Ntọt Mme Anditan̄a Obio Ubọn̄

Edinam Ekebe Ndise Ama Anam Enye Ọnọ Abasi Ubọn̄

APOSTLE PAUL ọkọdọhọ ke “ndusụk [owo] ẹkwọrọ Christ ke esịt ufụp ye utọk, ndusụk ẹkwọrọ ke eti esịt.” (Philippi 1:15) Ndusụk ini, idem mbon oro ẹdomode ndibiat enyịn̄ ikọt Jehovah, ke unana edifiọk, ẹsinam mbon eti esịt ẹdi ẹdikụt akpanikọ.

Ke November 1998, ẹma ẹwụt edinam kiet ke ekebe ndise idụt France oro ẹkesiode Bethel, kpa ufọkutom n̄kọk itieutom Mme Ntiense Jehovah ke Louviers, France. Kpa ye oro ẹkenamde n̄kpọ ke nsio nsio usụn̄ ẹban̄a emi, edinam oro ama enyene nti utịp oro owo mîkodorike enyịn.

Anna-Paula, emi okodụn̄de kilomita 60 ọkpọn̄ Bethel, ekedi kiet ke otu mbon oro ẹkesede edinam oro. Anna-Paula, eka nditọ iba oro ama ọkọwọrọ ndọ, ke okoyom utom. Ntre ke ndan̄nsiere, enye ama okot Bethel ke urụk ukopikọ ndibụp m̀mê imọ imekeme ndikụt utom do. Enye ọkọdọhọ ete: “Edinam ekebe ndise oro ama anam mfiọk ke Bethel edi eti itie oro ẹnamde eti utom.” Akakpa n̄wan emi idem didie ntem ndifiọk nte ke kpukpru mbon oro ẹnamde utom ke Bethel ẹdi mme asan̄autom oro ẹnọde ini mmọ unyịme unyịme! Ke ẹma ẹkeneme ye enye esisịt ẹban̄a utom Mme Ntiense Jehovah, n̄wan emi ama enyịme ke iyama Ntiense kiet awaha edise imọ.

Ke ini Léna, asan̄autom uyọhọ ini ke esop n̄kann̄kụk oro, akawahade etiene enye, mmọ ẹma ẹneme nneme ke anyan ini, ndien Anna-Paula ama ọbọ n̄wed oro Ifiọk Oro Adade Osịm Nsinsi Uwem.a Etisịm ini mfiak n̄waha efen, Anna-Paula ama okot n̄wed oro okụre onyụn̄ enyene ediwak mbụme. Enye ama ọsọsọp enyịme ekpep imọ Bible. Anna-Paula ọkọdọhọ ete: “Emi ekedi ifet ọnọ mi ndidụn̄ọde Ikọ Abasi. Akananam ubọk mi ikotụkke Bible.”

Ke January, Anna-Paula ama aka Bethel ndien ke urua oro eketienede enye ama odụk mbono esop Christian ke akpa ini. Esisịt ini ke oro ebede, enye ama ọtọn̄ọ ndikpep Bible ye nditọ esie nnyụn̄ n̄kwọrọ ikọ nnọ mme ufan esie. Enye ọdọhọ ete: “N̄kekemeke ndidịp se n̄kekpepde. Ama ọdọn̄ mi ndibuana akpanikọ Bible ye mme owo nnyụn̄ ndọn̄ mmọ esịt.” Ke ama ekesịn ọkpọsọn̄ ukeme ndikan ediwak ọkpọkpọ mfịna oro enye ekenyenede, Anna-Paula ama ọtọn̄ọ ndidụk mme mbono esop kpukpru ini. Enye ama anam n̄kọri usọp usọp onyụn̄ ana baptism ke May 5, 2002.

Akan oro, ke ntak eti uwụtn̄kpọ ye ifịk oro Anna-Paula ekenyenede ke utom ukwọrọikọ, eka esie ama ọtọn̄ọ ndikpep Bible ndien ikebịghike ama ana baptism. Anna-Paula ọdọhọ ete: “Inua ikemeke nditịn̄ nte esịt adatde mi. Mmesikọm Jehovah kpukpru usen ke enye ndinam mi ndiọn̄ọ Enye ye ke kpukpru edidiọn̄ oro enye ọdiọn̄de mi.”

[Ikọ idakisọn̄]

[Mme ndise ke page 8]

Enyọn̄ enyọn̄: Anna-Paula

Isọn̄ Isọn̄: Inuaotop ọfis n̄kọk itieutom France