Sọn̄ọ Kiet Eken Idem ebe ke Ndinọ Ibọrọ ke Mme Mbono Esop
1 Ẹteme nnyịn ke Mme Hebrew 10:24 ẹte ‘idemerede kiet eken inọ ima ye nti utom.’ Emi esịne edisọn̄ọ kiet eken idem ebe ke ndinọ nti ibọrọ ke mme mbono esop. Ntak emi nnyịn ikpọnọde ibọrọ? Didie ke nnyịn ikeme ndinam emi? Mmanie ẹbọ ufọn?
2 Kere ban̄a ediwak ini oro afo ọbọde ufọn oto edikop nte mbon efen ẹnọde mmemmem, in̄wan̄în̄wan̄ ibọrọ, anamde n̄kpọ ọsọp an̄wan̄a fi onyụn̄ ọsọn̄ọde fi idem ke n̄kan̄ eke spirit. Afo emenyene ifet ndinam ukem oro nnọ mmọ. Ke ini afo etienede abuana, afo owụt udọn̄ fo ke ‘ndinọ ndusụk enọ eke spirit’ man esịn udọn̄ ọnọ kpukpru mbon oro ẹdụkde.—Rome 1:11, 12.
3 Nte Ekemede Ndinọ Nti Ibọrọ: Kûnọ anyan ibọrọ, otụkde kpukpru ekikere ke ikpehe ekikere. Nnyan ibọrọ ẹsiwak nditre ndiwụt akpan ibọrọ ẹnyụn̄ ẹkeme ndikpan mbon efen ndibuana. Akpa ibọrọ ke ikpehe ekikere ekpenyene ndidi ibio ibio, nnennen ibọrọ ke mbụme oro ẹmịn̄de. Ndien mbon oro ẹnọde mme udiana ibọrọ ẹkeme ndiwụt nte ẹkpedade se ẹkpepde ẹsịn ke edinam mîdịghe ẹwụt nte mme itien̄wed Abasi ẹnyenede ebuana. Se Ñwed-item Ufök-ñwed, page 90-92.
4 Edieke afo etịmerede esịt aban̄a nte edinọde ibọrọ, bem iso tịm ibio ibio ibọrọ, nyụn̄ dọhọ ada ukpepn̄kpọ okot fi ọnọ ibọrọ ke ikpehe ekikere oro. Ke ama akanam emi ke mme mbono esop ifan̄, eyedi mmemmem n̄kpọ nditiene mbuana. Ti ete ke Moses ye Jeremiah ẹma ẹwụt unana mbuọtidem ke ukeme mmọ nditịn̄ ikọ ke otuowo. (Ex. 4:10; Jer. 1:6, ik. id., NW) Edi Jehovah ama an̄wam mmọ nditịn̄ ikọ ke ibuot esie, enye oyonyụn̄ an̄wam fi n̄ko.
5 Mmanie Ẹdibọ Ufọn Ito Mme Ibọrọ Fo? Afo ke idemfo ọyọbọ ufọn koro ibọrọ fo anam akpanikọ etịm odụk ekikere ye esịt fo, anamde edi mmemmem n̄kpọ ọnọ fi nditi ntọt oro ke ukperedem. N̄ko, mbon efen ẹbọ ufọn ke ndikop mme ikọ fo oro ẹbọpde-bọp. Nnyịn imesikop nsịnudọn̄ ke ini kpukpru owo, edide mbon ẹmi ẹnyenede mbufiọk, n̄kparawa, mbon oro ẹkopde bụt, m̀mê mbufa owo, ẹsịnde ukeme ndiyarade mbuọtidem mmọ ke mme mbono esop.
6 Nnyịn imetịm ifiọk ite ke ‘idụhe se ifọnde nte ikọ ke ekem ini’ ke ini ẹdade mmọ ndisọn̄ọ kiet eken idem ke mme mbono esop!—N̄ke 15:23.