Ekebe Mbụme
◼ Anie ke ẹkeme ndida man okot mme ikpehe ekikere ke Ukpepn̄kpọ N̄wedesop ye Ukpepn̄kpọ Enyọn̄-Ukpeme?
Utom Obio-Uböñ Nyin eke August 1977 ye November 1980 ẹma ẹtịn̄ ẹban̄a mbon ẹmi ẹdotde nte mme okot n̄wed, Nditọete iren oro ẹma ẹkena baptism ke ẹda ke ẹdude. Ẹkpenyene ndimek mmọ nsio ke otu mbiowo, mme asan̄autom unamutom, ye nditọete eken oro ẹma ẹkena baptism oro ẹnyenede ukeme ke esop. Oyom mbon oro ẹnọde ẹkeme ndikot n̄wed udọn udọn, ye edisọn̄ọ ntịn̄ ikike ikọ ye edimenede ye edisụhọde uyo nte odotde. Mmọ ẹkpenyene ndinyene ifiopesịt nnyụn̄ nnyene mme edu utịn̄ikọ oro ẹyomde nte ẹsiode ẹwụt ke Ñwed-item Ufök-ñwed Utom Ukara-Abasi, ibuot 6. (Men Nehemiah 8:8 domo.) Mmọ n̄ko ẹkpenyene ndinịm uwụtn̄kpọ ke eduuwem mmọ.
Sia ukpepn̄kpọ n̄wedesop ekpride akan mme mbonoesop eken, ekeme ndidi eyenete eren oro odotde onyụn̄ anade baptism ididụhe kpukpru ini ndikot n̄wed. Ke mme utọ idaha oro, ada ukpepn̄kpọ ekeme ndibiere ndikot mme ikpehe ekikere ke idemesie, mîdịghe enye ekeme ndidọhọ eyenete an̄wan oro odotde onyụn̄ anade baptism oro esikotde n̄wed ọfọn an̄wam. Edieke eyenete n̄wan okotde, idịghe se ẹyomde enye ayara ọfọn̄ibuot, sia enye mînamke n̄kpọ ke itie unọ ukpep. Nte ededi, enye ekeme ndinam ntre edieke enemde enye ke idem akan.
Ke Ukpepn̄kpọ Enyọn̄-Ukpeme, anaedi nditọete iren oro ẹdotde ẹyedu ndikot. Ada Ukpepn̄kpọ Enyọn̄-Ukpeme ekpenyene ndinam ndutịm nnọ mme andikot ke anyanini nnyụn̄ ndian emi ke obukpọk ntọt. Edi mbiomo ofụri otu mbiowo ndisat mbon oro ẹdidọhọde ẹkot n̄wed ke Ukpepn̄kpọ Enyọn̄-Ukpeme. Edieke eyenete mîkotke n̄wed ọfọn, ada Ukpepn̄kpọ Enyọn̄-Ukpeme ekpenyene ndinam n̄kpọ ndinọ ima ima item ye un̄wam. Ẹkeme ndifiak ndụn̄ọde n̄wed enyịn̄ mme andikot ediwak ini nte ẹyomde man ẹkụt ẹte ke ẹkaiso ẹnyene n̄kokon̄ idaha ukot n̄wed. Edieke ẹsiode eyenete enyịn̄ ẹfep ke n̄wed, ẹkpenyene nditịn̄ ntak nnọ enye ye mme edu oro oyomde enye anam utom ke esịt man afiak odot.
Edide edikot n̄wed nnọ ekpri otu ke Ukpepn̄kpọ N̄wedesop m̀mê edide edikot nnọ ofụri esop ke Ukpepn̄kpọ Enyọn̄-Ukpeme, owo oro ẹnọde ekpenyene ndida ifetutom esie ke akpan n̄kpọ. (1 Tim. 4:13) Enye ekpenyene nditịn̄ ikọ ye nsọn̄uyo, okotde n̄wed ke usọ usọ usụn̄ oro edinamde ẹfiọk “mme nnennen ikọ akpanikọ” nte ọfọnde.—Eccl. 12:10, NW.