Ikpehe 2—Wụt Edikere Mban̄a nọ Mbon En̄wen
1 Adan̄a nte edide se ikemede, nnyịn iyom ndimụm eti itie ebuana n̄kama ye mbon oro ẹdụn̄de ke n̄kann̄kụk nnyịn. Emi oyom ete nnyịn iwụt edikere mban̄a ye ukpono inọ unen ye mme ntụk mmọ.
2 Ẹdiọn̄ọ Mme Ntiense Jehovah ke ntak nti ido. Nti idaha nnyịn ke eduuwem ye usịnen̄kpọ oro ẹmade ke mbọhọidụn̄, ke ufọkn̄wed, ye ke itieutom, ọkọrọ ye ke mme mbono nnyịn, ẹdi ibuot nneme oro ẹsitịn̄de ediwak nti ikọ ẹban̄a.—Se Enyọn̄-Ukpeme eke June 15, 1989, page 20.
3 Nte ededi, eti ido esịne edinam akpanikọ, nsịnifịk, ye nti ido uwem. Enye n̄ko esịne ediwụt ukpono nnọ mbon oro ẹdụn̄de ẹkpere Ufọkmbono Obio Ubọn̄ nnyịn. Ẹkeme ndifụmi edu uten̄e Abasi nnyịn ke mme ikpehe eken edieke nnyịn ikpude ndiwụt edikere mban̄a nnọ mme mbọhọidụn̄ nnyịn. Paul ama akpak nnyịn ete ‘idu uwem nte odotde ye gospel.’—Phil. 1:27.
4 Nditọete iren ye iban ẹkpenyene ndifep ndiboho ke usụn̄ isan̄ odude akanade Ufọkmbono Obio Ubọn̄. Etre ndineme nneme ke ọkpọsọn̄ uyo nte mîdotke oro ẹkemede ndida ke mme ufọk oro ẹdude ẹkpere n̄kop. Owo ikpenyeneke ndiyak nditọwọn̄ ẹdi ẹfefehe ẹdụk ẹfefehe ẹwọrọ ke Ufọkmbono Obio Ubọn̄. Editọ usụn̄ moto ye unana edikere mban̄a m̀mê edifri mme ifiom ekeme nditịmede mbọhọidụn̄. Utọ edu emi idaha eti etop isọk esop. Nko, edi akpan n̄kpọ nnyịn ndinịm kpukpru mbet uwat ke ini iwatde uwat ke n̄kann̄kụk oro.—Rome 13:1, 2, 5.
5 Owo ikpenyeneke ndibon mme moto ke ebiet owo m̀mê ke ebiet oro mmọ ẹbiọn̄ọde mme moto eken m̀mê ẹsịride usụn̄. Ke ebiet emi esop ita m̀mê inan̄ ẹdade ukem Ufọkmbono Obio Ubọn̄ ẹnam n̄kpọ, ekpere ndidi ẹdiomi mme mbonoesop ẹnọ kpukpru usen ke urua, ndien emi oyom ọyọhọ edidianakiet ke ufọt mme otu mbiowo.—Se Enyọn̄-Ukpeme, October 1, 1988, page 17, ikpehe ekikere 13.
6 Bible akpak nnyịn ‘ndinam kpukpru n̄kpọ nnọ Abasi ubọn̄,’ ndien oro esịne ediwụt edikere mban̄a nnọ mbonan̄wa. (1 Cor. 10:31-33) Edieke nnyịn ‘isede n̄kpọ owo en̄wen,’ nnyịn idinọhọke ke inyene mmọ ye unana edikere mban̄a. (Phil. 2:4) Nnyịn n̄ko iyefep edibiọn̄ọ mme mbubehe oro mme anyamurua n̄kann̄kụk ẹnamde.
7 Ndiwụt edikere mban̄a nnọ mbon en̄wen—ke esịt esop ye ke an̄wa—edi ediwụt an̄wan̄wa se nnyịn ikerede ke esịt nnyịn. Se nnyịn inamde inyụn̄ itịn̄de ekpenyene ndiwụt ke nnyịn ‘imama mme mbọhọidụn̄ nnyịn nte idem nnyịn.’—Matt. 7:12; 22:39.