Biọn̄ Utọn̄ ke Ikọ Prọfesi

¹ “Ẹma ẹdọdiọn̄ ẹsọn̄ọ ikọ mme prọfet ẹkan ẹnọ nnyịn.” (2 Pet. 1:19) Ntak emi Peter eketịn̄de ikọ emi-e? “Ẹma ẹdọdiọn̄ ẹsọn̄ọ” mme prọfesi ẹban̄ade Obio Ubọn̄ ke N̄wed Abasi Usem Hebrew ọkọrọ ye mbon oro Jesus Christ ke idemesie eketịn̄de, ebe ke se Peter ye mbet iba en̄wen ẹkekụtde ẹkenyụn̄ ẹkopde ke ini edikpụhọde mbiet ke n̄kpọ nte isua 32 ke edem. Utịbe utịbe n̄kukụt emi ama ọnọ mmọ nsọn̄ọ nte ke Jesus Christ ke akpanikọ eyekara ke Obio Ubọn̄ ye uyama ubọn̄ ye ọyọhọ ibetedem Ete esie. Mme Christian ke akpa isua ikie ẹma ‘ẹtịm ẹnam ke ndibiọn̄ utọn̄ ke ikọ mme prọfet oro, nte owo esese utuenikan̄ eke ayamade,’ koro ke ẹsiode oro ẹfep esịt mmọ ẹkpekabade ẹkịm. Ndibiọn̄ utọn̄ ke ikọ mme prọfet oro ayamade nte un̄wana eyenam mmọ ẹdu ke edidemede onyụn̄ anam mmọ ẹdu ke un̄wana tutu obufa usen oro esiere, emi “utịn,” kpa Christ, edisiahade ke uyama Obio Ubọn̄.​—2 Pet. 1:16-19; Matt. 17:1-9.

² Nnyịn ikodụhe do nditiene Peter n̄kụt ubọn̄ ubọn̄ edikpụhọde mbiet oro. Edi, mme Christian oro ẹdude ke emana emi oro ẹbiọn̄de utọn̄ ke ikọ prọfesi ẹnyene akamba ifet, idịghe eke edibem iso nda n̄kụt ukara Obio Ubọn̄ Christ, edi ndikụt akpakịp uyarade nte ke ubọn̄ ubọn̄ Edidem emi ke akara ataata edikara! Ke isua kiet kiet oro ebede ọtọn̄ọde ke 1914, ẹdọdiọn̄ ẹsọn̄ọ ikọ prọfesi nte nnyịn ikụtde edisu oro nsio nsio ikpehe n̄wọrọnda “idiọn̄ọ” oro Jesus ọkọnọde aban̄a ubọn̄ ubọn̄ ‘edidu’ esie ẹsude. Akpan ikpehe kiet ke idiọn̄ọ oro edi nte ke ẹyenọ ntọt ẹban̄a ukara, m̀mê Obio Ubọn̄, esie ke kpukpru idụt mbemiso Edidem adade utịt ọsọk editịm n̄kpọ emi. Ke idak ndausụn̄ Christ, ẹnam utom edikwọrọ Obio Ubọn̄ idahaemi ke idụt 232 ke udomo oro akanam owo mîkereke ke ẹyenam. (Matt. 24:3-14) N̄ko-n̄ko, nte ini “akwa ukụt” asan̄ade ekpere, Edidem oro ẹdoride ke ebekpo ke atan̄ “akwa otuowo” obok ẹmi n̄kọ ẹfiọkde ẹban̄a edidu esie.​—Edi. 7:9,10,14.

