Ẹdu Ke Ukpeme Ẹnyụn̄ Ẹsịn Ifịk!

“Ẹkpeme ndien, koro mbufo mîfiọkke usen m̀mê hour.”—MATTHEW 25:13.

1. Apostle John okodori enyịn ke nso?

KE AKPATRE nneme ke Bible, Jesus ama ọn̄wọn̄ọ ete: “Mmọn̄ ndedi iwiwa.” Apostle John esie ama ọbọrọ ete: “Amen. Di, Ọbọn̄ Jesus.” Apostle oro ikenyeneke eyịghe nte ke Jesus eyedi. John ama esịne ke otu mme apostle oro ẹkebụpde Jesus ẹte: “Sian nnyịn ini eke mme n̄kpọ ẹmi ẹdidide; nso idinyụn̄ idi idiọn̄ọ [edidu, NW; Greek, pa·rou·siʹa] Fo, ye eke akpatre ini eyo emi?” Ih, John ama odori enyịn ye mbuọtidem aban̄a edidu Jesus eke ini iso.—Ediyarade 22:20; Matthew 24:3.

2. Kaban̄a edidu Jesus, n̄kpọ etie didie ke mme ufọkabasi?

² Utọ mbuọtidem oro iwakke mfịn. Ediwak ufọkabasi ẹnyene ukpepn̄kpọ aban̄ade “edidi” Jesus, edi ibat ibat ke otu mme andibuana ke mmọ ẹnen̄ede ẹdori enyịn ẹban̄a enye. Mmọ ẹdu uwem nte n̄kpọ eke enye mîdidịghe. N̄wed oro The Parousia in the New Testament ọdọhọ ete: “Idotenyịn Parousia enyene esisịt odudu ke uwem, ekikere ye utom ufọkabasi. . . . Ifịk ifịk usụn̄ oro ufọkabasi akpadade anam utom edikabade esịt ye editan̄a gospel ntiene nte ini edide usọp usọp, emem edieke mîkam ikpaha-kpa ofụri ofụri.” Edi idịghe ye kpukpru owo!

3. (a) Mme ata Christian ẹkere didie ẹban̄a pa·rou·siʹa? (b) Nso ke nnyịn idikere iban̄a idahaemi akpan akpan?

³ Mme ata mbet Jesus ẹbet utịt idiọk editịm n̄kpọ emi ye ọkpọsọn̄ udọn̄. Ke adan̄aemi inamde ntre ke edinam akpanikọ, oyom nnyịn inyene nnennen idaha ekikere kaban̄a kpukpru se ibuanade ke edidu Jesus inyụn̄ inam n̄kpọ nte asan̄ade ekekem. Oro ayanam nnyịn ‘ime ime tutu esịm akpatre inyụn̄ idi se ẹnyan̄ade.’ (Matthew 24:13) Ke ini eketịn̄de ntịn̄nnịm ikọ oro nnyịn ikụtde ke Matthew ibuot 24 ye 25, Jesus ama ọnọ ọniọn̄ ọniọn̄ item oro nnyịn ikemede ndida nsịn ke edinam, kaban̄a nsinsi ufọn nnyịn. Ibuot 25 ọdọn̄ọ mme n̄ke ẹmi ekemede ndidi afo ọmọfiọk, esịnede kiet oro aban̄ade nditọiban duop (mme asian ye ndisịme nditọiban) ye n̄ke aban̄ade talent. (Matthew 25:1-30) Didie ke nnyịn ikeme ndibọ ufọn nto mme n̄ke oro?

Ẹdu ke Ukpeme, nte Nditọiban Ition Ẹkedude!

