MMỌ ẸMA ẸNỌ IDEMMỌ UNYỊME UNYỊME ke New York

KE ISUA ifan̄ emi ẹbede, Cesar ye Rocio an̄wan esie ẹkedụn̄ ke California. Mmọ ẹma ẹnyene ufọk idemmọ ẹnyụn̄ ẹnyene se ẹdiade sia Cesar ama enyene ata eti ubọkutom. Rocio ekesisosio usen anam utom ke ufọkibọk. Mmọ ikenyeneke nditọ. Edi enyene se iketịbede emi akanamde mmọ ẹkpọn̄ ofụri se mmọ ẹkesinamde ẹkedụn̄ ke ebiet en̄wen. Nso idi oro?

Ke October 2009, n̄kọk itieutom United States ẹma ẹnọ leta ẹsọk kpukpru esop ke idụt oro, ẹdọhọ ke imoyom nditọete ẹdinam utom ke ibio ini ke Bethel, ẹn̄wam ẹbọp mbufa ufọk ke Wallkill, New York. Ẹma ẹdọhọ idem mbon oro ẹbede isua 35 ẹtiene ẹsịn n̄wed. Cesar ye Rocio ẹdọhọ ẹte: “Imebe isua emi, ntre ikada emi nte n̄kukụre ifet oro inyenede nditiene nnam utom ke Bethel. Nnyịn ikoyomke ebe nnyịn!” Mmọ ẹma ẹsọsọp ẹsịn n̄wed.

Isua kiet ye ọfiọn̄ ifan̄ ama ebe, edi owo ikokotke mmọ ẹdinam utom ke Bethel. Mmọ ẹma ẹnam n̄kpọ man ẹma ẹkot mmọ, n̄kpọ ndomokiet edikpan mmọ ndika. Cesar ọdọhọ ete: “Ima imen itie unịm moto nnyịn inam ubet ufọk kiet, sia ikoyom ndiwọrọ n̄kodụn̄ do mmen ufọk nnyịn nsịn owo. Ima ikpọn̄ ediye ufọk emi mîbịghike ikọbọp ikodụn̄ ke ubet ufọk kiet emi ekpride akan oro utịm ikatiaita. Ima iben̄e idem ndien ndika Bethel edieke ẹkotde nnyịn.” Nso en̄wen iketịbe? Rocio ọdọhọ ete: “Ọfiọn̄ kiet ke ima ikọwọrọ ikodụn̄ ke ekpri ubet ufọk oro, ẹma ẹkot nnyin idinam utom ke ibio ini ke Wallkill. Ima inen̄ede ikụt ke Jehovah ọkọdiọn̄ nnyin ke ntak se ikayakde atak.”

ABASI ỌDIỌN̄ MMỌ KE NTAK SE MMỌ ẸYAKDE ATAK

Ata ediwak nditọete nnyịn ẹnam se Cesar ye Rocio ẹnamde. Mmọ ẹyak n̄kpọ atak mmọ man ẹketiene ẹbọp n̄kpọ ẹnọ esop Abasi ke New York. Ndusụk mmọ ẹnam utom ke Wallkill, ke ẹnyụn̄ ẹn̄wam ẹbọp nsio nsio n̄kpọ do. Ediwak mmọ ke ẹn̄wam ẹbọp ibuot itieutom nnyịn ke Warwick.a Mme ebe ye iban mmọ ẹkpọn̄ ufọk ye utom mmọ man ẹnyene ini ẹnam n̄kpọ Jehovah. Ndusụk ẹsikam ẹkpọn̄ ufene emi mmọ ẹmade etieti. Ndi Jehovah ọdiọn̄ mbon emi ẹnamde emi? Ih, ọdiọn̄!

Da Way ye Debra an̄wan esie ke uwụtn̄kpọ. Mmọ mbiba ẹkpere isua 60. Way esidiọn̄ ikan̄ ilektrik. Mmọ ẹma ẹnyam ufọk mmọ ye ediwak n̄kpọ emi mmọ ẹnyenede ke Kansas ẹkekpe ufọk ẹdụn̄ ke Wallkill ẹnyụn̄ ẹsisio usen ẹtiene ẹkenam utom ke Bethel.b Kpa ye oro mîmemke utom ndinam se mmọ ẹkenamde emi, mmọ ituaha n̄kpọfiọk ke se mmọ ẹkeyakde atak. Debra etịn̄ nte enye adade utom oro ẹnọde enye anam ke Bethel: “Esitie mi ndusụk ini nte ndu ke itie ubọpufọk ke Paradise, emi ẹsiwụtde ke mme n̄wed nnyịn!”

Melvin ye Sharon ẹma ẹnyam ufọk ye mme n̄kpọ emi mmọ ẹnyenede ke South Carolina man ẹketiene ẹn̄wam ke utom ke Warwick. Kpa ye oro mîmemke utom ndinam emi, esịt enenem mmọ ke ifet oro mmọ enyenede nditiene mbọp ibuot itieutom ofụri ererimbot nnyịn. Mmọ ẹdọhọ ẹte: “Esịt enen̄ede enem nnyịn ndifiọk ke se inamde emi eyenyene ufọn ọnọ nditọete nnyịn ke ofụri ererimbot.”

