“Ẹkpeme”
1 Ke ini Jesus eketịn̄de mme ikọ oro ẹwetde ke Matthew 26:38-41, enye ke akasan̄a ekpere ata ọkpọsọn̄ ini ke uwem esie nte owo. Enye ekedi ata akpan ini ke ofụri mbụk owo. Edinyan̄a ofụri ubonowo okodu ke itiendịk. Ama oyom mme mbet Jesus “ẹkpeme.”
2 Mfịn nnyịn imenen̄ede Ikpere edidi Jesus kaban̄a adiana-iba utom eke andinyan̄a ye ebiereikpe. Nte mme Christian ẹmi ẹdude ke ukpeme ẹmi efiọkde nte ini edide usọp usọp, nnyịn iwan̄ke-wan̄ ubọk itie ibet edinyan̄a. Nnyịn imọfiọk ite ke ana nnyịn idu ke mben̄eidem kpukpru ini. Oyom nnyịn ikaiso “ikpa utom ye en̄wan” ke utom oro nnyịn inamde inọ Jehovah. (1 Tim. 4:10) Nso kaban̄a nnyịn owo kiet kiet? Nte nnyịn ke idu ke ukpeme?
3 Ndidụn̄ọde Idem Nnyịn: Jesus ama odụri nnyịn utọn̄ n̄ko ete: “Ẹkpeme idem mbufo.” (Luke 21:34,35) Ana nnyịn ikpeme idem nnyịn, ikụt ite ke nnyịn ‘inyeneke ubiomikpe, inyụn̄ inyeneke ndudue ke ufọt n̄kwakwan̄a ye idiọk emana.’ (Phil. 2:15) Nte nnyịn imodu uwem ke usen kiet kiet nte mme Christian, ikpebede Jesus inyụn̄ isan̄ade nte ekemde ye mme edumbet oro ẹwụtde ke Ikọ Abasi? Ana nnyịn ifep eduuwem oro mîdịghe eke Christian emi edide eke ererimbot emi “[esịnede] ke ubọk andidiọk.” (1 John 5:19; Rome 13:11-14) Ke ini nnyịn idụn̄ọrede idem nnyịn ke un̄wana N̄wed Abasi, nte nnyịn imenen̄ede idu ke ukpeme nte Jesus eketemede?
4 Ana mbiowo ẹdu ke edidemede man ẹtịn̄ enyịn ẹnam utom mmọ ke esop, ẹfiọkde ẹte ke mmimọ iyenam ibat ke nte ikpemede otuerọn̄. (Heb. 13:17) Mme ibuotufọk ẹnyene akpan mbiomo ndinọ mbonufọk mmọ ndausụn̄ ke mme usụn̄ Jehovah. (Gen. 18:19; Josh. 24:15; men 1 Timothy 3:4, 5 domo.) N̄ko, edi akpan n̄kpọ didie ntem nte kpukpru nnyịn inam ewụhọ N̄wed Abasi oro nte ima kiet eken! Enye edi idiọn̄ọ ata Ido Ukpono Christ—John 13:35.
5 Du ke Edidemede Ndinọ Mbon En̄wen Ntọt: Ndidu ke ukpeme esịne n̄kpọ akan ndikpeme idem nnyịn. Ẹnọ nnyịn utom edinam mbon en̄wen ẹdi mme mbet. (Matt. 28:19, 20) Ima mbọhọidụn̄ ekpenyene ndinụk nnyịn ndinọ mbon en̄wen ntọt man otodo mmọ ẹkpebọhọ nsobo oro asakde iso ese ererimbot emi. Emi edi mbiomo emi odorode kpukpru Christian ke afara. Enye edi akpan ikpehe utuakibuot nnyịn. (Rome 10:9,10; 1 Cor. 9:16) Nnyịn imesiwak ndisobo unana udọn̄ m̀mê ataata ubiọn̄ọ ke utom unyan̄a uwem emi. Edi mbiomo nnyịn ndikaiso nnam, idem ekpededi ata ediwak owo inọhọ utọn̄ ke ntọt nnyịn. (Ezek. 33:8, 9) Ata ima oro inyenede inọ Abasi ye mbọhọidụn̄ eyenụk nnyịn ndiyọ.
6 Idahaemi idịghe ini ndiyụhọ udọn̄ idem nnyịn. Nnyịn ikpenyeneke ndiyak editịmede esịt eke uwem ofụri usen ọwọn̄ọde ntịn̄enyịn nnyịn m̀mê ndisịn idem ke unọ idem inemesịt eke editịm n̄kpọ emi tutu mmọ ẹkabade ẹtie nte n̄kpọ etabi. (Luke 21:34,35) Edieke edide akanam oyom ẹnam n̄kpọ ye usọp usọp ini ke ekikere, edi idahaemi. Ini ke asan̄a ekpere usọp usọp ọnọ Jesus Christ ndibiere ikpe nnọ idiọk editịm n̄kpọ emi. Edi sụk mbon oro ẹtabade idap, ẹdude ke edidemede, ẹnyụn̄ ẹkpemede ẹdibọhọ. Nnyịn idikop idatesịt didie ntem edieke nnyịn inamde item Jesus inyụn̄ ‘ikemede ndibọhọ kpukpru n̄kpọ oro ẹdiwọrọde’!—Luke 21:36.