Mme Mbụme Ẹtode Mme Andikot
Ndi ikọ oro “m̀mê” oro odude ke Zephaniah 2:3 ọwọrọ ke mme asan̄autom Abasi itịmke ifiọk m̀mê ẹyenọ mmimọ nsinsi uwem?
Itien̄wed oro okot ete: “Mbufo kpukpru sụn̄-sụn̄ mbio isọn̄ emi ẹnamde ikpe esie, ẹyom Jehovah; mbufo ẹyom edinen ido, ẹyom sụn̄-sụn̄ ido: m̀mê mbufo ẹyedịbe ke usen iyatesịt Jehovah.” Ntak emi ufan̄ikọ emi ọdọhọde “m̀mê”?
Man ifiọk nte Jehovah edinamde n̄kpọ ye mme anam-akpanikọ ikọt esie ke Armageddon, ọyọfọn iti se Bible ekpepde aban̄a se Abasi aduakde ndinam nnọ ikọt esie oro ẹkpan̄ade mbemiso ini ubiereikpe oro. Ẹyenam ndusụk mmọ ẹset ẹkedu uwem unana n̄kpa ke heaven nte mme owo eke spirit, ke adan̄aemi ẹdinamde mbon eken ẹset ye idotenyịn edidu uwem nsinsi ke Paradise. (John 5:28, 29; 1 Corinth 15:53, 54) Edieke Jehovah editide mme anam-akpanikọ ikọt esie oro ẹkekpan̄ade mbemiso Armageddon onyụn̄ ọnọ mmọ utịp, ke akpanikọ, enye iditreke nditi mme asan̄autom esie oro ẹdude uwem ke usen iyatesịt esie.
Apostle Peter ama ada odudu spirit ewet ikọ oro ọnọde owo nsịnudọn̄ n̄ko, ete: “[Abasi ama] anyan̄a Noah, ọkwọrọ edinen ido, ye owo itiaba en̄wen ke ini enye akadade ukwọ ofụk ererimbot mbon unana uten̄e Abasi; ndien ke ndifọp obio Sodom ye Gomorrah ẹkabade ntọn̄ enye obiom mmọ ikpe, . . . enye ama onyụn̄ anyan̄a edinen owo oro Lot . . . Jehovah ọfiọk nte anyan̄ade mbon uten̄e Abasi osio ke idomo, edi enịmde mme anam ukwan̄ido ọnọ edisịbe mfep ke usen ikpe.” (2 Peter 2:5-9) Okposụkedi Jehovah okosobode ndiọi owo ke eset, enye ama anyan̄a Noah ye Lot, emi ẹkesọn̄ọde ẹda ẹnam n̄kpọ esie. Jehovah ayanyan̄a mbon oro ẹten̄ede enye n̄ko ke ini edisobode ndiọi owo ke Armageddon. “Akwa otuowo” emi ẹdide ndinen owo ẹyebọhọ.—Ediyarade 7:9, 14.
Mmọdo, etie nte ikọ oro “m̀mê” ke Zephaniah 2:3 iwọrọke ke Abasi idikemeke ndinyan̄a ikọt esie. Utu ke oro, enye ọwọrọ ke edieke owo ọtọn̄ọde ndiyom edinen ido ye sụn̄sụn̄ ido, ke ẹkeme ndidịp enye ke usen iyatesịt Jehovah. Ndien ẹdinyan̄a owo n̄kukụre edieke enye akade iso oyom sụn̄sụn̄ ido ye edinen ido.—Zephaniah 2:3
[Ndise ke page 31]
“Jehovah ọfiọk nte anyan̄ade mbon uten̄e Abasi osio ke idomo”