Nte Ikọ Oro “Christian” Ediwọrọ N̄kpọ En̄wen?
OWO ndidi Christian ọwọrọ nso? Didie ke afo ọkpọbọrọ? Ẹma ẹbụp ibat ibat owo ke nsio nsio idụt mbụme oro, ndien ẹmi ẹdi ndusụk ibọrọ oro mmọ ẹkenọde:
“Nditiene Jesus nnyụn̄ n̄kpebe enye.”
“Ndidi eti owo ye ndibuana n̄kpọ ye mbon efen.”
“Ndinyịme Christ nte Ọbọn̄ ye Andinyan̄a.”
“Ndidụk Mass, nditịn̄ Edisana Mary, ye ndidia Edisana Udia Ọbọn̄.”
“Nnịmke ke akpanikọ ke owo enyene ndika ufọkabasi mbemiso edide Christian.”
Idem mme n̄wed ukabadeikọ ẹnọ udịm udịm edikabade oro akpade owo idem. Ke akpanikọ, n̄wed ukabadeikọ kiet akabade ikọ oro “Christian” ke nsio nsio usụn̄ duop, ọtọn̄ọde ke “ndinịm ido ukpono Jesus Christ ke akpanikọ m̀mê ndibuana ke enye” esịm “ndidi eti owo m̀mê owo oro ẹmade.” Idịghe n̄kpọ n̄kpaidem nte ke edi ọkpọsọn̄ n̄kpọ ọnọ ediwak owo ndinam se owo ndidi Christian ọwọrọde an̄wan̄a.
Edu Edinam Se Ẹmade
Mfịn, ke otu mbon oro ẹdọhọde nte idide Christian—idem ke otu mbon oro ẹbuanade ukem ido ukpono—owo ekeme ndikụt nsio nsio ekikere oro ẹnyenede ẹban̄a mme n̄kpọ utọ nte edida odudu spirit Abasi n̄wet Bible, ukpepn̄kpọ edito ke unam mforo owo, ido ukpono ndisịn idem ke mbre ukara, ye edibuana se owo enịmde ke akpanikọ ye mbon efen. N̄kpọ aban̄ade ido uwem, ke mme utọ ibuotikọ nte usion̄o idịbi, idan̄ ukemuduot, ye eren ye n̄wan ndidụn̄ ọtọkiet ye unana edidọ ndọ, ẹsiwak ndidi n̄kpọ eneni. Edu edinam se ẹmade edi ntak.
Ke uwụtn̄kpọ, esopikpe ufọkabasi Protestant kiet, ke ndondo emi ama enyịme ndisọn̄ọ unen oro ufọkabasi enyenede “ndimek ebiowo oro ẹdiọn̄ọde nte adan̄ ukemuduot nsịn ke otu ukara esie,” ntre ke n̄wedmbụk oro Christian Century ọtọt. Ndusụk ekpep ukpepn̄kpọ ido ukpono ẹkam ẹnọ ekikere ẹte ke mbuọtidem ke Jesus idịghe akpan n̄kpọ kaban̄a edinyan̄a. Mmọ ẹnịm ke akpanikọ ẹte ke mme Jew, mbon Muslim, ye mbon eken “ẹkeme ndika heaven [kpa nte mme Christian ẹkemede],” ntre ke ntọt kiet ke The New York Times ọdọhọ.
Edieke ekemede, kere nte anditiene ukpepn̄kpọ Marx ekpesịnde udọn̄ ọnọ mme owo ndinyene ọkpọkpọ mbubehe m̀mê akara ukara mbio-obio ekpesịnde udọn̄ ọnọ ukara ufịk, mîdịghe nte ese n̄kpọ mban̄a n̄kann̄kụk ọkpọnọde ediwot akai ibetedem. Afo ọkpọdọhọ ke “owo oro ikemeke ndidi ata anditiene ukpepn̄kpọ Marx m̀mê akara ukara mbio-obio m̀mê ese n̄kpọ mban̄a n̄kann̄kụk”—ndien afo emenen. Edi, ke ini afo ekerede aban̄a nsio nsio ekikere mbon oro ẹdọhọde nte idide Christian mfịn, afo oyokụt mme ukpepn̄kpọ oro ẹdide ata nsio nsio ẹnyụn̄ ẹwakde ndidu ke ntuaha ye se Anditọn̄ọ Ido Ukpono Christ, Jesus Christ, ekekpepde. Nso ke ẹmi ẹtịn̄ ẹban̄a uduot Ido Ukpono Christ mmọ?—1 Corinth 1:10.
Mbụk aban̄ade udọn̄ ndikpụhọde mme ukpepn̄kpọ Christian nnam ekem ye ido obufa eyo ebịghi etieti, nte nnyịn idikụtde. Didie ke Abasi ye Jesus Christ ẹkere ẹban̄a mme utọ edikpụhọde oro? Ndi mme ufọkabasi oro ẹnọde mme ukpepn̄kpọ oro mîtọn̄ọke ito Christ ibetedem ẹnyene unen ndikot idemmọ Christian? Ẹyekere ẹban̄a mme mbụme ẹmi ke ibuotikọ oro etienede.