Jehovah Ada “Amen” Fo ke Ọsọn̄urua
JEHOVAH ada utuakibuot nnyịn ke ọsọn̄urua. Enye ke “akpan̄ utọn̄ okop” se ikọt esie ẹtịn̄de, onyụn̄ ada kpukpru se mmọ ẹnamde ẹda ẹtoro enye ke ọsọn̄urua, ọkpọkọm ekpri didie. (Mal. 3:16) Ke uwụtn̄kpọ, enyene ikọ kiet emi nnyịn mîkemeke ndibat adan̄a ediwak ini emi itịn̄de. Ikọ oro edi “amen.” Ndi Jehovah ada ekpri ikọ ntre ke ọsọn̄urua? Ih, ada! Se idin̄wamde nnyịn ikụt ntak emi enye adade ikọ oro ntre edi nnyịn ndidiọn̄ọ se ikọ oro ọwọrọde ye ini emi ẹkesitịn̄de enye ke Bible.
“KPUKPRU OWO ẸNYENE NDIBỌRỌ, ‘AMEN!’”
Amen ọwọrọ “yak edi ntre” m̀mê “ke akpanikọ.” Ẹda enye ẹto ikọ Hebrew emi ọwọrọde “nam akpanikọ,” “di se ẹkemede ndiberi edem.” Ke eyo Bible, ẹma ẹsitịn̄ ikọ emi ndusụk ini ke itie ikpe. Ke owo ama akada un̄wọn̄ọ ama, akana enye ọdọhọ “amen” ndisọn̄ọ ke se imọ iketịn̄de edi akpanikọ, ke imọ imenyịme utịp ekededi. (Num. 5:22) Owo ama ọdọhọ “amen” ntre ke eferife, akana enye anam uyo esie.—Neh. 5:13.
Akpan ini kiet emi ẹkedọhọde “amen” odu ke Deuteronomy ibuot 27. Ke nditọ Israel ẹma ẹkedụk Isọn̄ Un̄wọn̄ọ, akana mmọ ẹsop idem ke ufọt Obot Gerizim ye Obot Ebal yak ẹkot Ibet ẹnọ mmọ. Akana mmọ ẹkpan̄ utọn̄ ẹkop se ẹkotde ẹnyụn̄ ẹtịn̄ ikọ emi owụtde ke imenyịme se Ibet etịn̄de. Ini ẹkotde utịp nsọn̄ibuot, mmọ ẹma ẹbọrọ “Amen!” ndiwụt ke imenyịme ikọ Ibet oro. (Deut. 27:15-26) Kere ise nte eketiede ini ediwak tọsịn irenowo, iban, ye nditọwọn̄ ẹdiande uyo ẹfiori “Amen!” (Josh. 8:30-35) Imenịm ke mmọ ikefreke se mmọ ẹketịn̄de usen oro. Nditọ Israel ẹma ẹnam se mmọ ẹketịn̄de sia Bible ọdọhọ ete: “Israel onyụn̄ aka iso ndinam n̄kpọ Jehovah ke ofụri ini emi Joshua odude uwem ye ke ofụri ini uwem kpukpru mbiowo emi ẹkesụk ẹdude uwem ke Joshua ama akakpa, emi ẹkefiọkde kpukpru n̄kpọ emi Jehovah akanamde ọnọ Israel.”—Josh. 24:31.
Jesus ama esidọhọ “amen” ada ọsọn̄ọ ikọ, edi enyene nte enye ekesitịn̄de. Utu ke ndidi owo ama etịn̄ ikọ ama enye ọdọhọ “amen” (emi ẹkabarede “ke akpanikọ”), enye ekesitịn̄ eke esie ada owụt ke se imọ iyomde nditịn̄ edi akpanikọ. Ndusụk ini Jesus ekesidọhọ “amen” ikaba, oro edi, “amen amen” emi ọwọrọde “ke ata akpanikọ.” (Matt. 5:18; John 1:51) Enye akada emi anam mbon emi ẹkpan̄de utọn̄ ẹnọ enye ẹkụt ke se imọ itịn̄de edi ofụri akpanikọ. Se ikanamde Jesus esitịn̄ ikọ ntre odori nsọn̄uyo edi ke ebe ke enye, kpukpru se Abasi ọn̄wọn̄ọde osu.—2 Cor. 1:20; Edi. 3:14.
