Ndikpep Akakan Usụn̄ Ima

Kosovo, Lebanon, ye Ireland. Mmọ ẹmi ẹdi mme enyịn̄ ẹmi ẹsiwakde ndikop ke mbụk ke mme isua ndondo emi. Mmọ ẹnam mme owo ẹkere ẹban̄a mme idaha uduọkiyịp, utop bọmb, ye uwotowo. Edi akpanikọ, mme afai afai en̄wan ẹmi mme ukpụhọde eke ido ukpono, eke orụk, eke ekpụk, m̀mê mme ukpụhọde eken ẹdide ntak idịghe obufa n̄kpọ. Ke akpanikọ, mmọ ẹyọyọhọ mme n̄wed mbụk, ndien mmọ ẹmeda ndutụhọ oro inua mîkemeke nditịn̄ ẹsọk ubonowo.

KE ẸKỤTDE ke ekọn̄ ẹmedu ke ofụri mbụk, ediwak owo ẹma ẹbiere nte ke ekọn̄ enen̄ede edi se owo mîkemeke ndifep ye nte ke edi ndammana n̄kpọ mme owo ndisua kiet eken. Nte ededi, mme utọ ekikere oro ẹnen̄ede ẹtuaha ye mme ukpepn̄kpọ Ikọ Abasi, kpa Bible. N̄wed Abasi etịn̄ in̄wan̄în̄wan̄ ete: “Owo eke mîmaha ima ifiọkke Abasi, koro Abasi edi ima.” (1 John 4:8) Ana in̄wan̄în̄wan̄ nte ke Andibot oyom mme owo ẹma kiet eken.

Bible owụt n̄ko nte ke ẹkebot owo ke mbiet Abasi. (Genesis 1:26, 27) Emi ọwọrọ nte ke ẹnọ ubonowo ukeme ndiwụt mme edu Abasi, emi n̄wọrọnda ke otu mmọ edide ima. Sia emi edide ntre, ntak emi mme owo ẹkpude ntre idiọk idiọk ke ofụri mbụk ndiwụt ima nnọ kiet eken? Inikiet efen, Bible anam nnyịn ifiọk. Edi koro akpa owo iba oro, Adam ye Eve, ẹma ẹsọn̄ ibuot ye Abasi ẹnyụn̄ ẹduọ ẹdụk idiọkn̄kpọ. Nte utịp, kpukpru nditọ mmọ ẹma ẹda idiọkn̄kpọ ye unana mfọnmma ẹmana. Rome 3:23 anam an̄wan̄a ete: “Kpukpru owo ẹma ẹnam idiọk-n̄kpọ, ẹnyụn̄ ẹtaba ubọn̄ Abasi.” Ndammana idiọkn̄kpọ ye unana mfọnmma nnyịn ẹma ẹbiat ukeme oro Abasi ọnọde nnyịn ndima ima. Ndi emi ọwọrọ ete ke mme owo inyeneke aba ukeme ndima kiet eken? Nso idotenyịn idu nte ke nnyịn tutu amama iyadara emem emem, ima ima itie ebuana ye mme ekemmọ owo?

Ana Nnyịn Ikpep Ndima Abasi

Jehovah Abasi ọmọfiọk ete ke idem okposụkedi mme owo ẹdide mme anana mfọnmma, ubonowo osụk enyenyene ukeme ndiwụt ima. Ntak edi oro enye oyomde kpukpru mbon oro ẹyomde ndidat enye esịt ẹwụt ima ke ofụri ukeme mmọ. Eyen Abasi, Jesus Christ, ama anam se ẹyomde emi an̄wan̄a ke ini ẹkedọhọde enye asiak n̄kponn̄kan ewụhọ ke Ibet ẹkenọde Israel. Enye ọkọdọhọ ete: “Ma Jehovah Abasi fo ke ofụri esịt fo, ye ke ofụri ukpọn̄ fo ye ke ofụri ekikere fo. Emi edi akamba ye ebe-iso item.” Ekem enye ama adian do ete: “Udiana onyụn̄ ebiet enye, ete, Ma mbọhọidụn̄ fo nte idem fo. Ofụri mbet ye mme prophet ẹsịne ke mme item iba oro.”—Matthew 22:37-40.

