Tịm Kpeme Se Afo Ekpepde Owo
1 Obufa ndutịm Ufọkn̄wed Utom Ukara Abasi editọn̄ọ ke March 1995. Afo eyekụt ke ndutịm ufọkn̄wed eke 1995 ete ke ẹsio mme ikọ item nnyịn ẹto n̄wed ita: Akpa edi n̄wed Ndimek Mfọn N̄kan Usụn̄uwem, se itienede edi mme ibuotikọ ẹsatde-sat ẹto n̄kani magazine Enyọn̄-Ukpeme, ekem Ñwed-item Ufök-ñwed Utom Ukara-Abasi. Se ifiakde itiene edi mme ibuotikọ ẹmi ẹsatde-sat ẹto n̄kani nsiondi Enyọn̄-Ukpeme ndien ẹberi ndutịm ufọkn̄wed ye utịn̄ikọ item ẹsiode ẹto Ñwed-item Ufök-ñwed Utom Ukara-Abasi. Nso ke nnyịn ikeme ndinam man iwụt ukpeme ke se nnyịn ikpepde owo inyụn̄ inyene n̄kponn̄kan ufọn?—1 Tim. 4:16.
2 Edi akpan n̄kpọ eyen ufọkn̄wed kiet kiet ke Ufọkn̄wed Utom Ukara Abasi ndinyene kpukpru n̄wed oro ẹkamade ke ufọkn̄wed ke ini ufọkn̄wed akade iso. Ntak mûsioho ini unịm ndikot se ẹnọde ẹnam ke ufọkn̄wed ke urua ke urua?
3 Mme Ufiop Ufiop Ikọ Item Oro Ẹdemede Udọn̄: Nte afo emenyene n̄wed oro Ndimek Mfọn N̄kan̄ Usụn̄ uwem? Nte owo kiet kiet ke ubon emi ekemede ndikot n̄wed enyene eke esie? Nte afo emenyene n̄kani nsiondi Enyọn̄-Ukpeme oro ẹsatde-sat ke itie unịmn̄wed fo? Nso kaban̄a Ñwed-item Ufök-ñwed Utom Ukara-Abasi? Nte ẹwụtde ke enyọn̄ emi, ẹsio mme utịn̄ikọ item isua emi ẹto n̄wed ita ẹmi. Mme esenyịn ufọkn̄wed ye mbon oro ẹnọde utịn̄ikọ item ẹyeda ufọn ẹsọk kpukpru owo ebe ke nditịm idem mfọn mfọn nnyụn̄ nnọ utịn̄ikọ oro ẹfọnde. Kpukpru owo ke otuowo ẹyebọ ekese ufọn edieke owo kiet kiet adade ini ndikot se ẹnọde ẹnam ke urua kiet kiet onyụn̄ otịmde idem ọnọ ebuana otuowo.
4 Edikot Bible Oro Anamde Owo Ekere N̄kpọ: Edikot n̄wed ọdọnọ, ye edidori nnennen nsọn̄uyo nnyụn̄ nsịn ufiop, edi akpan ikpehe eti ukpepn̄kpọ. Ke adianade do, se ẹnọde ẹkot ke Utịn̄ikọ Nọ. 2 iniọn̄ke, ndien ini ekemde eyewak ndidu nnọ ntọn̄ọikọ ye utịtikọ etịn̄ikọ. Ntọn̄ọikọ ekpenyene ndidemede udọn̄ nnọ se ẹkenọde ẹkot onyụn̄ otịm otuowo idem ndikụt ufọn esie. Utịtikọ ekeme ndisịne mme utịn̄ikọ edinam an̄wan̄a ye nte enye enyenede ebuana, ye etịn̄ikọ adade ini oro ẹnọde anam n̄kpọ ọyọhọ ọyọhọ.
5 Ẹkeme ndikụt mme ntọt efen efen kaban̄a ndutịm ufọkn̄wed ye nte ẹkemede ndinam se ẹnọde ke “Ndutịm Ufọkn̄wed Utom Ukara Abasi eke 1995.” Nnyịn ikpeme se nnyịn ikpepde owo ebe ke ndidụn̄ọde ntọt ẹmi ẹdude ke n̄wed emi, ke nditịm se ẹnọde nnyịn inam mfọn mfọn, ye ke ndida item oro ẹnọde nnyịn nsịn ke edinam, man inam n̄kọri ke usọ utịn̄ikọ ye edinọ ukpep. Ẹnọ mbon oro mîsịnke enyịn̄ kan̄a ke ufọkn̄wed emi ufiop ufiop ikot ndinam ntre.