Abasi.”—Rome 8:14-21; 2 Timothy 2:10-12.

¹³ Ebede ke idiọkn̄kpọ Adam, ẹma ẹnam ofụri mme andito ubon esie ‘ẹsụk idem ẹnọ ikpîkpu n̄kpọ,’ ẹmande mmọ ẹsịn ke ufụn idiọkn̄kpọ ye n̄kpa. Mmọ ikekemeke ndisio idem mmọ ke utọ ufụn oro. (Psalm 49:7; Rome 5:12, 21) Oh, ọdọn̄ mme erọn̄ en̄wen didie ntem ndiwọrọ ke “itie ufụn mbiara”! Edi mbemiso oro ada itie, ana ndusụk n̄kpọ ẹtịbe nte ekemde ye ini ye eyo oro Jehovah enịmde.

14. Nso ke “ediyararede nditọ Abasi” edibuana, ndien didie ke emi edisụn̄ọ ke ‘edisio [ubonowo] ke itie ufụn mbiara’?

¹⁴ Ana ẹbemiso ‘ẹyarade’ nsụhọ “nditọ Abasi” oro ẹyetde aran. Nso ke emi edibuana? Ke edikem ini Abasi, mme erọn̄ en̄wen ẹyekụt uyarade nte ke ‘ẹfịk [mbon oro ẹyetde aran] idiọn̄ọ’ ẹnyụn̄ ẹnọ mmọ ubọn̄ ndikara ye Christ ke akpatre. (Ediyarade 7:2-4) ‘Ẹyeyarade nditọ Abasi’ oro ẹnamde ẹset n̄ko ke ini mmọ ẹbuanade ye Christ ke ndisobo idiọk editịm n̄kpọ Satan mfep. (Ediyarade 2:26, 27; 19:14, 15) Ekem, ke ini Ukara Tọsịn Isua Christ, ẹyefiak ‘ẹyarade’ mmọ nte mme oku oro ẹdade ẹnọ “ekondo” ubonowo ufọn uwa ufak Jesus. Emi oyosụn̄ọ ke ‘ndisio [ekondo] ke itie ufụn mbiara’ ndien ke akpatre nsịn “ke itie eyen-isọn̄ emi enyenede ubọn̄ eke nditọ Abasi.” (Rome 8:21; Ediyarade 20:5; 22:1, 2) Ye utọ utịbe utịbe idotenyịn oro, ndi eyịghe ekededi odu nte ke mme erọn̄ en̄wen ‘ẹtie ẹbet ini eke ẹdiyararede nditọ Abasi’ ye “ọkpọsọn̄ udọn̄”?—Rome 8:19.

Ime Jehovah Ọwọrọ Edinyan̄a

15. Nso ke nnyịn mîkpedehe-de ifre kaban̄a nte Jehovah enịmde ini mme n̄kpọntịbe?

¹⁵ Jehovah edi Akwa Ekpeme Ini. Ini oro enye enịmde ọnọ mme n̄kpọntịbe edi mfọnmma. Mme n̄kpọ ẹkeme nditre nditịbe kpukpru ini nte nnyịn ke idem nnyịn idoride enyịn. Nte ededi, imekeme ndinyene ọyọhọ mbuọtidem nte ke kpukpru se Abasi ọn̄wọn̄ọde ẹyesu. (Joshua 23:14) Enye ekeme ndiyak mme n̄kpọ ẹka iso ẹbịghi ẹkan nte ediwak owo ẹkedoride enyịn. Edi ẹyak nnyịn idomo ndidiọn̄ọ mme usụn̄ esie inyụn̄ ima ọniọn̄ esie. Paul ekewet ete: “Uwak ọniọn̄ ye ifiọk Abasi editụn̄ọ adan̄a didie! Mme ikpe Esie ẹkak owo ndidụn̄ọde adan̄a didie, onyụn̄ ayan̄a owo nditiene nde usụn̄ Esie. Koro anie ọfiọk ekikere Ọbọn̄? Anie okonyụn̄ ọnọ Enye item?”—Rome 11:33, 34.

16. Mmanie ẹdu ke idaha ndibọ ufọn nto ime Jehovah?

¹⁶ Peter ekewet ete: “Ndima, sia mbufo ẹtiede ẹbet mme n̄kpọ ẹmi [nsobo akani “enyọn̄” ye “isọn̄” ye edinịm “obufa enyọn̄” ye “obufa isọn̄” ke itie esie nte un̄wọn̄ọ Abasi edide], ẹnyene ifịk ndien, man enye ekpesịm mbufo nte ẹtiede ke emem, ẹnana ntọi, ẹnyụn̄ ẹnana ndo ke enyịn esie. Ẹnyụn̄ ẹda ẹte, anyan ime Ọbọn̄ ọwọrọ edinyan̄a.” (Sịghisịghi ubọkn̄wed edi eke nnyịn.) Ke ntak ime Jehovah, ediwak miliọn owo ẹnyene ifet ndidi se ẹnyan̄ade ke “usen Ọbọn̄,” emi edidide ke mbuari “nte inọ.” (2 Peter 3:9-15) Ime esie n̄ko ayak nnyịn owo kiet kiet ‘isan̄a ke ndịk ye nnyek-idem inam edinyan̄a nnyịn ọwọrọ usụn̄.’ (Philippi 2:12) Jesus ọkọdọhọ ke nnyịn inyene ‘ndikpeme idem’ nnyụn̄ ‘ntaba idap’ edieke iyomde ndinyene unyịme nnyụn̄ n̄kụt unen ‘ndida ke iso Eyen Owo’ ke ini enye edidide ndibiere ikpe.—Luke 21:34-36; Matthew 25:31-33.

