Nte Afo Omokụt Ebiet Udọn̄ Odude?
1 Ẹtịn̄ ẹban̄a Jehovah nte Andin̄wam ye Ebiet Ubọhọ. Nnyịn imọfiọk ke imekeme ndika mbịne enye ke ini idude ke unana ndien enye eyen̄wam nnyịn. (Ps. 18:2; 46:1) Nnyịn imekeme ndikpebe edu mbọm emi ebe ke ndinyịme ndin̄wam mbon efen ke ini nnyịn ikụtde ke udọn̄ odu.
2 Nso isinụk owo esịn ukeme ndin̄wam owo efen? Ata ediwak owo ẹkụt emi nte ima ima, edinam mfọnido ndinam. Ke akpanikọ Ikọ Abasi esịn udọn̄ ọnọ emi. (Rome 15:1) Paul ama akpak nnyịn ete ‘ikûse n̄kpọ idem nnyịn ikpọn̄, edi ikam ise n̄kpọ owo en̄wen.’—Phil. 2:4.
3 Emi edi n̄kpọ oro kpukpru nnyịn ikemede ndikop idatesịt ndinam. (Utom 20:35) Paul ama osio akparawa Timothy owụt nte uwụtn̄kpọ owo emi “edikerede n̄kpọ” nditọete esie “ke akpanikọ.” (Phil. 2:20) Ọfọn nte nnyịn inyenede ediwak n̄kparawa owo oro ẹnyenede ukem edu emi ke mme esop mfịn. Edi edide nnyịn idi n̄kpri m̀mê ikpọ owo, mme n̄kpọ ẹdu oro nnyịn ikemede ndinam edieke nnyịn ikụtde ebiet udọn̄ odude.
4 Nte akanam afo emekere ke ndusụk owo ẹnyene udọn̄ oro ẹkemede ndinọ eti ntịn̄enyịn? Eyedi eyenete eren m̀mê eyenete an̄wan okodu ke ufọkibọk, ndien ibat ibat owo ẹka ẹkese enye; mîdịghe owo ikemeke ndinam n̄kpọ aba, edi owo idụhe ndika utom nnọ enye m̀mê ndin̄wam ke mme utom esịtufọk. Jesus ese mbon oro ẹnamde n̄kpọ Jehovah nte mme andibuana ke ubon kiet ẹmi ẹnen̄erede ẹkere ẹban̄a kiet eken. (Mark 3:33-35) Ke n̄ke erọn̄ ye ebot, enye ama owụt ete ke mbon oro ẹdarade mfọn ke ubọk nnasia Edidem ẹnam ntre ke ntak edin̄wam oro mmọ ẹn̄wamde nditọete Edidem.—Matt. 25:40.
5 Didie ke N̄keme Ndin̄wam? Nso ke ẹkeme ndinam man ẹnọ un̄wam ke ini ata udọn̄ odude? Nte nnyịn imekeme ndinam usio-ukot ndin̄wam ke ndusụk usụn̄? Ekeme ndidi mbonusọn̄ oro ẹyomde nsịnudọn̄ ẹdu, edi mmọ inyeneke n̄kpet n̄kpet nsan̄a ndin̄wam mmọ. N̄kparawa owo ẹmi ẹyomde un̄wam ẹkeme ndidu. Ubon oro enyenede udọn̄ obufa obufa emi enyenede uwak nditọ ekeme ndidi Ufọkmbono Obio Ubọn̄ ke ini asuanetop emi ekpepde n̄kpọ ye mmọ mîdụhe. Mmọ ẹkeme ndikop inemesịt ndinyene owo oro onyịmede ndin̄wam mmọ ke ndise mban̄a nditọ oro.
6 Nte nnyịn ikọride ke ima inọ akpanikọ ye esop Jehovah, nnyịn n̄ko imọkọri ke esịtekọm ye edikere mban̄a inọ mbon en̄wen ke esop. Paul ama esịn udọn̄ ọnọ nnyịn ndinyene in̄wan̄în̄wan̄ esịt ke afan̄ emi. (2 Cor. 6:11-13) Jesus ama ọsọn̄ọ etịn̄ ete ke nnyịn ndiwụt ima nnọ kiet eken edi akpan usụn̄ oro nnyịn iwụtde ke nnyịn inen̄ede idi mme anditiene imọ.—John 13:35.
7 Ntre ke ini ikụtde ke udọn̄ odu, ata ima oro inyenede inọ nditọete nnyịn inyụn̄ inyenede inọ esop ekpenyene ndinụk nnyịn inam usioukot inyụn̄ in̄wam ke usụn̄ ekededi oro nnyịn ikemede. (Gal. 6:9, 10) Edikere emi ikerede iban̄a mbon efen mi odụri nnyịn adian ọtọkiet ke n̄kpet n̄kpet mbọbọ ima ye edidianakiet. (1 Cor. 10:24) Ke usụn̄ emi, nnyịn inam udeme nnyịn ke ndin̄wam ẹyụhọ udọn̄ oro odude ke esop.