Ndimụm Edidianakiet Obio Ubọn̄ Nnyịn N̄kama
1 Obio Ubọn̄ Abasi edi ata ukara, enyenede ukeme ye odudu. Enye ekedi ibuotikọ ukwọrọikọ Jesus. (Matt. 4:17) Ndikpep mbon en̄wen n̄kpọ nnyụn̄ ntie ntiense nnọ akpanikọ Obio Ubọn̄ ekedi akpan ikpehe utom ukwọrọikọ Jesus. Enye ama ekpep nnyịn ndibọn̄ akam mben̄e Obio Ubọn̄ ndinyụn̄ mbemiso nyom enye. (Matt. 6:9, 10, 33) Ndisọn̄ọ ndiana kiet ye Jehovah ye esop esie, ndinam utom ukwọrọikọ nnyịn, ye ndida san̄asan̄a n̄kpọn̄ ererimbot an̄wam nnyịn ndimụm edidianakiet Obio Ubọn̄ nnyịn n̄kama. Ebede ke mme edinam ye ikọ nnyịn, nnyịn imowụt ite ke nnyịn ida ke n̄kan̄ Obio Ubọn̄ oro.—John 18:37.
2 Ọtọn̄ọde ke 1914, Obio Ubọn̄ amakabade edi ata idem n̄kpọ ọnọ ediwak miliọn mme andidu ke idak esie. Edidianakiet oro mme andidu ke idak Obio Ubọn̄ ẹmi ẹwụtde edi ata isio isio ye ererimbot oro abaharede. Ana nnyịn inam Obio Ubọn̄ oro edi ata idem n̄kpọ ke uwem nnyịn edieke anade enye edi odudu oro anamde idiana kiet. Nso inam enye edi ata idem n̄kpọ ọnọ nnyịn?
3 Ukem nte mme ukara eken, Obio Ubọn̄ enyene mme ibet. Edi, enye enyene ukpụhọde koro ẹkụtde mme ibet esie ke Bible. Edikot Ikọ Abasi kpukpru ini anam nnyịn iti mme n̄kpọ oro oyomde iti kaban̄a se ẹyomde ẹto nnyịn nte mme andidu ke idak Obio Ubọn̄. Ndikpep mme n̄wed nnyịn ke ukpepn̄kpọ idemowo ye ndausụn̄ otode “asan̄autom emi anamde akpanikọ, onyụn̄ enyenede ọniọn̄” ẹn̄wam nnyịn ida mme ibet Abasi isịn ke edinam ke uwem ofụri usen nnyịn. (Matt. 24:45) Nte nnyịn inamde utọ ọkpọkpọ edida nsịn ke edinam oro, Obio Ubọn̄ ototịm edi ata idem n̄kpọ ọnọ nnyịn, odụride nnyịn adian ọtọkiet akan ke itie nditọete ofụri ererimbot, anamde nnyịn idi ubon mme andituak ibuot oro adianade kiet ke idak itie ukara Jesus.
4 Edidianakiet Ebe ke Ukwọrọikọ Obio Ubọn̄: Utom nnyịn edi ndikwọrọ eti mbụk Obio Ubọn̄ “[nsịm] utịt ererimbot.” (Utom 1:8) Ndikwọrọ ikọ ye “esịt kiet” adian nnyịn ọtọkiet nte nnyịn idomode ndinọ Jehovah “ubọn̄.” (Rome 15:5, 6) Ndibuana ifịk ifịk ye ekemmọ mbonutom nnyịn ke ofụri isọn̄ ọsọn̄ọ mbuọtidem nnyịn onyụn̄ ayak spirit Jehovah ada nnyịn anam utom man ọyọhọ uduak esie. ‘Ediyọhọ kpukpru ini ke utom Ọbọn̄’ anam ‘isọn̄ọ ida, ikûyak n̄kpọ esehede’ nnyịn.—1 Cor. 15:58.
5 Ke ediwak idụt Satan odomo ndibiat edidianakiet nnyịn ebe ke ndibiọn̄ọ utom ukwọrọikọ nnyịn. Enye ada kpukpru usụn̄ oro enye ekemede ndisịn ubahade nnyụn̄ nnam mfịna ẹdaha ẹda, ndidomo ndision̄o ndomoidem ye en̄wan ndi. (N̄ke 6:19; Gal. 5:19-21, 26) Enye akpama nnyịn ibuana ke mme utọk ererimbot inyụn̄ ikam ida ke n̄kan̄ kiet ke mme n̄kpọ ẹban̄ade ukaraidem ye mme edinam n̄kaowo. (Jas. 3:14-16) N̄wed Abasi eteme nnyịn ete ibiọn̄ọ odudu esie; mîdịghe ntre, enye eyemen nnyịn ata nte udia esie. (1 Pet. 5:8, 9) Inaha nnyịn iyak ata idem n̄kpọ oro idotenyịn Obio Ubọn̄ edide akpa ke esịt ye ekikere nnyịn.
6 Ndimụm edidianakiet nnyịn n̄kama oyom eti ibuot ye ọniọn̄ oro otode enyọn̄. Ke ini mme mfịna ẹdemerede, akpan akpan edieke mmọ ẹbuanade nditọete nnyịn, ana nnyịn ision̄o mbun̄wụm spirit ndinam emem odu. Mme edu ererimbot, utọ nte ntan̄idem, usua, ye ibụk, ẹtọtọ ubahade ndien ana ikan oro. (Eph. 4:1-3; Col. 3:5-10, 12-14) Oyom nnyịn iyọhọ ekikere nnyịn ye nti ekikere oro ẹbọpde-bọp. Obio Ubọn̄ oro edi ata idem n̄kpọ ke uwem nnyịn! Edi nnyịn inyene ndidu ke ukpeme ndimụm enye n̄kama ke usụn̄ oro!—Eph. 6:11, 13.
7 Ata idem n̄kpọ eke utịbe utịbe idotenyịn Obio Ubọn̄ nnyịn adian nnyịn ọtọkiet ke edu edidianakiet oro mîdinyeneke utịt tutu amama.—Ps. 133:1.