Nam Mfiakn̄ka ke Kpukpru Ndiye Uduot N̄kpri N̄wed Oro Okonịmde
1 Apostle Paul ama otoro mbon Philippi koro mmọ ‘ẹketọn̄ọde ntak ẹdemede ekikere mmọ ẹban̄a enye.’ (Phil. 4:10) Edieke nnyịn idade uwụtn̄kpọ mmọ nte udomo oro anade itiene kaban̄a an̄wautom, nnyịn ‘iyedemede ekikere nnyịn’ iban̄a mbon oro nnyịn inọde ikọ ntiense, esịt eyenyụn̄ edemede nnyịn ndinam mme mfiakn̄ka.
2 Edieke afo okonịmde ediye uduot ekpri n̄wed oro “Ukara Emi Edidade Paradise Edi,” afo emekeme nditịn̄ n̄kpọ ebietde emi:
◼ “N̄kosụk n̄kere mban̄a nneme oro nnyịn ikenyenede usen oko, ndien itien̄wed iba ẹma ẹdụk mi ekikere oro ndimade ndibuana ye afo. Afo emekeme nditi ke nnyịn ima ineme iban̄a Abasi ndibọ isọn̄ emi n̄kara. Ke Bible, Jehovah Abasi ọn̄wọn̄ọ ete ke emi eyeda itie. [Kot Daniel 2:44.] Nte afo omonịm ke oro eyenen̄ede otịbe? [Bet ibọrọ.] Kop se Abasi etịn̄de aban̄a ukeme esie ndisu name un̄wọn̄ọ esie. [Kot Isaiah 55:11.] Oro ekpenyene ndisịn udọn̄ nnọ nnyịn ndibuọt idem ke Obio Ubọn̄ Abasi. Edi ini ewe ke Abasi edisu mme un̄wọn̄ọ esie?” Nam an̄wan̄a nte ke imọ iyebọrọ mbụme oro ke ima ifiak iwaha.
3 Afo emekeme ndida usụn̄ edisobo ye owo enyeemi ke ini afiakde aka ebịne owo oro ọkọbọde ediye uduot ekpri n̄wed oro “Ke Ini Owo Oro Afo Amade Akpade”:
◼ “Mmesịn san̄asan̄a ukeme ndifiak ndi, ke ntak nneme nnyịn oro akaban̄ade editaba owo ke n̄kpa.” Wụt ndise odude ke page 30 ke ini ọdọhọde: “Nte emeti idaha inemesịt emi mme owo ẹsetde ẹnyụn̄ ẹfiakde ẹdiana kiet ye mbonima mmọ? Mma mbụp fi mban̄a ebiet oro n̄kpọ emi edidade itie, ke heaven m̀mê ke isọn̄. Iso-ọfọn afo ama okụt ibọrọ emi Bible ọnọde ke page 26 eke ediye uduot ekpri n̄wed emi.” Neme mme akpan n̄kpọ ke ọyọhọ ikpehe ekikere ita osịm ition, nyụn̄ kot John 5:21, 28, 29. Nte ini ayakde, kot itien̄wed ekededi oro osụhọde emi odude ke page oro.
4 Nte ama ọtọn̄ọ ukpepn̄kpọ ke “Sese! Mmanam Kpukpru N̄kpọ Ẹdi Mbufa”? Ke afiakde aka, afo emekeme ndinam ntem:
◼ Fiak kụbọde ka page 30, nyụn̄ wụt mbụme emi: “Mme usụn̄ ewe ke Bible edi n̄wọrọnda?” Kụbọde ka page 3 ye 4, nyụn̄ neme ikpehe ekikere 1-4 ọkọrọ ye ndise ẹdude ke ikpaedem ediye uduot ekpri n̄wed emi. Kot itien̄wed kiet m̀mê iba oro ẹsiakde ẹsịn ke ikọ idakisọn̄ ke ikpehe ekikere 4. Nam an̄wan̄a nte ke Bible edi n̄kukụre n̄wed oro ọnọde utọ utịbe utịbe idot enyịn oro. Nam ndutịm nọ edifiak n̄waha fo efen. Ke ama akawaha utịm ikata, edieke etiede nte ke ukpepn̄kpọ oro eyekaiso, afo emekeme nditọn̄ọ nditọt obufa ukpepn̄kpọ!
5 Afo emekeme nditọn̄ọ nneme ke “Enyịn̄ Abasi Oro Edibịghide ke Nsinsi” ntem:
◼ “Isan̄ oko, mma n̄wụt fi enyịn̄ Abasi ke Bible. Ndifiọk nnyụn̄ n̄kot enyịn̄ oro Jehovah edi akpan ubak utuakibuot nnyịn.” Kụbọde ka page 31, dụn̄ọde mme akpan n̄kpọ ke mme akpatre ikpehe ekikere inan̄, nyụn̄ kot John 17:3 ye Micah 4:5. Nam an̄wan̄a nte ke nnyịn imesinịm ukpepn̄kpọ Bible oro ekemede ndiwụt nte ẹdinamde enyịn̄ Abasi asana ke nnennen usụn̄ ye nte nnyịn ikemede ndidara mme edidiọn̄ eke paradise isọn̄.
6 Ntre, fiak kere ban̄a mbon oro afo okosobode. Kaiso ndifiak n̄ka, nyụn̄ tịm n̄kpọ oro edinyenede ufọn ndibuana ye mmọ. Afo emekeme ndidi kiet emi “osion̄ode mfri ke akpanikọ” ke ndinam mbufa mbet.—Matt. 13:23.