Ẹka Iso Ẹbet ye Ime

17. Ewe mme ikọ apostle Paul ke nnyịn ikpenyene ndinam?

¹⁷ Paul ama esịn udọn̄ ọnọ nditọete esie eke spirit ete ‘ẹkûdọn̄ enyịn ke se owo okụtde ke enyịn, edi ẹdọn̄ enyịn ke se owo mîkwe.’ (2 Corinth 4:16-18) Enye ikoyomke n̄kpọ ndomokiet ofụk ekikere mmọ kaban̄a utịp eke heaven oro ẹkenịmde mmọ ke iso. Edide nnyịn idi mme Christian oro ẹyetde aran m̀mê idi mme erọn̄ en̄wen, ẹyak nnyịn inyene utịbe utịbe idotenyịn oro ẹnịmde nnyịn ke iso ke ekikere ikûnyụn̄ ikpa mba. Ẹyak nnyịn “itie ke ime ibet,” iwụtde nte ke “nnyịn idịghe mbon mfiak-edem n̄ka nsobo; edi idi mmọ ẹmi ẹbuọtde idem isịm edinyan̄a ukpọn̄.”—Rome 8:25; Mme Hebrew 10:39.

18. Ntak emi nnyịn ke mbuọtidem ikemede ndiyak ini ye eyo nsịn Jehovah ke ubọk?

¹⁸ Nnyịn ke mbuọtidem imekeme ndiyak ini ye eyo nsịn Jehovah ke ubọk. Edisu mme un̄wọn̄ọ esie ‘idibehe ini’ nte ekemde ye ndutịm ini esie. (Habakkuk 2:3) Kan̄a ke emi, item oro Paul ọkọnọde Timothy enen̄ede enyene se ọwọrọde ọnọ nnyịn. Enye ọkọdọhọ ete: “Ke iso Abasi, ye ke iso Christ Jesus, emi edikpede ikpe mme odu-uwem ye mme akpa-n̄kpa, mmada ediyarade Esie ye Ubọn̄ Esie n̄wụk fi nte, Kwọrọ ikọ Abasi; sịn ifịk nam emi, ke edide ekem ini ye ke mînyụn̄ idịghe ekem ini . . . Nam utom ọkwọrọ-gospel, nam utom fo ma.”—2 Timothy 4:1-5.

19. Nso ke ini osụk odu ọnọ ikọt Jehovah ndinam, ndien ntak-a?

¹⁹ Uwem odu ke itiendịk—eke nnyịn ye eke mme mbọhọidụn̄ nnyịn. Paul ekewet ete: “Tịm kpeme idem fo, ye se afo ekpepde owo. Yịre ke edinam utom emi; koro ke edinam ntem afo ayanyan̄a idem fo ye mmọ ẹmi ẹkopde uyo fo.” (1 Timothy 4:16) Ini enen̄ede omụhọ ọnọ idiọk editịm n̄kpọ emi. Ke adan̄aemi nnyịn ibetde mme aduai-owo-idem n̄kpọntịbe oro ẹsụk ẹdude ke iso ye ọkpọsọn̄ udọn̄, ẹyak nnyịn ikûdede ifre nte ke emi osụk edi ini ye eyo Jehovah ọnọ ikọt esie ndikwọrọ eti mbụk Obio Ubọn̄. Ana ẹnam utom oro ẹma nte ekemde enye. “Adan̄aoro,” nte Jesus eketịn̄de, “utịt eyedi.”—Matthew 24:14.

[Mme Ikọ idakisọn̄]

Ke Ndinam Ndụn̄ọde

◻ Kaban̄a ubatini, didie ke idaha nnyịn ebiet eke mme Christian eke akpa isua ikie?

◻ Ntak anade mme Christian ‘ẹdu ke ukpeme,’ idem ke ini edidu Christ?

◻ Ntak emi mme edibot n̄kpọ ẹdide owo ẹnyenede ọkpọsọn̄ udọn̄ ẹban̄a “ediyararede ndito Abasi”?

◻ Ntak emi nnyịn ke mbuọtidem ikemede ndiyak ini ye eyo nsịn Jehovah ke ubọk?

[Mme ndise ke page 17]

Ana mme Christian ẹdu ke edidemede nte mmọ ẹbetde edidi Christ

[Ndise ke page 18]

Nsụhọ oro ẹyetde aran ẹyọhọ ke utom Jehovah, ikọn̄ke mbuọtidem mmọ ke ubatini