Ndimen N̄wed Ndidu Uwem ke Nsinsi N̄wụt Uforo Uforo
1 Jesus ama enyene usọ ke edida oro enye ekesidade mme ntọn̄ọikọ. Enye ama esifiọk se etịn̄de man edemede udọn̄. Ini kiet enye ama ọtọn̄ọ nneme ye n̄wan Samaria n̄kukụre ke ndiben̄e enye edin̄wọn̄ mmọn̄. Emi ama ọsọsọp omụm udọn̄ esie koro ‘mme Jew mîkasan̄ake n̄kpọ ye mbon Samaria.’ Ke akpatre nneme oro ama osụn̄ọ ke ndin̄wam enye ye ediwak mbon en̄wen ndikabade ndi mme andinịm ke akpan-ikọ. (John 4:7-9,41) Nnyịn imekeme ndikpep n̄kpọ nto uwụtn̄kpọ esie.
2 Ke ini otịmde idem ndinọ n̄wed Ndidu Uwem ke Nsinsi, bụp idemfo, ‘Nso idi mme n̄kpọ oro ẹbehede mme owo ẹkan ke efakutom nnyịn? Nso idimụm udọn̄ uyen, akwa owo, ebe, m̀mê n̄wan?’ Afo emekeme nditịm awak akan ntọn̄ọikọ kiet onyụn̄ odiomi ndida enyeoro otịmde odot ye idaha.
3 Sia n̄wụre ke uwem ubon ebehede ediwak owo, afo emekeme ndidọhọ:
◼ “Mme mfịghe uwem eke usen ke usen ẹsịn ekese nsịn̄ede ke mme ubon mfịn. M̀mọ̀n̄ ke mmọ ẹkeme ndikụt n̄wam? [Bet ibọrọ.] Bible ekeme ndinen̄ede ndi n̄kpọ un̄wam nnọ nnyịn. [Kot 2 Timothy 3:16, 17.] N̄wed Abasi ọnọ ndausụn̄ oro ẹnyenede ufọn ẹmi ẹkemede ndin̄wam mme ubon ndibọhọ. Tịmfiọk se ẹdọhọde ke ikpehe ekikere 3 ke page 238 ke n̄wed emi, Afo Emekeme Ndidu Uwem ke Nsinsi ke Paradise ke Isọn̄.” Kot ikpehe ekikere 3, nyụn̄ nọ n̄wed.
4 Edieke afo adade n̄kpọ oto mbụk n̄kpọntịbe n̄kann̄kụk, afo emekeme ndidọhọ:
◼ “Nte ama okop mbụk n̄kpọntịbe aban̄ade [siak n̄kpọ oro ebehede n̄kann̄kụk]? Nso ke afo ekekere aban̄a oro? [Bet ibọrọ.] Enye anam fi ekere m̀mê ererimbot emi oyom nditie didie, nte inamke? Bible ama ebemiso etịn̄ aban̄a mme utọ n̄kpọ oro nte uyarade ndiwụt ke nnyịn idu ke ukperedem ini.” Ekem neme ntọt odude ke n̄wed Ndidu Uwem ke Nsinsi, page 150-153, nyụn̄ nọ n̄wed.
5 Ediwak owo ẹkop editịmede esịt ẹban̄a mfịna ubiatibet oro akade-kaiso ndikọri. Afo emekeme ndida akpa ntọn̄ọikọ ke idak ibuotikọ oro “Crime/Safety” ke page 10 eke n̄wed “Reasoning”:
◼ “Nnyịn inyene nneme ye mme owo iban̄a ọkpọkpọ ifụre. Ekese ubiatibet ẹdu ẹkan nnyịn ẹkụk, ndien enye otụk uwem nnyịn. Afo ekere ke oyom nso man mme owo nte ami ye afo inyene ifụre ke efak ke okoneyo?” Afo emekeme ndikot Psalm 37:10, 11 onyụn̄ osio mme edidiọn̄ oro Obio Ubọn̄ Abasi edidade idi owụt, adade page 156-158 ke n̄wed Ndidu Uwem ke Nsinsi. Ekem nọ n̄wed.
6 Edieke afo amade nneme oro ememde akan, afo emekeme ndida ntọn̄ọikọ oro ebietde enyeoro odude ke enyọn̄ enyọn̄ page 12 ke n̄wed “Reasoning”:
◼ “Nnyịn isịn udọn̄ inọ mme mbọhọidụn̄ nnyịn ndikere mban̄a akwa ini iso oro Bible owụtde nnyịn. [Kot Ediyarade 21:3,4.] Nte enem fi ndikop mban̄a emi? [Bet ibọrọ.) Ibuot 19 ke n̄wed emi owụt mme edidiọn̄ efen oro okopitem ubonowo edidarade ke idak Obio Ubọn̄ Abasi.” Nọ n̄wed Ndidu Uwem ke Nsinsi nyụn̄ diomi mfiakn̄ka.
7 Nditịm mme ntọn̄ọikọ oro ẹnyenede uforo ẹkeme ndin̄wam fi ndisịm mbon oro ẹkopde nsatitọn̄ ẹban̄a edinen ido.—Matt. 5:6.