Da Ini Fo Nam N̄kpọ Nte Ọfọnde
1 Jehovah esinyene ini ke ekikere. Enye oyom nnyịn ikere iban̄a ini n̄ko. Ebede ke esop esie enye an̄wam nnyịn ndinyene ini ke ekikere. Ẹkpak nnyịn ẹte ‘iyọhọ kpukpru ini ke utom Ọbọn̄.’ (1 Cor. 15:58) Ke usụn̄ emi, nnyịn imekeme nditịm nnyene uforo ke utom Jehovah.
2 Nnyịn owo kiet kiet inyene ukem udomo ini kpukpru urua—hour 168. Nnyịn ida ini nnyịn inam n̄kpọ ọfọn adan̄a didie? Nte nnyịn imowụt ke nnyịn imenen̄ede ifiọk ini oro idude ke idaha usen̄kpọ Jehovah? Nte mme edinam oro mîdịghe akpan n̄kpọ ẹsitịmede nnyịn?
3 Edi akpan n̄kpọ nte nnyịn inyene eti ndutịm. Ediwak owo ẹsidomo ndiwet udịm udịm n̄kpọ oro ẹdide akpan n̄kpọ ẹkan. Ẹsiwet n̄kpọ kiet kiet ke n̄wed oro etiene nte enye edide akpan n̄kpọ. Didie ke ẹkeme ndibiere oro? Bible ọdọhọ ke owo ekpenyene ‘ndikụt eti n̄kpọ ke kpukpru ọkpọsọn̄ utom esie.’ (Eccl. 3:13) Ndusụk utom ẹsision̄o nti utịp ẹkan en̄wen. Kere ban̄a mme utịp oro kiet kiet edidade edi. Nte edikụre utom oro eyesion̄o akpan utịp edi? Nte afo ‘eyekụt eti n̄kpọ’ ke ọkpọsọn̄ utom fo? Edieke mûdukwe, ekeme ndidi enye idịghe utom enen̄erede edi akpan n̄kpọ.
4 Ke Utom Ukwọrọikọ Nnyịn: Nnyịn imesidara ke ini mbon efen ẹdide mbono an̄wautom ke eti ini, ẹtịmde ẹkpan̄ utọn̄ ẹnọ item, ẹnyụn̄ ẹsọpde ẹwọn̄ọ ẹka efakutom. Nnyịn ikpakam isịn idem ke ndikwọrọ ikọ utu ke ndibebet. Paul nte an̄wan̄ade ekenen̄ede ekere aban̄a ufọn eti ndutịm ke ini enye ekewetde ete: “Ẹnam kpukpru n̄kpọ ke nde ye ke ido nte eyede.”—1 Cor. 14:40.
5 “Idem stork . . . ọmọfiọk edikem ini esie” ndiwọrọ idụn̄, ndien Bible ọdọhọ ke iyọn̄ ‘ẹnịm udia mmọ ke ndaeyo’ man ẹtịm idem ẹnọ ini ukwọ. (Jer. 8:7; N̄ke 6:6-8) Do ke se inamde owo ada ini anam n̄kpọ nte ọfọnde esịne. Ana nnyịn n̄ko ‘ifiọk edikem ini nnyịn.’ Ye unana editie nsọn̄ido nsọn̄ido n̄kaha, akpana nnyịn inyene ini ke ekikere. Iyomke nnyịn ifiọk se nnyịn inyenede ndinam kpọt edi n̄ko ini oyomde inam enye. Akpana nnyịn inyene edu edibemiso n̄kere n̄kpọ, inamde ufan̄ inọ se ikemede ndibiat owo ini. Ndien akpana nnyịn n̄ko inyịme ndisịbe ndusụk edinam man inam ini odu ọnọ se idide akpan n̄kpọ ikan, utọ nte editịm idem nnọ mme mbonoesop, utom ukwọrọikọ, ye mme edinam ukara Abasi eken.
6 Nnyịn iyom nditie nte Ete nnyịn eke heaven, Jehovah Abasi, oro ekpepde nnyịn ete ke “ẹmenịm ini ẹnọ kpukpru n̄kpọ.” (Eccl. 3:1) Ke ndida ini nnyịn nnam n̄kpọ nte ọfọnde, nnyịn imekeme ‘ndinam utom nnyịn ọyọhọ ọyọhọ mma.’—2 Tim. 4:5.