³ Sia “utịn” ama akasiaha, oro edi, Christ odu ke ukara Obio Ubọn̄, nte ntak osụk odu ndibiọn̄ utọn̄ ke ikọ prọfesi? Ih! Jesus Christ oro ẹnọde ubọn̄ ama ọnọ apostle John udịm udịm n̄kukụt ẹmi ẹnamde n̄wed Ediyarade. Ke adan̄aemi mmọemi ẹkedide n̄kpọ nsịnudọn̄ ẹnọ mme akpa Christian, mmọ ẹnyene san̄asan̄a ufọn ẹnọ mbon oro ẹdude uwem ke “usen Ọbọn̄,” emi nnyịn idude idahaemi. (Edi. 1:10) Ntak edi oro mme esop ikọt Jehovah idahaemi ẹkade iso ndikpep n̄wed Ata-Utịt Ediyarade.

⁴ “Ọfọfọn ọnọ andikot n̄wed, ye mmọemi ẹkopde ikọ prọfesi emi, ẹnyụn̄ ẹnịmde mme n̄kpọ eke ẹwetde ke esịt: koro ini ke ekpere.” (Edi. 1:3) Edieke anade nnyịn ikop inemesịt, ana nnyịn ifiọk se mme n̄kukụt prọfesi ẹwọrọde, ih, ana ẹnen̄ede ẹn̄wan̄a nnyịn. Nso ke emi oyom? Oyom edikot mfiak n̄kot man akpan n̄kpọ eke mbụk Ediyarade ẹsụhọde ẹdụk nnyịn esịt. Apostle Peter, andibuana ke otu ukara eke akpa isua ikie, ama ọfiọk ufọn editịn̄ mfiak ntịn̄ isọn̄ akpanikọ man ‘edemede’ nditọete esie ke n̄kan̄ eke spirit. (2 Pet. 1:12,13) Kpasụk ntre “asan̄autom emi anamde akpanikọ, onyụn̄ enyenede ọniọn̄” eke eyomfịn an̄wam nnyịn ndimụm esịtekọm oro nnyịn inyenede n̄kama ebe ke ndidụri ntịn̄enyịn nnyịn ndien ndien n̄wụt ikọ mme prọfet.​—Matt. 24:45-47.

⁵ Nte Ẹkpebiọn̄de Utọn̄: Nso orụk ntịn̄enyịn odot ẹnọ ikọ prọfesi oro odude ke Ediyarade? Apostle Paul eti nnyịn ete ke Abasi itịn̄ke ikọ inọ mme Christian ebe ke mme angel m̀mê mme prọfet nte enye ekesitịn̄de ye mme asan̄autom esie oro ẹkedude mbemiso eyo mme Christian. Utu ke oro, Jehovah etịn̄ ikọ ọnọ nnyịn ebe ke ata edima Eyen esie, emi enye ekemekde ete edi “andinyene kpukpru n̄kpọ.” (Heb. 1:1, 2) “Mmọdo ikpotịm ikpan̄ utọn̄ ikan inọ mme n̄kpọ ẹmi ikokopde, mbak nnyịn idifiọrọ ikpọn̄ mmọ.” (Heb. 2:1) Ih, ana nnyịn ibiọn̄ utọn̄ ke Ikọ Abasi inyụn̄ ibiọn̄ utọn̄ akpan akpan ke ikọ prọfesi oro otode Jesus Christ. Didie ke nnyịn ikeme ndinọ san̄asan̄a ntịn̄enyịn ke edikpep oro nnyịn ikpepde Ediyarade?

⁶ Akpa, edi ata akpan n̄kpọ ndidụk Ukpepn̄kpọ N̄wedesop ke urua kiet kiet. Emi edi ntre koro ye nnyịn, emi edi akpa ini oro nnyịn ikpepde n̄wed Ata-Utịt Ediyarade. Emi edi ata akpan ntak ikpenyenede ndidụk Ukpepn̄kpọ N̄wedesop ke ofụri ini oro ẹkpepde n̄wed Ata-Utịt Ediyarade. Oyom kpukpru nnyịn idu ke edidemede iban̄a mme n̄kpọntịbe eke eyomfịn ẹmi ẹdade itie usọp usọp ke edisu mme prọfesi eke Ediyarade. Do nnyịn imekeme nditịm idem ndinam n̄kpọ ke n̄kemuyo ye uduak Jehovah. Edieke ekemede, nam edi utịtmbuba fo nditre nditaba ukpepn̄kpọ n̄wedesop ekededi ke akpan ini edidụn̄ọde Ediyarade emi.