Kenneth ye Maureen an̄wan esie ẹdi n̄kpọ nte isua 55. Kenneth ekesibọp ufọk, edi mmọ ẹma ẹto California ẹdi Warwick ẹditiene ẹn̄wam ke utom. Mmọ ẹma ẹdọhọ eyenete an̄wan kiet ke esop mmọ an̄wam mmimọ ese aban̄a ufọk mmimọ, ẹnyụn̄ ẹdọhọ mbon mmọ ẹse ẹban̄a ete Kenneth emi edide akanieren. Ndi mmọ ẹsitua n̄kpọfiọk ẹban̄a se mmọ ẹkeyakde atak man ẹdinam utom ke Bethel? Ihih! Mmọ ẹbọ ekese ufọn. Ken ọdọhọ ete: “Idịghe nte nnyịn inyeneke mfịna, edi imenen̄ede ima se inamde emi. Ikpama mbon en̄wen ẹtiene ẹditabi ẹse.”

NTE ẸKESEDE ẸBAN̄A NSIO NSIO MFỊNA

Akana ediwak owo ẹse ẹban̄a nsio nsio mfịna mbemiso ẹwọrọde ẹken̄wam esop Abasi ẹbọp n̄kpọ. Da William ye Sandra ke uwụtn̄kpọ. Uwem ama enem mmọ ke ini mmọ ẹkedụn̄de ke Pennsylvania. Mmọ ẹbe isua 60 ẹnyụn̄ ẹnyene ufọkutom idemmọ emi owo 17 ẹnamde utom. Akanam mmọ ikpọn̄ke esop emi mmọ ẹkedude toto ke ini nditọwọn̄, ediwak iman mmọ ẹnyụn̄ ẹdụn̄ ẹkpere mmọ. Ntre ke ini ẹkeyomde mbon emi ẹdinyịmede ndito ufọk mmọ kpukpru usen ndinam utom ke Wallkill, mmọ ẹma ẹfiọk ke iyọwọrọ ikpọn̄ edem mmimọ ye kpukpru mbon emi mmimọ idiọn̄ọde. William ọdọhọ ete: “Ntịn̄ akpanikọ, idụhe se ikọsọn̄de nte nnyịn ndikpọn̄ ofụri se ikesinamde uwem enem nnyịn.” Edi mmọ ẹma ẹnen̄ede ẹbọn̄ akam, ẹnyụn̄ ẹbiere ndiwọrọ n̄ka Wallkill. Mmọ ituaha n̄kpọfiọk ndomokiet. William ọdọhọ ete: “Idụhe se inemde nte ndinam utom kiet ye mbon Bethel. Esịt enem mi ye n̄wan mi ke ima itiene idi!”

Ẹma ẹkot Ricky, emi ekesisede enyịn ke utom ubọpufọk ke Hawaii, etiene edin̄wam ke utom oro ẹnamde ke Warwick. Akana enye ọbọ ufọk ke Warwick, esito do edinam utom kpukpru usen. Kendra an̄wan esie ama enyịme mmọ ẹka, edi mmọ ẹma ẹnyene mfịna kiet. Mmọ ẹma ẹkere m̀mê editie Jacob eyen mmọ emi edide isua 11 didie. Mmọ ẹma ẹkere m̀mê akam ọfọn ofụri ubon mmimọ ndiwọrọ n̄ka New York ẹnyụn̄ ẹkere m̀mê n̄kan̄ oro ọyọfọn ye eyen mmimọ.

Ricky ọdọhọ ete: “Ima ikere m̀mê iyokụt esop oro mme uyen ẹsọn̄de idem. Ikoyom Jacob enyene ediwak nti ufan.” Nditọwọn̄ ikawakke ke esop emi mmọ ẹkekade ke akpatre, edi mbon Bethel ẹma ẹwak. Ricky ọdọhọ ete: “Ke akpa mbono esop emi ikodụkde ama akasuana, ima ibụp Jacob m̀mê enye okụt didie obufa esop nnyịn, akpan akpan emi mme ubọkn̄ka esie mîdụhe do. Enye ama ọdọhọ mi ete, ‘Daddy, kûfịna. Nyanam ufan ye n̄kparawa emi ẹnamde utom ke Bethel.’”

N̄kparawa oro ẹdi mme ufan Jacob idahaemi. Nso ufọn ke Jacob ọbọ? Ricky ọdọhọ ete: “Ke ini n̄kasan̄ade mbe ubet eyen mi okoneyo usen kiet, mma n̄kụt ke enye ikenịmeke ikan̄. N̄kekere ke mmọn̄ mmụm enye osụk ẹbrede mbre vidio, edi eyen mbon okokot Bible! Mma mbụp enye m̀mê nso ke enye anam, enye ete mi, ‘Ndi obufa owo Bethel; nyom ndikot Bible n̄kụre ke isua kiet.’” N̄kpọ emi ama enem Ricky ye Kendra esịt. Esịt enem mmọ sia Ricky etiene an̄wam ke utom emi ẹnamde ke Warwick, n̄ko eyen mmọ ke ọsọn̄ idem ke esop.—N̄ke 22:6.

