Ndidọk N̄ka Saba

ISUO Saba ke Holland ini kiet ko ekedi isuo emi mbon n̄wo akpammọn̄ ẹkedụn̄de, emi ẹkesiwatde ke Inyan Caribbean ẹyom mbụme. Mfịn, n̄kpọ nte owo 1,600, emi 5 ke otu mmọ ẹdide Mme Ntiense Jehovah, ẹdụn̄ ke ekpri isuo emi, oro oyomde usụn̄ ke n̄kpọ nte kilomita 240 ọkpọn̄ edem usiahautịn Puerto Rico. Nte ededi, Mme Ntiense Jehovah oro ẹnyenede uko mi ke ẹyom n̄kpọ oro enen̄erede ọsọn̄ urua akan mbụme. Mmọ ke ẹsịn ifịk ẹyom mbon oro “ẹnyenede eti esịt ndinyene nsinsi uwem.”—Utom 13:48.

Eti mbụk Obio Ubọn̄ Abasi ekesịm isuo emi ke akpa ini ke June 22, 1952, ke ini Mme Ntiense Jehovah ẹkewatde nsụn̄ikan̄ afara oro ẹkotde Sibia, emi ọkọniọn̄de mita 18, ẹdibehe ke esụk Saba. (Matthew 24:14) Gust Maki ye Stanley Carter emi ẹkedide mme isụn̄utom ẹma ẹdọk udịghi ukot itiat 500 ẹka ibuot obio Saba. Ke ediwak isua ikie emi ẹkebede, afan̄usụn̄ emi ekedi n̄kukụre usụn̄ oro ẹkesisan̄ade ẹsịm ibuot obio.

Ẹkemịn̄ akpa ntọt aban̄ade utom ukwọrọikọ Christian ke Saba ke 1966 Yearbook of Jehovah’s Witnesses. Nte ntọt oro okowụtde, enyene-ifịk Ntiense kiet kpọt okodu ke isuo oro. Ekem, ubon kiet otode Canada ama abiat ediwak isua ọkwọrọ eti mbụk do. Ke ndondo emi, Russel ye Kathy, ebe ye n̄wan oro ẹma ẹkekpọn̄ utom, emi ẹtode United States, ẹma ẹka Saba ẹketiene ẹbuana ke ndikwọrọ ikọ do. Kop mbụk mmọ.

Ndika Saba

Ami ye n̄wan mi imedibehe ke ubomofụm; nnyịn ika isen inọ Ronald, emi ekedide n̄kukụre Ntiense ke isuo oro ke akamba ubak iduọk isua 1990. Ronald ke ebet nnyịn ke an̄wambehe ubomofụm. Esịt enem enye aban̄a ekpri ikọn̄ efere oro idade isọk enye, koro owo inyamke n̄kpọ in̄wan̄ ke isuo emi. Nnyịn imodụk ekpri ubomisọn̄ mbiomo inyụn̄ iwat sụn̄sụn̄ ke n̄n̄wọn̄ọde n̄n̄wọn̄ọde usụn̄ idọk ikesịm etịn̄e Obot Scenery, kpa akani obot nsụn̄ikan̄.

Nte ituakde ida ke obio Hell Gate, Ronald efehe ekese m̀mê babru ikot oro ẹkediande ke obukpọk ntọt obio kaban̄a utịn̄ikọ an̄wa oro ẹdinọde ke Sunday ke osụk adadiana. Nnyịn imokop inemesịt ndikụt ke babru ikot oro ke osụk adadiana. Ronald ọfrọ odụk ubomisọn̄, nnyịn inyụn̄ ika iso ndiwat ndọk n̄ka n̄kponn̄kan obio ke isuo oro, emi ẹkotde Windwardside (Iso Ofụm). Nte enyịn̄ esie owụtde, ediye obio emi odu ke n̄kan̄ emi ofụm esibarade ke isuo emi, onyụn̄ okon̄ mita 400. Nte iwatde idụk usụn̄ ufọk Ron, nnyịn imokụt ẹwetde Kingdom Hall of Jehovah’s Witnesses ediye ediye ke iso ufọk esie.

Nte isụk idiade udia uwemeyo, mmobụp enye mbụme oro akanamde nnyịn idi idise enye: “Afo akasan̄a didie edi Saba editan̄a Obio Ubọn̄?”