⁷ Udiana, tịm ukpepn̄kpọ fo mfọn mfọn. Kot mme itien̄wed oro ẹsiakde ẹsịn nyụn̄ kere nte mmọ ẹsọn̄ọde edinam oro ẹnamde mme ufan̄ikọ Ediyarade oro ẹkpepde ẹn̄wan̄a. Ke usụn̄ emi afo eyenyene se ikande sụk mme ibọrọ mbụme. Kûdomo ndinyene ifiọk ikpọn̄ edi domo ndinyene eti ibuot ye ọniọn̄. (N̄ke 4:7) Ọyọhọ ita, buana ifịk ifịk ebe ke ndibọrọ mme mbụme nnyụn̄ n̄kot mme itien̄wed. Nam edi utịtmbuba fo ndinọ ibọrọ ke nsụhọde n̄kaha ini kiet ndien ke ekemede ediwak ini ke ukpepn̄kpọ kiet kiet. Ndinam ntre eyen̄wam fi ndiwụk ekikere fo ke ukpepn̄kpọ oro.

⁸ Nditịm n̄kpan̄ utọn̄ ke ikọ prọfesi esịne se ikande editịm idem, edidụk, ye edibuana. Enye ọwọrọ n̄ko ete idem ke ukpepn̄kpọ ama akasuana, nnyịn ikaiso ‘ndikere mban̄a mme n̄kpọ ẹmi, man mmọ ẹsụhọde ẹdụk nnyịn idem.’ (1 Tim. 4:15, NW) Edieke anade ikọ prọfesi emi ayama nte utuenikan̄ ke esịt nnyịn, ana nnyịn iyak enye otụk owo emi nnyịn idide ke esịt ntotụn̄ọ ntotụn̄ọ​—mme ekikere, mme udọn̄, mme ntụk, mme uduak, ye mme utịtmbuba nnyịn. (2 Pet. 1:19) Ntem, nnyịn ikpenyene ndisibụp idem nnyịn mme utọ mbụme nte: Nso ke ntọt emi ọwọrọ ọnọ mi san̄asan̄a? Nso ke ami n̄kpep mban̄a Jehovah ye Eyen esie, Jesus Christ? Nso edumbet esịne ke ukpepn̄kpọ emi? Nte ami mmọfiọk se ukpepn̄kpọ emi ọwọrọde ke esịt mi? Didie ke ami n̄keme ndida akpanikọ emi nsịn ke edinam ke uwem mi? Ke ubon mi? Ke esop? Ebede ke ndida se nnyịn ikpepde nsịn ke edinam, nnyịn imekeme nditịn̄ nte andiwet psalm eketịn̄de ete: “Ikọ fo edi utuenikan̄ ukot mi, ye un̄wana usụn̄ mi.”​—Ps. 119:105; Job 29:3, 4.