4. Nso idi akpan n̄kpọ ke n̄ke nditọiban?

⁴ Afo emekeme ndifiak n̄kot n̄ke nditọiban oro, ẹkụtde ke Matthew 25:1-13. Idaha edi ọkpọmiọk usọrọ ndọ mme Jew emi ebendọ akade ufọk ete n̄wanndọ man ada enye ọnyọn̄ ufọk ebendọ (m̀mê eke ete esie). Mme ebre-ikwọ ye mme ọkwọ-ikwọ ẹkeme ndidu ke utọ isan̄ oro, ndien owo itịmke ifiọk ini ẹdidide ẹdisịm. Ke n̄ke oro, nditọiban duop ẹma ẹbet edidi ebendọ tutu ke okoneyo. Owo ition, ke ndisịme, ikemenke aran ikan̄ oro ekemde ndien ẹkenyene ndika n̄kedep efen. Owo ition eken, ke ọniọn̄, ẹma ẹkama aran efen efen ke n̄kpọ udọn̄n̄kpọ man mmọ ẹkpefiak ẹsịn ke utuenikan̄ mmọ edieke oyomde ke ini edibet oro. Owo ition ẹmi kpọt ẹkedu ẹnyụn̄ ẹben̄e idem ke ini ebendọ ekedide. Ntem, mmọ kpọt ke ẹkeyak ẹdụk usọrọ oro. Ke ini ndisịme nditọiban ition ẹketode ẹdi, ini ama ebe akaha mmọ ndidụk.

5. Mme itien̄wed Abasi ewe ẹsịn un̄wana ke se n̄ke nditọiban ọwọrọde ke ndamban̄a usụn̄?

⁵ Ediwak ikpehe n̄ke emi ẹkeme ndin̄wan̄a owo nte ndamban̄a n̄kpọ. Ke uwụtn̄kpọ, N̄wed Abasi etịn̄ aban̄a Jesus nte ebendọ. (John 3:28-30) Jesus ama emen idemesie odomo ye eyen edidem emi ẹketịmde usọrọ ndọ ẹnọ. (Matthew 22:1-14) Bible onyụn̄ emen Christ odomo ye ebe. (Ephesus 5:23) Nte enemde, ke adan̄aemi ẹtin̄de ke ebiet en̄wen ẹban̄a mme Christian oro ẹyetde aran nte “n̄wan-ndọ” Christ, n̄ke oro itịn̄ke iban̄a n̄wanndọ. (John 3:29; Ediyarade 19:7; 21:2, 9) Nte ededi, enye etịn̄ aban̄a nditọiban duop, ndien ke ebiet en̄wen ẹmen mbon oro ẹyetde aran ẹdomo ye edisana eyenan̄wan oro ẹmende ẹnọ Christ ke ndọ.—2 Corinth 11:2.a

6. Jesus ọkọnọ nso item ke ini enye ekeberide n̄ke nditọiban?

⁶ Ke ẹsiode utọ ọyọhọ ntọt oro ye ntịn̄nnịm edinam an̄wan̄a ekededi ẹfep, ke akpanikọ odu nti edumbet ẹmi nnyịn ikemede ndikpep nto n̄ke emi. Ke uwụtn̄kpọ, tịm fiọk ete ke Jesus ekeberi enye ye mme ikọ ẹmi: “Ẹkpeme ndien, koro mbufo mîfiọkke usen m̀mê hour.” Ntre n̄ke emi owụt ke oyom owo nnyịn kiet kiet odu ke ukpeme, odu ke edidemede kaban̄a utịt editịm n̄kpọ emi oro asan̄ade ekpere. Utịt emi eyedi nte eyịghe mîdụhe, idem okposụkedi nnyịn mîkemeke nditịn̄ usenọfiọn̄. Ke afan̄ emi, tịm fiọk mme edu oro otu nditọiban iba ẹmi ẹkewụtde.

7. Ke nso usụn̄ ke owo ition ke otu nditọiban eke n̄ke oro ẹkewụt ke ikedi ndisịme?

⁷ Jesus ọkọdọhọ ete: “Owo ition ke otu mmọ ẹdi ndisịme.” Ndi oro ekedi koro mmọ mîkenịmke ke akpanikọ ite ke ebendọ ke ekedi? Ndi mmọ ẹma ẹwọn̄ọ ẹkeyom inemesịt? Mîdịghe ndi ẹkebabian̄a mmọ? Idịghe ndomokiet ke otu oro. Jesus ọkọdọhọ ete ke owo ition ẹmi ẹma “ẹwọn̄ọ ẹka ẹkesobo ye ọdọ-ndọ.” Mmọ ẹma ẹfiọk ẹte ke enye ke ekedi, ndien mmọ ẹma ẹyom ndinyene ebuana, idem ndibuana ke “udia ndọ.” Edi, ndi mmọ ẹma ẹnen̄ede ẹben̄e idem? Mmọ ẹma ẹbet enye esisịt, tutu esịm “ufọt okoneyo,” edi mmọ ikeben̄eke idem inọ edidi esie ke ini ekededi—edide ebebịghi m̀mê awawara akan nte mmọ ẹkedoride enyịn.