“KPUKPRU OWO ẸBỌRỌ ẸTE, ‘AMEN!’ ẸNYỤN̄ ẸTORO JEHOVAH”
Nditọ Israel ẹma ẹsidọhọ “amen” n̄ko ini mmọ ẹtorode Jehovah ẹnyụn̄ ẹbọn̄de akam ẹnọ enye. (Neh. 8:6; Ps. 41:13) Ke ini mme owo ẹkedọhọde “amen” ke utịt akam, oro okowụt ke mmọ ẹnyịme se ẹketịn̄de ke akam oro. Kpukpru owo nditiene nsịn uyo ama anam mmọ ẹkop inem ndituak ibuot nnọ Jehovah. Se iketịbede edi oro ini Edidem David ekemende Ekebe Jehovah edi Jerusalem. Nte mmọ ẹkesụk ẹdiade idara, ẹma ẹkwọ ikwọ ofụri esịt emi David ekewetde, emi ikụtde ke 1 Chronicle 16:8-36. Ikwọ oro ekedi akam. Akam oro ama otụk mme owo tutu “kpukpru owo ẹbọrọ ẹte, ‘Amen!’ ẹnyụn̄ ẹtoro Jehovah.” Mmọ ndidian uyo ntre mbọrọ “amen” okowụt ke enem mmọ ndidiana kiet ntuak ibuot nnọ Jehovah.
Mme Christian eyo mme apostle ẹma ẹsidọhọ “amen” ini mmọ ẹtorode Jehovah. Mme andiwet Bible ẹma ẹsiwet “amen” ẹsịn n̄ko ke leta mmọ. (Rome 1:25; 16:27; 1 Pet. 4:11) Ke n̄wed Ediyarade, ẹwụt nte mme edibotn̄kpọ eke spirit ke heaven ẹnọde Jehovah ubọn̄ ẹnyụn̄ ẹdọhọde ẹte: “Amen! Mbufo ẹtoro Jah!” (Edi. 19:1, 4) Mme Christian eyo mme apostle ẹma ẹsidọhọ “amen” n̄ko ke utịt akam ke mbono esop. (1 Cor. 14:16) Edi “amen” ikedịghe ikọ emi owo ekesinyụn̄ etịn̄de ntre ntre.
NTAK EMI “AMEN” FO EDIDE ỌSỌN̄URUA
Ke ima ikokụt ini emi ikọt Jehovah ẹkesidọhọde “amen,” imokụt se inamde ikọ oro edi ata akpan n̄kpọ ke utịt akam. Ima idọhọ “amen” ke utịt akam nnyịn, iwụt ke se iketịn̄de ke akam oro oto nnyịn esịt. Ima inyụn̄ idọhọ “amen” ke utịt akam emi ẹbọn̄de ke ibuot nnyịn, edide imetịn̄ uyo ọwọrọ m̀mê itịn̄ ke esịt, oro owụt ke imenyịme se ẹtịn̄de ke akam oro. Se mme ntak efen emi “amen” nnyịn edide ọsọn̄urua n̄kpọ.
“Amen” esinam inen̄ede ikpan̄ utọn̄ ini ẹbọn̄de akam. Idịghe se ẹtịn̄de ke akam kpọt ke isida ituak ibuot inọ Jehovah, nte inamde n̄kpọ ke ini ẹbọn̄de akam osụk esịne do. Sia iyomde “amen” nnyịn edi ke ofụri esịt, oro ekeme ndin̄wam nnyịn ikûda akam ke n̄kpọ mbubru inyụn̄ inen̄ede ikpan̄ utọn̄ ini ẹbọn̄de akam.
“Amen” esinam idiana kiet. Ke ini ẹbọn̄de akam ke ibuot ofụri esop, kpukpru owo ke esop ẹsidiana kiet ẹkop ukem n̄kpọ. (Utom 1:14; 12:5) Ima idian uyo ye nditọete eken isịn “amen,” oro esinam inen̄ede idiana kiet. Edide imọdọhọ “amen” uyo ọwọrọ m̀mê idọhọ ke esịt nnyịn, “amen” emi kpukpru nnyịn ibọrọde ekeme ndinam Jehovah anam n̄kpọ aban̄a se ẹkeben̄ede ke akam oro.
“Amen” nnyịn esitiene anam ẹtoro Jehovah
“Amen” esinam itoro Jehovah. Jehovah esikụt se inamde ida ituak ibuot inọ enye, sịm n̄kpri n̄kpri oro. (Luke 21:2, 3) Enye esikụt se isịnede nnyịn ke esịt onyụn̄ ọdiọn̄ọ se isinamde inam n̄kpọ. Idem ke ini ikpan̄de utọn̄ ikop mbono esop ke fon, Jehovah esikop “amen” emi isịnde ke akam emi ẹbọn̄de. Nnyịn ndibọrọ “amen” owụt ke imadiana ye nditọete eken itoro Jehovah.
“Amen” emi isịnde ke utịt akam ekeme nditie nnyịn nte inen̄ekede inyene se edide, edi se idude edi ke enye edi ata ọsọn̄urua n̄kpọ. N̄wed kiet emi etịn̄de n̄kpọ aban̄a Bible ọdọhọ ke ikọt Abasi ẹda “amen” ẹwụt ke imenịm inyụn̄ inen̄ede inyịme ikọ akam emi mmimọ m̀mê owo efen ọbọn̄de, ke akam ofụri esịt mmimọ edi oro. Akam nnyịn edi yak “amen” emi itịn̄de ini ekededi enem Jehovah esịt.—Ps. 19:14.