⁹ Du ke Edidemede ke Ndiọk Eyo: Ke isua 33 E.N., Jesus ama ọtọt mme mbet esie aban̄a nsobo Jerusalem oro ekedide ye idaha oro edinọde mmọ idiọn̄ọ ndifehe n̄ka ebiet ubọhọ. (Luke 19:41-44; 21:7-21) Ekem, se ibede isua 30 ẹma ẹbe. Ekeme ndidi ama etie ndusụk mme Christian ẹkedide mbon Judea ke idem nte ke ekpri ukpụhọde edidu ke n̄kpet n̄kpet ini iso. Item emi edima apostle Peter ekewetde ke udiana n̄wed esie, ke n̄kpọ nte 64 E.N., ete ‘ẹbiọn̄ utọn̄ ke ikọ prọfet oro’ ekedi ekemini didie ntem! (2 Pet. 1:19) Ekpri ini ke oro ebede, ke 66 E.N., udịmekọn̄ Rome ẹma ẹkan Jerusalem ẹkụk. Ke ini udịmekọn̄ Rome ẹmi ke unana idotenyịn ẹkefiakde ẹnyọn̄ọ usọp usọp ye unana akpan ntak, mme Christian ẹkedide mbon Judea oro ẹkedude ke edidemede ẹma ẹnam item Jesus ẹnyụn̄ ẹfen̄e. Ekem, ke 70 E.N., udịmekọn̄ Rome ẹma ẹfiak ẹdi ẹnyụn̄ ẹdisobo Jerusalem ofụri ofụri. Anaedi mme Christian oro ẹkekop idatesịt didie ntem nte ke mmimọ ima inen̄ede ibiọn̄ utọn̄ ke ikọ prọfesi Jesus!

¹⁰ Nso ke nnyịn mme Christian eyomfịn idu ke ukpeme iban̄a? Ke mme n̄kukụt eke Ediyarade, Jesus ama ọtọt mme Christian oro ẹdude uwem idahaemi, ke usen Ọbọn̄, aban̄a ediwak n̄kpọntịbe oro ẹkenyenede ndida itie ke mîbịghike. Ke isua 80 ẹmi ẹbede, ediwak ke otu mme n̄kpọntịbe ẹmi ẹdada itie: emana Obio Ubọn̄; ekọn̄ ke heaven ye edikan oro ẹkekande Satan ye mme demon esie oro eketienede, adianade ye edikụk mmọ nsịn ke n̄kann̄kụk isọn̄; iduọ Akwa Babylon; ye edidaha nda oro ididuot unam adahade ada, kpa ọyọhọ odudu ukara ererimbot itiaita. Edisu oro mme ikpehe prọfesi eke Ediyarade ẹmi ẹsude ọnọ ọyọhọ nsọn̄ọ nte ke mîbịghike nnyịn iyekụt mme utịbe utịbe n̄kpọntịbe ẹmi ẹsụhọde: edifịk akpatre ke otu mme andibuana ke 144,000 idiọn̄ọ, ndikụre nditan̄ akwa otuowo mbok, edisobo Akwa Babylon, ekọn̄ Armageddon, edikọbi Satan ke ukpe, ye Tọsịn Isua Ukara Christ. Edi akpan n̄kpọ didie ntem nnyịn ndibiọn̄ utọn̄ ke ntọt Jesus emi: “Sese, ndidi nte inọ; ọfọfọn ọnọ owo eke esịnede edisịnen̄kpọ esie etie ekpeme; mbak enye edisan̄a iferi, owo edinyụn̄ okụt mbubiam esie.”​—Edi. 16:15.

