Ikpehe 1—Wụt Edikere Mbana nọ Mbon En̄wen
1 Nnyịn imesidat esịt ndikụt uforo ikọt Jehovah, emi osụn̄ọde ke ibat esop oro ọkọride-kọri. Ke ndusụk ebiet, akpan akpan ke ata ikpọ obio, ẹsinen̄ede ẹda Ufọkmbono Obio Ubọn̄ ẹnam n̄kpọ, ndusụk ini oyomde ediwak esop ẹda ukem Ufọkmbono Obio Ubọn̄ ẹnam n̄kpọ. Idaha emi oyom edikere mban̄a efen efen oto kpukpru mbon oro ẹbuanade.
2 Esop kiet kiet oro adade Ufọkmbono Obio Ubọn̄ anam n̄kpọ ekpenyene ndinam enye asana onyụn̄ odu ke eti idaha ọnọ nditọete efen oro ẹdidụkde. Ẹkpenyene ndibon n̄kpọitie ke nde ke nde, ẹkpenyene nditan̄ n̄wed ekededi mfep ke okpokoro ubon n̄wed, ẹkpenyụn̄ ẹnyene nditan̄ ọkpọkpọ n̄kpọ ekededi oro ẹkebonde ke Ufọkmbono Obio Ubọn̄ mfep. Ẹkpenyene ndinam itie ukaikọt asana, ẹkụtde ẹte ke ẹnịm suọp, ọfọn̄ ukwọhọde ubọk, ẹnyụn̄ ẹbon babru ukaikọt efen ẹnyụn̄ ẹda mbio ke akpasa mbio ẹkeduọk.
3 Ke ini ẹdiomide mbonoesop ama akasuana ikpenyeneke ndimen̄e nte mîdotke, ẹtịmerede mme ndutịm kaban̄a mbonoesop efen. Anyan ufan ufan nneme ekeme ndisụn̄ọ ke mme owo ndiyọhọ ke barakọn̄ nnyụn̄ mbiat nditọete ini nditịm n̄kpọ kaban̄a mbonoesop efen. Ekeme ndidi itie ndinịm n̄kpọisan̄ ke Ufọkmbono Obio Ubọn̄ ikponke, ndien edidi ediwụt mfọnido ndisọsọp n̄wọrọ man mbon oro ẹdụkde ẹdi ẹnyene itie ndinịm n̄kpọisan̄. Ke n̄kan̄ eken, mbon oro ẹdidụkde mbonoesop efen ikpenyeneke ndibak n̄kaha, anamde mme owo ẹwak ẹkaha ke barakọn̄ ye itie unịm n̄kpọisan̄.
4 Ke ebiet emi ediwak esop ẹbuanade, oyom san̄asan̄a n̄kpet n̄kpet edidianakiet ke ndinam ndutịm nnọ edinam Ufọkmbono Obio Ubọn̄ asana ke urua ke urua. Nte ido edide, mme esop esinam emi ke adiana ke adiana ke ini oro ẹnịmde. Ke ini esop mbufo enyenede mbiomo emi, ẹkụt ẹte ke ẹnam ẹnye asana ketket ye ke ini. Mme esop eken oro ẹdade ufọkmbono emi ẹnam n̄kpọ ke ntre idinyeneke ntak ndiseme.
5 Ke ini ke ini esiyom esop kiet kiet okpụhọde ini mbonoesop esie, utọ nte ke ini esenyịn circuit edide. Edieke emi otụkde esop efen, mbiowo ekpenyene nditọt esop enye eken ke anyanini man mmọ ẹbak ẹtọt mme asuanetop mmọ nte ẹkekeme. N̄ko, edieke ẹdiomide ndusụk edinam oro ẹnọde unyịme, utọ nte Ufọkn̄wed Utom Usiakusụn̄, mbono mbiowo circuit, m̀mê ndọ, ekpenyene ndi-bem iso nsobo ye mme esop ye mme esenyịn circuit ekededi oro emi otụkde ke anyanini; mmọ ke ntem ididiomike ndida Ufọkmbono Obio Ubọn̄ oro nnam n̄kpọ ke ukem ini oro.
6 Ata ediwak ufọkmbono ẹdu ẹmi mme esop oro ẹbuanade ke nsio nsio circuit ẹdade ẹnam n̄kpọ. Edi akpan n̄kpọ mme esenyịn oro ẹsan̄ade-san̄a oro ẹdikade mme ufọkmbono ẹmi ndinam kiet eken ọfiọk ini emi mmọ ẹdiomide edika n̄kese. Edinam ukpụhọde ke idiọk ini m̀mê mme mfịna eken ẹkeme ndisụn̄ọ ke ini esenyịn iba ẹmi ẹsan̄ade-san̄a ẹdiomide edika n̄kese ke ukem urua.
7 Ima Ima edikere mban̄a mmọ efen, eti nneme, edibabak nnam ndutịm, ye edidianakiet ẹyen̄wam ndimụm ufiop ufiop itie ebuana n̄ka-ma ke ufọt mme esop ndien eyen̄wam “ẹnam kpukpru n̄kpọ ke nde ye ke ido nte eyede.”—1 Cor. 14:40.