Mbono District Ọnọ Aduai-owo-idem Ikot!—Ẹtoro Jehovah Idara Idara Kpukpru Usen!
1 “Edieke obukpon̄ osiorode uyo eke owo mîdiọn̄ọke se ọwọrọde, anie editịm idem eben̄e ekọn̄?” ntre ke apostle Paul okobụp. (1 Cor. 14:8) Nte ikot oro ọkọwọrọde ke Mbono District “Idara Idara Mme Anditoro” ama ọwọrọ uyo ọsọn̄ onyụn̄ an̄wan̄a? Ih, ke akpan. ‘Ẹtoro Jehovah idara idara ye ke usen ke usen’ ekedi n̄wọrọnda etop! Nte ikot emi oyomde owo anam n̄kpọ mi ama edemede fi esịt? Ndutịm mbono oro ọkọyọhọ ye mme okopodudu ntak kaban̄a nnyịn nditoro Jehovah, nsinsi Edidem, kpukpru ini.—Ps. 35:27, 28.
2 Heaven emi enyenede ndyọ ke ẹbụk ubọn̄ Jehovah ‘ke usen ke usen.’ (Ps. 19:1-3) Edieke mme anana-uyo edibotn̄kpọ ẹmi mînyeneke uwem ẹtorode Jehovah kpukpru ini, nte nnyịn mme enyene-ọniọn̄ edibotn̄kpọ ikpemenekede uyo nditoro enye kpukpru ini kaban̄a mme edu ye edinam esie ẹmi mînyeneke mbiet? Anie owo okpotịm odot ndibọ idara idara itoro nnyịn akan akwa Andibot nnyịn?—Ps. 145:3, 7.
3 Kpukpru Usen: Andiwet psalm eke odudu spirit ekewet ete: “Ẹtan̄a edinyan̄a esie kpukpru usen. Koro Jehovah omokpon onyụn̄ odot nte ẹkpetorode enye eti-eti.” (Ps. 96:2, 4) Nte emi abuana mme asiakusụn̄ kpọt? Baba-o! Nte emi ọwọrọ ke kpukpru nnyịn ikpenyene nditịn̄ nnọ mmọ en̄wen mban̄a Jehovah ke ini ekededi ye ke ebiet ekededi oro ikemede, idem ke mme usen oro nnyịn mîbuanake ke utom ukwọrọikọ eke ufọk ke ufọk? Ih! Ediyom oro oyomde ẹtoro Jehovah ke usen ke usen ẹnyụn̄ ẹtịn̄ ẹnọ mmọ en̄wen ẹban̄a usụn̄ edinyan̄a esie edi usọp usọp. Mme owo ẹnyene ndifiọk nte ke Jehovah edi Nsinsi Edidem ye nte ke Enye ọmọnọ Eyen Esie, Jesus Christ, oro ẹnọde ubọn̄ itie edikara ererimbot. Ima oro inyenede inọ Jehovah inyụn̄ inyenede inọ mme owo eyenam nnyịn ika iso nditịn̄ mban̄a etop emi nnyụn̄ ntịn̄ mban̄a mme ndutịm esie kaban̄a edinyan̄a ke ebiet ekededi oro ikụtde mme owo.—Ps. 71:15.
4 Kpukpru usen utom ukwọrọikọ esie eke isọn̄, Jesus Christ ama onịm ata ediye uwụtn̄kpọ nte in̄wan̄în̄wan̄ anditoro Jehovah. Enye ọkọdọhọ ete: “Mmọkọm Fi, O Ete, Ọbọn̄ enyọn̄ ye isọn̄.” (Matt. 11:25) Nte ekemde ye ikọ esie, ebiet ekededi oro Jesus okodude, enye ama esitoro Jehovah an̄wan̄wa. Ndien ebiet ekededi emi otuowo ẹbohode—edide ke synagogue, ke temple ke Jerusalem, ke enyọn̄ obot, m̀mê ke mben inyan̄—enye ama otoro Jehovah. Edieke nnyịn itienede nde-ikpat Jesus ketket ebe ke ndika iso ke utom edimenede Jehovah ke enyọn̄ an̄wan̄wa kpukpru usen ye ke usụn̄ enyenede iwụk, nnyịn iyenyene utịp oro ẹkamade idara ye inemesịt.
5 Ndiyere Ikot: Nte afo eyeyere ikot nditoro Jehovah an̄wan̄wa kpukpru usen? Ti ete, isua emana idịghe ubiọn̄ọ. Psalm 148:12 ọnọ n̄kparawa, nditọiban, n̄kani iren, ye nditọwọn̄ ikot nditoro Jehovah. N̄kparawa owo, nte mbufo ẹyetoro Jehovah ke otu nsan̄a ufọkn̄wed ye mme andikpep ke isua ufọkn̄wed emi? Ikpọ owo, nte mbon oro ẹnamde utom ọtọkiet ke itieutom ẹsikop ẹban̄a Jehovah ye mme uduak esie, ke ini idaha oro odotde odude ndineme nneme ọtọkiet? Kpukpru nnyịn ikpenyene ndinam edineme mban̄a Jehovah enen̄ede edi ubak uwem nnyịn ukem nte edikot ibifịk ye edidia udia edide. Idem edieke mbon unana udọn̄ ẹtrede ndinọ n̄kpan̄utọn̄ ke se nnyịn itịn̄de, odu Owo emi ọnọde, ndien enye eyenọ nnyịn utịp.—Mal. 3:16.
6 Nte utịt editịm n̄kpọ emi asan̄ade ekpere, ikot oro ọwọrọ okosịm utịt isọn̄ ete: “Mbufo ẹtoro Jehovah.” (Ps. 106:1) N̄kpo itoro nnyịn akpakam ọsọn̄ uyo akan nte usen kiet kiet ebede man otodo kpukpru owo ẹfiọk ẹte ke Enyeemi enyịn̄ esie edide Jehovah edi Ata Edikon̄ ke ofụri ererimbot.—Ps. 83:18.