Mme Ntọn̄ọikọ Ẹkeme Ndinam Ukpụhọde
1 Nte afo emesida ndusụk ntọn̄ọikọ oro ẹnọde ekikere ẹban̄a ke ekpri n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible m̀mê mmọ oro ẹdude ke nsiondi Utom Obio Ubọn̄ Nnyịn eke ndondo emi, anam n̄kpọ? Ediwak mme asuanetop ke ebụk nte mmọ ẹnen̄erede ẹkụt unen ke utom eke ufọk ke ufọk mmọ ebe ke nditịn̄ ukem ikọ oro odude ke n̄wed nte ntọn̄ọikọ. Mbon eken ẹmekụt ẹte ke ebede ke mmimọ ndida esisịt ini kpọt ntịm idem nnọ an̄wautom, mmọ ẹma ẹkeme nditịm mme ntọn̄ọikọ ke ikọ idemmọ edi ọkọn̄ọde ke mme ikọ ẹdude ke n̄wed oro ẹnọde ekikere ẹban̄a.
2 N̄kpọ kiet edi akpanikọ, nte ke afo eyetịm enyene ifụre ye uko edieke afo enyenede ntọn̄ọikọ fo ke ekikere mfọn mfọn mbemiso akade ebịne owo ndinọ etop Obio Ubọn̄. Mme ikọ fo ẹyewụt udọn̄ esịt akpanikọ oro afo enyenede ndinọ eti mbụk. Afo nditịm idem nte ọfọnde anam enen̄ede okop inem ke utom ukwọrọikọ fo koro eyenyene nti utịp. Se inen̄erede idi akpan n̄kpọ ikan edi nte ke uwa utom edi mfọnn̄kan n̄kpọ oro ikemede ndinam.—Heb. 13:15; 1 Pet. 2:5.
3 Ntre da ini tịm idem. Kere ban̄a mme utọ owo oro afo edisobode ke efakutom n̄kann̄kụk mbufo. Nso idi mme mfịna mmọ ye udọn̄ mmọ? Nso mme n̄kpọntịbe ndondo emi ẹtụk uwem mmọ? Ke ama eketie ekere aban̄a mme ibọrọ mbụme emi, se mme ntọn̄ọikọ oro ẹnọde ekikere ẹban̄a ke page 2-7 ke ekpri n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible, mîdịghe mek ntọn̄ọikọ kiet m̀mê akande oro to Utom Obio Ubọn̄ Nnyịn. Nyene ifụre ndikpụhọde m̀mê ndinam mme ikọ do ẹkekem man ada enye anam n̄kpọ ifụre ifụre. Usio-ukot efen eyedi ndidọhọ mme asuanetop efen ẹkop mme ntọn̄ọikọ fo ke ini anamde owụt. Emi ekeme ndisịn udọn̄ nnọ mbon efen ndifori mme ntọn̄ọikọ mmọ n̄ko. Ke idaha ekededi, afo ke akpanikọ eyesịn udọn̄ ọnọ kiet eken onyụn̄ edemede kiet eken ọnọ nti utom.
4 Ẹyenọ fi utịp ke ini ye ukeme oro afo esịnde ke nditịm mme nneme an̄wautom fo. Ekeme ndidi afo ọyọbọ edidiọn̄ ke ndinen̄ede nnyene ebuana oro enyenede uforo ke aduai-owo-idem utom editan̄ mbok oro akade iso idahaemi.