Ndiwụt Esịtekọm ke Se Nnyịn Inyenede
1 “Abasi otịm ayarade ima eke amade nnyịn, ke emi Christ akpade ke ibuot nnyịn ke adan̄aemi nnyịn isụk idide mme idiọkowo kan̄a.” (Rome 5:8) Kpukpru nnyịn ikpowụt esịtekọm inọ akakan uwa oro Jehovah Abasi ye Eyen esie ẹkewade ke ibuot nnyịn didie ntem! Ebede ke iyịp Christ oro ẹkeduọkde, ẹnọ nnyịn ifet edinyene nsinsi uwem, n̄kpọ oro owo baba kiet mîkemeke ndinọ nnyịn.
2 Didie ke nnyịn ikeme ndiwụt esịtekọm nnyịn? Ediwak owo ẹdu emi itọn̄ asatde kaban̄a ifiọk akpanikọ, emi ẹkemede ndikụt ke Edisana Ikọ Abasi kpọt. Edi uduak Jehovah nte mmọ ẹdinyene ifiọk akpanikọ. (1 Tim. 2:4) Nnyịn iwụt esịtekọm oro inyenede inọ akpanikọ ebe ke ‘ndikwọrọ eti mbụk Obio Ubọn̄ Abasi.’ (Luke 4:43) Ndibuana ke ofụri esịt ke utom emi owụt ke nnyịn imọfiọk ite ke Christ akakpa ọnọ nnyịn ye nte ke nnyịn iyom ndikpebe enye ebe ke ndinam ewụhọ esie ndinam mmọ en̄wen ẹdi mme mbet ke edinam akpanikọ.—Matt. 28:19, 20.
3 Nso idi ndusụk usụn̄ ukwọrọikọ oro ẹbederede ẹnọ nnyịn? Nte nnyịn imekeme ndisịn enyịn̄ nte mme asiakusụn̄ unọ un̄wam ke ini ke ini? Ke ẹma ẹkebat se iditakde, ndusụk owo ẹkeme nditọn̄ọ utom usiakusụn̄ ofụri ini. Ebede ke ndida nti ifet ẹmi nnam n̄kpọ, nnyịn imekeme ndinam udomo ini oro ibiatde ke ndisuan eti mbụk Obio Ubọn̄ ọkọri. Ekeme ndidi afo ke ini edem ama ekere aban̄a ndisịn enyịn̄, edi mme n̄kpọ-ata ẹma ẹdu. Eyedi mme idaha fo ẹkpụhọde. Edieke edide ntre, nte afo emekere ntotụn̄ọ ntotụn̄ọ aban̄a ndidụk utom usiakusụn̄ mîdịghe ndinam utom nte asiakusụn̄ unọ un̄wam?
4 Esịtekọm nnyịn ototịm okpon ke ini nnyịn isede se itịbede ikan nnyịn ikụk. N̄kọri ke afai, usua, ye en̄wan odu ke ofụri ererimbot. Paul nte odotde eketịn̄ aban̄a eyo nnyịn nte “ndiọkeyo.” (2 Tim. 3:1) Ke ufọt mme akama-mfụhọ idaha ẹmi, nnyịn imenyene ekese eti mbụk ndibuana ye mmọ en̄wen. Nnyịn imenyene nti magazine iba, Enyọn̄-Ukpeme ye Awake! Ọfiọn̄ emi nnyịn imekeme ndinọ idem kiet kiet mîdịghe ibọ editobo. Nnyịn n̄ko imenyene ediwak ibuotikọ ke ndiye uduot n̄kpri n̄wed. Mme n̄wed ẹmi ẹkeme ndida ata nsụkesịt nsọk mbon oro ẹkotde mmọ. Ndiwụt esịtekọm ke se nnyịn inyenede ekpenyene ndinụk nnyịn ndifọn ido ke ndibuana mmọ ye mbon en̄wen.—Heb. 13:16.
5 Ekeme ndidi ke n̄kann̄kụk oro afo odụn̄de, mme owo ẹwụt esisịt udọn̄ ke mme n̄kpọ eke spirit. Ke edide isio ye oro, mme efakutom oro ẹn̄wụmde mfri ẹdu. Ẹsikụt ekese udọn̄ ke otu mbon oro esemde usem efen. Nte afo emekeme ndikpep usem efen ke ẹsiode enyeoro afo ekemede ndisem idahaemi ẹfep ndien nte afo emekeme ndinam utom ke ikpehe ke idụt emi ẹsemde utọ usem oro ndien ata udọn̄ kaban̄a un̄wam fo odude? Esenyịn circuit mbufo ekeme ndinyene ndusụk ekikere ke afan̄ ẹmi mîdịghe afo emekeme ndiwet N̄ka.
6 Ediwak ntak ẹdu ndiwụt esịtekọm ke se nnyịn inyenede, ke akpanikọ ekese nti n̄kpọ. Nnyịn imekeme ndiwụt ekọm oro ikọmde Jehovah ke usụn̄ ọfọnde akan ebe ke ndinam mbon en̄wen ẹfiọk enyịn̄ ye mme uduak esie.—Isa. 12:4, 5.