8. Didie ke owo ition ke otu nditọiban eke n̄ke oro ẹkewụt ke ikedi asian?

⁸ Owo ition eken—mbon oro Jesus okokotde asian—ẹma ẹda utuenikan̄ n̄ko ẹwọn̄ọ ẹka, ẹbetde edidi ebendọ. Mmọ ẹkenyene ndibet n̄ko, edi mmọ ẹkedi “asian.” Ikọ Greek oro ẹkabarede “asian” ekeme ndinọ ekikere edidi “enyene-ọniọn̄, enyene-ifiọk, enyene-mbufiọk.” Owo ition ẹmi ẹma ẹwụt ke mmimọ idi asian ebe ke ndikama aran efen efen ke udọn̄n̄kpọ ndifiak nsịn ke utuenikan̄ mmọ edieke oyomde. Ke akpanikọ, mmọ ẹma ẹnen̄ede ẹnyene udọn̄ ke ndidu ke mben̄eidem nnọ ebendọ tutu mmọ ẹsịn ndinọ owo aran mmọ. Utọ edidu ke ukpeme oro ikedịghe ikpîkpu, nte ẹwụtde ke mmọ ndidu nnyụn̄ nnen̄ede ntịm idem ke ini ebendọ edide. Mmọ ẹmi “[ẹkeben̄ede] idem ẹtiene enye ẹdụk ke udia ndọ: ndien ẹberi usụn̄.”

9, 10. Nso idi ọkpọ ikọ n̄ke nditọiban, ndien mme mbụme ewe ke nnyịn ikpobụp idem nnyịn?

⁹ Jesus ikọnọhọ ukpep ke nte ẹkpenamde n̄kpọ nnennen ke udianndọ, enye ikonyụn̄ inọhọ item iban̄a edibuana n̄kpọ ye mbon en̄wen. Ọkpọ ikọ esie ekedi: “Ẹkpeme ndien, koro mbufo mîfiọkke usen m̀mê hour.” Bụp idemfo, ‘Nte ami mmenen̄ede ndu ke ukpeme kaban̄a edidu Jesus?’ Nnyịn imenịm ke akpanikọ ite ke Jesus ke akara idahaemi ke heaven, edi iwụk ntịn̄enyịn adan̄a didie ke ata idem n̄kpọ oro nte ke ‘Eyen Owo ọyọsọp odoro ke obubịt enyọn̄ edi ye odudu ye akwa ubọn̄’? (Matthew 24:30) Ke “ufọt okoneyo,” ini ebendọ ndidi ama enen̄ede ekpere akan nte ekedide ke akpa ini emi nditọiban oro ẹkewọn̄ọde ẹka ndisobo ye enye. Ukem ntre, Eyen owo ndidi ndisobo idiọk editịm n̄kpọ emi odude ke emi ekpere akan ini nnyịn ikọtọn̄ọde ndidori enyịn ke edidi esie. (Rome 13:11-14) Ndi nnyịn ke idu ke ukpeme, ikam idiọn̄de-diọn̄ ikpeme ikan nte ini asan̄ade ekpere akan?

¹⁰ Ndinam item oro ‘ẹkpeme’ oyom ntịn̄enyịn ofụri ini. Nditọiban ition ẹma ẹyak aran mmọ okụre ẹnyụn̄ ẹka ndidep en̄wen. N̄kpọ ekeme ndiwọn̄ọde ntịn̄enyịn Christian ukem ntre mfịn tutu enye iben̄eke idem ọyọhọ ọyọhọ inọ edidi Jesus oro ekperede. Oro ama etịbe ọnọ ndusụk Christian akpa isua ikie. Ekeme nditịbe nnọ ndusụk owo mfịn. Ntre ẹyak nnyịn ibụp idem nnyịn, ‘Ndi enye ke etịbe ọnọ mi?’—1 Thessalonica 5:6-8; Mme Hebrew 2:1; 3:12; 12:3; Ediyarade 16:15.

