Ekebe Mbụme

◼ Didie ke nnyịn ikeme ndibọrọ mbụme ke usụn̄ oro enen̄erede enyene ufọn ke mme mbonoesop?

Nnyịn imesidori enyịn ndisọp idem ọtọkiet ke mme mbonoesop eke urua ke urua. Do nnyịn imesinyene ifet ndiyarade mbuọtidem nnyịn nnyụn̄ nsịn udọn̄ nnọ mmọ en̄wen ebe ke nnyịn ndibọrọ mbụme. (N̄ke 20:15; Heb. 10:23, 24) Nnyịn ikpenyene ndise edibọrọ mbụme nte ifetutom inyụn̄ idomo ndibuana kpukpru ini. Didie ke nnyịn ikeme ndinam emi ke usụn̄ oro enen̄erede enyene ufọn?

Ntịmidem edi akpa usio-ukot. Edibemiso n̄kot nnyụn̄ ntie n̄kere mban̄a se ẹdikpepde edi akpan n̄kpọ. Domo ndifiọk se n̄kpọ oro ẹnemede enen̄erede ọwọrọ. Okposụk ekemede ndidi ẹma ẹneneme ibuotikọ oro ke edem, yom mme akpan n̄kpọ oro ẹnemede ntatara ntatara m̀mê oro ẹfiakde ẹfori. Wụk ekikere ke ofụri ibuotikọ ukpepn̄kpọ oro. Ke ini otịmde ibọrọ mbụme ke n̄wed oro esịnede ntotụn̄ọ ukpepn̄kpọ ke n̄wed kiet ke Bible, utọ nte n̄wed Ata-Utịt Ediyarade, domo ndise nte akpan ufan̄ikọ kiet enyenede ebuana ye mme ufan̄ikọ oro ẹdude ẹkanade enye. Nditiene mme ekikere ẹmi eyedemede ukeme ukere n̄kpọ fo. Enye eyen̄wam fi nditịm nti ibọrọ nnyụn̄ nnyene idatesịt ke afo ndinyene ebuana.

Ata nti ibọrọ ẹsidi mbio mbio, ẹtịn̄ ke mmemmem usụn̄, ẹnyụn̄ ẹkọn̄ọ ke n̄wed oro ẹkpepde. Akpa owo oro ọbọrọde mbụme ekpenyene ndibọrọ mbụme oro nnennen, ọkpọn̄de mme akpan n̄kpọ eken ọnọ mme udiana ibọrọ. Fep nnyan, n̄kanade n̄kanade ibọrọ oro adade ini akaha onyụn̄ ọbiọn̄ọde mbon en̄wen nditiene mbuana. Tịn̄ ikọ ke mme ikọ idemfo, utu ke ndikot ibọrọ fo nnennen nto n̄wed. Mme udiana ibọrọ ẹkeme ndisịne mme akpan n̄kpọ oro ẹdude ke mme itien̄wed Abasi oro ẹsiakde ẹsịn. Tịm kpan̄ utọn̄ ke se mbon en̄wen ẹtịn̄de man efep ẹdifiak ntịn̄ se ededi oro ẹma ẹketetịn̄ nte mîdotke.

Ọfọn afo emenede ubọk ediwak ini edi idịghe ke kpukpru ikpehe ekikere. Nnyịn imesịn udọn̄ inọ mme uyen nditiene mbọrọ mbụme. Edieke afo mûkemeke ndisọp ntịn̄ ikọ, afo emekeme ndibem iso nnam ada ukpepn̄kpọ ọfiọk ikpehe ekikere oro afo akpamade ndibọrọ, ndien ekeme ndidi enye eyenọ fi ifet ndinam ntre.

Kpukpru nnyịn ikpenyene ndisịn ọkpọsọn̄ ukeme man inyene se ibuanade ke mme mbonoesop oro ẹsịnede ebuana otuowo. Ti ete, mme utọ mbonoesop oro ndikụt unen ọkọn̄ọ akamba akamba ke unyịme nnyịn ndibuana uforo uforo ke ndinọ ibọrọ.​—Ps. 26:12.