Nditiene Uwụtn̄kpọ Nnyịn Nte Mme Ọnọ Un̄wana
1 Jesus ama etịn̄ aban̄a idemesie ete: “Ami ndi un̄wana ererimbot.” Ke nditiene uwụtn̄kpọ esie, mme mbet Jesus n̄ko ẹkedi “un̄wana ererimbot.” (Matt. 5:14) Nte “un̄wana ererimbot,” Jesus ama etịn̄ ete ke kpukpru mme anditiene imọ ẹyenọ “un̄wana uwem.” (John 8:12) Oro anam nnyịn idi mme ọnọ un̄wana eke spirit, emi mînaha idede iyak n̄kpọ ekededi ofụk m̀mê enịme un̄wana oro.
2 Esop Jehovah ọnọ ukpep man owụt nnyịn nte ikemede ndidi mme ọnọ un̄wana oro ẹnyenede uforo. Edieke nnyịn itienede item ye ndausụn̄ oro nnyịn ibọde ketket, nnyịn iyekeme ndisịn kpukpru onụk owo ke un̄wana aban̄ade akpanikọ Obio Ubọn̄. (1 Tim. 4:6) Ndinam utom nte mme ọnọ un̄wana isịneke sụk editịn̄ mban̄a akpanikọ ke kpukpru ifet edi esịne n̄ko edimụm eti eduuwem n̄kama nte mme Christian. Owo ikenyeneke se ẹtịn̄de ẹdian edu Uwụtn̄kpọ nnyịn. Nte mme anditiene enye, ana nnyịn iwụt ite ke Ido Ukpono Christ edi usụn̄uwem nnyịn kpukpru usen. (Eph. 5:9; Titus 2:7, 8, 10) Ana nnyịn inam nti utom oro mmọ efen ẹkemede ndikụt, man onụk mmọ ndinọ Abasi ubọn̄.—Matt. 5:16.
3 Ẹma ẹben̄e Ntiense kiet ndinam se owo mîsiwakke ndinam ke ini akanamde utom ke ufọk ke ufọk. Ibuotufọk oro ye n̄wan esie ẹma ẹdọn̄ọ etieti, edi mmọ ẹma ẹnyene okụk ẹkeyomde ndisịn ke ban̄k. Mmọ ẹma ẹbụp m̀mê Ntiense oro eyenam oro. Enye ama onyịme ndien ẹma ẹnọ enye $2,000 ẹte ada ekesịn ke ban̄k! Ke ini enye ọkọnyọn̄de edi, enye ama obụp ete: “Mbufo ẹsan̄a didie ẹnyene mbuọtidem ntre ke idem mi ke edide akanam idiọn̄ọke mi?” Ibọrọ ekedi: “Nnyịn imọfiọk, kpukpru owo ẹnyụn̄ ẹfiọk, ẹte ke Mme Ntiense Jehovah ẹdi n̄kukụre mbon oro ẹkemede ndibuọt idem.” Nnyịn ikpowụt esịtekọm didie ntem nte ke nnyịn nditiene edumbet ido uwem eke Bible ketket esida utọ etop oro ọnọde Abasi ukpono do edi!
4 Andikpep kiet ke ufọkn̄wed praimari ama anam an̄wan̄a otu ukpepn̄kpọ esie ntak oro eyen ufọkn̄wed kiet edide isua itiokiet emi edide Ntiense mîkabuanake ke uwet mme mbuwed oro enyenede n̄kpọ ndinam ye nduọkodudu nsunsu ido ukpono. Andikpep oro ama ọdọhọ ke imọ imenen̄ede ikop inemesịt iban̄a nte enye enyenede uko ndidi isio ke ntak se enye onịmde ke akpanikọ. Andikpep oro ama etịn̄ ete ke edieke nnyịn inen̄erede inịm n̄kpọ ke akpanikọ ke akpana nnyịn inyene uko ndisọn̄ọ nda nnọ n̄kpọ oro. Ke okoneyo oro andikpep oro ama odụn̄ọde se enye ke idemesie onịmde ke akpanikọ ndien ekenyene ndinyịme nte ke imọ inyeneke ukem uko oro ndisọn̄ọ nda kaban̄a se imọ inịmde ke akpanikọ. Edem usen oro enye ama ọtọt ete ke imọ idinamke otu ukpepn̄kpọ imọ abuana aba ke usọrọ nduọkodudu ekededi ke ini iso, emi enye ke idemesie mîsinịmke ndusụk mmọ ke akpanikọ!
5 Ikọt Jehovah ẹnyene udọn̄ ndinam un̄wana mmọ ayama, inamke n̄kpọ m̀mê mmọ edu ke m̀mọ̀n̄. Eti eduuwem mme uyen ke ufọkn̄wed esitụk mme nsan̄a ufọkn̄wed ye mme andikpep nte ọfọnde. Ntiense ẹdide ikpọ owo oro ẹnyenede eti eduuwem ke mbọhọ ẹsinam mmọ en̄wen ẹtịn̄ eti ikọ ẹban̄a etop Obio Ubọn̄. Ikọ ntiense ido nneme ke ediwak idaha esidụri ediwak mbon esịt-akpanikọ oro ẹyomde ndikpep n̄kpọ efen efen ada. Idem nsịnifịk ye edinam akpanikọ nnyịn ke itieutom idịbi udia esinọ ikọ ntiense. Ih, inamke n̄kpọ m̀mê nnyịn idu ke m̀mọ̀n̄ mîdịghe m̀mê nso ke inam, nnyịn imekeme ndidemede udọn̄ mme owo nnọ akpanikọ.
6 Ke ndiwụk enyịn nnyịn ke anana-ndudue usụn̄uwem akwa Uwụtn̄kpọ nnyịn, nnyịn imekeme ndikaiso nnam usọ nnyịn ẹfọn ẹma nte mme mbet esie. Ndikpebe uwụtn̄kpọ esie eyenam un̄wana nnyịn “ayama ọnọ kpukpru owo.”—Matt. 5:15; 1 Pet. 2:21.