Ẹsịn Ifịk nte Utịt Asan̄ade Ekpere

11. Ewe n̄ke ke Jesus akafiak eke, ndien enye oro ekebiet ewe?

¹¹ Ke n̄ke esie en̄wen, Jesus ama anam se ikande edidọhọ mme anditiene enye ẹdu ke ukpeme. Ke ama eketịn̄ aban̄a asian ye ndisịme nditọiban, enye ama eke n̄ke aban̄ade talent. (Kot Matthew 25:14-30.) Ke ediwak ikpehe enye emi ebiet n̄ke oro enye ekebemde iso eke aban̄a okụk, emi Jesus ekekede ke ntak emi ediwak owo “[ẹkekerede] ẹte Messiah ọmọn̄ ada ubọn̄ idaha oro.”—Luke 19:11-27.

12. Nso idi akpan n̄kpọ ke n̄ke talent?

¹² Ke n̄ke talent, Jesus ama etịn̄ aban̄a owo emi, mbemiso akakade anyan idụt, okokotde ifịn esie ita. Ọnọ kiet talent ition, ọnọ en̄wen talent iba, onyụn̄ ọnọ akpatre owo talent kiet kpọt—“ọnọ owo kiet kiet nte ukeme esie edide.” Eyedi emi ọkọwọrọ talent silver, idaha okụk emi ini oro ekedide okụk emi anamutom akadiade ke isua 14—ata ediwak okụk! Ke ini eren emi okotode edi, enye ama ọdọhọ ifịn esie ẹdinam ibat kaban̄a se mmọ ẹkenamde ke “anyan ini” emi enye mîkodụhe. Akpa ifịn iba ẹma ẹnam ibatokụk emi ẹkenọde mmọ awak utịm ikaba. Enye ọkọdọhọ ete “emetịm anam,” ọn̄wọn̄ọ ndinọ mmọ kiet kiet ifetutom efen efen, ndien eberi ete: “Dụk ke idara ọbọn̄ fo.” Ke ọdọhọde ete ke eteufọk ama etie uyịre uyịre akaha, ofụn emi ẹkenọde talent kiet ikadaha talent oro inam akpan n̄kpọ ndomokiet. Enye ama edịp okụk oro, ikam inyụn̄ isịnke enye ke ubọk mme akama-okụk man ẹnọ udori. Eteufọk okokot enye “idiọk asan̄autom ifu” koro enye ọkọbiọn̄ọde mme udori eteufọk esie. Mmọdo, ẹma ẹbọ enye talent oro, ndien ẹma ẹduọk enye ke an̄wa emi “editua eyet ye edita edet” edidude.

13. Didie ke Jesus okowụt ke ibiet eteufọk ke n̄ke oro?

¹³ N̄ko-n̄ko, ọyọhọ ntọt enye emi ekeme ndin̄wan̄a owo ke ndamban̄a usụn̄. Ke uwụtn̄kpọ, Jesus, emi eren oro akakade anyan idụt adade aban̄a, ọyọkpọn̄ mme mbet esie, aka heaven, onyụn̄ ebet ke anyan ini tutu ọbọ odudu ukara.b (Psalm 110:1-4; Utom 2:34-36; Rome 8:34; Mme Hebrew 10:12, 13) Nte ededi, nnyịn n̄ko imekeme ndikụt ntatara ukpepn̄kpọ m̀mê edumbet oro kpukpru nnyịn ikpenyenede ndida nsịn ke edinam ke uwem nnyịn. Nso idi oro?

14. N̄ke talent ọsọn̄ọ etịn̄ nso akpan udọn̄?

¹⁴ Edide idotenyịn nnyịn edi eke uwem unana n̄kpa ke heaven m̀mê nsinsi uwem ke paradise isọn̄, ana in̄wan̄în̄wan̄ ke n̄ke Jesus nte ke nnyịn ikpenyene ndisịn̄ede idem nnyịn ke mme utom Christian. Ke akpanikọ, ẹkeme nditịn̄ etop n̄ke emi ke ikọ kiet: nsịnifịk. Mme apostle ẹma ẹnịm uwụtn̄kpọ toto ke Pentecost 33 E.N. ka iso. Nnyịn ikot ite: “Peter onyụn̄ emen ediwak ikọ efen etịn̄ ọnọ mmọ, onyụn̄ akpak mmọ ete, Ẹnyan̄a idem mbufo ẹsio ke n̄kwan̄a emana emi.” (Utom 2:40-42) Ndien nso nti utịp ke enye ekenyene ntem ke mme ukeme esie! Nte mbon en̄wen ẹkedianade ye mme apostle ke utom ukwọrọikọ Christian, mmọ n̄ko ẹma ẹsịn ifịk, ye eti mbụk “ọdiọn̄de diọn̄ ọkọri ke ofụri ererimbot.”—Colossae 1:3-6, 23; 1 Corinth 3:5-9.

