Ndi Afo ke Ekere Aban̄a Ndọ?
Edieke nnyịn imende edinam usiondọ ofụri ekondo idomo ye unyekisọn̄, United States okpodu ke ata ebiet oro unyekisọn̄ ọtọn̄ọde. Ke isua kiet eke ndondo emi, ẹma ẹdianade se ibede ndọ miliọn kiet do—iba ke minit kiet ke ẹbaharede ukem ukem. Edi afo emekeme nditịm mfiọk nte ke idịghe United States kpọt enyene unana inemesịt emi ke ndọ.
NTE ndụn̄ọde kiet owụtde, ibat usiondọ ke Canada, England ye Wales, France, Greece, ye Netherlands ọmọdọk ebe utịm ikaba toto ke 1970.
Nnyịn imenyene kpukpru ntak ndinịm ke akpanikọ nte ke ata ediwak mme ọdọ ndọ ẹkedọ ndọ koro mmọ ẹmade kiet eken ẹnyụn̄ ẹyomde ndibiat ini uwem mmọ oro osụhọde ọtọkiet. Nte ededi, ke mfụhọ, idotenyịn kaban̄a inemesịt ndọ isikanke oro—sụk idotenyịn. Ke ẹma ẹkekụt ata idem n̄kpọ, ediwak owo ẹdọhọ ke mmimọ ima ibak idọ ndọ ikaha mîdịghe ke ikọdọhọ nnennen owo, m̀mê mbiba.
Ntak emi ata ediwak ndọ ẹkpude? “Akpan ntak edi unana ntịmidem,” ntem ke ewetn̄wed kiet aban̄ade uyomima ọdọhọ. Enye adian do ete: “Nte nnamde n̄kpọ ye mme ọdọ ndọ mban̄a ọkpọsọn̄ ubiak otode nnanenyịn ndọ, ntụk iba ke nsinyene—mbọm ye iyatesịt. N̄kop mbọm koro idotenyịn mmọ kaban̄a itie ebuana oro ọnọde uyụhọ edem mbiba okpude. N̄kop iyatesịt ke ntak unana ifiọk mmọ kaban̄a nte n̄kpọ emi awakde n̄kukọhọ.”
Ke akpanikọ, ediwak owo ẹdọ ndọ ye esisịt ifiọk mîdịghe inyeneke-nyene ndomokiet iban̄a nte ẹkemede ndinam enye okụt unen. Edi, emi idịghe n̄kpọ n̄kpaidem ke usụn̄ ndomokiet. Andikpep kiet ọkọdọhọ ete: “Adan̄a ediwak uyen nnyịn didie ẹka akamba ufọkn̄wed ẹkekpep ẹban̄a mme edu eku ye ekpọk, edi ẹkpu ndikpep mban̄a edu owo iba ẹmi ẹkotde ebe ye n̄wan?”
Ndi afo ke ekere aban̄a ndọ—edide ekere aban̄a ndọ oro ekemede ndidọ ke ini iso m̀mê ekere aban̄a ndọ oro odude idahaemi? Ke edide ntre, afo ekpenyene ndifiọk nte ke ata ata ebuana enen̄ede edi ata isio ye se ẹwụtde ke mme ndise senima, ke mme edinam ekebe ndise, ye ke mme n̄wed mbụk ima. Ke ukem ini oro, ẹkeme ndida ndọ owo iba ẹmi ẹkọride ẹsịm ọyọhọ idaha ẹmi ẹnen̄erede ẹma kiet eken nte edidiọn̄ otode Abasi. (Mme N̄ke 18:22; 19:14) Didie, ndien, ke afo ekeme nditịm mfiọk m̀mê emeben̄e idem ndisịm mme n̄kpọ oro ndọ oyomde? Mme n̄kpọ ewe ke afo ekpekere aban̄a ke ndimek nsan̄a ndọ? Mîdịghe edieke edide afo ọmọdọdọ ndọ, didie ke afo ekeme ndinam ifet kaban̄a edinyene inemesịt oro ebịghide ke ndọ okpon?