Nte ededi, ediwak owo ẹkere ẹte ke edi ata ọkpọsọn̄ n̄kpọ ndima owo emi mmọ mîkemeke ndikụt, ndien nnyịn mme owo ikemeke ndikụt Jehovah Abasi koro enye edide Spirit. (John 4:24) Kpa ye oro, nnyịn ke ibọ ufọn kpukpru usen ito se Abasi anamde, sia kpukpru nnyịn iberide edem ke uwak nti n̄kpọ ẹmi enye okobotde ke ufọn nnyịn. Apostle Paul ama osio akpanikọ emi owụt ke ini enye ọkọdọhọde ete: “Edi [Abasi] iyakke n̄kpọ-ntiense anana ọnọ enye, ke emi Enye ọfọnde ido, onyụn̄ ọnọde mbufo edịm heaven ye ini eduek, onyụn̄ ọnọde mbufo udia, anam esịt mbufo ọyọhọ ye idatesịt.”—Utom 14:17.

Idem okposụkedi kpukpru owo ẹbọde ufọn ke usụn̄ kiet m̀mê eken ẹto mme enọ Andibot, ibat ibat owo ẹwụt esịtekọm ẹnọ enye m̀mê ẹdi se esịt onụkde ndikọm enye. Ntem, oyom nnyịn ifiak idụn̄ọde kpukpru nti n̄kpọ ẹmi Abasi anamde ọnọ nnyịn inyụn̄ itie ikere mme utịbe utịbe edu esie ẹmi ẹkarade kpukpru se enye anamde. Ndinam ntre ekpenyene ndinam nnyịn itịm ifiọk enyene-uten̄e ọniọn̄ ye odudu Akwa Andibot nnyịn. (Isaiah 45:18) Ke akande kpukpru, enye ekpenyene ndin̄wam nnyịn ndikụt ke enye edi ima ima Abasi, ke emi enye mînọhọ nnyịn uwem kpọt edi n̄ko anamde nnyịn ikeme ndidara ediwak inem n̄kpọ ke uwem.

Ke uwụtn̄kpọ, kere ban̄a anana-ibat nsio nsio ndiye flawa oro Abasi okobotde ke isọn̄. Edi utịbe ọnọ nnyịn didie ntem nte ke enye ama ọnọ nnyịn ukeme ndikụt nnyụn̄ nnyene akwa inemesịt nto ndiye n̄kpọ ẹmi! Ukem ntre, Abasi ama ọnọ kpukpru orụk ọnọ-nsọn̄idem udia man nnyịn ika iso idu uwem. Enye ekere aban̄a owo didie ntem ke ndinọ nnyịn n̄ko ukeme ukop inem n̄kpọ man nnyịn ikpekeme ndikop utọ inem oro nto edidia udia! Nte mmọ ẹmi idịghe in̄wan̄în̄wan̄ uyarade nte ke Abasi enen̄ede ama nnyịn onyụn̄ enyene akakan ufọn nnyịn ke ekikere?—Psalm 145:16, 17; Isaiah 42:5, 8.

Ke ẹsiode ediyarade idemesie nnọ nnyịn ebe ke “n̄wed obot” ẹfep, Andibot owụt nnyịn utọ Abasi emi enye edide ebe ke Ikọ esie, kpa Bible. Emi edi koro ke Bible ke ẹwet ediwak ima ima n̄kpọ ẹmi Jehovah Abasi akanamde ke eset ye akpakịp edidiọn̄ ẹmi enye ọn̄wọn̄ọde ndinọ ubonowo ke n̄kpet n̄kpet ini iso. (Genesis 22:17, 18; Exodus 3:17; Psalm 72:6-16; Ediyarade 21:4, 5) Ke akande kpukpru, Bible ayarade akakan ima oro Abasi owụtde ubonowo ọnọ nnyịn—ndinọ ikpọn̄îkpọn̄ edibon Eyen esie ete edi Andifak nnyịn man nnyịn ikeme ndiwọrọ ke ufụn idiọkn̄kpọ ye n̄kpa. (Rome 5:8) Ke akpanikọ, adan̄a nte ikpepde iban̄a ima ima Andibot nnyịn, ntre ke onụk nnyịn ndima enye ke ofụri esịt nnyịn.

Ndikpep Ndima Mme Ekemmọ Owo

Nte Jesus okowụtde, ke adianade ye edima Abasi ke ofụri esịt, ukpọn̄, ye ekikere, nnyịn ikpenyene ndima mbọhọidụn̄ nnyịn nte idem nnyịn. Ke akpanikọ, ima Abasi oyom nnyịn ima mme ekemmọ owo. Apostle John akanam an̄wan̄a ete: “Ndima, edieke Abasi akamade nnyịn ntem, nnyịn nde ikpama kiet eken.” Enye ama aka iso ọsọn̄ọ etịn̄ ete: “Edieke owo ọdọhọde ete, Mmama Abasi, ndien enye asua eyen-ete esie, enye edi osu-nsu; koro owo emi mîmaha eyen-ete esie emi enye okokụtde ke enyịn ikemeke ndima Abasi emi enye mîkekwe. Ndien item emi ke nnyịn ikọbọ ke ubọk Esie, ete, owo emi amade Abasi edima eyen-ete esie n̄ko.”—1 John 4:11, 20, 21.