Ron ọbọrọ ete: “Ke ini ẹkekụrede ndibọp n̄kọk itieutom Mme Ntiense Jehovah ke Puerto Rico ke 1993, ama ọdọn̄ mi ye n̄wan mi ndika iso nnam utom ke esenidụt. Nnyịn ima ibebem iso isan̄a ye ebe ye n̄wan ẹdide asiakusụn̄ idi Saba, ima inyụn̄ idifiọk ke owo 1,400 ẹkedụn̄ ke Saba edi Ntiense ndomokiet ikodụhe. Ntre nnyịn ima ineme ye Kọmiti N̄kọk Itieutom Puerto Rico ite ke ikpama ndiwọrọ n̄ka do.

“Mme n̄kpọ ẹma ẹsan̄a nte ọkọfọnde, ntre ẹma ẹnyịme nnyịn iwọrọ ika do. Edi n̄kpọ mfụhọ nditịn̄ ke n̄wan mi ama ọdọn̄ọ idiọk idiọk ke isua iba ẹma ẹkebe, ntre nnyịn ima ifiak inyọn̄ California. Ke enye ama akakpa, mma mfiak ndi Saba. Idịghe omokụt, nsimaha nditọn̄ọ n̄kpọ nsana nyak ke usụn̄.”

Ndinọ Ikọ Ntiense ke Ufọk ke Ufọk ke Saba

Ufọk Ron emebịghi ke isua ikie, ndien ẹsida ufọtufọk esie ẹnịm mme mbono esop n̄ko.a Nte nnyịn idiade udia usenubọk inyụn̄ iben̄ede idem ndika ukwọrọikọ, edịm edep ọbọn̄ itie utem udia Ron oro mînyeneke ọkọm. Ke ima ikadia udia usenubọk, nnyịn imọtọn̄ọ ndinọ ikọ ntiense to ke enyịnusụn̄ sịm enyịnusụn̄ kpa ye oro edịm edepde n̄ken̄e n̄ken̄e. Ke kpukpru ufọk oro idụkde, Ron okot mme enyeneufọk enyịn̄ ke ini ọkọmde mmọ. Nneme nnyịn ọkọn̄ọ ke mbụk n̄kpọntịbe n̄kann̄kụk eke ndondo oro. Ata ediwak owo ẹmehe ye Ron ye utom ukwọrọikọ esie, ndien ediwak mmọ ẹnyịme ndibọ mme n̄wed Bible.

Ekeme ndisọn̄ ndinyene n̄wetnnịm n̄kpọ aban̄ade mbon oro ẹnyenede udọn̄ ke etop Obio Ubọn̄ edieke afo mûmeheke ye mbio obio. Ntak-a? Ron ọdọhọ koro “ibet oyom ẹyet ukem uduot ndom mbakara ke kpukpru ufọk.” Emi edi akpanikọ, koro nte nsede n̄kanade, mmokụt ke kpukpru ufọk ke Saba ẹdi afia ẹnyụn̄ ẹnyene ndatndat ọkọm.

Ke ima ikokụre nneme Bible, nnyịn imọnọ mme enyeneufọk ikot ite ẹdi ẹdikop utịn̄ikọ an̄wa oro ẹdinọde ke Sunday ke Ufọkmbono Obio Ubọn̄. Ke ini Ron mîkaha isan̄, enye esinọ utịn̄ikọ an̄wa kpukpru urua ke isuo oro. Kan̄a ke emi, ẹnịm ukpepn̄kpọ Bible 17 ke Saba. Owo 20 ẹkedụk Editi n̄kpa Christ ke 2004. Ndien okposụkedi etiede nte ke ibat oro enen̄ede ekpri, enye edi mbahade 1 eke ikie ke ofụri ibatowo oro ẹdụn̄de ke Saba!

Ke akpanikọ, Mme Ntiense Jehovah ẹsịn ọkpọsọn̄ ukeme ndida etop edinyan̄a otode Abasi nsịm adan̄a ediwak owo nte ẹkekeme. Edide ke ekpri isuo nte Saba m̀mê ke akamba ubak isọn̄, Mme Ntiense Jehovah ke ẹka iso ke utom oro ẹkedọn̄de mmọ ẹte ẹnam “mme owo ke kpukpru idụt ẹdi mbet.”—Matthew 28:19.

Nnyịn imeseme ke isan̄ nnyịn edisịm utịt. Nte idụkde ubomofụm, nnyịn imọkọm mme owo unyọn̄. Nnyịn idifreke isan̄ oro ikakade ke Saba ye ini oro ikabiatde idọk obio oro odude ke obot mi!

[Ikọ idakisọn̄]

[Mme ndise obio ke page 10]

(Ama oyom ndikụt nte enye enen̄erede etie, se n̄wed)

PUERTO RICO

[Ebiet Ẹdade Ndise Ẹto ke page 10]

Edem edem: www.sabatourism.com