MMỌ ITỊMEKEDE ESỊT IBAN̄A N̄KPỌN̄

Mbon emi ẹkekotde ẹdin̄wam ke utom ke Wallkill ye Warwick ẹdiọn̄ọ ke utom oyokụre usen kiet usen kiet. Edi ndi idem enyek mmọ m̀mê idika m̀mọ̀n̄ m̀mê idinyụn̄ inam nso utom ama okụre? Ihih, inyekke-o! Nditọete iba ye iban mmọ emi mîsịmke kan̄a isua 60, emi ẹtode Florida, ẹtịn̄ ikọ emi ediwak nditọete emi ẹsitịn̄de. John, emi esisede enyịn ke utom ubọpufọk ye Carmen an̄wan esie emi ẹkekotde ẹdidu ke Warwick ẹnam utom ibio ini ẹdọhọ ete: “Jehovah ọnọ nnyịn se iyomde tutu esịm emi. Nnyịn ikereke ke enye akpan̄wam nnyịn idisịm mi, ekem ko enye ọkpọn̄ nnyịn.” (Ps. 119:116) Luis, emi ẹsinamde n̄kpọ unịme ikan̄, ye Quenia an̄wan esie ẹnam utom ke Wallkill. Mmọ ẹdọhọ ẹte: “Imokokụt nte Jehovah atatde ubọk ọnọ nnyịn se idiade. Kpa ye oro nnyịn mîdiọn̄ọke nte n̄kpọ editiede, m̀mê ebiet emi idikade, ye se idinamde ima ikụre utom emi, imenịm ke enye ayaka iso akama nnyịn.”—Ps. 34:10; 37:25.

‘NYỌDIỌN̄ MBUFO TUTU MBUFO INANAKE BABA N̄KPỌ KIET’

Enyene mme n̄kpọ emi akpakanamde mbon emi ẹn̄wamde ẹbọp n̄kpọ ke New York ẹsịn ndika. Edi mmọ ẹma ẹdomo Jehovah ẹse nte enye ọdọhọde kpukpru nnyịn inam. Enye ọdọhọ ete: “Ẹda emi ẹdomo mi ẹse, . . . m̀mê ami ndiberekede window heaven nnọ mbufo nnyụn̄ n̄n̄wan̄a edidiọn̄ nnọ mbufo tutu mbufo inanake baba n̄kpọ kiet.”—Mal. 3:10.

Ndi oyodomo Jehovah ese man enye ọdiọn̄ fi? Bọn̄ akam nyụn̄ kere nte ekemede nditiene n̄n̄wam ke utom ubọpn̄kpọ, edide ke New York m̀mê ke ebiet en̄wen, nyụn̄ se nte Jehovah edidiọn̄de fi.—Mark 10:29, 30.

Dale ye Cathy an̄wan esie ẹto Alabama. Dale esibọp n̄kpọ. Mmọ mbiba ke ẹn̄wam ẹbọp n̄kpọ ke Wallkill, ẹnyụn̄ ẹdọhọ ke imama mbon en̄wen ẹtiene ẹnam utọ utom emi. Mmọ ẹdọhọ ẹte: “Edieke ọkpọn̄de kan̄a se amade ye se enyenede man akanam n̄kpọ ọnọ Abasi, oyokụt se Jehovah ekemede ndida fi nnam.” Nso idin̄wam owo enyịme ndinam utọ utom emi? Dale ọdọhọ ete: “Kûyom ikpọ n̄kpọ. Udutuaha n̄kpọfiọk tutu amama!” Gary emi otode North Carolina ọdiọn̄ọ utom ubọpn̄kpọ etieti sia enye anam utom emi ke isua 30. Enye ye Maureen an̄wan esie ẹdọhọ ke ufọn kiet emi mmimọ ibọde ke utom Warwick edi “nte mmimọ idiọn̄ọde ediwak nditọete emi ẹdade ofụri uwem mmọ ẹnam n̄kpọ Jehovah ke Bethel inyụn̄ inamde utom ye mmọ.” Gary adian do ete: “Edieke oyomde ndinam utom ke Bethel, kûyom ikpọ n̄kpọ. Utọ uwem emi ọfọn akan.” Jason emi ẹkesinamde utom ke kọmpeni emi ẹnamde n̄kpọ ẹban̄a ikan̄ ilektrik, ye Jennifer an̄wan esie ẹto Illinois. Mmọ ẹdọhọ ke nditiene mbọp Bethel Wallkill “etie nte owo ndinam utom ke obufa ererimbot.” Jennifer adian do ete: “Idụhe se inemde owo nte enye ndidiọn̄ọ ke Jehovah ama se imọ inamde inọ enye, ke enye onyụn̄ ekpep imọ se idinamde ke ini iso. Jehovah ọyọdiọn̄ fi akan nte ekerede.”