¹¹ Nte nnyịn ke idu ke edidemede? Nnyịn ida ikọ prọfesi emi ke akpan n̄kpọ adan̄a didie? Edide ikayak uwem nnyịn inọ Jehovah ke isua 5 ẹmi ẹkebede m̀mê ke isua 50 ẹmi ẹkebede, mme ikọ oro Paul eketịn̄de ọnọ mme Christian ke Rome ẹnen̄ede ẹnyene n̄kpọ ndinam ye nnyịn: “Sia mbufo ẹfiọkde edikem ini, ete ini ekekem nte mmimọ ikpedemede ke idap: koro edinyana ekpere nnyịn kemi, akan nte ekekperede ke ini nnyịn inịmde ke akpanikọ. Okoneyo ọnyọn̄ ebe efep, uwemeyo ke ekpere.” Ekem Paul ama eteme mme Christian ete ‘ẹfọrọde ndien utom ekịm’ ẹnyụn̄ ‘ẹsan̄a ukpono ukpono.’ (Rome 13:11-13) Nnyịn idu ke ererimbot oro odude ke mak mak ekịm ke n̄kan̄ ido uwem. Se ikedide ido emi odorode owo ndidien ke n̄kpọ nte isua 30 m̀mê 40 ẹmi ẹkebede eyedi ido uwem oro odotde ọnọ ediwak mbon ererimbot ke akpatre ikpehe eke ọyọhọ isua ikie 20 emi. Nditọete, ẹkpeme idem, man mbufo ẹdidede ẹfiọnọde ẹdụk ekịm ererimbot ẹnyụn̄ ẹkabade ẹnana ntịn̄enyịn ke n̄kan̄ ido uwem. Edieke mbufo ẹyakde idem mbufo ẹsịn ke usụn̄uwem nnam-se-mmade m̀mê ẹnyịmede mbiara ekikere ye usụn̄uwem ererimbot emi, mbufo idikemeke ndinọ ntịn̄enyịn ke ikpọ n̄kpọ-ata oro ẹsakde iso ẹse nnyịn mfịn ẹmi edide ibịghike ẹmọn̄ ẹbiere ke nsinsi: ediwụt unen itie edikara Jehovah ye edinam enyịn̄ esie asana. Ediyet idap ke n̄kan̄ eke spirit eyesịn edinyana owo, emi otịmde ekpere idahaemi, ke itiendịk.

¹² Kọri Esịtekọm ke Esịt Ban̄a Ikọ Prọfesi: Mme prọfet Hebrew eset ẹma ẹnen̄ede ẹnyene udọn̄ ke edisu eke mme ikọ odudu spirit oro mmọ ẹketịn̄de ẹbana Messiah. Mmọ ẹma “ẹtịm ẹyom ẹnyụn̄ ẹdụn̄ọde” edisu uduak Abasi. (1 Pet. 1:10,11) Kpasụk ntre, nte afo ọbiọn̄de utọn̄ ọnọ ikọ prọfesi ke n̄wed Ediyarade, esịtekọm oro afo enyenede ọnọ mme n̄kpọ eke spirit eyekọri. Udọn̄ n̄kpọ eke spirit fo eyekọri, ndien afo eyenyene ọkpọsọn̄ udọn̄ ndidụn̄ọde “nditụn̄ọ n̄kpọ Abasi.” (1 Cor. 2:10) Nte afo anamde esịt fo ọyọhọ ye esịtekọm ye ima ọnọ ikọ prọfesi, ufọn ididụhe owo ndikpakpak fi odụk mme mbonoesop; eyedemede fi ke esịt ndidụk nnyụn̄ mbuana ofụri ini. (Luke 6:45) Ndien edieke ‘ikọ ekperede ke esịt fo,’ eyenụk fi ‘ndida inua nnyịme man enyene edinyana.’​—Rome 10:8-10.

¹³ Adan̄a nte nnyịn isan̄ade ikpere utịt ini, ntre ke mbon nsahi ẹditetịm ẹsak nnyịn nsahi ẹban̄a ọkpọsọn̄ mbuọtidem nnyịn ke nditịn̄ mban̄a ikọ prọfesi Abasi. (2 Pet. 3:3, 4) Edi, nnyịn iyedu ke edidemede iban̄a ikọ prọfesi. Utuenikan̄ Ikọ Abasi owụt nnyịn itie emi nnyịn idude. Enye enen̄ede esịn un̄wana ke akpanikọ oro nte ke nnyịn idu ke ukperedem ini eke ekịm ererimbot emi. Utịn amasiaha! Christ odu ke ukara Obio Ubọn̄! Nte idade ise nnyịn imadada ikụt usiere obufa usen. Akpakam obufa ererimbot oro Abasi ọn̄wọn̄ọde akaiso ndidi ata idem n̄kpọ ọnọ nnyịn nte Obio Ubọn̄ ekedide ọnọ apostle ita oro ẹkenyenede ifet ndibemiso nda n̄kụt enye ke utịbe utịbe n̄kukụt eke edikpụhọde mbiet Jesus!