Mme Ete ye Eka Oro Ẹkopde Idatesịt!
1 Edieke afo edide uyen emi odụn̄de ke ufọk Christian, odu san̄asan̄a usụn̄ oro afo ekemede ndinam ete ye eka fo ẹnem esịt. Edieke afo ebịnede edinen usụn̄uwem, “esịt eyenem usọ ye uka.” (N̄ke 23:22-25) Nte ido edide ete ye eka fo ẹyom se ifọnde ikan ẹnọ fi. Idụhe se idinemde mmọ esịt ikan ndikụt nte afo anamde akpanikọ edi okwo onyụn̄ ayakde uwem fo ọnọ Jehovah.
2 Afo emekeme ndidat esịt ndinyene ete ye eka oro ẹdude ke akpanikọ. Ọtọn̄ọde ke ini emana fo, mmọ ẹnọ fi udia, ọfọn̄, ye ufọkidụn̄ ẹnyụn̄ ẹse ẹban̄a fi ke mme ini udọn̄ọ. Ke akam edide akpan n̄kpọ akan, mmọ ẹdomo ndikpep fi mban̄a Jehovah ye ndinen usụn̄ esie; emi edi ukpep oro ekemede ndinọ fi nsinsi uwem. (Eph. 6:1-4) Didie ke afo ekeme ndiwụt esịtekọm fo?
3 Nam Akpanikọ Edi Okwo: Ete ye eka fo ẹdomo ndikpep fi ada akpanikọ ke akpan n̄kpọ, anam n̄kọri eke spirit, onyụn̄ ọsọn̄ọ odu ke esop Jehovah. Afo emekeme ndiwụt esịtekọm ebe ke ndinyene udọn̄ ke ukpepn̄kpọ ubon ye unana edidi se ẹkpakde-kpak. Wụt udọn̄ ndidụk mme mbonoesop, anamde ntịmidem ke idemfo man ubon okposịm do ke eti ini. Tie ye ete ye eka fo ke mme mbonoesop, nyụn̄ nọ ọyọhọ n̄kpan̄utọn̄ ebe ke ndise n̄wed oro ẹkpepde. Nyanade bịne ndibuana ke mme mbonoesop ebe ke ndibọrọ mbụme. Wụt idem nte eyen ufọkn̄wed oro onyịmede ndinam n̄kpọ ke Ufọkn̄wed Utom Ukara Abasi, ọbọde se ẹnọde fi anam onyụn̄ anamde ofụri se ekekeme man anam mmọ. Nọ idem unyịme unyịme ndin̄wam ke ndise mban̄a utom ke Ufọkmbono Obio Ubọn̄, ke ebiet oro ẹkemede ndiyom un̄wam fo. Ndisịn idem ke mme utọ utom oro ekeme ndinam esịt fo owụhọ ke mme n̄kpọ oro ẹfọnde ye afo ke n̄kan̄ eke spirit.
4 Nịm Mme Utịtmbuba Oro Ẹnamde Owo Ọkọri: Nyanade bịne ndinyene ọyọhọ ebuana ke an̄wautom, owụtde udọn̄ ndidot nte asuanetop. San̄a ikpat kiet ye edikot Bible eke urua ke urua mîdịghe, ke akam ọfọnde akan, kot ofụri Bible kụre ke idemfo. Biere ke esịt fo ndisịm mme n̄kpọ oro ẹyomde kaban̄a uyakidem nnọ ye baptism. Ete ye eka fo ẹkeme ndin̄wam fi nditịm ukpepn̄kpọ fo ke ufọkn̄wed ye ntịn̄enyịn, ye ekikere edibọ ukpep oro editịmde fi idem ọnọ edinyene ọyọhọ ebuana ke utom Jehovah. Wụk ntịn̄enyịn ke ndinyene etop oro edinamde mmọ en̄wen ẹtoro fi ẹnọ mme san̄asan̄a ifetutom utọ nte usiakusụn̄ m̀mê utom Bethel. (Utom 16:1, 2) Ndisịm mme utịtmbuba fo ekeme ndin̄wam fi ‘odomo ọfiọk se ifọnde ikan, kpan̄ afo ọyọhọ ye mbun̄wụm eti ido.’—Phil. 1:10, 11.
5 Ini uyen edi ini ndikpep n̄kpọ, ndikọ ifiọk, ndinyụn̄ n̄kọri usọ ke ndinam n̄kpọ ye mbon efen. Enye edi ini emi afo ekemede ndidara uwem ye unana kpukpru mfịghe ye mbiomo ẹmi ẹsisan̄ade ye edikọri ndụk akwa owo. Solomon ọkọdọhọ ete: “O akparawa, dara ke uyen fo; yak esịt fo onyụn̄ enem fi ke usen emi afo edide akparawa.” (Eccl. 11:9) Edieke afo owụkde esịt fo ke ndinam n̄kpọ Jehovah ke ini uyen fo, afo eyebọ mme edidiọn̄ oro ẹdibịghide ke nsinsi.—1 Chron. 28:9.
6 Edieke afo ‘ebịnede edinen ido’ utu ke “mme idiọkitọn̄ ini uyen,” afo eyenam ete ye eka fo ẹbọhọ editịmede esịt ye iduọesịt. (2 Tim. 2:22) Afo eyenam esịt fo enyene ntak ndidara. (N̄ke 12:25) Ke akande kpukpru, afo eyeda idatesịt ọsọk Andibot fi, Jehovah Abasi.—N̄ke 27:11.