Mme Mbono An̄wautom

Ini ekededi oro ẹnịmde mbono an̄wautom ke Ufọkmbono Obio Ubọn̄ ye ediwak otu ukpepn̄kpọ n̄wedesop ẹdude, utọ nte ndondo oro mbonoesop asuanade ke Sunday, do ebiowo kiet ekpenyene ndinịm mbono emi nnọ kpukpru owo. Otu ukpepn̄kpọ n̄wedesop kiet kiet ikpenyeneke ndinịm isio isio mbono an̄wautom ke ufọkmbono oro ke ukem ini. Edi mbemiso mbono emi ọtọn̄ọde, otu ukpepn̄kpọ n̄wedesop kiet kiet ekpenyene nditie ke ikpehe oro ẹkemekde ẹnịm ke ufọkmbono oro man edi mmemmem n̄kpọ ndinam ndutịm nnọ mme nsan̄a. Ke ẹma ẹkenọ ntọt ẹma mbemiso ẹnyụn̄ ẹbọn̄de akam, nsio nsio ada ukpepn̄kpọ n̄wedesop ẹkpenyene ndikụre utom mmọ ke ndinọ efakutom ye edidian mme asuanetop man ẹnam utom ye kiet eken. Ke kpukpru owo ẹma ẹkenam emi, do eyenete eren kiet eyebọn̄ akam ediberi mbemiso kpukpru owo ẹwọrọde ẹka an̄wautom.

Mbọk ẹfiọk ẹte ke ndutịm ekededi oro ẹnamde ẹban̄a an̄wautom, esịnede efakutom oro ẹdinamde utom ye m̀mê anie edisan̄a ye anie, ẹkpenyene ndikụre ẹmi ke esịt Ufọkmbono Obio Ubọn̄ m̀mê ke ufọk m̀mê ebiet efen oro ẹnịmde mbono emi. Sia emi edide otu kiet kpọt, eyenete eren kiet eyebọn̄ akam ke ibuot mmọ mbemiso mmọ ẹwọrọde ẹka an̄wautom. Owo ikpenyeneke ndidian owo m̀mê ndideme efakutom ke an̄wa Ufọkmbono Obio Ubọn̄ m̀mê ke an̄wa ebiet ekededi oro ẹnịmde mbono an̄wautom.