Di Andin̄wam Ẹnam N̄kọri

¹ Sia nnyịn idude uwem ke “ndiọkeyo,” kpukpru nnyịn imoyom nsịnudọn̄. (2 Tim. 3:1) Ke otịmde ọfiọk udọn̄ emi idem ke eyo esie, Paul ama enyene udọn̄ ndida edisobo ye nditọete esie nte ifet ‘editiene n̄kop ndọn̄esịt.’ Enye ama akpak nditọete esie ete ‘ẹbịne ido eke ẹnamde kiet eken ọkọri.’ (Rome 1:11,12; 14:19) Mme ukeme ẹmi ẹma ẹkụt unen ke ‘ndisọn̄ọ mbet esịt: ẹkpe ye mmọ ẹte ẹsọk ẹyịre ke mbuọtidem.’ (Utom 14:21b, 22) Nnyịn imenen̄ede iyom utọ nsịnudọn̄ oro mfịn.

² Nnyịn imekeme ndinam mmọ en̄wen ẹkọri ebe ke se nnyịn itịn̄de. Ke ini itịn̄de ikọ nte odotde, mme ikọ nnyịn ẹkeme nditie nte “apple o-gold ke usan e-silver.” (N̄ke 25:11) Ke nditiene mbuana ke mme mbonoesop, nnyịn “inọ kiet eken item.” (Heb. 10:25) Nnyịn imekeme ndida edeme nnyịn nnam n̄kpọ ke eti usụn̄ ke ini nnyịn ibuanade mme ifiọkutom, itorode owo, m̀mê inemede mme n̄kpọ eke spirit. Utọ edida edeme nnam n̄kpọ ke eti usụn̄ emi edi ‘se in̄wamde owo ndikọri ke mfọn, ẹdade ufọn ẹnọ mmọ eke ẹkopde.’​—Eph. 4:29.

³ Tịn̄ Ban̄a Mme N̄kpọ Oro Ẹnamde-Nam Owo Ọkọri: Ke N̄wed Mbon Philippi 4:8, Paul ama ọnọ ndausụn̄ oro ọnọde un̄wam kaban̄a utịn̄ikọ nnyịn. Enye ọkọdọhọ ke nnyịn ikpenyene ndikere n̄kpọ ekededi oro ẹdide akpanikọ, ẹnyenede ukpono, ẹnende, ẹdide edisana, odotde ete ẹma, ẹwọrọde eti etop, eti ido odude, ẹnyụn̄ ẹdotde itoro. Nnyịn imekeme ndinịm ke akpanikọ kpukpru ini nte ke se nnyịn itịn̄de edidi akpanikọ onyụn̄ ada ufọn ọsọk mmọ efen edieke enye ọkọn̄ọde ke Ikọ Abasi. (John 17:17) Uyakidem nnyịn nnọ nte Christian, se nnyịn ikpepde ke mme mbonoesop, usụn̄ oro nnyịn iyọhọde utom ukwọrọikọ nnyịn, ye mme utọ n̄kpọ ntre ẹdi mme n̄kpọ oro ẹnyenede ukpono. Mme nneme oro ẹbọpde-bọp kaban̄a mme idaha ye mme edumbet Ikọ Abasi iditreke ndin̄wam nnyịn ikabade idi ‘ọniọn̄ ibọ edinyan̄a.’ (2 Tim. 3:15) Nnyịn imekeme nditịn̄ n̄kpọ n̄wụt esịtekọm nnyịn kaban̄a edisana ido oro mbon oro ẹdude ke edisana esop Jehovah ẹnyenede. Nnyịn imekeme nditoro nti edu mfọnido oro nditọete nnyịn ẹwụtde. (John 13:34, 35) Mme n̄kpọ oro ẹtorode esịne nti edu Christian edide mbuọtidem, idatesịt, emem, ye anyanime oro nnyịn ikụtde ke idem nditọete nnyịn. Nneme ẹban̄ade mme utọ n̄kpọ oro eti ido odude ẹnyụn̄ ẹdotde itoro ẹfọn ke ndinam mmọ en̄wen ‘ẹkọri.’​—Rome 15:2.

⁴ Kpukpru usen, nnyịn isak iso ise mme akama-mmemidem editịmede esịt eke ererimbot emi. Edemede ukpọn̄ didie ntem ndikpọnọde mme n̄kpọ ẹmi nnịm n̄kan̄ kiet nnyụn̄ nnyene ima ima ebuana ye nditọete nnyịn! Ọsọn̄urua ini oro nnyịn ibuanade ọtọkiet edi n̄kpọ uto oro anade ẹma. Edieke nnyịn kpukpru mi isinọde nsịnudọn̄ inyụn̄ inamde owo ọkọri, mmọ en̄wen ẹyetịn̄ ẹban̄a nnyịn ke esịt akpanikọ ẹte: “Mmọ [ẹdemerede] mi uwem.”​—1 Cor. 16:18.