Nnyịn idu uwem mfịn ke ererimbot emi ediwak owo ẹwụtde edu ami-ndi-akpa, ẹdide “mme ama idem,” kpa nte Bible ekebemde iso etịn̄. (2 Timothy 3:2) Ke ntre, edieke nnyịn iyomde ndikpep akakan usụn̄ ima, nnyịn inyene ndisịn ọkpọsọn̄ ukeme ndinam esịt nnyịn edi obufa nnyụn̄ n̄kpebe ima ima Andibot nnyịn, utu ke nditiene mme ibụk ibụk usụn̄ owo ke ofụri ofụri. (Rome 12:2; Ephesus 5:1) Abasi akam “[ọfọn] ido kpa ye mmọ eke mîkọmke enye ye mme idiọk owo,” enye onyụn̄ “[anam] utịn Esie asiaha ọnọ mme idiọk owo ye nti owo, onyụn̄ [anam] edịm edep ọnọ ndinen owo ye mme anam ukwan̄-ido.” Sia Ete nnyịn eke heaven enịmde utọ akwa uwụtn̄kpọ oro ọnọ nnyịn, akpana nnyịn idomo ndifọn ido nnyụn̄ ndi n̄kpọ un̄wam nnọ kpukpru owo. Ke ndinam ntre, nnyịn imekeme ndiwụt ke idi ‘nditọ ima ima Ete nnyịn eke heaven.’—Luke 6:35; Matthew 5:45.

Ndusụk ini utọ ima ima edinam oro esisụn̄ọ ke ndin̄wam mme owo ẹkabade ẹdi mme andituak ibuot nnọ ata Abasi. Ke ndusụk isua ẹmi ẹkebede, n̄wanndọ emi edide kiet ke otu Mme Ntiense Jehovah ama odomo ndibuana etop Bible ye mbọhọidụn̄ esie, edi mbọhọidụn̄ emi ama ọsọn̄ọ esịn. Nte ededi, edinam esie emi ikanamke idem emem n̄wanndọ emi. Utu ke oro, enye ama aka iso ndiwụt mfọnido onyụn̄ odomo ndidi n̄kpọ un̄wam nnọ mbọhọidụn̄ emi. Ini kiet enye ama an̄wam mbọhọidụn̄ emi man atan̄ n̄kpọ ọwọrọ aka ufọk efen. Ini efen enye ama odiomi owo ndisan̄a ye mbọhọidụn̄ oro n̄ka an̄wambehe ubomofụm man okosobo ye mme iman mbọhọidụn̄ emi. Ke ukperedem, mbọhọidụn̄ emi ama enyịme ukpepn̄kpọ Bible ndien ke akpatre akabade edi ifịk ifịk Christian kpa ye ọkpọsọn̄ ukọbọ otode ebe esie. Ih, mme edinam ima oro ẹma ẹsịn itiat idakisọn̄ ẹnọ nsinsi edidiọn̄.

Edieke nnyịn itịn̄de akpanikọ, nnyịn iyenyịme nte ke ima emi Abasi amade nnyịn idịghe ke ntak akpakịp nti edu nnyịn. Ke edide isio, enye ama nnyịn idem okposụkedi inyenede ediwak ndudue ye mmeme. Ke edide ntre, akpana nnyịn ikpep ndima mme ekemmọ owo kpasụk ntre kpa ye ediwak ndudue mmọ. Edieke inọde idem nnyịn ukpep ndikụt nnyụn̄ mma nti edu mbon efen utu ke ndiyom ndudue mmọ, eyetịm emem nnyịn utom ndinyene ima nnọ mmọ. Se ikerede iban̄a mmọ akam ekeme ndika anyan n̄kan ima oro edumbet akarade onyụn̄ esịne ufiop ufiop ima ye orụk ima emi odude ke ufọt n̄kpet n̄kpet ufan.

Ndiyak Ima Mbufo Ọkọri

Oyom ẹbọk ẹnyụn̄ ẹnam ima ye itie ufan ọkọri, ndien ndusụk ke otu n̄kpatan̄a n̄kpọ ẹyomde ndida nnam emi edi unana mbubịk ye edinam akpanikọ. Ndusụk owo ẹsidomo ndidịp mme mmeme mmọ man ẹdi nti owo ke iso mbon ẹmi mmọ ẹyomde ndinam ufan. Nte ededi, utọ usụn̄ uwem oro esiwak ndida utịp oro mmọ mîkodorike enyịn nsọk mmọ, nte mbon oro ke akpatre ẹdide ẹdifiọk se idide akpanikọ ẹnyụn̄ ẹdide se utọ unana edinam akpanikọ oro anamde ẹdian̄ade ẹkpọn̄ mmọ. Ke ntre, nnyịn ikpokopke ndịk ndinam mbon efen ẹdiọn̄ọ se nnyịn inen̄erede idi—idem okposụkedi nnyịn inyenede mme mmeme ẹmi in̄wanade ndikan. Emi ekeme ndin̄wam nditọn̄ọ itie ufan ye mmọ.