15. Ke nso akpan usụn̄ ke nnyịn ikpada akpan n̄kpọ eke n̄ke talent isịn ke edinam?

¹⁵ Nyene udọn̄ikọ n̄ke emi ke ekikere—ntịn̄nnịm ikọ aban̄ade edidu Jesus. Nnyịn imenyene nsọn̄ọ oro ekemde nte ke pa·rou·siʹa Jesus ke aka iso ndien nte ke ọyọsọp esịm ata-utịt. Ti ebuana oro Jesus okowụtde ke ufọt “utịt” ye utom oro mme Christian ẹnyenede ndinam: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:14) Ye emi ke ekikere, orụk ofụn ewe ke nnyịn ibiet? Bụp idemfo: ‘Ndi ntak ekeme ndidu ndibiere nte ke ami mbiet ofụn oro ekedịpde se ẹkenọde enye, eyedi ke adan̄aemi esede aban̄a mme ọkpọkpọ mbubehe esie? Mîdịghe nte ana in̄wan̄în̄wan̄ nte ke ami mbiet mbon oro ẹkefọnde ẹnyụn̄ ẹnamde akpanikọ? Ndi ami mmenen̄ede mbiere ndifori udori Eteufọk ke kpukpru idaha?’

Ndidu ke Ukpeme Nnyụn̄ Nsịn Ifịk ke Ini Edidu Esie

16. Nso etop ke n̄ke iba oro nnyịn inemede ẹnọ fi?

¹⁶ Ih, ke ẹsiode se mmọ ẹwọrọde ke ndamban̄a ye ke ntịn̄nnịm usụn̄ ẹfep, n̄ke mbiba ẹmi ẹnọ nnyịn in̄wan̄în̄wan̄ nsịnudọn̄ oro otode Jesus ke idemesie. Etop esie edi emi: Ẹdu ke ukpeme; ẹsịn ifịk, akpan akpan ke ini ẹkụtde idiọn̄ọ pa·rou·siʹa Christ. Oro edi idahaemi. Ntre nte nnyịn imenen̄ede idu ke ukpeme inyụn̄ isịn ifịk?

17, 18. Nso item ke mbet oro James ọkọnọ aban̄a edidu Jesus?

¹⁷ James eyeneka Jesus ikodụhe ke Obot Olive ikop ntịn̄nnịm ikọ Jesus; edi ke ukperedem enye ama okop aban̄a enye, ndien se enye ọkọwọrọde ama enen̄ede an̄wan̄a enye. Enye ekewet ete: “Ẹme ime ndien, nditọete, tutu Ọbọn̄ edi. Sese, ọtọ-in̄wan̄ etie ebet eti mbun̄wụm isọn̄, onyụn̄ eme anyan ime, tutu enye okụt akpa ye ukperedem edịm. Mbufo ẹme anyan ime ntre n̄ko; ẹsọn̄ọ mbufo esịt; koro edidi Ọbọn̄ ke ekpere.” (Sịghisịghi ubọkn̄wed edi eke nnyịn.)—James 5:7, 8.

¹⁸ Ke ama ọkọnọ nsọn̄ọ nte ke Abasi eyebiere ikpe ọnọ mbon oro ẹdade inyene mmọ ẹnam n̄kpọ ke idiọk usụn̄, James ama akpak mme Christian ete ẹkûnana ime ke adan̄aemi ẹbetde Jehovah ndinam n̄kpọ. Christian emi ananade ime ekeme ndikabade ndi osio-usiene, nte n̄kpọ eke anade enye ke idemesie enen̄ede mme idiọk oro ẹkenamde. Nte ededi, ikpenyeneke ndidi ntre koro ini ubiereikpe iditreke ndidi. Uwụtn̄kpọ ọtọin̄wan̄ owụt oro, nte James akanamde an̄wan̄a.

