Ke Ini N̄wan M̀mê Ebe Fo Ọwọrọde Akama Owo En̄wen

Maria emi odụn̄de ke Spain ọdọhọ ete: “Mma nyom ndiwot idem ke ini ebe mi ọkọdọhọde ke imọn̄ ikpọn̄ mi ikọdọ n̄kaiferi. Se enye akanamde oro ama abiak mi tutu, akpan akpan ke ini ntide kpukpru se n̄kanamde nnọ enye.”

Bill emi odụn̄de n̄ko ke Spain ọdọhọ ete: “Ke ini n̄wan mi ọkọkpọn̄de mi, eketie nte nduọ akpauben̄. Kpukpru se ikaduakde ndinam ama abiara, idotenyịn nnyịn onyụn̄ akpa mfụhọ. Enyene ndusụk usen emi eketiede nte ke mmefre enyịn mban̄a se iketịbede, edi etise mfiak ntọn̄ọ ndifụhọ n̄kpa n̄kpa.”

ESINEN̄EDE abiak owo ke ini n̄wan m̀mê ebe esie ọwọrọde akama owo en̄wen. Imọfiọk ke ndusụk owo ẹsifen ẹnọ ebe m̀mê n̄wan mmọ edieke enye akabarede esịt, ẹnyụn̄ ẹfiak ẹtọn̄ọ ndinam ndọ mmọ enem.a Edi, ọkpọkọm mmọ ẹsụk ẹdodụn̄ kiet, esisụk ababiak owo ke ini enye etide ke ebe m̀mê n̄wan imọ ama ọkpọn̄ imọ ebịne owo en̄wen. Nso ikeme ndin̄wam mbon oro utọ n̄kpọ emi ọwọrọde?

MME ITIE N̄WED ABASI ORO ẸKEMEDE NDIN̄WAM FI

Kpa ye oro esinen̄erede abiak owo ke ini ebe m̀mê n̄wan esie esịnde efịbe, Bible an̄wam ediwak mbon oro utọ n̄kpọ emi ọwọrọde. Bible anam mmọ ẹfiọk ke Abasi okụt mmọn̄eyet mmọ, ke se iwọrọde mmọ abiak enye n̄ko.—Malachi 2:13-16.

“Ke ini ediwak ekikere ẹtịmerede mi esịt, ndọn̄esịt fo enem ukpọn̄ mi.”—Psalm 94:19.

Bill ọdọhọ ete: “Ke ini n̄kokotde itien̄wed oro, eketie nte Jehovah obok mi nte edima ete esibokde eyen esie.”

“Afo ọyọsọn̄ọ ada ye owo emi ọsọn̄ọde ada.”—Psalm 18:25.

Carmen, emi ebe esie ekesiwọrọde akama n̄wan en̄wen ke ediwak ọfiọn̄, ọdọhọ ete: “Ebe mi ikọsọn̄ọke ida ye ami, edi mma mfiọk ke Jehovah ayaka iso ọsọn̄ọ ada ye ami. Enye idikpọn̄ke mi tutu amama.”

“Ẹkûtịmede esịt ke baba n̄kpọ kiet, edi ke kpukpru n̄kpọ ẹda akam ye n̄kpeubọk . . . ẹben̄e Abasi se mbufo ẹyomde; ndien emem Abasi emi akande kpukpru ekikere eyekpeme mbufo esịt ye ekikere.”—Philippi 4:6, 7.

Sasha ọdọhọ ete: “Mma n̄kot itien̄wed emi ediwak ini. Mma nsibọn̄ akam kpukpru ini, ndien Abasi ama anam esịt ana mi sụn̄.”

Enyene ini emi uwem okodorode kpukpru mbon oro itịn̄de iban̄a ke ibuotikọ emi. Edi mmọ ẹma ẹbuọt idem ye Abasi ẹnyụn̄ ẹkpep Bible, ndien oro ama ọsọn̄ọ mmọ idem. Bill ọdọhọ ete: “Ndibuọt idem ye Jehovah ama anam nnyene idotenyịn ke ini eketiede nte kpukpru n̄kpọ ọtọ etịmede ke uwem mi. Kpa ye oro edide enyene ini emi n̄kasan̄ade ‘ke itịghede ọkpọsọn̄ ekịm,’ Abasi ama odu ye ami.”—Psalm 23:4.

a Edieke oyomde ndifiọk se owo ekpekerede aban̄a mbemiso ebierede m̀mê akpana ifen inọ ebe m̀mê n̄wan imọ emi esịnde efịbe, kot ibuotikọ emi “When a Mate Is Unfaithful” ke Ẹdemede! Ikọmbakara eke April 22, 1999.

Mme N̄kpọ Oro Ẹkemede Ndin̄wam Fi

Kot mme itie Bible oro ẹdidọn̄de fi esịt.

Bill ọdọhọ ete: “Mma n̄kot n̄wed Job ekem n̄kot Psalm, nnyụn̄ ndụri udịm ke kpukpru ufan̄ikọ oro otụkde mi. Mma n̄kụt ke se ikọwọrọde mbon oro ẹtịn̄de ẹban̄a ke mme n̄wed Bible oro ama abiak mmọ onyụn̄ anam esịt etịmede mmọ, kpa nte eketịmerede mi.”

Bre ikwọ emi edidọn̄de fi esịt.

Carmen ọdọhọ ete: “Mma nsibre ikwọ ke ini mmen̄kemeke ndide idap okoneyo. Emi ama esinen̄ede ọdọn̄ mi esịt.” Daniel ọdọhọ ete: “Mma n̄kpep ndibre kita, ndien ikwọ oro n̄kesibrede ama anam esịt ana mi sụn̄.”

Tịn̄ nte etiede fi ke idem nọ owo.

Daniel ọdọhọ ete: “N̄kesimaha nditịn̄ nte etiede mi ke idem nnọ owo. Edi mma nnyene nti ufan, ntre mma ntọn̄ọ ndisineme nneme ye mmọ kpukpru usen. Mma nsitịn̄ mîdịghe n̄wewet nte etiede mi ke idem nnọ mmọ. Oro ama enen̄ede an̄wam mi.” Sasha ọdọhọ ete: “Mbonubon nnyịn ẹma ẹnen̄ede ẹn̄wam mi. Eka mi ikọkpọn̄ke mi ikpat kiet. Enye ama esikpan̄ utọn̄ ini ekededi oro nyomde nditịn̄ ikọ nnọ enye. Ete mi ama anam mfiọk ke ẹsụk ẹmama mi, onyụn̄ an̄wam mi n̄keme ndiyọ se ikọwọrọde mi.”

Bọn̄ akam kpukpru ini.

Carmen ọdọhọ ete: “Mma nsibọn̄ akam kpukpru ini. Eketie nte Abasi etie ekpere mi akpan̄ utọn̄ okop kpukpru se ntịn̄de onyụn̄ an̄wam mi. Mma nnen̄ede n̄kpere Abasi ke ofụri ini afanikọn̄ oro.”