Ke uwụtn̄kpọ, akanian̄wan Ntiense kiet ke esop kiet ke Nsannsan Edem Usiahautịn ekenyene ata ekpri ifiọkn̄wed. Edi, akananam enye ikodomoke ndidịp mbon efen akpanikọ oro. Ke uwụtn̄kpọ, enye esinyịme in̄wan̄în̄wan̄ nte ke imọ ikemeke ndinam an̄wan̄a mbon efen nte ẹdade ntịn̄nnịm ikọ Bible ye mbụkeset ẹsọn̄ọ nte ke Ini Mme Gentile eketre ke 1914.a Nte ededi, enye ama enịm ata eti uwụtn̄kpọ ke ifịk enyenede ọnọ utom ukwọrọikọ, ọkọrọ ye ke ima ye ntatubọk esiwụtde nditọete, oro akanamde ẹtịn̄ ẹban̄a enye ke ima ima usụn̄ nte n̄kpọuto esop oro.

Ke ndusụk ido edinam, owo imaha ediwụt ima an̄wan̄wa; ẹkpep mme owo ndiwụt eti ido enyọn̄ enyọn̄ ke edinam mmọ ye mbon efen. Ke adan̄aemi ọfọnde ndifọn ido nnyụn̄ n̄wụt edikere mban̄a kpukpru ini, nnyịn ikpenyeneke ndiyak eti ido nnyịn akpan nnyịn ndiwụt m̀mê edịp mme ntụk nnyịn kaban̄a mbon efen. Jehovah ikokopke bụt nditịn̄ mban̄a ima emi enye ekenyenede ọnọ edimek ikọt esie, Israel eset, ọdọhọde mmọ ẹte: “Mmama fi nsinsi ima.” (Jeremiah 31:3) Ukem ntre, apostle Paul ama ọdọhọ mme ekemmọ andinịm ke akpanikọ ke Thessalonica ete: “Ndien koro mbufo ẹdọn̄de nnyịn eti-eti, nnyịn ikụt inem, idịghe ke edinọ mbufo gospel Abasi ikpọn̄, edi ke edinyụn̄ nyak ukpọn̄ nnyịn nde nnọ mbufo, sia imade mbufo eti-eti.” (1 Thessalonica 2:8) Ntre nte nnyịn idomode ndikọri ata ima nnọ mme ekemmọ owo, emi odu ke n̄kemuyo ye ukpepn̄kpọ Bible ndiwụt mme utọ ntụk oro ke ndammana usụn̄ utu ke ndifịk nnịm.

Oyom N̄kaiso Ukeme

Ndikpep ndinyene nnyụn̄ n̄wụt ima nnọ mbon efen edi edinam oro akade-ka iso. Ndinam ntre oyom ekese ukeme oto nnyịn koro nnyịn inyene ndisịn ifịk man ikan unana mfọnmma idem nnyịn ọkọrọ ye edibiọn̄ọ ọkpọsọn̄ odudu ererimbot unana ima emi. Nte ededi, ediwak utịp oro emi adade edi enen̄ede odot ye ukeme ẹsịnde.—Matthew 24:12.

Idem ke anana-mfọnmma ererimbot emi, nnyịn imekeme ndinyene itie ufan oro ọfọnde akan ye mme ekemmọ owo, osụn̄ọde ke ekese idatesịt, emem, ye uyụhọ ọnọ nnyịn ye mbon efen. Ke isịnde utọ ukeme oro, nnyịn imekeme ndiwụt idem nnyịn nte idotde ndinyene utịbe utịbe idotenyịn eke edidu uwem ke nsinsi ke obufa ererimbot Abasi. Ke akande kpukpru, ebede ke ndikpep akakan usụn̄ ima, nnyịn imekeme ndinyene unyịme ye mme edidiọn̄ ima ima Andibot nnyịn, idahaemi ye ke nsinsi!

[Ikọ idakisọn̄]

[Mme ndise ke page 10]

Ẹkeme ndiwụt ima Christian ebe ke mme edinam mfọnido

Ebiet Ẹdade Ndise Ẹto ke Page 8]

UN PHOTO 186226/M. Grafman