19. Eyen Israel ekedide ọtọin̄wan̄ ekekeme ndime nso orụk ime?

¹⁹ Eyen Israel ekedide ọtọin̄wan̄ emi ọkọtọde n̄kpasịp ekenyene ndibet, akpa ebet enye etịbe, ekem ebet mfri ọsọn̄, ndien ke akpatre ebet ini idọk. (Luke 8:5-8; John 4:35) Ke mme ọfiọn̄ oro, mme ini ndien eyedi ntak editịmede esịt ẹma ẹdu. Ndi akpa edịm eyedep onyụn̄ ekem? Nso kaban̄a ukperedem edịm? Nte n̄kpri unam m̀mê oyobio oyowot mme mfri? (Men Joel 1:4; 2:23-25 domo.) Nte ededi, ke ofụri ofụri, eyen Israel ekedide ọtọin̄wan̄ ama ekeme ndibuọt idem ke Jehovah ye ke mme oto-obot edisan̄a n̄kanade oro enye ama ekenịm ke itie. (Deuteronomy 11:14; Jeremiah 5:24) Ime ọtọin̄wan̄ ekeme ndinen̄ede n̄wọrọ edinyene mbuọtidem ye idotenyịn. Ke mbuọtidem enye ama ọfiọk ete ke se imọ ikebetde eyedi. Ama enen̄ede edi!

20. Didie ke nnyịn ikeme ndime ime ke n̄kemuyo ye item James?

²⁰ Ke adan̄aemi ọtọin̄wan̄ ekemede ndinyene ndusụk ifiọk mban̄a ini emi idọk edidade itie, mme Christian akpa isua ikie ikekemeke ndibat ini emi edidu Jesus edidide. Nte ededi, enye iketreke ndidi. James ekewet ete: “[Edidu, NW; Greek, pa·rou·siʹa] Ọbọn̄ ke ekpere.” Ke ini oro James ekewetde mme ikọ oro, owo ikekwe kan̄a idiọn̄ọ edidu Christ ke akwa udomo m̀mê ke ofụri ererimbot. Edi ẹkụt idahaemi! Ntre ekpetie nnyịn didie ke idem idahaemi? Ẹnen̄ede ẹkụt idiọn̄ọ oro. Nnyịn imokụt enye. Nnyịn imekeme nditịn̄ ye nsọn̄ọ, ‘Mmokụt nte idiọn̄ọ oro osude.’ Nnyịn imekeme nditịn̄ ye mbuọtidem ite, ‘Edidu Ọbọn̄ edi emi, ndien ata-utịt esie emekpere.’

21. Nso ke nnyịn inen̄ede ibiere ndinam?

²¹ Sia edide ntre, nnyịn imenen̄ede inyene akwa ntak ndida mme akpan ukpepn̄kpọ ẹdude ke n̄ke Jesus iba oro nnyịn ima ikeneme ke akpan n̄kpọ inyụn̄ ida isịn ke edinam. Enye ọkọdọhọ ete: “Ẹkpeme ndien, koro mbufo mîfiọkke usen m̀mê hour.” (Matthew 25:13) Idahaemi nte eyịghe mîdụhe edi ini ọnọ nnyịn ndisịn ifịk ke utom Christian nnyịn. Ẹyak iwụt ke uwem nnyịn eke usen ke usen nte ke akpan n̄kpọ oro Jesus eketịn̄de an̄wan̄a nnyịn. Ẹyak nnyịn idu ke ukpeme! Ẹyak nnyịn isịn ifịk!

[Mme Ikọ idakisọn̄]

Nte Afo Emeti?

◻ Nso akpan n̄kpọ ke afo ekpep oto n̄ke asian ye ndisịme nditọiban?

◻ Ebede ke n̄ke talent, nso akpan item ke Jesus ọnọ fi?

◻ Ke nso usụn̄ ke ime fo ke ebuana ye pa·rou·siʹa ebiet eke eyen Israel ekedide ọtọin̄wan̄?

◻ Ntak emi idahaemi enen̄erede edi ini oro aduaide owo idem onyụn̄ akamade n̄kpọ-ata ndidu uwem?

[Mme ndise ke page 23]

Mme ukpepn̄kpọ ewe ke afo ekpep oto n̄ke nditọiban ye eke talent?